Leeqkunaq tapukusqan

¿Imanaqtinmi huchasapa warmita Jesús nirqan: “Huchaykikunan pampachasqa”, nispa? (Luc. 7:37, 48, NM.)

Jesusmi fariseo Simonpa wasinman mikhuq rirqan, hinan huk warmi hamuspa chakin qayllanpi qonqoriykukuspa weqenwan chakinta apicharqan, chukchanwantaq ch’akichirqan. Hinaspan chakinta much’aykuspa q’apaq hawinawan hawiykurqan. Biblian willan chay warmiqa “llaqtaq reqsisqan huchasapa” warmi kasqanta. Llapa runakunaña huchayoq kanchis chaypas, Bibliaqa “huchasapa” nin nishu huchapi puriq runakunatan otaq sapa kutilla Diospa kamachikuyninkunata mana kasukuqkunatan. Chay warmiqa qhelli huchapi puriqmi kanman karqan. Paytan Jesusqa nirqan: “Huchaykikunan pampachasqa”, nispa (Luc. 7:36-38, 48, NM). Jesusqa manaraqtaq sacrificakurqanchu runakunata huchankumanta kacharichinanpaq chayqa, ¿imanaqtintaq chay warmita nirqan: “Huchaykikunan pampachasqa”, nispa?

Jesuspa chakinta chay warmi weqenwan apichashaqtinmi Jesusqa Simonman huk rikch’anachiyta willarqan. Chaypin huchata rikch’anachirqan askha qolqe manu kaywan, khaynatan nirqan: “Huk qolqe manuqpan iskay manukuqnin karqan, hukninmi phisqa pachak qolqe manu, huknintaq phisqa chunka manu. Mana imankupas kutichipunankupaq kaqtintaq, manuqqa iskayninkuta pampachapurqan. Niway, ¿mayqenninkutaq astawanqa payta munakunqa? nispa. Hinan Simonqa nirqan: –Yuyaykuni chay askha manuta pampachasqa kaqmi paytaqa munakunqa”, nispa. Jesustaq: “Chanintan ninki”, nirqan (Luc. 7:41-43). Runakunaqa llapallanchismi Diosta kasukunanchis; mana kasukuspa huchallikuspaqa paymanmi manu kanchis. Ancha munakuq Diosninchismi ichaqa chay rikch’anachiypi qolqe manuq hina, payman manu kasqanchista pampachawanchis. Chaymanta rimaspan Jesusqa yachachisqankunata nirqan Diosta khaynata rogakunankupaq: ‘Huchaykuta pampachawayku, imaynan ñoqaykupas contraykupi huchallikuqta pampachayku hinata’, nispa (Mat. 6:12).

¿Imaynapitaq Diosri ñawpaq tiempopi huchallikuqkunata pampacharqan? Diospa chanin kamachikuyninkunaman hinaqa huchallikuq runaqa wañunanmi karqan. Chaymi Adanqa mana kasukuq kasqanrayku wañurqan. Israel runakunaman kamachikuyninkunata qospanmi ichaqa Jehová Dios nirqan huk animalta sacrificiopi haywallaspanku huchankumanta pampachasqa kanankuta. Apóstol Pablon nirqan: “Kamachikuy simiman hinaqa, yaqa llapallanmi yawarwan ch’uyanchasqa kanan karqan. Yawar hich’akuqtillanmi huchaqa pampachasqa”, nispa (Heb. 9:22). Judío runakunaqa allintan chayta yacharqanku. Chayraykun Simonpa wasinpi kaqkunaqa mana allinpaqchu qhawarirqanku chay huchasapa warmiman Jesuspa nisqanta. Chaymi mikhuqmasinkunaqa sonqonku ukhupi nirqanku: “¿Pitaq kayri huchakunatapas pampachaqqa?” nispa (Luc. 7:49). Chhaynaqa, ¿imaraykun Jesús chay huchasapa warmita nirqan: “Huchaykikunan pampachasqa”, nispa?

