Wawaykikunata yanapay leeyta estudiayta munanankupaq

WAWAYKITA leeyta estudiayta yachachinki chayqa, allinninpaqmi kanqa. Paykunaqa chaywanqa kusikunkun. Askha runakunan kusikuywan yuyarinku wawallaraq kashaqtinku tayta-mamankuq leepusqankumanta. Leeyqa imaymanapin yanapawanchis. Diospa siervonkunaqa leeyta yachasqankuraykun Bibliamanta astawan yachanku, chhaynapitaq astawan Diosman asuykunku. Huk taytan nin: “Ancha allin yachachikuykunataqa leespa estudiaspan tarinchis”, nispa.

Wawakunataqa allin estudiaq kasqankun yanapanqa Dioswan amigontin kanankupaq (Sal. 1:1-3, 6). Manaña leeyta yachaqkunallachu wiñay kawsayta chaskinqaku chaypas, leeyqa yanapawanchismi Diosmanta astawan yachananchispaq. Biblian nin: “Kusisamiyoqmi kay libropi profetizasqa simikunata leeqqa, hinallataq leesqata uyariqkunapas”, nispa (Apo. 1:3). Apóstol Pablopas Timoteotan yuyaycharqan estudiaspa allinta yuyaymanananpaq, nirqanmi: “Chaykunataqa makillapuni ruway [“yuyaymanay”, NM], chaykunaman k’askakuy, ahinapin iñiypi wiñasqaykita lliwpas sut’ita rikunqaku”, nispa (1 Tim. 4:15).

Wakinqa allin leeyta yachaspapas manan tiempota hap’inkuchu estudianankupaq, yanqa ruwaykunapin tiemponkuta usuchinku. Chayraykun wawaykikunata yanapanayki allin estudiaq kanankupaq. ¿Imaynatan chayta ruwawaq?

Munakuywan ejemploykiwan ima yanapay

Wawaykikunata munakuywan yachachinki chayqa, kusikuytan tarinqaku. Owenwan Claudiawanmi yuyarinku wawankuq chhayna kusikusqankuta, khaynatan willakunku: “Ima hinaraqmi suyakuqku estudianayku horata. Chaypin allin cuidasqa thak sientekuqku, reparaqkutaq munakusqaykuta”, nispa. Chhayna munakuywan yachachisqaykin wawaykikunata yanapanqa waynayasqanku tiempopipas. Owenwan Claudiawanqa kusisqan kashanku wawanku precursor kasqankumanta, leeyta estudiayta yachachisqankuqa wawankuq allinninpaqpunin karqan.

Chaymantapas ejemploykiwanmi wawaykikunataqa yachachinayki. Sichus rikusunkiku sapa kutilla leeqta estudiaqta chayqa, paykunapas kaqllatataqmi ruwanqaku. “Manan ñoqamanqa gustawanchu leey” nishankipaschá, chhayna kaqtinqa, reparanaykin imakunachus aswan importante kasqanta, cambianaykitaq imayna yuyaykusqaykita (Rom. 2:21). Sichus sapa p’unchay Bibliata leenki, preparakunkitaq  huñunakuykunapaq, familiaykiwan estudianaykipaqpas chayqa, reparanqakun chaykuna ruway ancha importante kasqanta.

Chhaynaqa, munakuywan ejemploykiwan iman wawaykikunata yachachinayki. ¿Imatawanmi ruwawaq leeyta munanankupaq?

Gustachiy leeyta

Wawaykikuna leeyta munanankupaqqa huch’uychankumantapachan qonayki qelqakunata. Chhaynatan huk umalli iñiqmasinchista tayta-maman yanapasqaku huch’uyllaraq kashaqtin, paymi nin: “Wawakuna hap’ichunku libronkuta. Chhaynapin amigonkuta hina qhawarinqaku, munakunqaku ima”, nispa. Wakin wawakunaqa manaraq leeyta yachashaspan anchata munakunku wakin qelqanchiskunata, yaqapas Aprendamos del Gran Maestro, otaq Bibliamanta willakuq libroy nisqa librokunata. Chaykunata wawaykikunaman leenki chayqa, yanapankin allinta rimanankupaq, hinallataq “Diospa Espiritunmanta kaqkunata” otaq Diospa yachachikuyninkunata allinta yachanankupaqpas (1 Cor. 2:13).

Sapa p’unchay leepuy alto kunkawan. Chhaynapin yanapanki allinta rimanankupaq, gustachinkitaq leeyta. Ganaswanmi leenayki paykunapas chhaynata leenankupaq. Yaqapaschá sapa kutilla nisunkiku wakmanta kasqallantataq leepunaykipaq. Chhayna kaqtinqa, kasullay. Tiempowanqa munallanqakun huk yachachikuykunata yachayta. Ama obligaychu qanwan kuska leenankupaq. Jesús hina yachachiy “entiendeyta atisqankuman hina[lla]” (Mar. 4:33). Chayta ruwaqtiykiqa kusisqan suyakunqaku leepunayki horata, chhaynapitaq yanapanki librokunaman k’askakunankupaq.

Wawaykikunawan rimay leepusqaykimanta. Chhaynapin ratolla yachanqaku leesqayki rimaykunata, entiendenqakutaq. Wawakunata leey yachachinapaq libron nin: “Leesqayki rimaykunata wawaykikuna yachanankupaqqa paykunawanmi rimanayki leesqaykimanta. [...] Chayllaraqtaq yuyayta hap’ishanku chayqa, sasan paykunapaq leeyta yachay, chayraykun paykunawan sumaqta parlanayki”, nispa.

