Diosmi atiyta qowanchis tentacionta pisi kallpayayta atipanapaq

“Santo Espíritu hamuqtinmi ichaqa atiyta chaskinkichis.” (HECH. 1:8.)

1, 2. ¿Imatan Jesús qatikuqninkunaman prometerqan? ¿Imaraykun chayta necesitarqanku?

JESUSQA yacharqanmi qatikuqninkunapaq Diospa kamachikusqanta hunt’ay sasa kananta. Payqa repararqanmi hatun llank’anata aparisqankurayku, atiyniyoq enemigokunayoq kasqankurayku, runalla kasqankurayku ima Diospa yanapayninta necesitasqankuta. Chaymi manaraq hanaq pachaman ripushaspa prometerqan: “Qankunaman Santo Espíritu hamuqtinmi ichaqa atiyta chaskinkichis, hinaspan testigoykuna kankichis Jerusalén llaqtapi, lliw Judea provinciapi, Samaria provinciapi, kay pachaq k’uchunkunakamaraq”, nispa (Hech. 1:8).

² Chay promesan Pentecostés 33 watamantapacha hunt’akurqan, Jesuspa qatikuqninkunaman santo espíritu uraykamuqtin, chay espirituq yanapayninwanmi Jerusalén llaqtapi predicacionta aparirqanku. ¡Manan pipas chay ruwasqankuta qolluchiyta atirqanchu! (Hech. 4:20.) Chay tiempokunamanta ‘kay pachaq p’uchukanankaman’ llapa cristianokuna necesitarqanchis Diospa atiyninta (Mat. 28:20).

3. a) ¿Imapin hukniray atiywan santo espirituwan? b) ¿Imaynatan Diospa qowasqanchis atiy yanapawanchis?

³ Jesusqa nirqanmi qatikuqninkunata: “Qankunaman Santo Espíritu hamuqtinmi ichaqa atiyta chaskinkichis”, nispa. Santo espirituwan atiywanqa manan kaqllachu. Santo espirituqa Jehová Diospa kallpanmi, chay kallpanwanmi runakunata yanapan otaq imatapas ruwan munaynin hunt’akunanpaq. Atiymi ichaqa runapi otaq imapipas hinalla kashan imapas ruwakunanpaq necesitakunankama. Astawan entiendenapaq kaywan rikch’anachisun. Santo espirituqa bateriata cargaq eléctricidad hinan, atiytaq bateriapi electricidad hina. Santo espiritunwan atiy qowasqanchismi tanqawanchis Diosman qokushaspa prometesqanchista hunt’anapaq, wañuyman apaq ruwaykunamanta karunchakunapaq ima (leey Miqueas 3:8; Efesios 3:16).

4. ¿Imatan kay estudiopi yachasun? ¿Imapaqmi chaykunata yachasun?

⁴ ¿Imakunatan ruwasunman atiy chaskisqanchiswan? ¿Imaynatan yanapawasunman imapi tarikuqtinchispas? Tukuy sonqowanña Diosta servinchis chaypas Satanaspa kawsanpi, millay runakunaq kawsanpi, otaq pantaq runa kasqanchisraykun imaymana sasachakuykunapi tarikunchis. Cristianokunaqa atipananchismi chaykunata, chayllan Diospaq hunt’aq sonqo kasun, predicacionninchispi mana pisipasunchu, manataqmi Diosninchismantapas t’aqakusunchu. Chaymi kunan yachasun imaynatan santo espíritu yanapawanchis tentacionkunata, sayk’uyta, pisi kallpayaytapas atipanapaq.

Tentacionkunata atipasun

5. ¿Imaynatan mañakusqanchis kallpachawasunman?

⁵ Jesusmi qatikuqninkunata yachachirqan  khaynata mañakunankupaq: ‘Ama wateqayman urmanaykuta munaychu, aswanpas mana allinkaqmanta qespichiwayku’, nispa (Mat. 6:13). Jehová Diosqa kutichimuwasunmi chhaynata mañakuqtinchisqa. Jesusqa nillarqantaqmi: ‘Hanaq pachapi kaq Yayaykichisqa qosunkichismi mañakuqninkunamanqa Santo Espiritunta’, nispa (Luc. 11:13). Anchatan kusikunchis chaninta imatapas ruwanapaq Jehová Dios atiy qowasqanchismanta. Ichaqa manan chaywanqa nisharqanchu: “Manan tentasqachu kankichis”, nispachu (1 Cor. 10:13). Aswanmi nisharqan ima tentacionña kaqtinpas Jehová Diosmanta tukuy sonqowan mañakunanchista (Mat. 26:42).

