Yuyayninchista kallpachasun allin reparaq kananchispaq

GIMNASTAKUNAQ ejercicio ruwasqankuta rikuspaqa kusikunchismi. Chhayna sumaq ejerciciota ruwanankupaqqa, ¡maytachá kallpachakurqanku! Biblian ñoqanchistapas niwanchis gimnastakuna hina yuyayninchista kallpachananchista.

Hebreo cristianokunaman carta qelqasqanpin Pablo nirqan: “Khamuna mikhuymi ichaqa wiñasqakunapaqña, yuyayninkupi allinkaqta mana allinkaqta reparayta yachaqkunapaqña”, nispa (Heb. 5:14). ¿Imaraykun Pablo hebreo cristianokunata nirqan yuyayninkuta kallpachanankupaq imaynan gimnastakuna cuerponkuta kallpachanku hinata? ¿Imaynatataq yuyayninchistari kallpachasunman?

‘Yachachiqkunañan kanaykichis’

Apóstol Pablon Cristo Melquisedec sacerdote hina kananmanta rimashaspa nirqan: “Hinallataq Diosqa Melquisedecpa t’aqanman hina payta uma sacerdotepaq churarqan. Chaykunamantaqa askhan rimanayku kashan, ichaqa sasa sut’inchaymi mana usqhay entiendeq kasqaykichisrayku. Qankunaqa unay iñiqkunañan kankichis, yachachiqkunañan kanaykichispas. Ichaqa Diospa Simin qelqamanta qallariy yachachikuykunata huktawan yachachinaraqmi kashankichis. Qankunaqa ñuñuq wawa hinallaraqmi kashankichis, manan mikhunata khamuq hinaraqchu”, nispa (Hebreos 5:10-12).

Qallariy siglopin askha judío cristianokuna qallariypi yachasqallankuwan kusisqa kasharqanku, chaymi espiritualpi mana wiñarqankuchu. Paykunaqa Kamachikuy Simiq nisqanman hinallan kawsayta munasharqanku, qhari-kay qarachatapas señalayllatan munasharqanku (Hech. 15:1, 2, 27-29; Gál. 2:11-14; 6:12, 13). Wakintaq samana p’unchayta, Hucha Pampachay P’unchaytapas mana saqeyta munarqankuchu (Col. 2:16, 17; Heb. 9:1-14). Chaymi Pabloqa kallpacharqan allinkaqta mana allinkaqtapas reparaspa ‘wiñasqa-kayman chayanankupaq’ (Heb. 6:1, 2). Pabloq nisqanqa askha cristianokunatachá yanaparqan allin yuyaykuq kanankupaq, chaywanqa iñiyninkupi wiñarqankuchá. Ñoqanchisri, ¿imaynapin tarikushanchis?

Allin reparaq kanapaq kallpachakusun

¿Imatan ruwasunman allin wiñasqa-kayman chayananchispaq? Yuyayninchistan kallpachashanallanchis allinkaqta mana allinkaqta reparayta yachanapaq. Imaynan gimnasta cuerponta kallpachan munay ejerciciokunata ruwananpaq hinata.

Allin umayoq kanapaqqa estudiashanallanchismi, chhaynatan nirqan universidadpi huk profesor. Chaymantapas kallpachakusun imatapas yachananchispaq chayqa, umanchisqa yachallanqan ima munasqanchistapas, chhaynatan nillarqantaq huk yachayniyoq runapas.

Chhaynaqa, yuyayninchistan kallpachana Bibliamanta astawan yachanapaq. Chayta ruwaspan Diospa munayninta allinta hunt’asun (Rom. 12:1, 2).

 ‘Khamuna mikhunawan’ misk’ichikusun

Sichus allin wiñasqa-kayman chayananchispaq kallpachakushanchis chayqa, tapukunanchismi: “¿Astawanchu Bibliapi yachachikuykunata entiendeshani? ¿Allin takyasqa cristianota hinachu reqsiwanku?” nispa. Mamaqa sumaqtan wawanta uywan ñuñuchispa, q’apikunata mikhuchispa ima, ichaqa ¿llakikunmanchu wiñasqanman hina khamuna mikhunakunata wawan mana mikhuyta munaqtin? Arí, kaqllataqmi kanman iñiywanpas. Anchatan kusikunchis pipas Bibliata estudiaspa Diosman qokuspa bautizakuqtinqa, ichaqa, ¿manachu llakikusunman qallariy yachachiykunallawan qhepakuqtin? (1 Cor. 3:1-4.) Lliwpas munanchismi yachachisqa yachachiqman tukupunanta.

Allin kaqkunapi yuyaymananapaqqa kallpachakunan (Sal. 1:1-3). Manan imapas hark’awananchischu chayta ruwananchispaq, chaypaqqa qhawarikunanchismi televisionta qhawaspa, huk ruwaykunapipas hayk’a tiempo pasasqanchista, chaykunaqa manan yuyayninchista kallpachanmanchu. Allin yuyaykuq kananchispaqqa tukuy sonqowanmi estudiananchis Bibliata, ‘allin yuyayniyoq hunt’aq kamachiq’ qelqakuna qowasqanchistapas (Mat. 24:45-47). Sapa p’unchay Bibliata estudiasqanchismantapas manan saqenanchischu Familiantin Diosta Yupaychana Ch’isinta, Bibliapi sasa entiendey yachachikuykuna estudiaytapas.

México suyupi congregacionkunata watukuq Jerónimo iñiqmasinchismi, Qhawaq revistata chaskispa hinalla llapanta estudian. Chaymantapas esposanwanmi tiempota t’aqanku kuska estudianankupaq. Paymi nin: “Sapa p’unchaymi Diospa Qelqanta estudiayku, Veamos ‘la buena tierra’ nisqa folletowan huk qelqakunawanpas yanapachikuspa”, nispa. Ronald iñiqmasinchispas congregacionpi sapa semana Bibliata leenapaq t’aqasqataqa estudianmi, chaymantapas huk yachachiykunatan tukunankama allinta estudian. Paymi nin: “Chay yachachikuykunata estudiasqaymi ima hinaraq suyachiwan huktañataq qallarinaypaq”, nispa.

Ñoqanchisri, ¿yuyaymanashanchischu Bibliata estudiaspanchis? ¿Yuyaykuq kasqanchista tukuy atisqanchistachu mat’ipayashanchis? ¿Bibliaq nisqanman hinachu imatapas ruwashanchis? (Pro. 2:1-7.) Allinkaqta mana allinkaqta reparanapaq yuyayninchista kallpachaspallan, allin takyasqa yachayniyoq cristianoqa kasunchis.

[23 paginapi dibujo]

Yuyayninchista kallpachashallasun allinkaqta mana allinkaqta reparanapaq