Leeqkunaq tapukusqan

Jesusmi nirqan: “Imaynan hanaq pachapi Taytaykichispas chaninpuni, chay hinallataq qankunapas chaninpuni kaychis”, nispa. ¿Imaynatan huchasapa runakuna chay textoq nisqanta hunt’asunman? (Mat. 5:48.)

Chay textopi griego rimaymanta t’ikrakuq “chanin” simiqa Jehová Dios hina allintapuni ruwaymantan rimashan, chay simin t’ikrakullantaq “hunt’asqa”, “mana imanasqa”, nispa.

Qallariypiqa Adanwan Evawanqa mana huchayoq runakunan karqanku, Diospa kamachikuyninkunatapas mana pantaspan hunt’arqanku. Diospa kamachikuyninkunata p’akiqtinkun ichaqa huchasapa runaman tukupurqanku, chaymi llapa wawankupas huchayoq nacerqanku. Chhaynapin Adanqa huchaman wañuyman qaraykuwarqanchis (Rom. 5:12).

Jesusqa Orqo Patapi rimaspan sut’ita qhawarichirqan huchasapa runakunaqa Jehová Dios hina allintapuni ruway atisqankuta. Chaypin rimarqan Dios hina munakuyniyoq kanamanta, khaynatan nirqan: “Munakuychis awqaykichiskunata, [saminchaychis ñakaqniykichiskunata, allinta ruwapuychis cheqnikuqniykichiskunapaq] mañapuychis k’amiqniykichiskunapaqpas qatiykachaqniykichiskunapaqpas. Ahinapin hanaq pachapi kaq Yayaykichispa wawankuna kankichis, payqa intintan lloqsichimun allinkunapaqpas mana allinkunapaqpas, parachimullantaqmi”, nispa (Mat. 5:44, 45). Jesuspa yachachisqankunapas runakunata chhaynata munakuspaqa Jehová Dios hina allin ruwaq kasqankutan rikuchinku.

Jehová Diospa testigonkunaqa kallpachakunkun runakunata chay hinata munakunankupaq. Tukuy atisqanchistan ruwanchis llapa runakunaman Bibliamanta cheqaq kaqta yachachinanchispaq ima religionmantaña may llaqtamantaña kaqtinkupas. 236 nacionkunapin qanchis millón más runakunaman Bibliamanta estudiota qoshanchis.

Jesusmi nirqan: “Munakuqnillaykichista munakuwaqchis chayqa, ¿ima premioyoqtaq kawaqchis? ¿Manachu contribución cobraqkunapas chay hinallatataq ruwanku? Wawqeykichiskunallatachus napaykunkichis chayqa, ¿hukkunaq ruwasqanmantaqa astawanchu ruwashankichis? ¿Manachu Diospi mana iñiqkunapas chay hinallatataq ruwashanku?” nispa (Mat. 5:46, 47). Cheqaq cristianokunaqa manan allin educacionniyoq otaq huk razamanta runakunallatachu allinpaq qhawarinku, nitaq munakuqnillankutachu munakunku. Aswanpas paykunaqa yanapanku wakchakunata, onqosqakunata, wawakunata, kurakkunatapas. Chhaynapin rikuchinku Jehová Dios hina munakuyniyoq kasqankuta.

Jesús kay pachata Waranqa Wata kamachimuqtinqa sacrificionpi iñispa kasukuq runakunan mana huchayoqman tukupuspa tukuy imatapas allintapuni mana pantaspa ruwanqaku imaynan qallariypi Adanpas ruwarqan hinata. Chaypin Diospa Churinqa “saqraq ruwasqankunata” tukuchipunqa (1 Juan 3:8).