Kallpachanakushallasun hukkuna hukkunawan
Kallpachanakushallasun hukkuna hukkunawan
“Hukkuna hukkunawan sonqochanakuychis kallpachanakuychis.” (1 TES. 5:11.)
1. ¿Imaynapin ancha allinninchispaq Diospa llaqtanpi kasqanchis, ichaqa ima sasachakuykunatan atipananchis?
¡IMA munaymi Diospa llaqtanpi kayqa! Chaypi tarikusqanchisraykun Jehová Diospa amigon kanchis, manataq nishu sasachakuykunawan ñak’arinchischu Bibliaq nisqanman hina kawsasqanchisrayku. Chaymantapas allin amigokunayoqmi kanchis, paykunaqa kusisqa kananchistan munanku. Askha iñiqmasinchiskunan ichaqa imaymana sasachakuykunata atipananku, wakinqa sasachakunkun Bibliaq yachachikuyninkuna entiendeyta; hukkunataq onqosqankurayku, llakiq ñit’isqan kasqankurayku otaq mana allin ruwasqankumanta sasachakuypi tarikunku. Llapallanchistaq ñak’arinchis Diosta mana kasukuq runakuna hawa.
2. ¿Imatan ruwananchis iñiqmasinchiskuna sasachakuypi tarikuqtinku, imarayku?
2 Pi iñiqmasinchispas sasachakuypi kaqtinqa anchatan llakikunchis. Pabloq nisqan hina, Diospa llaqtanqa huk cuerpo hinan, “cuerpoq huk miembronchus muchun chayqa, llapan miembrokunan chaywan kuska muchullantaq” (1 Cor. 12:12, 26). Pipas sasachakuypi tarikushan chayqa, yanapaykunanchismi. Chayraykun kunan Bibliapi yachasunchis wakin cristianokuna sasachakuypi kaqkunata imayna yanapasqankumanta. Sapankamanta yachaspa tapukusun: “¿Imaynatan ñoqapas chhaynata yanapayman? ¿Imaynatan iñiqmasiykunata yanapayman Diosta servishanallankupaq, chhaynapi Diospa llaqtan allin takyasqa kananpaq?” nispa.
Apolostan yanaparqanku
3, 4. ¿Imapin Apolosta yanaparqanku Aquilawan Priscilawan?
3 Apolos Éfeso llaqtaman tiyaq ripuspaqa allin predicaqñan karqan, Hechos qelqan paymanta nin: ‘Jesusmantan iman kaqtapuni tukuy sonqo rimaqpas yachachiqpas. Ichaqa Juanpa bautismollantan yacharqan’, nispa; “Yayaq, Churiq, Santo Espirituq sutinpi” bautizakuymantaqa manan yacharqanchu. ¿Imarayku? Yaqachus hina payqa 33 wata Pentecostés fiesta ñawpaqta uyarinman karqan Bautizaq Juanpa qatikuqninkunaq otaq Jesuspa qatikuqninkunaq predicasqanta. Tukuy sonqowan predicaqña karqan chaypas, manan lliw yachachikuykunatachu entienderqan. Chaymi huk iñiqmasikuna yanaparqanku. ¿Imaynatan yanaparqanku? (Hech. 1:4, 5; 18:25; Mat. 28:19.)
4 Aquilawan Priscilawan sinagogapi Apolospa predicasqanta uyarispankun payta wasinkuman pusarqanku aswan sut’ita yachachinankupaq (leey Hechos 18:24-26). Chhaynapin chay warmi-qhariqa munakuyninkuta rikuchirqanku. Yanapayta munaspan sumaqllata rimapayarqanku, kallpachakurqankutaq mana pisichasqa sientekunanpaq. Apolosqa manan allintachu yachasqa cristianokuna imayna qallarisqanta. Payqa anchatachá agradecekurqan chaymanta sut’inchaqtinku. Chay yachasqanwanmi “anchata yanaparqan” Acaya llaqtapi iñiqmasikunata, ancha atiywantaq rimarqan (Hech. 18:27, 28).
5. ¿Ima yanapaytan qonku millonninpi Testigokuna, imaraykun chay yanapay qosqankumanta kusikunku?
