Diospaq llank’aspan kallpata hap’inchis

“Yugoyman k’umuykukuychis, [...] chaymi qankunaqa samakuyta tarinkichis.” (MAT. 11:29.)

1. ¿Imatan Jehová Dios kamachirqan Sinaí orqopi? ¿Imapaqmi chayta kamachirqan?

JEHOVÁ DIOS Israel runakunaman Sinaí orqopi kamachikuykunata qoshaspaqa kamachillarqantaqmi sábado p’unchayta waqaychanankupaq. Moiseswanmi paykunata kamachirqan: “Soqta p’unchaymi llank’anki, qanchiskaq p’unchaytaqmi samakunki, toroykipas asnoykipas samananpaq, wasiykipi naceq qhari kamachiykipas wak llaqtayoqpas samakunanpaq”, nispa (Éxo. 23:12). ¿Imaraykun kamachirqan soqta p’unchaypi samanankupaq? Chaytaqa kamachirqan paykunata munakuspa khuyapayaspa iman, chhaynapi ‘samakuspa’ wakmanta kallpata hap’inankupaq.

2. ¿Imanaqtinmi sábado p’unchay Israel runakunaq allinninpaq karqan?

² Ichaqa manan samakunallankupaqchu sábado p’unchayqa karqan. Chay p’unchayqa Jehová Diosta yupaychanankupaqmi karqan. Chaypin taytakuna familiankuta yachachinanku karqan Jehová Dios kasukuyta, chanin kaq ruwaytapas (Gén. 18:19). Hinallataq familiakunapas amigokunapas huñunakuspanku Jehová Diospa ruwasqankunapi yuyaymanaqku kallpachanakuqku ima (Isa. 58:13, 14). ¿Imapaqwanmi sábado p’unchayta waqaycharqanku? Chay p’unchay waqaychasqankun rikuchirqan Señor Jesucristo waranqa wata kamachiqtin llapa runakuna cheqaq samakuyta tarinankuta (Rom. 8:21). Kay tiempopirí, ¿imaynatan kallpata hap’isunman Jehová Diosta kasukushanallanchispaq?

Iñiqmasinchiskunawanmi kallpachanakunchis

3. ¿Imaynatan ñawpaq cristianokuna kallpachanakurqanku?

³ Apóstol Pablon Diospa llaqtanmanta nirqan: ‘Cheqaq-kaytan takyachinpas waqaychanpas’, nispa (1 Tim. 3:15). Chay tiempopi cristianokunataqa iñiqmasinkunan yanaparqanku iñiyninkupi allinta takyanankupaq, llapankun munakuywan kallpachanakuqku (Efe. 4:11, 12, 16). Éfeso llaqtapi kashaqtinmi apóstol Pablota visitarqanku wakin Corinto llaqta iñiqmasinkuna kallpachanankupaq, chaymi payqa nirqan: “Anchatan kusikuni Estefanaspa, Fortunatoq, Ahaycoq chayamusqankumanta, [...] sonqoytan kawsarichiwarqanku”, nispa (1 Cor. 16:17, 18). Chhaynallataqmi Titopas sientekurqan Corinto llaqtapi iñiqmasinkunawan kashaspa, chaymi Pablo nirqan: “Paytaqa qankunan llapaykichis allintapuni sonqonta llanllarichimusqankichis”, nispa (2 Cor. 7:13). Kay tiempopipas Jehová Diospa testigonkunaqa anchatan kallpachanakunchis iñiqmasinchiskunawan huñukuspa.

4. ¿Imaynapin sonqonchis kawsarinraq huñunakuykunapi?

⁴ Huñunakuykunapiqa sonqonchisraqmi llanllarin kusikuymanta. Chaypin hukkuna hukkunawan iñiyninchispi kallpachanakunchis (Rom. 1:12). Iñiqmasinchiskunaqa manan karullamanta reqsisqanchis runakunachu kanku, paykunaqa munakusqanchis respetasqanchis amigonchiskunan kanku.  Chaymi paykunawan huñukuspa kusikunchis, kallpatapas hap’inchis (File. 7).

5. ¿Imatan ruwasunman hatun huñunakuykunapi?

