Jehová Diosqa yanapanmi llakipi tarikuqkunata

REY Salomonmi nirqan: “Sapankan [qonqaylla] imaynapipas rikukunku”, nispa (Ecl. 9:11). Yaqapaschá qonqaylla ima sasachakuypipas rikukuspa nishu llakipi tarikusunman. Pipas familianchismanta wañupuqtinqa nishu sonqo nanaypin tarikunchis. Wakinqa askha semanan otaq askha killakunan chhaynapi tarikunku. Mayninpiqa manan Jehová Diosmantapas mañakuyta atinkuchu.

Nishu llakikuypi tarikuspaqa necesitanchismi kallpachawananchista, yanapawananchista, munakuwananchistapas. Rey Davidmi nirqan: “Señor Diosqa llapa urmaqkunatan aysarin, llapa k’umuykachisqakunatan sayarichin”, nispa (Sal. 145:14). Chaymantapas Jehová “Diosqa kay pachantintan qhawashan tukuy sonqo payta serviqkunarayku atiyninta rikuchinanpaq” (2 Cró. 16:9). Dios kinkinmi nin: “Huchanta reqsikuqwanmi [llakiq ñit’isqan kaqkunawanmi] k’umuykukuq sonqoyoqwanmi kashani, k’umuykukuqkunata kallpachanaypaq, huchankuta reqsikuqkunaq sonqontapas kawsarichinaypaq”, nispa (Isa. 57:15). ¿Imaynatan Jehová Dios kallpachan llakiq ñit’isqan kaqkunata?

‘Tiemponpi rimasqaqa may allinmi’

Jehová Diosqa llakipi tarikushaqkunataqa iñiqmasinkuwanmi kallpachachin. Biblian nin: ‘Llakipi kashaqkunata yanapaykuychis’, nispa (1 Tes. 5:14). Chaymi cristianokunaqa sonqo nanay llakipi kashaqkunataqa yanapaykunanchis munakunanchistaq. Sonqonchismantapacha pisillatapas rimarisqanchisqa anchatan kallpachanman, astawanqa kallpachanqa ñawpaqpi pay hina llakikuypi tarikuqpa rimapayasqan otaq chhaynapi tarikuqkunata yanapayta yachaq amigoq rimapayasqan. Chay hinatan Jehová Diosqa llakiq ñit’isqan kaqkunata kallpachan.

Alex iñiqmasinchismanta yachasunchis, payqa umallin. Manaraq unaychu casarasqa kashaqtinmi esposan qonqaylla onqospa wañukapurqan. Hinan iñiq t’aqakunata watukuq umalli anchata khuyapayaspa kallpacharqan, paypa esposanpas wañukapusqan, ichaqa wakmantan casarakapusqa. Paymi nisqa: “Ñoqapas askha kutin nishu llakikuypi tarikurqani. Huñunakuykunapi predicacionpi kashaspaymi kallpata hap’iq kani. Wasiyman kutipuspay hinan ichaqa wakmanta sapallay sientekuq kani”, nispa. Chaymantan Alex nin: “Mana ñoqallachu chhayna llakipi tarikusqaymanta  yachaspaymi thak sientekurqani”, nispa. Rikusqanchis hina, ‘tiemponpi rimasqaqa may allinpunin’ llakikuypi kashaqkunata kallpachanapaq (Pro. 15:23).

Askha viudo otaq viuda iñiqmasikunata yanapaq umallipas Alextaqa kallpacharqanmi. Paymi qhawarichirqan Jehová Diosqa imayna sientekusqanchista, ima necesitasqanchistapas yachasqanta. Nirqanmi: “Tiempoq pasasqanman hinaqa munankipaschá wakmanta casarakuyta. Chhayna kaqtinqa manan Jehová Diosqa hark’asunkichu”, nispa. Ichaqa manan llapan viudokunachu wakmanta casarakapunku munankuña chaypas. Chay iñiqmasiq nisqanpi yuyaymanaspan Alex nirqan: “Mayninpiqa wakmanta casarakapuytaqa qhawariyku esposaykutapas wasanchashaykuman otaq Jehová Dios contrapas huchallikushaykuman hinatan. Chayraykun may allinpuni wakmanta casarakapunaykipaq Jehová Dios mana hark’asqasuykita yuyarichisqasuykikuqa”, nispa (1 Cor. 7:8, 9, 39).

Davidpas sinchi llakikuykunapi ñak’ariykunapin tarikurqan. Salmo takita qelqasqanpin nirqan: “Señor Diosqa chanin runakunatan qhawashan, waqyakusqankutapas makillan uyarishan [...] payqa llakiq ñit’isqan sonqoyoqkunatan qespichin”, nispa (Sal. 34:15, 18). Jehová Diosqa tiempollanpin kutichimun llakiq ñit’isqankunaq waqyakusqanta. Payqa chayta ruwan allin iñiyniyoq khuyapakuq iñiqmasikunawan kallpachachispan. May allinmi paykunaq yanapayninta chaskiyqa.

Huñunakuykunan yanapawanchis

Sinchi llakikuypi tarikuq cristianokunaqa ratullan yuyayninkupi hap’inku mana allin kaqkunata, chaykunataq hukkunamanta karunchanman. Biblian nin: “Payllapaq kawsaqqa munaynillantan maskhan, llapa allin yuyaychaykunatapas manan munanchu”, nispa (Pro. 18:1). Alexmi nirqan: “Esposayki otaq esposoyki wañupuqtinqa mana allin yuyaykunan umaykiman hamusunki. Ñoqan huchachakuq kani: ‘Ama khaynatachu  ruwayman karqan, aswan allinta esposayta tratayman karqan’, nispa. Manan sapallay kayta munaqchu kani. Chhayna yuyaykuykunata saqeyqa sasan sapa p’unchay sapallayki tarikusqaykirayku”, nispa.