5 Kay tiempopiqa millonninpi Testigokunan anchata agradecekunku Bibliamanta yachachiqninkuta, askhataq paykunawan amigontin kanku. Yachachiqkunaqa askha killakunapin sapa semana paykunawan estudiarqanku, chaytaqa kusikuywanmi ruwarqanku, paykunaqa yacharqankun chay ruway ancha importante kasqanta (Juan 17:3, Edición 1988). Anchatan kusikurqanku estudiantekuna Bibliaq yachachikuyninta entiendesqankumanta, chayman hina kawsasqankumanta, Jehová Diospa munayninta ruwanankupaq qokusqankumantapas.
‘Allintan rimarqanku’ paymanta
6, 7. a) ¿Imaraykun Pablo Timoteota akllarqan paywan rinanpaq? b) ¿Imaynatan Timoteo iñiyninpi wiñarqan Pabloq yanapayninwan?
6 Iskaykaq kuti viajasqankupin Pablowan Silaswan Listra llaqtapi iñiqkunata watukurqanku. Chaypin paykunaqa Timoteota astawan reqsirqanku. “Listra llaqtapi Iconio llaqtapi kaq wawqe-panakunan Timoteomanta allinta rimarqanku”, payqa 20 watayoq hinan kashanman karqan. Eunice mamanwan Loida hatun mamanwanqa cristianan karqanku, taytanmi ichaqa mana cristianochu karqan (2 Tim. 1:5). Pabloqa iskay wata ñawpaqta hinan chay familiata reqsinman karqan, Listra llaqtapi iñiqkunata ñawpaq kuti watukusqanpi. Iskay kuti watukusqanpin ichaqa Pablo Timoteota ancha allinpaq qhawarirqan allin iñiyniyoq wayna kasqanrayku. Chaypi umallikunawan rimanakuspan apóstol Pabloqa Timoteota pusarqan predicaypi yanapananpaq (leey Hechos 16:1-3).
7 Timoteoqa allintan yacharqan Pablomanta. Chaymi Pabloqa rantinpi kacharqan iñiq t’aqakunata watukunanpaq. Chunka phisqayoq wata hinan Pablowan kuska llank’arqan, chhaynapin iñiyninpi astawan wiñaspa allin umalliman tukupurqan (Fili. 2:19-22; 1 Tim. 1:3).
8, 9. ¿Imapaqmi wayna-sipaskunata yanapana? ¿Imaynatan huk iñiqmasinchis chayta ruwarqan?
8 Kunanpas Diospa llaqtanpiqa askha wayna-sipaskunan kan, paykunaqa allintan yanapakunkuman. Allin iñiyniyoq cristianokunaq yanapayninta chaskispankuqa, atinkumanmi imaymanapi yanapakuyta. ¿Reqsinkichu Timoteo hina hukkunata serviy munaq wayna-sipaskunata? Kurak cristianokunaq kallpachayninwanqa yaqapaschá kankuman precursor, betelita, misionero otaq iñiq t’aqakunata watukuq umalli. ¿Imaynatan yanapasunman chaykunaman aypanankupaq?
9 Martinmi iskay chunka wataña Betelpi servishan, paymi yuyarin kinsa chunka wata ñawpaqta huk watukuq umalli imayna yanapasqanmanta. Huk p’unchay predicaq lloqsispankun umalliqa kusikuywan willasqa wayna kashaspa Betelpi llank’asqanmanta. Chaymi kallpachasqa Betelpi servinanpaq. Chhayna kallpachasqanmi paytaqa anchata yanapasqa qhepaman ima ruwananpaq. Sapankanchispas wayna-sipaskunataqa yanapasunmanmi Diospa llaqtanpi allinta llank’anankupaq.
Llakiq ñit’isqan kaqkunata kallpachasun
10. ¿Imaynan sientekurqan Epafrodito, imarayku?
10 Pablon Romapi preso kasharqan, chaymi Filipos cristianokuna Epafroditota kacharqanku watukunanpaq, qolqeta apananpaqwan. Epafroditoqa paywanmi qhepakuyta munarqan sasachakuyninkunapi yanapananpaq. Romaman chayaspan ichaqa onqopurqan, ‘yaqapunin wañukapurqanpas’. Yuyaykusqanman hina Pablota mana yanapay atisqanmantan sinchita llakikapurqan (Fili. 2:25-27).
11. a) ¿Imaraykun wakin cristianokuna llakiq ñit’isqan tarikunkuman? b) ¿Ima nirqanmi Pablo Epafroditota imayna yanapanankumanta?
