Allintapuni llank’asun Diospa cosechanpi

“Señorpa llank’ananpi aswan-aswanta [llank’aychis].” (1 COR. 15:58.)

1. ¿Imamantan Jesús rimarqan yachachisqankunaman?

KINSA chunka wata tukuypin Jesusqa Samariapi Sicar nisqa llaqtaq chimpanpi p’uytuq ladonpi samasharqan, chaypin yachachisqankunata nirqan: “Chakrakunata allinta qhawariychis, ichhunapaqmi poqosqaña kashan”, nispa (Juan 4:35). Payqa manan trigo ichhuymantachu rimasharqan, aswanmi payta qatikunankupaq allin sonqoyoq runakuna yachachinamanta. Askhan ruwananku karqan, ichaqa pisi tiempollan chaypaq karqan.

2, 3. a) ¿Imaynapin yachanchis cosecha tiempopi kashasqanchista? b) ¿Imamantan kay estudiopi yachasunchis?

² Kunanpas ‘chakrakunaqa’ “ichhunapaqmi poqosqaña kashan”. Chayraykun sapa wata ancha askha runakunaman kawsay qoq yachachikuyta predicakushan, waranqanpitaq chay yachachikuyta chaskispa bautizakushanku. Chaymi kallpachakunanchis chay hatun llank’aypi yanapakunanchispaq, manan hayk’aqpas chhayna llank’ayqa karqanchu. Jehová Diosmi chayta kamachiwanchis, paymi Chakrayoqqa. Chayraykun allinta qhawarikunanchis ‘aswan-aswantachu llank’ashanchis’ chayta (1 Cor. 15:58).

³ Kay pachapi kashaspan Jesusqa kinsa wata kuskan allinta yachachirqan qatikuqninkunata chay llank’ayta hunt’anankupaq. Kay estudiopin yachasunchis kinsa yachachikuyninkunamanta. Chaykunamanta yachaspan allin preparasqa kashasun kay tiempo cosechapi tukuy atisqanchista ruwananchispaq.

Huch’uyyaykukuqmi kana

4. ¿Imaynatan Jesús yachachirqan huch’uyyaykukuq kayta?

⁴ Huk kutinmi Jesuspa qatikuqninkuna simipura hap’inakurqanku mayqenninkuchus aswan importante kasqanmanta, paykunaqa phiñasqallaraqchá kasharqanku chay ruwasqankumanta. Hinan Jesusqa paykunata anyananpaq huk wawata waqyaspa chawpinkupi sayaykachirqan, hinaspan nirqan: “Pipas kay wawa hina huch’uyyaykukuqmi Hanaq pacha qhapaqsuyupiqa qollana [importante]”, nispa (leey Mateo 18:1-4). Runakunaqa pitapas allinpaqqa qhawarinku atiyniyoq otaq qhapaq kaqtinmi, Jesusmi ichaqa qatikuqninkunata yachachiyta munarqan Jehová Diospa allin qhawarisqan kanankupaqqa ‘huch’uyyaykukuq’ kanankuta.

5, 6. ¿Imaraykun huch’uyyaykukuq kananchis? ¿Imatan huk iñiqmasinchismanta yachasunman?

⁵ Runakunan kallpachakushanku atiyniyoq qhapaq kanankupaq, chay yuyaywantaqmi tukuy imatapas ruwanku, chaymi manaña tiemponkupas kanchu Diosmanta yachanankupaq (Mat. 13:22). Cristianokunan ichaqa yachanku Diospa sonqonta kusichinankupaqqa mana chay runakuna hinachu kawsanankuta, aswanpas ‘huch’uyyaykukuq’ kanankuta. Chaymi hukkunata aswan allinpaq qhawarinku kikinkumantaqa (Mat. 6:24; 2 Cor. 11:7; Fili. 3:8).

⁶ Francisco iñiqmasinchismanta yachasun. Payqa waynallaraq kashaspan universidadmanta lloqsipurqan precursor kananrayku. Khaynatan willakun: “Tiempowanqa casarakapurqanin, ichaqa esposaywanmi rimanakurqayku  tukuy tiempoykuwan Diosta servishanallaykupaq, chaymi mana qolqe maskhaypichu afanakurqani. Wawakunayoq kapuspaykupas manan pisiparqaykuchu, Jehová Diosmi yanapawarqanku tukuy tiempoykuwan paypaq llank’ashanaykupaq. Kinsa chunka watañan umalli kashani, chay watakunapiqa imaymana llank’aykunapin yanapakurqani Diospa llaqtanpi. Chaymi manapuni pesapakuymanchu qhapaq kayta mana maskhasqaymanta”, nispa.

