Casado kawsayqa Diospa qokuyninmi

“Chayrayku, runaqa taytantapas mamantapas saqepunqa, hinaspan warminman hukllachaykakapunqa, huk aychallataq kapunqaku.” (GÉN. 2:24.)

1. ¿Imaraykun Jehová Diosta respetananchis?

JEHOVÁ DIOSMI casarakuyta paqarichiqqa, chaymi paytaqa respetananchis. Paymi Kamaqninchis hanaq pacha Taytanchispas, Bibliaq nisqan hinataq “tukuy allin kaqkunatapas, tukuy chanin kaqkunatapas” qowanchis (Sant. 1:17; Apo. 4:11). Ancha munakuq kasqanraykun sumaq regalokunata qowanchis (1 Juan 4:8). Arí, tukuy yachachiwasqanchispas, kamachiwasqanchispas, qowasqanchispas allinninchispaqmi kusisqa kananchispaqmi kanpas (Isa. 48:17).

2. ¿Imatan Jehová Dios Adanman Evamanpas qorqan?

² Biblian willan casarakuyqa Diospa regalon otaq qokuynin kasqanta (Rut 1:9; 2:12). Adanta Evawan casarachispan kamachikuyninkunata qorqan allin kanankupaq (leey Mateo 19:4-6). Chay kamachikuykunaman hina kawsaspaqa kusisqan wiñaypaq kawsankuman karqan. Ichaqa manan kasukurqankuchu, chaymantan sasachakuykunapi tarikuspa wañuyta tarirqanku (Gén. 3:6-13, 16-19, 23).

3, 4. a) ¿Imapin askha runakuna rikuchinku casarakuyta Jehová Diostapas mana respetasqankuta? b) ¿Pikunamantan kay estudiopi yachasunchis?

³ Askha runakunan Adán Eva hina pisipaq qhawarinku otaq mana reparankupaschu casarakuqkunapaq Diospa qosqan kamachikuykunata. Wakinqa manan allinpaqchu chay kamachikuykunata qhawarinku otaq munasqankuman hinalla kawsanku (Rom. 1:24-32; 2 Tim. 3:1-5). Manan Diospa qosqanta hinachu qhawarinku, manataqmi respetankuchu. Chaywanqa casarakuy Paqarichiq Diostan mana respetashankuchu.

⁴ Wakin cristianokunapas manan Jehová Dios hinachu casado kawsayta qhawarinku. Chaymi yanqallamanta otaq imaraykullapas t’aqanakapunku otaq divorcianakapunku. ¿Iman yanapanman chayta mana ruwanankupaq? ¿Imaynatan Génesis 2:24 textopi kamachikuy casadokunata yanapanman hukllachasqa kawsanankupaq? ¿Imaynatan casarakuy munaqkuna preparakunkuman kusisqa kawsanankupaq? Ñawpa tiempopi kinsa casarasqa warmi-qharimanta yachaymi llapallanchista yanapawasun. Paykunamanta yachaspan reparasun Jehová Diosta respetay ancha allinpuni kasqanta.

Hunt’aq sonqo kasun

5, 6. ¿Ima llakikuypin tarikurqanku Zacariaswan Elisabetwan? ¿Imatan chaskirqanku hunt’aq sonqo kasqankumanta?

⁵ Zacariaswan Elisabetwanmi Judá llaqtapi tiyarqanku, paykunaqa tukuy imatapas allintan ruwaqku. Sapankapas Dios munakuq runan karqanku chaymi casarakurqanku. Zacariasqa allin sacerdoten karqan, iskayninkutaqmi kallpachakuqku Kamachikuy Simi nisqanman hina kawsanankupaq. Tukuy chaskisqankumantan agradecido karqanku. Ichaqa mana wawayoqmi karqanku. Elisabetmi mana wachakuq karqan, iskayninkutaqmi machu-payaña karqanku (Luc. 1:5-7).

⁶ Ñawpa tiempopiqa mana wawayoq kayqa mana allin qhawarisqan karqan, yaqa  llapa warmi-qharitaqmi askha wawayoq kaqku (1 Sam. 1:2, 6, 10; Sal. 128:3, 4). Religionpi umalli yachachiqkunapunin kamachikurqanku mana wachakuq warmimantaqa t’aqakapunankupaq. ¡Chayqa sinchi mana allinmi karqan! Zacariasmi ichaqa hunt’aq sonqo qhari karqan, chaymi mana warminmanta t’aqakapurqanchu. Manan mayqenninkupas imaraykullapas t’aqakuypi yuyaykurqankuchu. Mana wawayoq kasqankumanta llakisqaña karqanku chaypas, kuskan Diosta servirqanku. Qhepamanmi Jehová Dios paykunata samincharqan huk wawata qospa (Luc. 1:8-14).