11 Kay tiempopiqa askha runakunan imaymanamanta sinchita llakikuspanku depresión onqoywan hap’ichikunku. Organización Mundial de la Salud nisqan willan phisqa runakunamanta huknin chaywan onqonankumanta. Ñoqanchistapas chay onqoyqa hap’iwasunmanmi familianchis uywaymanta, onqosqanchismanta, otaq imapi pantasqanchismanta sinchita llakikuqtinchis. ¿Imaynatan Filipos llaqtayoq cristianokuna Epafroditota yanapayta atinkuman karqan? Pablon paykunata nirqan: “Ancha kusikuywan Epafroditota chaskiychis, Señorpi iñiq wawqeta hinapuni, hinallataq pay hina llank’aq wawqekunatapas anchata respetaychis. Cristoq kamachinpi kashaspan yaqa wañurqanpas, qankunaq rantiykichispin llank’aysiwarqan wañuytapas mana manchakuspa”, nispa (Fili. 2:29, 30).
12. ¿Imaynatan kallpachasunman llakiq ñit’isqan kaqkunata?
12 Ñoqanchispas kallpachananchismi llakisqa tarikuspa pisi kallpayaq iñiqmasikunataqa. Diosta servispa imapas allin ruwasqankumanta rimaspan kallpachasunman. Yaqapaschá bautizakunankurayku otaq tukuy tiemponkuwan Diosta servinankurayku imaymanata saqenanku karqan. Chaymi paykunata nisunman, ñoqanchispas Jehová Diospas kallpachakusqankuta anchata valorasqanchista. Wakin cristianokunaqa manañapaschá ñawpaqpi hinachu ruwanqaku yuyaqña kapusqankurayku, chaywanpas paykunataqa anchatan respetananchis unay tiempoña Diosta hunt’aq sonqowan servisqankurayku. Imaynapiña iñiqmasinchiskuna tarikuqtinpas llapanchismi Diospa yuyaychawasqanchista kasukunanchis, paymi niwanchis: “Manchalikunata [“llakipi tarikuqkunata”, NM] yanapaykuychis, pisi kallpakunata kallpachaykuychis, hinallataq llapapaqpas pacienciayoq kaychis”, nispa (1 Tes. 5:14).
“Pampachapuychis, hinaspa sonqochaychis”
13, 14. a) ¿Imatan ruwarqanku qhelli huchapi puriq runata, imarayku? b) ¿Imaraykun allin karqan qarqosqanku?
13 Corinto llaqtayoq cristianokuna ukhupin huk runa qhelli huchapi purisharqan, manataq huchanmanta kutirikurqanchu. Chaywanmi Diospa llaqtanta qhellichasharqan, mana iñiqkunapas millaytan rimarqanku chaymanta. Chaymi Pabloqa kamachirqan chay runata qarqonankupaq (1 Cor. 5:1, 7, 11-13).
14 Qarqosqankuqa iñiqmasikunaq allinninpaqmi karqan, paypas yuyayninman kutispan huchanmanta pesapakurqan hinaspa Diosman kutirikapurqan. Chayraykun Pabloqa iskaykaq carta qelqasqanpi kamachirqan chay runata chaskipunankupaq. Ichaqa nillarqantaqmi: “Kunanqa payta pampachapuychis, hinaspa sonqochaychis, paqtan sinchi llakiq ñit’isqan kanman”, nispa (leey 2 Corintios 2:5-8).
15. ¿Imaynatan chaskinanchis kutimpuqkunata?
15 ¿Imatan chaymanta yachasunman? Pipas Diospa llaqtanmanta qarqosqa kaqtinqa llakikunchismi. Payqa yaqapaschá Diospa sutinta, llaqtantapas mana allinpaq qhawarichirqan. Chaymantapas mana allintapaschá ruwawarqanchis. Ichaqa, ¿imatan ruwakunman huchallikuq kutimpuyta munaqtin? Chaymanta encargakuq umallikunan chaytaqa Bibliaq nisqanman hina qhawarinanku. Sichus reparanku huchanmanta kutirikusqanta, hinaspa decidinku kutimpunanpaq chayqa, chay ruwasqankun rikuchinqa Jehová Diospa pampachasqanta (Mat. 18:17-20). Diostaq khuyapayaspa pampachashan chayqa, ñoqanchispas pampachananchismi, mana chayqa Diospa contranpin kashasunman. Cristianokunaqa kallpachakunchismi llapa iñiqmasinchiskunawan huk-nisqalla thakpi kawsananchispaq, Diospa allin qhawarisqan kananchispaqpas. Chayraykun huchanmanta kutirikuspa kutimpuqkunataqa ‘wakmanta munaykakapunanchis’ (Mat. 6:14, 15; Luc. 15:7).
