Llapanchismi invitasqa kashanchis

¿IMAPAQMI invitasqa kashanchis? Pachantinpi Jehová Diospa testigonkunaq 118 mayqen sucursalninmanpas rinanchispaqmi. Chayman askha riqkunaqa anchatan admirakunku chaypi rikusqankumanta.

México nacionpin Bibliata estudiaq wayna rirqan Betel wasita reqsiq, chaypin payqa rikurqan askha qharikunata warmikunatapas Jehová Diosta servispa kusisqa kasqankuta, chaymantaqa anchatan admirakurqan. Chaymi tapukurqan: “¿Imatan ruwanay kaypi llank’anaypaq?” nispa. Hinan nirqanku: “Ñawpaqtaqa bautizakunaykin. Chaymantapas precursor kanaykipaqmi kallpachakuwaq”, nispa. Chay waynaqa nisqankuman hinan ruwarqan, iskay wata qhepamantaq Betel wasiman haykurqan, chaypiqa iskay chunka wata hinañan llank’ashan.

¿Iman Betel?

Hebreo rimaypi “Betel” simiqa “Diospa wasin” ninantan nin (Gén. 28:19, nota). Sucursalpiqa pachantinpi pachak waranqa más iñiq t’aqakunapi kaqkunata yanapanapaqmi llank’akun, chhaynapi Jehová Diosta allinta servinankupaq. Wakin sucursalkunapiqa Bibliakunata huk qelqanchiskunatawanmi ruwakun. Betel wasikunapiqa iskay chunka waranqa iñiqmasinchiskunan llank’anku imaymana llaqtakunamanta, wakinqa kanku allin estudioyoq qhapaq ima, wakintaq mana, paykunan Diosta iñiqmasinkutapas munakusqankurayku chaypi llank’anku. Chaypiqa askhan unayña llank’ashanku allin kallpayoq waynakunawan kuska. Llapankupas llank’ayta tukusqanku qhepatan otaq semana tukuytan rinku huñunakuykunaman hinallataq predicaqpas. Chaymantapas tiempotan hap’inku Bibliata estudianankupaq, kusirikunankupaq otaq imatapas ruwanankupaq.

Betelpi llank’aqkunaqa sapa killan pisi qolqeta chaskikunku gastonkupaq. Allin alimentaq sumaq mikhunatan mikhunku, limpio cuartokunapitaqmi tiyanku. Betelqa manan qhapaqkunaq tiyanan wasi hinachu, aswanpas llank’anankupaq imachus necesitakusqallanmi chaypiqa kan. Chayman riqkunaqa admirakunkun chay wasita limpiota qhawarispanku, huertakunatapas sumaq allichasqata rikuspanku, hinallataq sumaq trataq kasqankumanta, hukkuna-hukkunawan yanapanakusqankumantapas. Ocupasqaña kashanku chaypas, lliwtan sumaqta tratanku. Manan pipas hukkunamantaqa  aswan allinpaq qhawarikunchu. Chaypi ruwasqankuqa llapanmi allinpuni, limpiayña, wayk’uyña, huertakunata allichayña, qelqakunata ruwayña, oficinapi llank’ayña kachun chaypas. Paykunaqa huk-nisqallan llank’anku allin willakuykuna hinantinman mast’arikunanpaq (Col. 3:23).

Wakinninkuta reqsisun

Betelpi llank’aqkunamanta wakinninkuta reqsirisun. ¿Iman paykunata kallpacharqan chaypi llank’anankupaq? Mariomanta yachasunchis. Payqa Alemania nacionpin huk allin reqsisqa empresapi llank’aspa allin sueldota ganaq, allin puestomantaqmi chayanman karqan. Huk kutinmi sucursalman rirqan, chaypin ofrecekurqan huk semana llank’ananpaq, hinan yanapakurqan qelqakuna ruwaypi. Payqa kaq raton repararqan Betelpi llank’aqkunaqa mana llank’aqmasinkuna hinachu kasqankuta, chaymi solicitudta hunt’arqan chaypi llank’ananpaq. Askha llank’aqmasinkunaña, familianña mana allinpaqchu qhawarirqanku chay ruwasqanta chaypas, Marioqa kusisqan Betel wasipi llank’ashan.

Betelmanqa askhan chayanku mana profesionllayoq. Chaymi Abelwanpas sucederqan, payqa México nacionpi kaq Betelpin 15 wataña llank’ashan. Paymi nin: “Betelpiqa imaymana ruwaytan yacharqani. Qelqakunata ruwanapaq hatun maquinakuna manejaytan yachachiwarqanku. Chay yachasqaywanqa askha qolqetan maypipas ganayman, ichaqa manan kusisqachu kayman. Kaypiqa thakmi sientekuni, manan imamantapas llakikunichu, nitaq llank’anaypipas hukkunawan qhawanakushaykuchu. Manan aswan hatun universidadkunapipas kaypi hinaqa yachaymanchu karqan Diosta allin serviyta, imaymana ruwaytapas”, nispa.