7. ¿Imakunata ruwaspan kasukurqanki Romanos 12:16 nisqanta?

⁷ Biblian nin: “Ama hatunchakuychischu, aswanpas pisichasqa runakunawan kuskachakuychis”, nispa (Rom. 12:16). Sichus mana maskhasunchu qhapaq kaykunata, allin qhawarisqa kaytapas chayqa, ancha kusikuytan tarisun Jesusta qatikunankupaq askha runakuna yanapasqanchismanta, hinallataq Dios serviyninchispi huk ruwaykunata aparisqanchismantapas (Mat. 4:19, 20; Luc. 18:28-30).

Allin llank’aqmi kana

8, 9. a) Pisillapi willay bolsa qolqemanta rikch’anachiyta. b) ¿Pikunatan anchata kallpachanqa chay rikch’anachiy?

⁸ Jehová Diospa cosechanpi allinta yanapakunanchispaqqa allin llank’aqmi kananchis. Chaytan Jesús qhawarichirqan bolsa qolqemanta rikch’anachiy rimasqanpi. * Chaypin rimashan huk patronmanta, paymi manaraq karu llaqtaman ripushaspa kinsa kamachinkunaman askha qolqeta qorqan. Hukninmanmi qorqan phisqa bolsa qolqeta, hukninmantaq iskay bolsata, hukkaqmantaq huk bolsata. Patronninku ripuqtinqa iskay kamachikunallan usqhaylla ‘llank’arqanku’ qolqeta mirachinankupaq. Kinsakaq kamachin ichaqa “qella” kasqanrayku p’amparqorqan patronninpa qolqenta. Kutimuspan patronqa “allinmi” nirqan allin llank’aq kamachinkunata, hinaspan “hatun llank’anaman” churarqan. Qella kamachitan ichaqa qechupurqan qolqe qosqanta, hinaspa qarqopurqan wasinmanta (Mat. 25:14-30).

⁹ Llapanchispas chay allin llank’aq kamachikuna hinachá tukuy atisqanchista ruwayta munanchis Diospa cosechanpi llank’ananchispaq. Ichaqa wakinninchisqa manapaschá tukuy atisqanchista ruwayta atinchischu familianchista uywanapaq ch’isiyaq llank’asqanchisrayku, otaq manaña wayna-sipaskuna hinachu qhali, kallpayoq kasqanchisrayku. Chhayna kaqtinqa ancha allinpunin kanqa bolsa qolqemanta rikch’anachiyta yuyariy.

10. ¿Imaynapin yachanchis patronqa kamachinkunaman atinallankuta kamachisqanta? ¿Imaraykun chay ruwasqan kallpachawanchis?

 ¹⁰ Patronqa yacharqanmi kamachinkuna mana igual llank’aqchu kasqankuta, chaymi ‘sapankaman qorqan llank’ay atisqankuman hina’ (Mat. 25:15). Ñawpaq kamachiqa chaskisqanman hinan aswan askhata qolqeta mirachirqan. Chaywanpas patronqa iskaykaq kamachiq llank’asqantaqa allinpaqmi qhawarirqan, chaymi nirqan: “Allin hunt’aq kamachi”, nispa; iskayninkumantaq kaqllawan premiarqan (Mat. 25:21, 23). Jehová Diospas yachanmi sapankanchis imaynapichus tarikusqanchisman hina cosecha llank’aypi yanapakusqanchista, tukuy sonqomanta ruwananchispaq hayk’a kallpachakusqanchistapas, manataqmi hinallatachu qhawarparinqa chay ruwasqanchista (Mar. 14:3-9; leey Lucas 21:1-4).

11. Imaymana ruwanayoq kaqkunapas ¿atinkumanchu cosecha llank’aypi allinta yanapakuyta? Willay Selmiramanta.

¹¹ Brasil llaqtayoq Selmira iñiqmasinchismanta yachasun. Paypa ejemplonmi rikuchiwanchis Diospaq tukuy atisqanchista llank’ananchispaq mana allinpiraqchu tarikunanchista. Iskay chunka wata hinañan qosanta suwakuna wañuchirqanku, chaymi sapallan kinsa warmi wawankunata uywanan karqan. Empleadataq karqan chayqa p’unchaynintinmi llank’aq, hunt’a carropitaq viajaq; chaywanpas kallpachakurqanmi precursora kananpaq, qhepamanqa iskay ususinkunapas precursoran kapurqanku. Paymi willakun: “Chay tiempopiqa iskay chunka más runakunamanmi estudiota qoq kani, paykunaqa familiay hinan kanku. Maytan kusikuni paykunawan amigontin kasqaymanta. Chay kusikuytaqa manan qoriwanpas ni imawanpas rantiyta atiymanchu karqan”, nispa. Rikusqanchis hina, Jehová Diosqa anchatan Selmirata yanaparqan allin llank’aq kasqanmanta.

