Munakuymi hukllachawanchis. Sapa wata ruwakuq huñunakuy

ESTADOS UNIDOSPIN qayna wata 3 octubre killapi Watch Tower Bible and Tract Society of Pennsylvania nisqapi llank’aqkuna huñukurqanku, invitasqakunapiwanqa phisqa waranqan karqanku, chay huñukuyqa watapi huk kutillatan apakun, chaywanqa 125 kutitañan ruwakusharqan. Chaytan pasachirqanku videopi, Betelpi llank’aqkuna hinallataq Canadá Betelpi kaqkunapas qhawanankupaq. Chay huñunakuytaqa 13.235 iñiqmasinchiskunan kusisqa uyarirqanku Jehová Diosta munakusqankurayku.

Umalli T’aqapi llank’aq Geoffrey Jackson iñiqmasinchismi chay huñunakuyta qallarichirqan. Paymi presentarqan wakin Betelpi llank’aqkunata kinsa mosoq takikunata takinankupaq, takichiqninkutaq karqan David Splane iñiqmasinchis, paypas Umalli T’aqapin llank’an. Paymi rimarqan takispa Diosta yupaychayqa ancha allinpuni kasqanmanta. Chay takiqkuna tukuspankutaq llapa chaypi kaqkunawan kuska wakmanta takirqanku. Huk t’aqa takiqkunaqa chay huñunakuyllapaqmi karqan, manan chayqa kananchu huñunakuyninchiskunapi ni hatun huñunakuykunapipas.

Sucursalkunamanta willakuykuna

Chay qhepatataq phisqa sucursalkunamanta encargakuqkuna willarqanku llaqtankupi imayna predicakushasqanmanta. Kenneth Little iñiqmasinchismi willarqan Canadá sucursalpi yaqa llapa revistakunata Estados Unidospaqpas Canadapaqpas ruwanankumanta. Chaypaqqa iskay turnopin 16 horasta llank’anqaku, chhaynapin chunka kuti mastaraq revistakunata ruwanqaku.

Reiner Thompson iñiqmasinchismi rimarqan República Dominicanapi predicay imayna aparikushasqanmanta, Nigeriamantataq Albert Olih. Chaymantataq Emile Kritzinger willarqan Mozambique llaqtapi iñiqmasinchiskuna chayraq 1992 watapi gobiernoq autorizasqan kasqankumanta, chay wata ñawpaqkunataqa qatiykachasqan kasqaku. Chay kinsantin llaqtakunapiqa astawanmi yapakushanku predicaqmasinchiskuna. Chay qhepatataq Viv Mouritz rimarqan Timor Oriental llaqtapi predicay imayna aparikusqanmanta.

Umalli T’aqaq churasqan encargakuqkuna

Umalli T’aqaq churasqan encargakuqkunaqa soqtaman t’aqasqan kashanku, 1976 watamantapachan chay soqta t’aqakuna Jehová Diospa testigonkunaq llank’asqankuta pachantinpi qhawarishanku. Qhepa watakunamantaq wak t’aqa ovejakunamanta wakin iñiqmasinchiskuna chay encargakuqkunata yanapakuq haykurqanku, kunanqa 23 yanapakuqkunan kashanku. Paykunamantan soqtata rimachirqanku, soqtantinkumantaqa 341 watañan Jehová Diosta tukuy tiemponkuwan servishanku.

Ñawpaqtan rimachirqanku Don Adams iñiqmasinchista, paymi Betelpi llank’ayta qallarirqan 1943 watapi. Paymi willarqan Encargakuqkunaq Umallinkunaq llank’ayninmanta, paykunaqa pisqantin t’aqakunamanta umallikunan kanku, paykunaqa sumaqta rimanakuspan llank’anku. Encargakunkutaqmi qatiykachaykuna, juiciokuna, terremotokuna, otaq imapas kaqtin teqsimuyuntinpi iñiqmasinchiskunata yanapanankupaq.