6. ¿Imawanmi Jesús Saqraq tentasqanman kutichirqan?

⁶ Jesusqa Diospa Simin Qelqawanmi Saqraq tentasqanmanqa kutichiq. Payqa allintan yacharqan Diospa Siminmanta, chaymi khaynata kutichiq: “Diospa Simin Qelqan nin: ‘[...]’ Diospa Simin Qelqaqa nillantaqmi, ‘[...]’. Anchhuriy, Satanás, Diospa Simin Qelqan nin, ‘Señor Diosniykitan yupaychanki, pay sapallantataqmi servinkipas’, nispa ”, nispa. Jehová Diosta Simin Qelqatawan anchata munakusqanmi Jesustaqa yanaparqan Saqraq tentasqanman mana urmananpaq (Mat. 4:1-10). Jesús mana kasuqtinmi Saqraqa ripurqan.

7. ¿Imaynatan Biblia yanapawanchis tentacionkunata atipanapaq?

⁷ Jesusqa Diospa churin kashaspapas Qelqaq nisqanman hinan Saqra tentaqtin kutichirqan. Ñoqanchisqa astawanraqmi chayta ruwananchis. Jesús hina Saqraq tentacionninman mana urmanapaqqa kallpachakunanchismi Jehová Diospa kamachikuyninkunata allinta yachanapaq sonqomanta hunt’anapaqpas. Askha cristianokunan chay kamachikuykunata hunt’anankupaq decidikurqanku Bibliata estudiaspa chaypi yachachikuykunata chaninpaq qhawarisqanku qhepaman. Diospa Simin Qelqaqa atiyniyoqmi, chaymi “sonqopi yuyaykusqakunatapas lliwtapuni sut’inchan” otaq cambian (Heb. 4:12) Bibliata estudiaspa yuyaymanaspa iman astawan entiendesun Jehová Diosqa hunt’aq Dios kasqanta (Sal. 25:10). Chhayna atiyniyoqtaq Biblia chayqa, tiempotan t’aqananchis imapichus allinyananchis kashan chaypaq hina textokunapi yuyaymananapaq.

8. ¿Imakunan yanapawanchis Santo Espirituta chaskinapaq?

⁸ Jesustaqa Diospa ‘Santo Espiritunwan hunt’a kasqanmi’ yanapallarqantaq Saqraq tentasqanman mana urmananpaq (Luc. 4:1). Ñoqanchispas Dioswan hukllachasqa kaspaqa Jesús hinan ima tentaciontapas atipasun. Ichaqa, ¿imatan ruwana Jehová Dioswan hukllachasqa kanapaq? Bibliatan estudiana, Diosmanta mañakuna, manataqmi Diospa llaqtanmanta t’aqakunachu (Sant. 4:7, 8). Askha iñiqmasinchiskunan reparanku Diosta astawan serviy allinninkupaq kasqanta, ninkun: “Chay allin ruwaykunapi yuyaykuymi Diosman astawan asuykachiwanku”, nispa.

9, 10. a) ¿Ima tentacionkunan kan tiyasqayki llaqtapi? b) ¿Imaynatan yuyaymanay Diosmanta mañakuypas yanapawasunman tentacionkunamanta ayqekunapaq?

⁹ ¿Ima tentacionkunapin tarikurqanchis? Casado cristianokuna, ¿yaqachu hayk’aqllapas huk qharita otaq huk warmita qhawapayarqankichis? Solterokuna, hayk’aqllapas mana iñiq runa mayta rinaykichispaqpas invitasuqtiykichis, ¿yaqachu riyta munarqankichis? Televisionpi otaq Internetpi millay qhelli ruwaykuna rikhurimuqtin, ¿hinallatachu qhawarqankichis? Chaykunata ruwayqa pisi-pisimantan hatun huchaman tanqaywasunman, chaykunapin yuyaymananchis, chaymi mana ima huchamanpas urmasunchu (Sant. 1:14, 15). Huchapi purispaqa iñiqmasinchiskunaq, familianchiskunaq sonqontan k’irisunman, astawanqa Jehová Diosninchistan llakichisunman. Diosninchista  kasukuspan ichaqa ch’uya concienciayoq kawsasunchis (leey Salmo 119:37; Proverbios 22:3). Chhayna tentacionkunapi tarikuspaqa Jehová Diosmantan santo espiritunta mañakunanchis chaykunata atipanapaq.

