¿Qosaykichu wasancharqasunki?

MARGARITAWAN qosan Raulwanqa unayñan tukuy tiemponkuwan Jehová Diosta servisharqanku. * Raulmi ichaqa ñawpaq wawankuq nacesqan qhepallaman pisi-pisimanta Diosmanta karunchakapuspa qhelli huchapi puriyta qallarirqan, chaymi Diospa llaqtanmanta qarqochikapurqan. Margaritan nin: “Chaykuna sucedeqtinqa wañukapuytaraqmi munarqani, sinchi k’irisqan sonqoypi sientekurqani, manataqmi imanakuytapas atirqanichu”, nispa.

Juanapas sinchi k’irisqan sonqonpi sientekurqan casarakusqan qhepallaman qosan maqayta qallariqtin. Paymi willakun: “Ñawpaq kutipi maqawaqtinmi pisichasqa sientekurqani, p’enqaypitaq rikukurqani. Ichaqa pampachayta mañakuwaqtinmi pampacharqani. Chhaynan karqan sapa kuti maqawaqtin, cristiana kasqayraykun yuyaykurqani maqawasqanmanta pampachanay kasqanta. Chaymanta umallikunaman hukkunamanpas willakuytaqa qosaymantapas mana allinta rimashayman hinatan qhawariq kani. Payqa watan-watanmi maqawarqan ñoqataq pampachaq kani. Chaymantapas mana munasqa sientekuspaymi yuyaykurqani imatapas ruwaspa munachikunaypaq. Wawaytawan saqerpariwasqanku qhepamantaq ñoqa huchachakurqani ripusqanmanta  ‘ichapaschá astawanraq kallpachakuyman karqan’ nispay”, nispa.

Yaqapaschá qanpas qosayki sonqoykita k’irisqanmanta Margarita otaq Juana hina sinchi llakisqa kashanki, chaymantapas iñiyniykipi pisipashanki, qolqeykipas manaña aypashasunkichu. * Bibliapi profeciaq nisqan hinan ‘sasa tiempokunapi’ kawsashanchis. Chay profecian willan ‘tukukuy qaylla p’unchaykunapi’ familiakuna sasachakuypi tarikunanta, manaña paykunapura munanakunankuta, askha runakunataq imayna kawsasqankuwan rikuchinanku karqan Diosta mana servisqankuta (2 Tim. 3:1-5). Cheqaq cristianokunapas chhayna sasachakuykunapin tarikunchis. Chhaynaqa, ¿iman yanapasunkiman llakikuyniykita atipanaykipaq?

Manan qanchu huchayoq kanki

Yaqapaschá tapukunki: “¿Imaynataq munakusqay runari khayna mana allinta ruwawan?” nispa. Chaymantapas qan kikiykipaschá huchachakushanki qosaykiq mana allin ruwasqanmanta.

Jesustapas huknin amigonmi enemigonkunaman hap’ichispa sonqonta k’irirqan. Payqa chunka iskayniyoq apostolninkunata akllananpaqqa allintan qhawarirqan Diosmantapas mañakurqanmi, llapankupas tukuy sonqonkuwan Diosta serviqmi karqanku. Chaychá Jesusqa nishu k’irisqa sientekurqan Judas pay contra hatariqtin (Luc. 6:12-16). Jehová Diosqa manan Wawanta huchacharqanchu Judaspa ruwasqanmanta.

Casadokunaqa huchayoq kasqankuraykun imapipas pantanku. Salmo takita qelqaqmi chaymanta nirqan: “Señor Diosníy, huchakunatachus yuyashawaq chayqa, ¿pitaq manaqa huchachasqachu kanman?” nispa (Sal. 130:3). Chayraykun casadokunaqa Jehová Dios hina listo kashananku hukkunaq pantasqanta pampachanankupaq (1 Ped. 4:8).

“Sapankanchismi kikinchismanta Diosman cuentata qosun” (Rom. 14:12). Maqakuq otaq millayta k’amikuq qosaqa Diosmanmi chay ruwasqanmanta cuentata qonqa. Diosqa manan allinpaqchu qhawarin chay ruwaykunata, chaymi qosaqa mana imaraykupas esposanta millayta tratananchu (Sal. 11:5; Efe. 5:33; Col. 3:6-8). K’arak phiñakuyta mana saqepuyta munaq cristianokunaqa Diospa llaqtanmantan qarqosqa kanqaku (Gál. 5:19-21; 2 Juan 9, 10). Maltratasqa cristianakunaqa manan manchakunankuchu qosanku mana allin tratasqankumanta umallikunaman willakuyta. Jehová Diosqa anchatan khuyapayan chay cristianakunataqa.