Wawaykikunata niy leepunasuykikupaq, leesqankumanta tapunasuykikupaqpas. Qanpas tapuwaqmi leesqankumanta, hinaspataq kutichiyninta tarinankupaq yanapawaq. Chhaynapin reparanqaku librokunaqa imamantapas yachanapaq allin kasqanta. Astawanqa chhaynata yachachiwaq Bibliamanta rimaq librokunamantan, ima libromantapas Biblia aswan allin kasqanrayku (Heb. 4:12).

Allin leeq kanapaqqa sapa kutillanmi practicana. * Chayraykun wawaykikuna pisillatapas leeyta wasapachiqtinkuqa “allinmi” ninayki. Chhaynapin paykunaqa munanqaku leeyta, ancha allinpaqtaq chayta qhawarinqaku.

Leeyqa kusikunapaqmi, allinninchispaqtaq

Imayna estudiayta yachaspankuqa tukuy sonqonkuwanmi wawakunaqa leenqaku. Estudiayqa leesqaykita allinta entiendeymi, yachasqaykikunata tupanachiy, chaykunata ordenpi churay, yuyarispa chayman hina ruway ima. Allin estudiayta yachaspa imaynatachus yanapasqanta entiendeq wawakunaqa, ancha allinpaqmi qhawarinku estudiayta, kusikunkutaq chayta ruwaspa (Ecl. 10:10).

 Yachachiy imayna estudiayta. Yachachiwaqmi Familiantin Diosta Yupaychana Ch’isipi, sapa p’unchaypaq textota t’aqwishaspa, otaq ima ratopas. Ñawpaqtan yachachinayki tukuy yuyaywan uyariyta, chaypaqmi allinta tiyachispa huk ratollapas sapa kutilla yachachinayki. Yachachikuykuna tupanachiyta yachanankupaq tapuy ñawpaqpi yachasqankumanta chayllaraq yachasqankumantawan. Chaymanta niwaq estudiasqaykichismanta entiendesqankuman hina pisillapi willanasuykikupaq, chhaynapin mana qonqanqakuchu yachasqankuta. Chaymantapas kutipawaqchismi allinnin yachachikuykunata. Yachachillawaqtaqmi estudiasqaykichis horapi otaq huñunakuypi kashaspa imatapas anotayta. Chaykunata ruwaspa estudiaypas yachachiypas allinpunin kanqa llapaykichispaq.

Allin sitiopi yachachiy. Tukuy yuyaywan uyarinankupaqqa maypichus thak kankuman chaypi yachachiy, cuartoqa ama puñuywan aysachikunankupaq hinachu kachun. Wawayoq cristianan nin: “Hunt’anaykin ima p’unchaychus estudianaykichispaq nisqaykitaqa. Chhaynapin wawakuna yachanqaku tukuy imapas tiemponpi ruwakunanta”, nispa. Chayraykun wakin tayta-mamakunaqa mana dejankuchu wawanku chay ratopi imatapas ruwanankuta. Wawakunamanta allin yachaq runaq nisqan hinapas, chhaynapin wawakunaqa allin estudiayta yachanqaku.

Rikuchiy allinninkupaq kasqanta. Yachachinallaykitaqmi estudiasqanku kawsayninkupi yanapasqanta, chhaynapin reparanqaku imapaqchus estudiasqankuta. Huk cristiano waynan nin: “Imapi yanapawananta mana reparaspayqa qellakunin estudiayta. Allinniypaq kaqtinmi ichaqa kusisqa ruwani”, nispa. Wawakunaqa imapas paykunapaq importante kaqtinqa estudiaytan munanku, anchatan kusikunkupas. Imaynan qallariypi leeyta atishaspanku astawan yachayta munaqku chhaynallatataqmi estudiaytapas astawan munanqaku.

¿Imapaqmi aswan allin?

Wawaykikunata leeyta estudiayta munanankupaq yanapasqaykiqa imaymanapin allinninpaq kanqa: escuelapipas llank’anapipas allinmi kanqaku, runamasinkuwanpas sumaqtan kawsanqaku, entiendenqakun imarayku kay pachapi imapas sucedesqanta, sumaqtan kawsanqaku tayta-mamankuwan, hinaspapas ancha kusikuytan tarinqaku leespa estudiaspa.

Wawakunataqa allin estudiaq kasqankun yanapanqa Jehová Diosta servinankupaq, yachachikuyninkunatapas allintan yachanqaku “anchonmanpas, wask’anmanpas, ukhunmanpas, sayayninmanpas” (Efe. 3:18). Askhatan qanqa yachachiwaq wawaykikunaman. Chayrayku tukuy atisqaykita ruway wawaykikunata allinta yachachinaykipaq, qhepamanqa Jehová Diostan servinkuman. Allin estudiaq kayta yachachisqaykin wawaykikunataqa yanapanqa Jehová Diosman astawan asuykunankupaq. Diosqa yanapasunkin sichus paymanta mañakuspa kallpachakunki wawaykikunata leeyta estudiayta yachachinaykipaq chayqa (Pro. 22:6).

[Uranpi willakuy]

 [26 paginapi fotokuna recuadropiwan]

Yanapay leenanpaq

• qelqakunata qoy

• alto kunkawan leepuy

• leesqaykimanta parlaychis

• niy leepunasuykipaq

• niy leesqanmanta tapunasuykipaq

Yanapay estudiananpaq

• ejemplota qoy

• yachachiy imayna estudiayta:

○ tukuy yuyaywan uyarichun

○ yachachikuykunata tupanachichun

○ yachasqanmanta pisillapi willachun

○ yachasqanta kutipayta yachachun

○ anotayta yachachun

• allin sitiopi estudiachiy

• rikuchiy allinninpaq kasqanta