⁵ Hatun huñunakuykunapas anchatan kallpachawanchis. Chaypin Diospa yachachikuyninkunata uyarispa kallpachakunchis imaynan unuta ukyaspa ch’akiyninchista thasnuchinchis hinata, chaymantapas askha iñiqmasinchiskunawanmi amigota ruwanchis (2 Cor. 6:12, 13). Manchali kasqanchisrayku sasa kanman piwanpas amigota ruway chayrí, ¿imatan ruwasunman? Kallpachakusunmanmi imapipas yanapakunanchispaq. Huk hermanan hatun huñunakuypi yanapakusqanmanta khaynata willakun: “Familiallaytan reqsirqani, iskay kinsa amigokunallatawan. Pichaypi yanapakuspaymi ichaqa askha iñiqmasiykunata reqsirqani. ¡Maytan chaywan kusikurqani!” nispa.

6. ¿Imatan ruwasunman vacacionpi kashaspa?

⁶ Israel runakunaqa watapi kinsa kutitan Jerusalén llaqtaman rinanku karqan Diospaq fiestakunata ruwanankupaq (Éxo. 34:23). Wakinqa chakrapi ruwanankuta, negocionkuta ima saqesparaqmi chakipi askha p’unchaykuna puriqku. Sasaña karqan chaypas, Jerusalenman chayaspaqa anchatan kusikuqku yupaychana wasipi kaqkunata Jehová Dios ‘yupaychasqankuta’ rikuspa (2 Cró. 30:21). Kay tiempopipas askha iñiqmasinchiskunan kusikunku Betel wasita visitaspanku. ¿Qanpas riwaqchu Betel wasita vacacionniykikunapi?

7. a) ¿Imaraykun allinpuni kusirikunapaq huñukuy? b) ¿Imaynan kanan chay huñukuy?

⁷ Familianchiswan, amigonchiskunawan kusirikunanchispaq huñukusqanchispas kallpachawanchismi. Rey Salomonmi qelqarqan: “Runapaq aswan allinqa mikhuyllanmi, ukyayllanmi, llank’asqanpipas kusikuynillanmi”, nispa (Ecl. 2:24). Kusikunanchispaq iñiqmasinchiskunawan huñukuspaqa astawanmi paykunawan reqsinakuspa  munanakunchis. Chay huñunakuykunapi pisilla kaspanchismi aswan allinta kallpachanakusunman, chaymantapas hukmi makilla chayta qhawashanan, astawanqa tragoyoq ukyanakuna kaqtin.

Predicaspan kallpata hap’inchis

8, 9. a) ¿Imaynan karqan Jesuspa yachachisqan, imaynataq karqan religionpi umallikunaqri? b) ¿Imaynapin allinninchispaq predicay?

⁸ Jesusqa tukuy sonqonwanmi predicarqan, chhaynata predicanankupaqmi qatikuqninkunatapas kallpacharqan. Nirqanmi: “Cosechanaqa askhapunin, llank’aqkunataq ichaqa pisilla. Chayrayku, chakrayoqta valekuychis cosechanman llank’aqkunata kachamunanpaq”, nispa (Mat. 9:37, 38). Predicasqanqa ‘allin willakuykunan’ karqan, chaymi runakunaq sonqonqa llanllariqraq (Mat. 4:23; 24:14). Fariseokunaq yachachisqanmi ichaqa llasa q’epi hina karqan (leey Mateo 23:4, 23, 24).

⁹ Allin willakuykunata willaspaqa runakunatan yanapanchis Diosmanta yachanankupaq, Diospa yachachikuyninkunatapas allintan takyachinchis yuyayninchispi sonqonchispi ima. Chaychá Salmo takita qelqaqpas nirqan: “¡Yupaychasqa Señor Diosqa kachun! May allinmi Diosninchisman yupaychaykunata takiyqa”, nispa (Sal. 147:1). Chhaynaqa ñoqanchispas astawanmi kallpachakunanchis predicaspa Jehová Diosta yupaychananchispaq.