‘Kusatan yanapawanqa’
16. ¿Imaraykun Pablo phiñakurqan Marcospaq?
16 Bibliapi huk willakuymi yachachiwasun phiñachiwaqninchiskunapaq ama sientepakunanchispaq. Chaypin willashan Marcospa ruwasqanwan Pablo phiñakusqanmanta. Pablowan Bernabewan ñawpaqkaq kuti viajasqankupin chay waynaqa paykunawan risqa yanapakunanpaq. Ichaqa qonqayllan wasinman kutimpusqa, manan yachakunchu imarayku chay ruwasqanta. Pabloqa anchatan phiñakurqan chaymanta. Iskaykaq kuti viajanankupaq kashaqtinkun Pabloqa mana Marcosta pusayta munarqanchu, chaymi Bernabewan sinchita phiñachinakurqanku. Payqa manan qonqasqachu ñawpaq kuti viajasqankupi Marcos qonqaylla kutikampusqanta (leey Hechos 13:1-5, 13; 15:37, 38).
17, 18. ¿Imaynapin yachanchis Pablowan Marcoswan allipunakapusqankuta? ¿Imatan chaymanta yachanchis?
17 Marcosqa manan pisiparqanchu Pablo payta mana pusayta munasqanmantaqa, aswanpas Bernabewan rispan huk llaqtakunapi predicashallarqan (Hech. 15:39). Marcosqa tukuy sonqowan predicaqmi karqan, chaymi Pabloqa qhepa watakunaman allinta paymanta rimarqan. Romapi preso kashaspanmi Pablo Timoteoman cartata qelqarqan payta watukuq rinanpaq, nirqantaq: “Marcosta maskhamuspayki pusamuway, payqa kusatan llank’anapi yanapawanqa”, nispa (2 Tim. 4:11). Rikusqanchis hina, Pabloqa anchatan Marcosta munakapusqa.
18 ¿Imatan chay willakuymanta yachallasunmantaq? Marcosqa manan sientepakurqanchu Pabloq phiñakusqanwan, aswanpas allin misionero kananpaqmi kallpachakurqan. Iskayninkupas Dios sonqo kasqankuraykun mana phiñasqallachu karqanku. Qhepamanmi Pabloqa Marcosmanta allinta rimarqan. ¿Imatan ñoqanchispas ruwasunman mayqen iñiqmasinchiswanpas allipunakapusqanchis qhepaman? Phiñachinakusqanchista qonqaspan hukkunata yanapashanallanchis iñiyninkupi wiñanankupaq. Chayta ruwaspaqa iñiqmasinchiskunatan kallpachasun.
Yanapanakushallasun
19. ¿Imapin hukkuna hukkunawan yanapanakunanchis?
19 Kay ‘sasa tiempokunapiqa’ astawanmi iñiqmasikunaq yanapayninta necesitanki, paykunapas necesitankun yanapayniykita (2 Tim. 3:1). Yaqapaschá huk cristiano mana yachanmanchu sasachakuyninta imayna allichayta, Jehová Diosmi ichaqa yachan. Diosqa iñiqmasikunawanmi yanapanqa, hinallataq qanwanpas (Isa. 30:20, 21; 32:1, 2). Chayraykun kallpachakunanchis Pabloq yuyaychasqanta kasukunanchispaq, paymi nirqan. “Hukkuna hukkunawan sonqochanakuychis kallpachanakuychis, imaynan ruwashankichispuni hinata”, nispa (1 Tes. 5:11).
¿Imaynatan kutichiwaq?
• ¿Imaraykun llapan iñiqmasikuna kallpachanakunanchis?
• ¿Imakunapin iñiqmasinchiskunata yanapasunman?
• ¿Imaraykun iñiqmasinchiskunaq yanapayninta necesitanchis?
[Tapuykuna]
[11 paginapi dibujo]
¿Yanapashanchischu iñiqmasinchiskunata?
[12 paginapi foto]
Cristiano wayna-sipaskunaqa allintan yanapakunkuman Diospa llaqtanpi