12. ¿Imaynatan allin llank’aq kasqanchista rikuchisunman?

¹² Manaña llapanchischu askha hora predicayta atisunman chaypas, llapanchismi atisunman aswan allin predicayta. Chaypaqqa Predicayta Yachanapaq Huñunakuypi yachasqanchisman hinan ruwananchis. Chaypin sapa semana yachachiwanchis allin predicaq kananchispaq, lliw runaman Diosmanta willarinanchispaqpas (2 Tim. 2:15). Chaymantapas ichapaschá wakin ruwananchiskunata seqesunman otaq qhepamanña ruwasunman, chhaynapi astawan iñiqmasinchiskunawan predicananchispaq (Col. 4:5).

13. ¿Iman kallpachawasun allin llank’aq kananchispaq?

¹³ Allin llank’aq kananchispaqqa Jehová Diostan munakunanchis (Sal. 40:8). Jesuspa rimasqan qella kamachiqa manchakurqanmi patronninta, paypaqqa phiña runa mana atinata mañakuqmi karqan. Chaymi qolqetaqa pampaman pakamurqan llank’aspa mirachinanmantaqa. ¿Chay kamachi hinachu kayta munasunman? Manan riki. Chayrayku kallpachakusun sapa p’unchay astawan Jehová Diosman asuykunanchispaq. Chaypaqmi estudiaspa yuyaymanashanallanchis Diospa munakuyninpi, paciencianpi, khuyapayakuyninpi, may sumaqpuni kasqanpi ima, chaymi sonqonchista kuyurichinqa Diospaq astawan llank’ananchispaq (Luc. 6:45; Fili. 1:9-11).

“Ch’uya kaychis”

14. ¿Imaynan kananku Diospa cosenchanpi llank’aqkuna?

¹⁴ Hebreo Rimay Qelqakunaq nisqanman hinan apóstol Pedroqa cristianokunata nirqan: “Imaynan waqyaqniykichis Diosqa ch’uya, chay hinallataq qankunapas tukuy kawsayniykichispi ch’uya kaychis. Diosmi nin: ‘Ch’uya kaychis, ñoqa ch’uya kasqayrayku’”, nispa (1 Ped. 1:15, 16; Lev. 19:2; Deu. 18:13). Chhaynaqa Diospa cosechanpi llank’aqkunaqa  ch’uyan kananchis. ¿Iman ch’uyanchawasunman? Diospa cheqaq yachachikuyninkuna.

15. ¿Imatan ruwawasunman Diospa simin?

¹⁵ Bibliapiqa Diospa yachachikuyninkunatan rikch’anachikun ch’uyanchaq unuwan. Chaymi apóstol Pablo rimarqan Cristoq hanaq pachapaq akllasqakunata “unupi mayllispa Diospa siminwan” ch’uyanchachisqanmanta, chhaynapin akllasqakunaqa ‘mana qhelliyoq’ kapunku Jehová Diospa ñawpaqenpi (Efe. 5:25-27). Unay watakunañan Jesuspas rimasqa Diospa siminqa ch’uyanchaq kasqanmanta. Paymi qatikuqninkunata nirqan: “Qankunaqa limpioñan kankichis, qankunaman rimaykusqay simikunawan”, nispa (Juan 15:3). Chhaynaqa, Jehová Dios chaskiwananchispaqqa siminwanmi ch’uyanchachikunanchis.

16. ¿Imatan ruwananchis Diospa ñawpaqenpi limpio kananchispaq?

¹⁶ Diospa cosechanpi llank’ay munaqqa ch’uyanchakunanmi ima qhelli ruwaymantapas. Hinaspan kallpachakunan limpiolla kananpaq, Jehová Diospa kamachikuyninkunatapas llapantan hunt’anan (leey 1 Pedro 1:14-16). Imaynan cuerponchis limpio kananpaqqa sapa kutilla bañakunchis, chhaynallataqmi Diospa qhawarinanpaq limpio kananchispaqpas sapa kutilla paypa yachachikuyninkunawan ch’uyanchakunanchis. Chaypaqmi Bibliata leenanchis, huñunakuykunaman hamunanchis, kallpachakunanchistaq Diospa kamachikuyninkunata kasukunanchispaq. Chhaynapin mana urmasunchu huchaman, karunchakusuntaq kay pachaq espiritunmanta (Sal. 119:9; Sant. 1:21-25). Diospa yachachikuykunawanqa ‘mayllisqan’ kasunman hatun huchakunamantapas. ¡Maytan kusikunchis chayta yachaspa! (1 Cor. 6:9-11.)