Chaymantataq Dan Molchan rimarqan Betelpi Llank’aqkunamanta Encargakuqkunamanta, paykunaqa pachantinpi 19.851 Betelpi llank’aqkunatan qhawarinku ima necesitasqankupi yanapanankupaq. David Sinclair iñiqmasinchistaq willarqan Qelqakuna Ruwaymanta Encargakuqkunaq llank’ayninmanta, paykunaqa sucursalkunaq llank’ananpaq ima necesitasqankuta  chaskinankupaqmi qhawarinku. Yaqa 60 wata Betelpi llank’aq Robert Wallen iñiqmasinchistaq rimarqan Predicacionmanta Encargakuqkunaq ruwananmanta, paykunaqa predicacionta, iñiq t’aqapi wakin ruwaykunatawanmi qhawarinku. Chay qhepatataq William Malenfant willarqan Yachachikuymanta Encargakuqkunaq ruwananmanta, paykunan hatun huñunakuykunapaq yachachikuykunata preparanku. Tukunapaqtaq John Wischuk willarqan Yachachikuykuna Qelqaymanta Encargakuqkunaq ruwananmanta, paykunan qhawarinku qelqakuna ruwakunanta. *

2010 watapaq textoqa munakuymantan rimashan

Chaymantataq Umalli T’aqapi llank’aq kinsa iñiqmasinchiskuna discursokunata qorqanku. Hukninmi karqan Gerrit Lösch, paymi tapurqan: “¿Munasqa kaytachu munanki?” nispa. Hinaspan willarqan lliwpas munakuyta necesitasqanchista, munasqa kaspalla imatapas aswan allin ruway atisqanchista. Willallarqantaqmi Jehová Dios munakuq kaqtillan lliwpas kawsashasqanchista, payta munakusqanchisrayku predicasqanchista yachachisqanchistapas.

Nillarqantaqmi Diospa kamachikusqanman hina munakuq kaspa enemigonchiskunatapas munakunanchista (Mat. 5:43-45). Chaymantan willarqan Jesusta imaymanawan ñak’arichisqankumanta, chhaynataña maltratashaqtinkupas, Diosmantan mañakurqan k’aspipi clavaqnin soldadokunapaq. Chaymi Discurso qoqqa uyariqkunata kallpacharqan chaykunapi yuyaymanaspa Jesusta astawan munakunankupaq. Hinaspan willarqan 2010 watapaq texto 1 Corintios 13:7, 8 kasqanta, chaypin nin: ‘Munakuqqa tukuy imapin pacienciakun. Munakuyqa wiñaypaqmi’, nispa. Chhaynaqa manan wiñay kawsayllatachu suyashanchis, hukkunata munakuspa hinallataq munasqa kaspa wiñaypaq kawsaytawanmi suyakushanchis.

¿Purinmanchu carro mana gasolinayoq?

Chaymantataq Samuel Herd iñiqmasinchis discursota qorqan. Paymi khaynata qallarirqan: “Huk amigonchis carronpi apayta munawasunman 50 kilometrosta, ñoqanchistaq reparasunman pisichalla gasolinan kasqanta. Chayta willaqtinchistaq niwasunman: ‘Ama llakikuychu, huk galón gasolinayoqmi kashan’, nispa. Kuskan ñanpitaq ichaqa carro sayarparipunman. ¿Allinchu karqan pisi gasolinallayoqta chay carrota purichiy? Manan riki, aswan allinmi kanman karqan askha gasolinayoqta carrota purichimuy. Chhaynallataqmi Dios serviyninchispipas, allin cristiano kananchispaqqa astawanmi paymanta yachananchis”, nispa.

Espiritualpi ama chay carro hina kananchispaqqa, hunt’asqatan chaskikunanchis Jehová Diospa qowasqanchista. Chaytaqa ruwasunman sapa p’unchay Bibliata estudiaspan, ichaqa manan leeyllachu leenanchis, aswanpas allintan entiendenanchis ima nisqanta. Manataqmi saqenanchischu  Familiantin Diosta Yupaychana Ch’isita. Sapa semana chayta aparisun chayqa, carromanpas gasolinata hich’aykushasunman hinan kanqa. Huñunakuykunamanpas mana faltaytan rinanchis, chaypin Bibliata estudianchis. Chaymantapas thak sitiopin Jehová Diospa yachachikuyninkunapi yuyaymanananchis. Chhaynapin salmo takita qelqaq hina nisun: “Ñawpa p’unchaykunatan yuyarini, tukuy ruwasqaykikunatan yuyaymanani, makiykiq ruwasqankunatan qhawarini”, nispa (Sal. 143:5).