Ñawpaq tayta-mamanchispa huchallikusqanku qhepatan, Jehová Dios willarqan huk mirayta kachamunanpaq, chay miraytan Satanasqa mirayninpiwan talonninpi k’irinan karqan (Gén. 3:15). Miraytaqa k’irikurqan Diospa contranpi hatariq runakuna Jesusta wañuchiqtinkun (Gál. 3:13, 16). Cristoq hich’asqan yawarmi runakunataqa huchamanta wañuymantawan kacharichin. Diospa munasqantaqa manan imapas qolluchinmanchu, chaymi Génesis 3:15 textopi nisqanmantapacha Diospaqqa huchamanta sacrificio ruwakunmanñapas hina karqan, chayraykun promesankuna hunt’akunanpi suyakuqkunaq huchantaqa pampachayta atirqan.

Manaraq kay pachaman Cristo hamushaqtinqa ñan Jehová Diosqa wakin runakunata chaninpaq qhawarirqanña. Paykunamantan wakin karqan: Enoc, Noé, Abraham, Rahab, Job  ima; paykunaqa iñirqankun Diospa promesankuna hunt’akunanpi. Chaymi Santiago qelqarqan: “Abrahammi Diospi iñirqan, chaymi Diosqa payta chanincharqan [...]. Chhaynallataqmi rabona warmi Rahabpas ruwasqankunawan chaninchasqa karqan”, nispa (Sant. 2:21-25).

Rey Davidpas hatun huchakunamanmi urmarqan, chaywanpas payqa tukuy sonqonwanmi Diospi iñirqan, sonqomantataq pesapakurqan. Huchakuna imayna pampachasqa kasqanmantan Biblia nin: “Diosmi Jesucristota churarqan runakunarayku yawarninta hich’aspa wañunanpaq. Chayraykun payqa runakunata khuyapayaspa huchankuta pampachan. Chaytaqa yawarta hich’aspa wañusqanpi iñispan runakunaqa chaskinku. Chhaynapin Diosqa chaninchayninta rikuchin. Payqa pacienciayoq kaspanmi ñawpa tiempopi huchallikusqakunata hinallata qhawarqan [pampacharqan]. Kunanmi ichaqa Diosqa mana hinallatachu qhawan, aswanmi chaninchayninta rikuchin, pay chanin kananpaq, hinallataq Jesuspi iñiqkunata chaninchaq kananpaqwan”, nispa (Rom. 3:25, 26). Qhepamanña Cristo sacrificakunan karqan chaypas, sacrificakunmanñapas hinatan Jehová Diosqa qhawarirqan, chaymi Davidpa huchankunata pampachaspaqa mana p’akisharqanchu chanin kamachikuyninkunata.

Chayraykun chay huchasapa warmitapas huchanta pampachapurqan. Qhelli huchapiña purirqan chaypas sonqomantan pesapakurqan chay ruwasqanmanta. Yacharqanmi huchanmanta kacharichisqa kananta, chaymi ruwasqanwan rikuchirqan runakunata huchamanta kacharichinapaq Jehová Diospa qosqan runata ancha allinpaq qhawarisqanta. Manan pipas Cristoq sacrificakunantaqa hark’ayta atinmanchu karqan, chaymi runakunaq huchantaqa chay warmiqta hina pampachakuyta atikurqan. Chayraykun Jesusqa nirqan: “Huchaykikunan pampachasqa”, nispa.

Rikusqanchis hina, Jesusqa chaskirqanmi huchasapa runakunata, ancha munakuywantaq qhawarirqan. Jehová Diosmi prometen huchankumanta kutirikuqkunata llapankuta pampachananpaq. ¡Maytan huchayoq runakunataqa chay promesa kallpachawanchis!

[7 paginapi dibujo]

Chaninpaq qhawarisqan karqanku