Makilla kashay predicanaykipaq

¿MAKILLACHU kashanki maypiña kaspapas piwanña tupaspapas predicanaykipaq? Finlandia nacionpin Turku llaqtapi iñiqmasinchiskuna makilla kasharqanku pimanpas predicanankupaq, chayta ruwaspan askha runakunaman predicarqanku.

Turku llaqtamanmi Asia ladomanta runakuna chayamurqanku huk hatun barco ruwayta tukunankupaq. Hinan huk iñiqmasinchis yacharqorqan llaqtaq hotelninkunapi qorpachakusqankuta, chaymanta sapa tutamanta carropi llank’anankuman risqankutapas. Chaymi chayta usqhaylla willarqan chay llaqtapi inglés rimaq iñiqmasinchiskunaman.

Chayta yacharqospan iñiqmasinchiskunaqa rimakunakurqanku chay runakunaman Diospa Gobiernonmanta predicanankupaq. Chay semanatan domingo p’unchayta chunka iñiqmasinchiskuna carroq paraderonpi huñukurqanku las siete tutamantanta. Mana pi llank’aqtapas rikuspankun piensarqanku tardeta chayanankupaq otaq Turkumanta pasapunankupaqña. Ichaqa chayllamanmi huk llank’aq rikhurimurqan. Pisi-pisimantan llapanku chayamurqanku. Chaymi iñiqmasinchiskunaqa paykunaman predicayta qallarirqanku, inglés rimaypi askha qelqanchiskunatataq qorqanku. Huk horamanta hinataq carro lloqsirqan chayqa, askhatan rimarqanku. Qorqankutaq 126 folletokunata, 329 revistakunatawan.

Allintataq chay runakuna uyarikurqanku chayqa, wakmantan iñiqmasinchiskuna rimanakurqanku hawa semanapi predicanankupaq watukuq umalli visitaqtin. Watukuq umalliqa las seis y media tutamantantan paraykamushaqtin predicananpaq huñunakuyta aparirqan, hinan 24 iñiqmasinchiskuna rirqanku carroq paraderonman. Ñawpaq kuti predicasqankupin tarisqaku Filipinas llaqtayoq runakunata, chaymi tagalo rimaypi qelqanchiskunata askhata aparqanku. Chay tutamantan iñiqmasinchiskunaqa chay runakunaman qorqanku 7 librota, 69 folletokunata, 479 revistakunatawan. Chay iñiqmasinchiskunaq sonqonqa llanllarirqanraqmi kusikuymanta.

Chay runakuna manaraq llaqtankuman kutipushaqtinkun askha iñiqmasinchiskuna qorpachakusqanku hotelman rirqanku Diospa Gobiernonmanta astawan yachachinankupaq. Askha llank’aqkunan nirqanku huk lado llaqtakunapipas Jehová Diospa testigonkunawan rimasqankuta, hinaspan agradecekurqanku chay llaqtapi kashanankukama paykunaman predicasqankumanta.

Qanrí, ¿makillachu kashanki maypi tarikuspaykipas, pimanpas predicanaykipaq? ¿Kallpachakushankichu wak llaqtayoq runakunamanpas predicanaykipaq? Chhayna kaqtinqa, Turku llaqtayoq iñiqmasinchiskuna hinan kusikuyta tarinki.

[32 paginapi foto mapapiwan]

(Imaynapuni kasqanta yachanaykipaq, qelqata qhaway)

FINLANDIA

HELSINKI

Turku

[Fotota horqorqan]

STX Europe