¿Imaynatan Jehová Dios qhawarin justificakuyta?

ADANMI Diosta nirqan: “Kawsaysiwananpaq qowasqayki warmin sach’a ruruta qowarqan, hinan mikhurqani”, nispa. Warmitaq nirqan: “Mach’aqwaymi q’otuwarqan, hinan mikhurqani”, nispa. Adán Evaq chhayna ruwasqankuta hinan kunanpas runakunaqa hukkunaman tumpanku mana allin ruwasqankumanta (Gén. 3:12, 13).

Jehová Diosqa castigarqanmi Adanta Evatawan mana kasukusqankumanta, chaywanmi rikuchirqan justificakusqankuta mana allinpaq qhawarisqanta (Gén. 3:16-19). Chhaynaqa, ¿mana allinpaqchu Jehová Dios qhawarin imamantapas justificakuyta? Icha, ¿allinpaqchu wakinkunata qhawarin? Chhayna kaqtinqa, ¿imaynatan yachasunman mayqenkunachus allin mayqenkunataqchus mana chayta? Chaypaq ñawpaqta yachasunchis iman justificakuy kasqanta.

Justificakuyqa imaraykus imatapas ruwarqanchis otaq mana ruwarqanchischu otaq mana ruway munasqanchismanta razonkuna qoymi. Mayninpitaq imapipas pantarqosqanchismanta razonkuna qoy, chhaynapi pampachawananchispaq. Mayninpin ichaqa kanman mana allin ruwasqanchismanta hukkunaman tumpay imachus sonqonchispi kaqta pakanapaq, imaynan Adanwan Evawanpas ruwarqanku hinata. Chayraykun yaqa llapa runakuna mana allinpaqchu qhawarinku justificakuytaqa.

Chayraykun cristianokunaqa cuidakunanchis chay ruwaymanta astawanqa Dios serviyninchispi, mana chayqa ñoqanchis ‘kikinchistan q’otukusunman’ mana allin yuyaykuykunawan (Sant. 1:22). Chayrayku qhawarisunchis imaynatan Biblia yanapawasunman “imachus Señorpa sonqonta kusichiq kaqta” ruwananchispaq chayta (Efe. 5:10).

¿Ima ruwananchistan munan Jehová Dios?

Bibliapi Diospa kamachikuyninkunataqa kasukunanchismi. Jesusmi yachachisqankunata kamachirqan: “Rispa llapa suyu runakunata yachachimuychis, yachachisqaykuna kanankupaq”, nispa; chaytaqa kunanpas kasukushanallanchismi (Mat. 28:19, 20). Chay kamachikuyta hunt’ayqa ancha importanten, chaymi apóstol Pablopas nirqan: “¡Ay, ñoqamanta, manachus allin willakuykunata willayman chayqa!” nispa (1 Cor. 9:16).

Wakinmi ichaqa manaraq predicaq lloqsishankuchu, unayña ñoqanchiswan Bibliata estudiashanku chaypas (Mat. 24:14). Wakintaq manaña predicapunkuchu. ¿Ima razonkunatan qonku chaymanta? ¿Imatan Jehová Dios ruwarqan ñawpaq tiempopi serviqninkuna kamachikuyninta hunt’anankupaq iskayrayaqtinku? Chaymanta yachasunchis.

¿Imakunatan Jehová Dios mana allinpaq qhawarin?

“Nishu sasamá.” Yaqapaschá wakinqa predicayta sasapaq qhawarinku, astawanqa manchali kaqkuna. Jonasmanta yachasunchis. Jehová Diosmi paytaqa kamachirqan Nínive llaqtapi tiyaq runakunaman juicionmanta willamunanpaq, chaywanqa mancharikurqanmi Jonasqa. Chay llaqtaqa Asiriaq capitalninmi karqan, chaypiqa mana khuyapayakuspa runa wañuchiqkunan tiyaqku. Jonasqa  khaynatapaschá yuyaykurqan: “Chay llaqtapiqa imataraqchá ruwawankuman, wañuchiwankumanpaschá”, nispa. Chaymi Niniveta rinanmantaqa huk ladoman pasapurqan. Jehová Diosmi ichaqa chay ruwasqanta mana allinpaqchu qhawarirqan, chaymi hukmanta kamachirqan chay llaqtaman rinanpaq. Hinan Jonasqa kallpata hap’ispa Diospa kamachisqanta hunt’arqan, Jehová Diostaq ruwasqanta allinpi tukuchirqan (Jon. 1:1-3; 3:3, 4, 10).

Sichus nishu sasapaq predicayta qhawarishanki chayqa, yuyarinaykin ‘Diospaqqa tukuy imapas atikuq’ kasqanta (Mar. 10:27). Chayrayku mañakushallay yanapayninta. Mañakuqtinchisqa kallpachawasunmi. Mana manchakuspa predicasun chayqa yanapawasunmi (Luc. 11:9-13).