Diosmanmi asuykachiwanchis

Betelman visitayqa yanapawanchismi Diosman asuykunanchispaq. México llaqtayoq Omarmanta yachasunchis. Paytaqa huch’uyninmantapachan mamitan Bibliamanta yachachirqan, 17 watanpin ichaqa manaña huñunakuykunaman riqchu nitaq predicaqpas lloqsiqñachu. Chaymi imaymana viciokunaman urmarqan qolqe maskhaypitaq purirqan.  Qhepa watakunamantaq huk empresapi llank’ashaspa wakin llank’aqmasinkunawan Betel wasita rirqan huk maquinaq imayna funcionasqanta yachachinankupaq. Paymi willakun: “Tukuqtiykun rikuchiwarqanku Betelpi imakunachus ruwakusqanta. Chaypiqa sumaqtan tratawarqanku rikurqanitaqmi tukuy sonqowan Diosta servisqankuta, chaywanmi reparakurqani Diosman kutirikunay kasqanta. Chaymi wakmanta huñunakuykunaman rirqani, Bibliatapas estudiayta qallarirqani. Soqta killamantataq bautizakapurqani. Anchatan Diosta agradecekuni Betelpi kallpachawasqanmanta”, nispa.

Japón llaqtayoq Masahiko sutiyoq waynapas familian ukhupin Jehová Diosmanta yacharqan. Ichaqa manan allinpaqchu qhawarirqan Bibliaq nisqanman hina kawsayta. Chaymi estudiayllamanña qokurqan, manan huñunakuykunamanpas riqñachu, nitaq predicaqpas lloqsiqñachu. Paymi nin: “Huk kutinmi familiaywan huk hermanokunawan ima rimanakurqanku Betelman rinankupaq. Familiaypa kallpachasqanmi ñoqapas paykunawan rirqani. Betelpi kashaqtiyqa sonqoyraqmi llanllarirqan. Manan hayk’aqpas chay kutipi hinaqa amigoykunawanpas kusisqa sientekurqanichu. Chaymanta kutimpuspaymi decidikurqani Diosta servinaypaq, mañakurqanitaq Bibliamanta yachachiwanankupaq”, nispa. Kunanqa Masahikoqa precursor kaspan Diosta servishan.

Huk iñiqmasinchismi Franciamanta Moscú llaqtaman ripurqan llank’aq. Chaypiqa manañan Diospa llaqtanwan huñukurqanñachu, chaymi iñiyninpi pisipapurqan. Tiempoq pasasqanmanqa mana allin ruwaykunamanmi urmarqan, Jehová Diosta mana serviq qhariwantaq casarakapurqan. Huk p’unchaymi huk hermananchis Franciamanta watukuq risqa, hinan iskayninku San Petersburgo llaqtata viajarqanku Betel wasita reqsinankupaq. Chaypi imachus sucedesqanmantan huk cartapi khaynata willakun: “Betelpi sumaqta chaskiwasqankuqa sonqoyman chayaqmi karqan. Repararqanin santo espirituq yanapayninwan llank’asqankurayku thakpi sientekusqankuta. ¡Maytan pesapakurqani Diospa llaqtanmanta karunchakusqaymanta! Chaymi chay qhepaman Diospa yanapayninta mañakurqani, wawaykunamanpas Bibliamanta yachachiyta qallarirqani”, nispa. Huk iñiqmasikunaña chay hermanata yanaparqanku chaypas, paytaqa Betelman risqanmi kallpacharqan. Chaymantapachan kallpachakurqan Diosta allinta servinanpaq.

¿Imaynan Jehová Diospa testigonkunamanta pisillata yachaq runakuna sientekunku Betelta visitaspa? 1988 watapin Alberto sutiyoq runa Brasil llaqtapi sucursalta visitarqan, payqa politicapi puriqmi karqan. Payqa anchatan admirakurqan chaypi imatapas limpiota, allin allichasqata rikuspa, mana pakapichu imatapas ruwasqankumantawan. Chay ñawpaqllatan payqa sacerdote cuñadonpa tiyasqan seminariota visitaq risqa. Chaypi rikusqanmantan Alberto nin: “Chaypiqa imatapas pakallapin ruwanku”, nispa. Chaymi Betelta risqan qhepallaman Biblia estudiayta qallarirqan, manañataq politicawan chhaqrukurqanchu. Kunanqa umalli kaspan Diosta yupaychashan.

¡Hamuychis!

Askha iñiqmasinchiskunan anchata kallpachakunku Betelta visitanankupaq. Paulowan, Eugeniawanqa tawa watan qolqeta waqaycharqanku Brasilpi sucursalman rinankupaq, iskay p’unchaytan carropi 3.000 kilometrosta viajarqanku. Chaymanta imayna sientekusqankumantan khaynata ninku: “Allinmi risqaykuqa karqan. Kunanqa yachaykun Jehová Diospa llaqtanpi imayna llank’akusqanta. Betelpi imakuna ruwakusqanmanta estudiantekunaman willaqtiykun paykuna tapuwaqku hayk’aqllapas rirqaykuchus chayta. Kunanmi ichaqa ‘arí’, nispa niykuman”, nispa.

¿Kanchu tiyasqayki llaqtapi otaq cercallapi kaq nacionpi Jehová Diospa testigonkunaq sucursalnin? Chhayna kaqtinqa invitaykikun reqsiq rinaykipaq. Riqtiykiqa sumaqtan chaskisunkiku, kallpachasqataq kutimpunki Diosta servishanallaykipaq.

[18 paginapi foto]

Mario

[18 paginapi foto]

Abel

[18 paginapi foto]

Alemania

[18 paginapi foto]

Japón

[18 paginapi foto]

Brasil