Sinchi llakiq ñit’isqan tarikuspaqa necesitanchismi pipas kallpachawananchista, huñunakuyninchiskunapin chaytaqa tarinchis. Chaypiqa Diosmi kallpachawanchis allin yachachikuyninkunawan.

Huñunakuykunapin reparanchis sasachakuyninchiskunamanta mana sinchitachu llakikunanchis kasqanta. Chaypi Bibliata t’aqwispan huk ratollapas llakikuyninchiskunata qonqapunchis aswan importante kaqkunapitaq yuyayninchista churanchis: Dioslla kamachikunanpaq derechoyoq kasqanpi, sutinta ch’uyapaq qhawarichinanpiwan. Yuyarillanchistaqmi Jehová Diosqa imaynapi tarikusqanchista allinta yachasqanta manaña wakin reparanchu imaynapi tarikusqanchista otaq manaña allintachu entiendenku chaypas. Payqa allintan yachan ‘llakisqa sonqoqa uyata unphuyachisqanta’ (Pro. 15:13). Chaykunata yachaymi kallpachawanchis mana pisipananchispaq (Sal. 27:14).

Enemigonkunaq qatiykachasqan kashaspan David khaynata Jehová Diosmanta waqyakurqan: “Sinchitapunin llaki ñit’ishawan, sonqoymi p’iti-p’itishan”, nispa (Sal. 143:4). Sasachakuykunaqa rey Davidta hinan ñoqanchistapas pisi kallpayachiwasunman llakipas ñit’iwasunman. Qonqaylla onqosqa tarikusunman otaq ima sasachaypipas chayqa, Jehová Diosmi yanapawasun aguantananchispaq (Sal. 41:1-3). Manaña milagrota ruwaspachu qhaliyachiwasun chaypas, yachayta kallpatan qowasun ama pisipananchispaq. Nishu llakikuypi tarikuspaqa David hinan Jehová Diospa yanapayninta maskhananchis, paymi nirqan: “Ñawpa p’unchaykunatan yuyarini, tukuy ruwasqaykikunatan yuyaymanani, makiykiq ruwasqankunatan qhawarini”, nispa (Sal. 143:5).

Jehová Diosmi yuyaycharqan chay sumaq simikunata qelqakunanpaqqa, chaymi Bibliapiqa tarinchis. Chaywanmi yachanchis Payqa imayna sientekusqanchista allinta entiendesqanta, waqyakusqanchista uyarisqantapas. Yanapayninta maskhasun chayqa ‘qaqatan sayachiwasun’ (Sal. 55:22).

“Diosmantaqa mañakushallaychispuni”

Santiago 4:8 nin: “Diosman asuykuychis, hinan payqa asuykamusunkichis”, nispa. Chay nisqantaqa kasukunchis Diosmanta mañakuspan. Apóstol Pablon nirqan: “Diosmantaqa mañakushallaychispuni”, nispa (1 Tes. 5:17). Manaña atinchischu imayna mañakuyta chaypas, “Santo Espiritun mana rimay atina anchiywan ñoqanchispaq Diosmanta mañapuwanchis” (Rom. 8:26, 27). Qhawarisqanchis hina, Jehová Diosqa allintan entienden imayna sientekusqanchista.

Monikan nin: “Jehová Dioswanqa amigontin kani mana p’itiyta paymanta mañakusqayrayku, Bibliata leesqayrayku, allinta t’aqwisqayrayku ima. Paytaqa qhawarini qayllallaytapas yanapawananpaq purishanman hinatan. Mañakuspay imayna sientekusqaymanta manaña atinichu imayna rimayta chaypas, payqa entiendewanmi. Munakuyninqa wiñaypaqmi”, nispa.

Chhaynaqa maskhasunpuni iñiqmasinchiskunaq yanapayninta munakuynintapas. Kallpachakusun huñunakuykunapi uyarimusqanchis kallpachaq yachachikuykunata kasukunanchispaq. Tukuy sonqo Jehová Diosmanta mañakusun. Manan qonqananchischu Jehová Diosqa tukuy chaykunawan yanapawasqanchista. Alexmi khaynata nin: “Jehová Diosqa imaymanawanmi kallpachawanchis iñiyninchispi ama pisipananchispaq. Chayman hina ruwasun chayqa, ‘hatun atiytan’ chaskisun, manataq ima sasachakuywanpas pisipasunchu”, nispa (2 Cor. 4:7).

[18 paginapi foto recuadropiwan]

Llakipi kashaqkunapaq yanapay

Askha Salmo takikunan qhawarichin Jehová Diosta serviqkunaqa sasachakuypi tarikuspa nishu llakipi kasqankuta. Qhawarichillantaqmi yanapananpaq waqyakuqtinkuqa Jehová Dios uyarimusqanta. Wakin Salmokunan khaynata nin:

“Llaki-phutiyniypin Señor Diosta waqyakurqani, yanapaykuwananpaqmi Diosniyta waqyakurqani, ch’uya wasinmantan uyarimuwarqan, qaparisqaytan uyarimuwarqan.”(Sal. 18:6.)

“Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin.” (Sal. 34:18.)

“[Jehová Diosmi] llakiq ñit’isqan sonqoyoqkunata qhaliyachin, k’irinkunatapas wataykun.” (Sal. 147:3.)

[17 paginapi foto]

‘Tiemponpi rimasqa’ simiqa llakiq ñit’isqan kaqkunatan anchata kallpachan