7. ¿Imapin Elisabet rikuchirqan hunt’aq sonqo kasqanta?

⁷ Elisabetpas hunt’aq sonqo warmin karqan. Zacariasqa manan rimaripuyta atirqanchu wawayoq kananta ángel willaqtin mana creesqanmanta. Ichaqa willarqanchá warminman wawanku Juan sutiyoq kananpaq angelpa willasqanta. Wawanku naceqtinmi familiankunapas reqsisqanku runakunapas taytanpa sutinta chay wawaman churayta munarqanku. Ichaqa qosanta kasuspan Elisabet nirqan: “Manan, Juanmi sutinqa kanqa”, nispa (Luc. 1:59-63).

8, 9. a) ¿Imaynatan hunt’aq sonqo kay casarasqakunata hukllachan? b) ¿Imaynatan casarasqakuna rikuchinkuman hunt’aq sonqo kasqankuta?

⁸ Paykuna hinan kay tiempopi casarasqakunapas llakikuykunapi sasachakuykunapi tarikunku. Chaymi sapankapas hunt’aq sonqo kananku. Hukta qhawapayaypas, wasanchaypas, qhelli ruwaykunata qhawaypas hunt’aq sonqo kayninkutan pisiyachinman, manañan confianza kanmanchu chaytaqmi munakuyninkuta chiriyachipunman. Casado kawsaypi hunt’aq sonqo kayqa allin cercasqa wasipi tiyay hinan, tukuy mana allinkunamantan pakaykuwanchis kusisqa, thakpi tiyanapaq. Warmipas qharipas hunt’aq sonqo kaspankuqa mana manchakuspan imachus yuyaykusqankumanta parlarinqaku astawantaq munanakunqakupas. Arí, allinta kawsanapaqqa hunt’aq sonqon kana.

⁹ Jehová Diosmi Adanta nirqan: “Runaqa taytantapas mamantapas saqepunqa, hinaspan warminman hukllachaykakapunqa, huk aychallataq kapunqaku”, nispa (Gén. 2:24). Casarasqa warmi-qhariqa manañan soltero hinañachu familianwan amigonkunawanpas kawsanqa. Ñawpaqtaqa qosankuta esposankutaraqmi atiendenanku kanqa tiemponkutapas paykunamanmi qonanku kanqa. Casarasqakunaqa huk familiayoqñan kanku, chaymi tayta mamankuqa mana chapukunankuchu ima ruwasqankupipas. Sapankan warminman qosanman k’askakunan, chaytan Jehová Dios kamachikun.

10. ¿Iman casadokunata yanapanqa kusisqa kanankupaq?

¹⁰ Mana iñiq qosayoq kaqkunatapas hunt’aq sonqo kayqa yanapanmi. Huk cristianan nin: “Anchatan Jehová Diosta agradecekuni qosayta kasukunaypaq respetanaypaq yachachiwasqanmanta. Hunt’aq sonqo kasqayraykun 47 wataña munanakuspa respetanakuspa kawsayku”, nispa (1 Cor. 7:10, 11; 1 Ped. 3:1, 2). Casarasqa ukhupi allin kawsay kananpaqqa kallpachakunan. ¿Imatan ruwawaq esposayki otaq qosayki kusisqa kananpaq? Rimasqaykipi otaq ruwasqaykipi rikuchiy imamantapas astawanqa pay aswan importante kasqanta. Tukuy atisqaykita ruway ama pipas nitaq imapas munanakuyniykichista chiriyachinanpaq (leey Proverbios 5:15-20). Ronwan Jeannettewanmi 35 wata masña casarasqa kashanku, paykunan ninku: “Diosta kasukuspayku hunt’aq sonqo kaspayku iman allinta kawsarqayku”, nispa.

Kuska imatapas ruwayqa hukllachawanchismi

11, 12. ¿Imaynatan Aquilawan Priscawan kuska imatapas ruwaqku a) wasinkupi, b) llank’anankupi, c) predicacionpi?

¹¹ Apóstol Pabloqa Áquila Prisca amigonkunamanta rimaspaqa iskayninkumantapunin  rimaq. ‘Huk aychallan kapunqaku’ nispa Diospa nisqantan paykunaq kawsasqanku sut’ita rikuchirqan (Gén. 2:24). Paykunaqa kuskan imatapas ruwaqku wasinkupi, llank’anankupi, Diosta servispapas. Corinto llaqtaman Pablo chayaqtinmi wasinkuman waqyaykurqanku, chaymantan Pabloqa huk tiempo llank’ayninta aparinman karqan. Hinaspapas Éfeso llaqtapi kaq wasinkutan huñunakuykunapaq qorqanku. Chayllaraq iñiqmasikunatapas yanaparqankun, Apolostapas Diospa Siminmantan astawan entiendechirqanku (Hech. 18:2, 18-26). Roma llaqtaman astakuspan chaypi wasinkuta huñunakuykunapaq qollarqankutaq. Chay qhepamanmi Éfeso llaqtaman kutispa iñiqmasikunata kallpacharqanku (Rom. 16:3-5).