Wasanchay huchaman urmaq cristianoqa esposan contra huchallikusqanmantapas Dios contran huchallikullantaq (Mat. 19:4-9; Heb. 13:4). Sichus engañasqa cristiana kallpachakurqan Bibliaq nisqanman hina kawsananpaq chayqa, manan imaraykupas huchachakunanchu qosanpa pantasqanmanta.

Jehová Diosqa yachanmi imayna sientekusqaykita. Paypas nishu k’irisqan sientekurqan Israel runakuna wasanchaqtinku (Isa. 54:5, 6; Jer. 3:1, 6-10). Chaymi Diosqa allinta yachan qosaykiq mana allin ruwasqanrayku hayk’a waqasqaykita (Mal. 2:13, 14). Yachantaqmi kallpachana necesitasqaykita.

¿Imaynatan Jehová Dios kallpachasunkiman?

Jehová Diosqa iñiqmasikunawanmi kallpachasunki. Juana iñiqmasinchismi chaymanta nin: “Qosaywan t’aqakapunaymanta nishu llakisqa kashaqtiymi anchata kallpachawarqan iñiq t’aqakunata watukuq umalli. 1 Corintios 7:15 textota leewaspanmi yuyaymanachiwarqan. Sumaqllata rimapayawasqanmi sonqoyta thak nichirqan, chaymi manaña  huchachakurqanichu”, nispa. *

Margaritapas yuyarinmi imaynata Jehová Dios iñiqmasikunawan yanapasqanmanta. Paymi nin: “Qosayqa manan huchapi purisqanta saqepuyta munarqanchu, chaymi wawaykunawan huk llaqtaman ripurqani. Chaypin iskay cuartota alquilakurqani. Qhepan p’unchay nishu llakisqa q’epiykunata paskashaqtiymi punkuta takakamurqanku. Ñoqaqa wasiq dueñon kananpaqmi piensarqani. Ichaqa mamitayta familiaytawan Bibliamanta yachachiwaqniyku hermanan kasqa. Payqa wasiyoqtan maskhamushasqa Bibliamanta yachachinanpaq, manan yuyaykullasqapaschu chaypi tariwananpaq. ¡Maytan kusikurqani rikuspay! Ima pasawasqanmanta willakusqay qhepamantaq iskayniyku waqaykurqayku. Hinan payqa yanapawarqan chay p’unchay huñunakuyman rinaykupaq. Lliw iñiqmasikunan kusikuywan chaskiwarqanku, umallikunataq imachus necesitakusqanta ruwarqanku iñiyniykupi yanapawanankupaq”, nispa.

¿Imaynatan iñiqmasikuna yanapakunkuman?

Iñiqmasikunaqa imaymanapin yanapakuyta atinkuman. Margarita llank’ayta qallariqtinmi huk familia payta yanaparqan necesitakuqtin escuelamanta lloqsimusqanku qhepaman wawankunata qhawaypi.

Paymi nin: “Iñiqmasiykunataqa astawanqa agradecekuni ñoqata wawaykunatawan predicacionman apawasqankumantan”, nispa. Chay hinata yanapakuqkunaqa Gálatas 6:2 textoq nisqantan hunt’anku, chaypin nin: “Ima sasachakuykunaña kaqtinpas hukkuna hukkunawan yanapaykunakuychis, ahinapin Cristoq kamachikuy siminta hunt’ankichis”, nispa.

Hukkunaq huchanrayku ñak’ariqkunaqa anchatan agradecekunku chhaynata yanapasqankumanta. Benita sutiyoq iñiqmasinchistan qosan saqerparisqa tawa wawakunantinta, 15.000 dólares manu paganayoqta ima. Paymi willakun: “Jehová Diospa qowasqan munakuq iñiqmasiykunaq mana yanapayninwanqa manan sasachakuyniyta atipayta atiymanchu karqan. Paykunan sumaqta wawaykunata yanaparqanku, chaymi mayta paykunata agradecekuni wawaykuna iñiyninkupi allin takyasqa kasqankumanta. Umallikunapas makillan kasharqanku yuyaychawanankupaq, nishu llakisqa kashaqtiypas uyariwaqkun”, nispa (Mar. 10:29, 30).