‘Chanin runakunaqa k’ancharinqakun’

Tukuypitaq John Barr iñiqmasinchis rimarqan trigo chakramanta chirisuela qoramantawan (Mat. 13:24-30, 38, 43). Chay rikch’anachiymi rimashan trigota ichhukuqtin “hanaq pacha qhapaqsuyu wawakuna[ta]” huñukuspa chirisuela qoramanta t’aqakunanta, chhaynapi chay qora ruphachisqa kananpaq.

Barr iñiqmasinchismi nirqan mana tukuy tiempochu trigota huñukunanmanta. Leemurqantaq Mateo 24:34 textota, chaypin nishan: “Cheqaqtan niykichis, manan kay mirayqa tukukunqachu lliw chaykuna hunt’akunankama”, nispa. Iskay kutitan khaynata leerqan: “1914 watapi hanaq pachapi Cristo kamachiyta qallarisqanmanta señalta rikuq wakin akllasqa cristianokunan kaq tiempopi kawsananku karqan manchay ñak’ariypa qallariyninta rikuq wakin akllasqa cristianokunawan”, nispa. Manan yachakunchu chay miray hayk’aqkama kananta. Paykunan ‘miray’ kanku kawsayninku huk tiempopi tupasqanrayku. Akllasqa iñiqmasinchiskunaqa manaña wiñaymasintinchu kanku chaypas, ‘mirayqa’ huk tiempopin kaq watakunallapi kawsarqanku. Manchay ñak’ariy qallariqtinqa kawsashanqakuraqmi wakin akllasqa cristianokuna, paykunaq kawsayninmi huk tiempopi tuparqan 1914 watapi señalta rikuq wakin akllasqakunaq kawsayninwan. ¡Maytan kusikunchis chayta yachaspa!

Akllasqa cristianokunaqa kusikuywanmi suyakushanku hanaq pachapi premionkuta chaskinankupaq. Ichaqa lliw cristianokunan tukuykama Diospaq hunt’aq kananchis hanaq pachapaq otaq kay pachapaq suyakuyniyoqña kanchis chaypas. ¡Ima sumaqmi ‘trigoq’ huñukusqan tiempopi kawsayqa!

Takiyta tukuspankun Umalli T’aqamanta Theodore Jaracz iñiqmasinchis mañakuywan tukurqan. ¡Ima munaymi chay huñukuyqa karqan!

[Uranpi willakuy]

[5 paginapi recuadro]

UMALLIKUNAPAQ ESCUELA

Anthony Morris iñiqmasinchismi willarqan lliw umallikuna preparacionta chaskinankumanta. 2008 wata qallarillashaqtinmi Estados Unidospi Patterson nisqapi umallikunapaq huk escuela aparikurqan. Chay escuelaqa 72 kutitañan ruwakurqan, chaykamaqa 6.720 umallikunañan cursota chaskirqanku. Ichaqa Estados Unidosllapin 86.000 masraq umallikuna kanku, chaymi askharaq ruwana kasharqan. Chayraykun Umalli T’aqa aprobarqan Brooklyn llaqtapi huk escuela aparikunanpaq, chaymi qallarirqan 2009 wata 7 diciembre killapi.

Brooklynpi yachachinankupaqmi Pattersonpi iskay killa preparakunan karqan tawa watukuq umallikunata. Chaymantataq tawatawan preparakunan karqan, paykunañataq chay escuelata Huñunakuy Wasikunapi aparinankupaq. Chayqa ruwakunan karqan chunka iskayniyoq yachachiqkuna kanankama, paykunan Estados Unidospi sapa semana iskay-iskaymanta soqta escuelakunapi yachachinanku karqan. Chaymantataq tawa yachachiqkunata preparakunan karqan castellano simipi yachachinankupaq. Chay escuelaqa manan Escuela del Ministerio del Reino nisqaq rantinchu. Aswanpas chaypin umallikunata yanapakunqa iñiyninkupi allin kallpachasqa kanankupaq. Pachantinpi kaq sucursalkunan chay escuelata aparinqaku 2011 watapi Huñunakuy Wasikunapi, Hatun Huñunakuy Wasikunapi ima.

[4 paginapi fotokuna]

Huñunakuytan qallarirqanku mosoq takina libronchismanta takispanku Jehová Diosman takisun