¹² Paykunaqa Pablowan kuskan huk tiempo karpakuna ruwaypi llank’arqanku. Chaypin yachallanchistaq warmi-qhari mana hap’inakuspa mana churanakuspa huk hinalla llank’asqankuta (Hech. 18:3). Ichaqa Diosta servisqankun yanaparqan casado kawsayninkupi sumaqta kawsanankupaq. Corinto, Éfeso, Roma llaqtakunapiqa ‘Jesucristota serviypi llank’aysiqkunata’ hinan reqsirqanku (Rom. 16:3). Maytaña rispapas kuskan paykunaqa Diosmanta willaqku.

13, 14. a) ¿Ima ruwaykunan casarasqakunata t’aqanasqata hina kawsachin? b) ¿Imakunan casarasqakunata yanapanqa ‘huk aycha’ hinalla kawsanankupaq?

¹³ Imatapas kuska ruway munasqankun casadokunata astawan hukllachan (Ecl. 4:9, 10). Askha warmi-qharikunan ichaqa t’aqanasqa hina kawsanku. Wakinqa ch’isiyaqmi llank’anku, hukkunataq llank’anankurayku huk llaqtakunata otaq huk nacionkunata viajanku, chaymantataq familiankuman qolqeta apachimunku. Wakinqa wasinkupi kashaspapunin televisión, videojuego, Internet qhawayman, pukllayman qokunku otaq huk ruwaykunaman. Chhaynapi tarikushanki chayqa allinmi kanman wasipi ruwanakunata kuska ruwanaykichispaq tiempota t’aqay; kuskan wayk’uwaqchis, platokunata maylliwaqchis, huertata limpiawaqchis, wawaykichista otaq yuyaq tayta-mamaykichista cuidawaqchis.

¹⁴ Chaykunamanta astawanqa kuskan Dios yupaychana ruwaykunata ruwanaykichis. Sapa p’unchaypaq textota t’aqwispa, Diosta Yupaychana Ch’isinta estudiaspa, predicacionman lloqsispa, precursor kaspapas astawanmi hukllachasqa kawsankichis. ¿Atiwaqchischu precursor kayta, huk killa, huk wata, otaq astawanpas? (Leey 1 Corintios 15:58.) Huk cristianan qosanwan kuska precursor karqanku, paymi nin: “Predicacionman kuska lloqsisqaykun yanapawarqanku sumaqta parlarinaykupaq. Iskayniyku runakunaman yachachiyta munaspa kusata yanapanakuq kayku. Astawanmi payman k’askakurqani; manan qosayta hinallachu rikuq kani aswanpas amigoyta hinan”, nispa. Qankunapas kallpachakunaykichismi chhayna allin llank’aykunata kuska ruwanaykichispaq. Chaymi yanapasunkichis ima ruway munasqaykichispas p’unchay-p’unchaymanta  tupananpaq. Áquila Prisca hinan qankunapas yuyaykusqaykichispi ruwasqaykichispipas ‘huk aychalla kapunkichis’.

Diosmi ñawpaqpi kanan

15. ¿Imatan casadokuna ruwananku kusisqa kawsanankupaq? Kutichisqaykita sut’inchay.

¹⁵ Jesusqa allintan yacharqan casado kawsaypi Jehová Dios ñawpaqpi kananta. Payqa rikurqanmi Adanta Evawan casarachisqanta, Diosta kasukusqanku tiempopi kusisqa kawsasqankutapas. Rikurqanmi mana kasukusqankumantapacha imaymana sasachakuykunapi tarikusqankutapas. Chaymi runakunata yachachishaspa yuyarichirqan Génesis 2:24 textopi Taytanpa kamachikusqanta, nirqantaqmi: “Chayrayku, runaqa Diospa hukllachasqantaqa ama t’aqachunchu”, nispa (Mat. 19:6). Kunanpas kusisqa kawsayta munaqqa Diostan tukuy sonqowan respetanan. Chaytan Jesuspa tayta maman ruwarqanku.

16. ¿Imaynatan Josewan Mariawan rikuchirqanku Dios sonqo kasqankuta?