“Manan munanichu.”  Predicayta mana munashankichu chayqa, Jehová Diosmanta mañakuy sonqoykita kuyurichinanpaq, chhaynapi predicayta munanaykipaq. Apóstol Pablon qelqarqan: “[Diosmi] allin munayninman hina allinkaq ruwayta munachisunkichis hinaspa ruwachisunkichis” , nispa (Fili. 2:13). Rey Davidpas khaynatan Diosmanta mañakurqan: “Qan sonqota kawsachikuway”, nispa (Sal. 25:4, 5). Chhaynaqa Jehová Diosta rogakusun munayninta ruwananchispaq sonqonchispi wiñachinanpaq.

Mayninpiqa nishu sayk’usqa otaq desanimasqa tarikuspan obligakunchis huñunakuykunaman rinanchispaq predicaq lloqsinanchispaqpas. Ichaqa manan chayraykuchu yuyaykunanchis Jehová Diosta manaña munakusqanchista. Ñawpaq tiempopi Diosta tukuy sonqonkuwan serviqkunapas tukuy atisqankutan ruwaqku munayninta hunt’anankupaq. Pablopas Diospa munasqanta ruwananpaqqa ‘cuerponwanmi’ kasuchikuq (1 Cor. 9:26, 27). Dios serviyninchista mayninpi obligakuspaña hunt’asun chaypas, Jehová Diosqa yanapawasunmi, payqa yachanmi munakusqanchisrayku chay ruwasqanchista. Chaywanmi rikuchillasuntaq Satanasqa llulla kasqanta, paymi ñoqanchismanta nin: “Sasachakuykunapi tarikuspankuqa manañan Diosta servinqachu”, nispa (Job 2:4).

“Manan tiempoy kanchu.” Sichus nishanki: “Predicanaypaqqa mana tiempoy kanchu”, nispa chayqa, qhawarikunaykin imakuna kawsayniykipi aswan importante kasqanta. Jesusmi nirqan: “Diospa qhapaqsuyunta, [...] ñawpaqtaqa maskhaychis”, nispa (Mat. 6:33). Chayta hunt’ananchispaqqa saqenanchispaschá kanqa wakin ruwananchiskunata otaq kusikuykunaman manaña nishutachu qokunanchis kanqa, chhaynapi aswanta predicananchispaq. Necesitanchisña kusirikuyta, kikinchispaq ima ruwayta chaypas, manan chayraykuchu Dios serviyninchistaqa saqenanchis. Cristianokunaqa Diospa munaynintaraqmi ñawpaqta ruwananchis.

“Manan atiymanchu.” Yaqapaschá allin willakuykuna predicanaykipaq mana  preparasqa hina sientekunki. Ichaqa ama chaywan pisipaychu. Ñawpaq tiempopi Diosta serviqkunapas mana hunt’ay atinankupaq hinan Diospa kamachikuyninta qhawarirqanku. Moisesmanta yachasun. Jehová Dios kamachiqtinmi nirqan: “¡Ay, Señor Diosníy! Manan hayk’aqpas allin rimaq runachu kani, ñawpaqpas kunanpas kay kamachiykiqa manan usqhay rimaqchu kani, sasachaspa rimaqmi kani”, nispa. Yanapananpaqña prometerqan chaypas, Moisesqa khaynatan nirqan: “¡Ay, Señor Diosníy! Rogakuykin, hukta kachay”, nispa (Éxo. 4:10-13). ¿Imatan Jehová Dios ruwarqan?

Jehová Diosqa manan yuyaykurqanchu Moisesta manaña kachananpaq, aswanpas Moisespa wawqen Aarontan kamachirqan yanapananpaq (Éxo. 4:14-17). Qhepamanpas Moisestaqa yanapashallarqanmi kamachikuyninkunata hunt’ananpaq. Kunanpas Diosqa allin predicaq iñiqmasikunawanmi yanapachiwasun. Chaymantapas Simin Qelqapin prometewanchis predicayta hunt’ananchispaq yanapawananchista (2 Cor. 3:5; qhaway  “Aswan kusisqa kawsasqay watakuna” nisqa recuadrota).

“Sonqoytan k’irirqonku.” Wakinqa manañan huñunakuykunamanpas predicaqpas rinkuchu huk iñiqmasinchispa ruwasqanwan nishuta phiñakusqankurayku. Razonwanña chhayna sientekunkuman chaypas, Jehová Diosqa manan allinpaqchu qhawarinman chayrayku iñiyninkupi pisipasqankuta. Pablomantawan Bernabemantawan yachasunchis. Paykunaqa sinchita phiñachinakuspan “t’aqanakurqanku”, chaywan sonqonkupi  k’irisqaña sientekurqanku chaypas Jehová Diostaqa servishallarqankun (Hech. 15:39).