10. Manaña runakuna uyariwasunchu chaypas, ¿imaraykun predicayninchis allinpuni?

¹⁰ Wakin llaqtakunapiqa askhan uyarikunku, wakinpitaq pisilla (leey Hechos 18:1, 5-8). Predicasqayki llaqtapi pisilla uyarikunku chayqa, ama chaywan pisipaychu, aswanpas qhawariy ima allinkunata predicaspa ruwasqaykita. Jehová Diospaq imapas ruwasqanchisqa manan yanqapaqchu (1 Cor. 15:58). Manaña runakuna uyariwasunchu chaypas, predicasqanchisqa ancha allinpunin. Hinaspapas, Jehová Diosmi pusamun allin sonqoyoqkunataqa, paymi encargakunqa llapankuman allin willakuykuna chayananpaq (Juan 6:44).

Familiantin Diosta Yupaychana Ch’isipi kallpachakusun

11. ¿Imatan Jehová Dios kamachin tayta-mamakunaman? ¿Imaynatan chayta hunt’ankuman?

¹¹ Tayta-mamakunan wawankumanqa Jehová Diosmanta yachachinanku (Deu. 11:18, 19). Chayrayku, ¿ñachu rimanakurqankichisña ima horapi wawaykichista yachachinaykichispaq? Chay ruwanaykichista hunt’anaykichispaqmi Jehová Diosqa qosunkichis: librokunata, revistakunata, videokunata, uyarinapaq grabacionkunatapas.

12, 13. a) ¿Imapaqmi allinpuni Familiantin Diosta Yupaychana Ch’isi? b) ¿Imaynatan chay huñunakuy aparikunan?

¹² Allin yuyayniyoq hunt’aq kamachiqa Familiantin Diosta Yupaychana Ch’isitan churarqan familiakuna huñunakuspa Bibliata estudianankupaq. Chaywanmi askha familiakuna aswan hukllachasqa munanakuspa kawsashanku, Jehová Diosmanpas astawanmi asuykushanku. Ichaqa ¿imaynatan chayta aparinanku?

¹³ Jehová Diosqa kusikuq Diosmi, chaymi Familiantin Diosta Yupaychana Ch’isiqa kusikunapaq kanan (1 Tim. 1:11, NM; Fili. 4:4). Ima munaymi chay ch’isipi Bibliamanta astawan yachayqa. Tayta-mamakunaqa wawankuq sonqonman chayanankupaq hinan yachachinanku. Yachasunchis 10 watayoq Brandonmanta. Payqa mach’aqwaykunata munakusqanraykun mana allinpaqchu qhawariq Bibliapi mach’aqwayta Saqrawan tupanachikusqanta. Chaymi encargarqanku Yupaychana Ch’isipi chaymanta rimananpaq. Wakin familiakunataq Bibliapi textokunata sapankanku t’aqanakunku, chhaynapi leespanku pichus huk textopi rimashan chayman hina rimanankupaq  otaq dramapi hina actuanankupaq. Chhaynapin wawakunaqa kusisqa tukuy yuyaywan Bibliamanta yachanqaku, sonqonkupitaq chayta hap’inqaku. *

Ama yanqa ruwaykunawan sayk’usunchu

14, 15. a) ¿Imanaqtinmi runakuna llakisqa manchasqa ima kawsashanku? b) ¿Iman cristianokunata llakichiwallanchistaq?

¹⁴ Kay tiempopiqa imaymana sasachakuykuna kasqanwanmi runakuna llakisqa manchasqa tiyashanku. Askhan wakcha mana llank’anayoq kashanku. Llank’anayoq runakunapas manan qolqenkuta aypachikunkuchu, ‘t’oqo ch’uspamanpas pagonkuta churaykushankuman hinan’ sientekunku (tupachiy Ageo 1:4-6). Chaymantapas sinchi mast’arisqan kashan terrorismo, huk sasachakuykunapas, manataqmi kamachikuqkunaqa imatapas ruwayta atinkuchu. Hinaspapas, askhan ñak’arishanku mana allinkunata ruwasqankurayku (Sal. 38:4).

¹⁵ Cristianokunapas ñak’arinchismi chay sasachakuykunawanqa (1 Juan 5:19). Mayninpiqa aswan llakikuypiraqmi tarikunchis Jehová Diosta servisqanchisrayku. Chhaynapin Jesuspa rimasqan hunt’akun, paymi nirqan: “Ñoqata qatiykachawarqanku chayqa, qankunatapas qatiykachallasunkichistaqmi”, nispa (Juan 15:20). Ichaqa ‘qatiykachawaqtinchispas manan Diosqa saqerpariwanchischu’ (2 Cor. 4:9).