¹⁶ Parlaqmasintin kasqankumantapachan Joseqa respetowan sumaqta Mariata trataq. Onqoq kasqanta yacharqospapas manan millay warmita hinachu rikurqan, chay qhepamanña huk ángel willarqan imaynapi onqoq rikhurisqanta chaypas (Mat. 1:18-20). Casarakusqanku qhepamanpas kasukuqmi kaqku cesarpa kamachikusqanta Kamachikuq Simitapas (Luc. 2:1-5, 21, 22). Jerusalenpi Hatun fiestakunaman qharikunalla kamachisqa karqanku rinankupaq chaypas, sapa watanmi Mariapas familianpas riysirqanku (Deu. 16:16; Luc. 2:41). Josepas Mariapas kallpachakurqankun Diospa sonqonta kusichinankupaq tukuy kamachikusqanta kasukunankupaqpas. Chaychá Jehová Diosqa paykunata akllarqan Churinta uywanankupaq.

17, 18. a) ¿Imakunapin rikuchisunman Jehová Diosta ñawpaqman churasqanchista? b) ¿Imaynatan kawsasun Diosta ñawpaqman churaspa?

¹⁷ ¿Qankunari imaynan kashankichis? ¿Bibliaq nisqanman hinachu kawsashankichis? Imatapas decidinaykichis kaqtin, ¿Bibliatachu t’aqwirinkichis, mañakunkichischu Diosmanta, tapukunkichischu allin iñiyniyoq cristianokunata? Icha, ¿yuyaykusqaykichisman hinallachu ruwankichis otaq familiaykichismanta amigoykichismantachu yanapayta mañakunkichis? ¿Kallpachakunkichischu hunt’aq kamachi familiakunapaq yuyaychaykuna apachimusqanman hina kawsanaykichispaq? Icha, ¿llaqtaykichispi imayna kawsasqankuman hina, runakunaq nisqanman hinallachu kawsashankichis? ¿Kuskachu Diosmanta mañakunkichis estudiankichispas? ¿Parlarinkichischu Diosta astawan servinaykichismanta otaq familiaykichispa necesitasqanmanta?

¹⁸ Ray cristianon 50 wataña kusisqa esposanwan tiyanku, paymi nin: “Kallpachakuqmi kayku Jehová Dioswan casado kawsayniykupi ‘kinsanpasqa q’aytu’ hina kanaykupaq, chaymi ima sasachakuykuna kaqtinpas sumaqta allichaq kayku”, nispa (leey Eclesiastés 4:12). Dannypas Trinapas ninkun: “Kuska Jehová Diosta servisqaykun sapa p’unchay astawan hukllachawanku”, nispa. Paykunaqa 34 wata masñan kusisqa kawsashanku. Jehová Diosta casado kawsayninchispi ñawpaqman churasun chayqa, yanapawasunmi sumaqta kawsananchispaq saminchawasuntaqmi kanpas (Sal. 127:1).

 Respetasun Diospa qowasqanchista

19. ¿Imapaqmi Jehová Dios casarakuyta paqarichirqan?

¹⁹ Askha casarasqakunan paykunaq allinnillanpi yuyaykunku. Cristianokunan ichaqa mana chhaynatachu yuyaykunchis. Jehová Diosqa munaynin hunt’akunanpaqmi casarakuytaqa paqarichirqan (Gén. 1:26-28). Sichus Adanwan Evawan kasukunkuman karqan chayqa, Hallp’anchismi sumaq paraíso kashanman, chanin runakunallan Diosta servispa kusisqa kawsashankuman karqan.

20, 21. a) ¿Imaynatan casado kayta qhawarina? b) ¿Imamantan qhepa estudiopi yachasun?

²⁰ Casarakuy kawsayqa Diosta hatunchanapaqmi (leey 1 Corintios 10:31). Kunan yachasqanchis hina hunt’aq sonqo kay, kuska imatapas ruway, Diosta ñawpaqman churay iman casado kawsayta astawan hukllachan. Sichus casarakuypi yuyaykushanchis, casado kawsayninchispi aswan allinta kawsayta munashanchis, otaq t’aqanakuypi hinaña kashanchis chaypas, llapallanchismi casado kawsaytaqa Diospa qosqanta hina qhawarina. Chaytan mana qonqanachu, chhaynapin imata decidinapaqpas Diospa nisqanman hina ruwasun. Chayta ruwaspan rikuchisun casado kawsaytapas hanaq pacha Taytanchistapas respetasqanchista.

²¹ Jehová Diosqa manan casado kawsayllatachu qon kusisqa kawsananchispaq. Qhepa estudiopin yachasun huk regalo qosqanmantañataq. Chay regaloqa soltero kaymi.

¿Imanispan kutichisunman?

• ¿Imaynatan hunt’aq sonqo kay yanapanqa casarasqakunata?

• ¿Imaynatan kuska imatapas ruway casarasqakunata hukllachanqa?

• ¿Imaynatan casarasqakuna rikuchinkuman Jehová Dios ñawpaqpi kasqanta?

• ¿Imaynatan rikuchisunman Jehová Dios respetasqanchista?

[Tapuykuna]

[15 paginapi fotokuna]

Kuska imatapas ruwasqaykichismi hukllachasunkichis