17. ¿Bibliaq ima kamachikuykunatan kasukunanchis limpio kananchispaq?

¹⁷ ¿Tukuy sonqowanchu Diospa yachachikuyninkunawan ch’uyanchachikunchis? Chaypaqqa tukuy imapin kasukuq kananchis. ¿Karunchakunchischu mana allin pukllaykunamanta qhelli kusirikuykunamantapas? (Sal. 101:3.) ¿Yanqapas qasichu huñukushanchis mana iñiqkunawan? (1 Cor. 15:33.) ¿Tukuy atisqanchistachu ruwashanchis imapi pantashasqanchista saqenanchispaq? (Col. 3:5.) ¿T’aqasqachu kashanchis política nisqamanta? ¿Cuidakunchischu pukllaykuna kaqtin ama llaqtanchismanta umata hoqarinanchispaq? (Sant. 4:4.)

18. ¿Imatan ruwayta atisun Diospa ñawpaqenpi limpio kaspa?

¹⁸ Tukuy chaykunapi Diospa munasqanta ruwasunchis chayqa, allin cosechaqkunan kasunchis. Hanaq pachapaq akllasqa cristianokunata uvas sach’aq k’allmankunaman rikch’anachispan Jesusqa nirqan: “[Yayayqa] mayqen k’allmapas ñoqapi mana ruruqtaqa wit’unmi, ruruq k’allmatataqmi kuchupan [limpian], astawan rurunanpaq”, nispa (Juan 15:2). Chhaynaqa, Bibliaq yachachikuyninkunawan ch’uyanchachikuspaqa aswan allintan llank’asun Diospa cosechanpi.

¡Kusikunapaqmi Diospa cosechanpi llank’ayqa!

19. ¿Imakunatan Jesuspa qatikuqninkuna ruwarqanku allin cosechaq kasqankurayku?

¹⁹ 33 watapi Pentecostés fiestapin Jesuspa yachachikuyninman hina kawsaqkunaqa santo espirituta chaskirqanku, chaywanmi kallpachakurqanku “kay pachaq k’uchunkunakamaraq” predicanankupaq (Hech. 1:8).  Paykunaqa anchatan yanapakurqanku allin willakuykuna “kay pachantinpi runakunaman” willasqa kananpaq. Wakinqa Umalli T’aqapin karqanku, wakintaq misionero karqanku, wakintaq iñiq t’aqakunata kallpachaspa puriqku (Col. 1:23). ¡Ancha sumaq llank’aypin tarikurqanku, runakunamanpas ancha kusikuytan aparqanku!

20. a) ¿Ima kusikuytan tarirqanki Diospa cosechanpi llank’aspa? b) ¿Imatan tukuy sonqowan ruwayta munanchis? ¿Imapaqmi kallpachakushanallanchis?

²⁰ Sichus huch’uyyaykuq kasun, allinta llank’asun, Diospa kamachikuyninkunatapas kasukusun chayqa, Diospaq hinan llank’ayninchis kanqa. Ñoqanchisqa manan mana iñiq runakuna hinachu aycha kusichiyllapi, qolqe maskhayllapi purinchis, chaymi mana paykuna hinachu uma nanaypi llakikuypi tarikunchis, aswanmi kusisqa kawsanchis (Sal. 126:6). Chaymantapas yachanchismi ‘Señorwan llank’asqanchisqa mana yanqapaqchu kasqanta’ (1 Cor. 15:58). Jehová Diosqa yachanmi ‘payta munakuspa’ cosenchanpi llank’asqanchista, chaymi huk allin premiota qowasunchis (Heb. 6:10-12).

[Uranpi willakuy]

¿Yuyarishanchischu?

• ¿Imanaqtinmi huch’uyyaykukuq kananchis?

• ¿Imaynatan allin llank’aq kasunman Diospa cosechanpi?

• ¿Imaraykun Diospa consechanpi llank’aqkuna limpio kananchis?

[Tapuykuna]

[17 paginapi foto]

Huch’uyyaykukuspa necesitasqallanchiswan kawsaspan kusisqa Diosta servisun