 Mayninpiqa manan allinchu kanman sasachakuyninkumanta rimay (Ecl. 3:7). Margaritan nin: “Cristianamasiykunawanqa astawanmi rimaq kani chayllaraq reqsishasqay iñiqmasikunamanta, predicacionmanta, Biblia yachachiymanta, wawakunamanta, hukkunamantapas; sasachakuyniykunamantan ichaqa mana rimaqchu kani. Anchatan paykunata agradecekuni chaymanta mana tapupayawasqankumanta”, nispa.

Ama vengakuychu

Wakin engañasqa esposakunaqa manan huchachakunkuchu qosankuq pantasqanmanta. Aswanmi k’irisqa sientekunku qosankuq huchanrayku nishuta ñak’arisqankumanta. Ichaqa sonqonkupi phiñakuyta wiñachinkuman chayqa, aswan importante kaqtan qonqapunkuman, manañataq tukuy sonqonkuwanchu Diosta servinkuman. Chaymantapas yaqapaschá vengakuypi yuyaykunkuman.

Sichus reparashanki sonqoykipi phiñakuy saphichakushasqanta chayqa, yuyaykuy Josuepa Calebpa ejemplonpi. Paykunaqa wañuytapas mana manchakuspan Prometesqa Hallp’ata qhawaq rirqanku. Riqmasin qharikunaqa iñiyninkupi pisipaspankun Israel runakunaq sonqonta waqllichirqanku Diosta ama kasukunankupaq. Josuewan Calebwanmi ichaqa Israel runakunata kallpacharqanku Diospi confianankupaq, paykunataq rumiwan ch’aqeyta munarqanku (Núm. 13:25–14:10). Manaña huchayoqchu karqanku chaypas, llaqtamasinkuq huchanraykun tawa chunka watata ch’inneq aqo pampapi purinanku karqan.

Josuewan Calebwanqa maytachá phiñakurqanku llaqtamasinkuq mana kasukusqankumanta, ichaqa manan chayraykuchu phiñasqalla karqanku. Aswanmi kallpachakurqanku tukuy sonqonkuwan Diosta servishanallankupaq. Tawa chunka wata tukukapuqtintaq Levi runakunawan kuska Prometesqa Hallp’aman haykuspankun premionkuta chaskirqanku, paykunallan karqan ch’inneq pampapi wañupuq runakunaq wiñaymasinqa (Núm. 14:28-30; Jos. 14:6-12).

Unay tiempopaschá qosayki wasanchasqasuykimanta llakisqa kanki. Paymanta t’aqakapusqaykiraykupaschá nishu llakikuypi tarikunki, hinaspapas manapaschá qolqeyki aypasunkichu. Ichaqa ama chaykunawan pisipaychu. Kamachikuyninkunata mana kasukuq runakunataqa Jehová Diosñan juzganqa, imaynan ch’inneq pampapi Israel runakunata juzgarqan hinata (Heb. 10:30, 31; 13:4).

Atipawaqmi llakikuyniykita

Mana allin kaqkunapi yuyaykunaykimantaqa Diospa yachachikuyninkunapi yuyaykuy. Juanan willakun: “Qhawaq, ¡Despertad! resvistakunamanta grabacionta uyarisqaymi yanapawarqan ama pisipanaypaq. Huñunakuykunapas kallpachawarqanmi, chaypi tapuykunaman kutichisqaypas qonqachiwarqanmi mana allin yuyaykusqaykunata. Diospi iñinankupaq runakunata yanapasqaymi iñiyniyta kallpacharqan. Bibliamanta yachashaq runakunata yanapasqaytaq aswan importante kaqkunapi yuyaykachiwarqan”, nispa.

Benitan willakun: “Huñunakuykunaman risqaymi, predicacionman lloqsisqay iman yanapawarqan ama pisipanaypaq. Chaymi wawaykunatawan astawan hukllachawarqanku hinallataq iñiqmasikunawanpas. Nishu sasachakuypi tarikusqaymi qhawarichiwarqan imakunapi allinyanay kasqanta. Sasaña kaqtinpas Jehová Diospa yanapayninwanqa manan pisiparqanichu”, nispa.

Qanpas chhayna sasachakuypi tarikuspaqa atiwaqmi llakikuyniyki atipayta. Qosayki wasanchasqasuykimanta nishu llakisqaña kashanki chaypas, kallpachakuy apóstol Pabloq yuyaychasqanman hina kawsanaykipaq, paymi nirqan: “Amayá allinkaqta ruwaspaqa sayk’usunchu, manachus pisi kallpayasun chayqa, tiemponpin cosechasunchis”, nispa (Gál. 6:9).

[Uranpi willakuykuna]

[31 paginapi foto]

Wasanchasqa cristianakunaqa agradecekunkun predicacionpi yanapasqankumanta