Mayqen iñiqmasinchispas phiñarqochiwaqtinchisqa yuyarinanchismi mana paychu enemigonchis kasqanta. Satanasmi enemigonchisqa paymi millp’urqoytaqa munawanchis. Chayrayku ama gustonta qosunchu, aswanpas ‘contranpi qaqatapuni sayasunchis, iñiyninchispi allintapuni takyananchispaq’ (1 Ped. 5:8, 9; Gál. 5:15). Chhaynapin mana sientepakusunchu (Rom. 9:33).

Atisqanchisman hina ruwasun

Qhawarisqanchis hina, Bibliapiqa manan ima razonpas kanchu Diospa kamachiwasqanchista mana hunt’ananchispaq. Mayninpin ichaqa allin razonkuna kanman Dios seviyninchispi pisillata ruwananchispaq. Bibliaq huk kamachikuyninkunata hunt’asqanchisraykupaschá mana ancha tiempo aypawasunmanchu. Otaq onqosqa, nishu sayk’usqa tarikuspa pisillata ruwasunman manataq munasqanchisman hinachu. Chhayna kaqtinqa, Simin Qelqapi Diospa niwasqanchismi kallpachawasun, payqa tukuy sonqomanta ruwasqanchistan qhawan yachantaq imaynapi tarikusqanchistapas (Sal. 103:14; 2 Cor. 8:12).

Chhaynaqa, ama ruwasqanchistapas hukkunaq ruwasqantapas yuyaykusqanchisman hinaqa mana allinpaq qhawarisunchu. Pabloq nisqantan yuyarinanchis, paymi nirqan: “¿Pitaq qanqa kanki hukpa kamachinta huchachanaykipaqri? Patronninmi niyta atin allin kasqantapas, mana allin kasqantapas”, nispa (Rom. 14:4). Huk iñiqmasinchiswan Dios serviyninchista tupanachishananchismantaqa yuyarinanchismi sapankanchis kikinchismanta “Diosman cuentata” qonanchista (Rom. 14:12; Gál. 6:4, 5). Diosmanta mañakuspa chaypi imamantapas willakuspaqa ‘allin concienciawanmi’ sut’illanta rimananchis (Heb. 13:18).

Jehová Diosta serviyqa kusichiwanchismi

Imaynapiña tarikuspapas llapallanchismi kusisqa Jehová Diostaqa servisunman, payqa manan hayk’aqpas mana atisqanchistaqa mañawasunmanchu. ¿Imaynapin chayta yachanchis?

Biblian nin: “Imachus qonaykipaq makiykipi kashaqtinqa, ama runamasiykita niychu: Ripuy, kutimunkiña, paqarinña qosqayki”, nispa (Pro. 3:28). “Imachus qonaykipaq makiykipi kashaqtinqa” nisqanwanmi yachanchis Jehová Diosqa atisqanchisman hina imatapas ruwananchista munasqanta. Manan hukkuna hina ruwananchistachu munan. Jehová Diostaqa llapanchismi tukuy sonqonchiswan serviyta atisunman askhataña otaq pisitaña ruwasun chaypas (Luc. 10:27; Col. 3:23).

[14 paginapi foto recuadropiwan]

 “Aswan kusisqa kawsasqay watakuna”

Nishu onqosqaña, llakipiña tarikuspapas manan ninanchischu: “Predicay llank’aypiqa manan askhatachu ruwayta atiyman”, nispa. Canadá llaqtayoq Ernest iñiqmasinchismanta yachasun.

Ernestqa manan allintachu rimaq, manchalitaq kaqpas. Wasanta k’irikusqan qhepatan manaña llank’apurqanchu. Hinan payqa yuyaykurqan predicayman astawan qokunanpaq. Huñunakuykunapi precursor auxiliar kaymanta rimamusqankun anchata kallpacharqan, ichaqa sasa hunt’aypaqmi chayta qhawarirqan.

Atinmanchus icha manachus chayta yachananpaqmi huk killalla precursor auxiliar kananpaq solicitudta hunt’arqan. Ichaqa atirqanmi precursor auxiliar kayta. Hinan nillarqantaq: “Huk kutitawanqa manachus hina atirqoymanchu”, nispa. Chayta yachananpaqmi wakmanta solicitudta hunt’allarqantaq huk killapaq. Chay kutipas atirqanmi.

Ernestqa huk watan precursor auxiliar karqan. Payqa precursor regular kaytapas mana atinanpaqmi qhawarillarqantaq. Chaymi chayta yachananpaq solicitudta hunt’allarqantaq. Ichaqa watantinmi atirqan precursor regular kayta, chaywanqa maytan kusikurqan. Payqa iskay watatawanraqmi precursor karqan nishuta onqospa wañukapunankama. Manaraq wañupushaspanmi kusikuymanta waqasparaq watukuqninkunata niq: “Aswan kusisqa kasqay watakunaqa karqan Jehová Diosta precursor kaspa servisqaymi”, nispa.

[13 paginapi foto]

Predicanapaq imachus hark’awasqanchiskunataqa atipasunmanmi

[15 paginapi foto]

Jehová Diosqa anchatan kusikun atisqanchisman hina tukuy sonqonchiswan serviqtinchis