16. ¿Iman yanapawanchis kusisqalla kananchispaq?

¹⁶ Jesusmi nirqan: “Ñoqaman hamuychis llapa sayk’usqakuna q’episapakuna, ñoqan samachisqaykichis”, nispa (Mat. 11:28). Chayta kasukunapaqqa Cristopi iñisqanchistan rikuchinanchis, chhaynapin Jehová Diosqa makinpipas hap’iykuwashasunman hina cuidawasun, ‘hatun atiynintataq’ qowasun (2 Cor. 4:7). Chaymantapas Jehová Diosqa santo espiritunwanmi iñiyninchispi kallpachawasun kusisqalla ima pruebatapas aguantananchispaq (Juan 14:26; Sant. 1:2-4).

17, 18. a) ¿Imayna yuyaykuymantan cuidakunanchis? b) ¿Iman pasawasunman kusirikuykunallapi kaqtinchis?

¹⁷ Hinaspapas Jehová Diosta serviqkunaqa manan kay pachapi runakuna hinachu munapayananchis aycha kusichiykunata (leey Efesios 2:2-5). Mana chayqa, ‘aychaq millay munayninkunaman, ñawiq rikusqan millay munapakuykunaman, kay pacha kawsaypi hatunchakuykunaman’ hinan ruwayta qallarisunman (1 Juan 2:16). Otaq yuyaykusunman chaykunata ruwaspa kusisqa kananchista (Rom. 8:6). Wakin runakunan kusirikuyta munaspa drogakunku, machanku, qhelli ruwaykunata qhawanku, wañuyta mana manchakuspa imaymanapi pukllanku, huk mana allinkunatapas ruwanku. Saqraqa ‘q’otukuq yuyayninkunawanmi’ ñoqanchistapas engañayta munawanchis mana allinkunata allinpaq qhawarinanchispaq (Efe. 6:11).

¹⁸ Allin yuyaywan mikhuypas, ukyaypas, imapi kusirikuypas manan huchachu. Ichaqa manan chaykunapichu sonqonchis kanan. Kay tiempopiqa allin yuyaywanmi  kawsananchis, chayraykun yachananchis cuerponchis kamachiyta. Sichus sonqonchispa munasqankunapi purinanchisrayku imaymanata ruwasunman chayqa, sayk’upusunmanmi hinaspa manaña allintachu Diosta servisunman, chhaynapitaq Dios serviyninchis ‘yanqapaq kanman’ (2 Ped. 1:8).

19, 20. ¿Imatan ruwananchis kallpachasqa kananchispaq?

¹⁹ Jehová Diospa munasqanman hina kawsaqkunaqa yachanchismi kay pachapi kusirikuykuna tukukuqlla kasqanta. Moisespas yacharqanmi chaytaqa (Heb. 11:25). Kusisqa kallpachasqa kananchispaqqa hanaq pacha Yayanchispa munasqantan hunt’ananchis (Mat. 5:6).

²⁰ Chhaynaqa Diospaq tukuy sonqo llank’aspa kallpata hap’isun. Chhaynapin ‘kusisamiyoq suyakuyninchis hunt’akunanta suyakushananchiskama’ Diosta manchakuspa kawsasunchis, manataq ‘kay pachaq kaqninkunata sinchita munapayasunchu’ (Tito 2:12, 13). Chaymantapas Jesuspa yugonmanmi k’umuykukunanchis paypa kamachisqanman hina purispa. Chayta ruwaspan astawan kallpata hap’isun, cheqaq kusikuytapas tarisun.

[Uranpi willakuy]

¿Ima nispan kutichiwaq?

• ¿Imakunata ruwaspan kallpata hap’isunman?

• ¿Imaynatan predicasqanchis kikinchista kallpachawanchis hinallataq hukkunatapas?

• ¿Imaynatan tayta-mamakuna aparinanku Familiantin Diosta Yupaychana Ch’isita?

• ¿Imakunan iñiyninchispi pisipachiwasunman?

[Tapuykuna]

[26 paginapi dibujokuna fotokunapiwan]

Jesuspa yugonman k’umuykukuspan kallpata hap’inchis