¹⁰ ¿Imatan yachallanchistaq Jesusta Saqra tentasqanmanta? Jesusqa 40 p’unchayñan mana imata mikhuspa ch’inneqpi kasharqan. Chayta reparaspachá Saqraqa chay ‘kutipi’ Jesusta tentarqan (Luc. 4:13). Chaytan kunanpas Saqraqa ruwashan. Payqa makillan kashan imapi pisipaqtinchispas tentawananchispaq. Chaymi kallpachakunanchis iñiyninchispi allin takyasqa kanapaq. Sayk’usqa kashaspa, pisi kallpayashaspan astawanqa Jehová Diosta mañakunanchis pakaykuwananchispaq santo espiritunta qowananchispaqpas (2 Cor. 12:8-10).

Sayk’uyta pisi kallpayayta atipasun

11, 12. a) ¿Imaraykun kay tiempopi runakuna pisi kallpayanku? b) ¿Imatan Jehová Dios qowasun sasachakuykunata atipanapaq?

¹¹ Sinchi sasachakuykuna tiempopi kasqanchisrayku, pantaq runa kasqanchisrayku iman mayninpi pisi kallpayay hap’iwanchis (2 Tim. 3:1-5). Armagedonpa chayamusqanman hinan astawan qolqemanta sasachakuykunapas imaymana llakikuykunapas kashan. Chaychá tayta mamakunapaqqa aswan sasa kashan familiankuta cuidanankupaq. Chaykunamanta llakikusqankun paykunata llasa q’epi hina ñit’ishan. ¿Chhaynapichu qanpas tarikushanki? ¿Iman yanapasunkiman chay sasachakuykunata atipanaykipaq?

¹² Jesusmi prometerqan santo espirituta qowananchispaq (leey Juan 14:16, 17). Chay espirituqa Diospa ancha hatun kallpanmi. Chaywanmi Jehová Diosqa “aswan askhataraq” kallpata qowanchis ima sasachakuytapas aguantananchispaq (Efe. 3:20). Apostol Pablon willarqan ‘imaymana sasachakuypi kashaqtinchispas’ santo espiritumanta ‘hatun atiy chaskisqanchista’ (2 Cor. 4:7, 8). Jehová Diosqa manan sasachakuyninchiskunata chinkachinqachu, ichaqa santo espirituntan qowasun kallpata hap’inanchispaq (Isa. 12:2).

13. a) ¿Iman Stephanie sipasta yanapan tukuy sasachakuyninkunata aguantananpaq? b) ¿Reqsinkichu pitapas chhayna sasachakuypi tarikuqta?

¹³ Stephanie sipasmanta yachasun. Payqa 19 watanpin kashan precursorataqmi kanpas. 12 watanpi kashaqtinmi derrame cerebral hap’irqan, umanpitaqmi tumorta  tarirqanku. Iskay kutitan operarqanku, chaskirqanmi radioterapia nisqa tratamientotapas. Ichaqa yapamantan iskay kutita derrame cerebral qollarqantaq, chaymi kunanqa arphata rikun, lloq’e lado cuerpontaqmi mana ancha kuyurinchu. Chaywanpas Stephanie sipasqa anchatan kallpachakun huñunakuykunaman rinanpaq predicananpaqpas. Payqa reparanmi imaymanapi Jehová Diospa kallpachasqanta. Llakisqa tarikuspan iñiqmasikunaq experiencianta leespa kallpachakun. Iñiqmasikunan kallpachanku tarjetakunata apachispa huñunakuykunapi rimapayaspa ima. Bibliamanta yachay munaqkunapas wasintan rinku paywan estudianankupaq. Chaykunamantan payqa Jehová Diosta anchata agradecekun, nintaqmi, “Salmo 41:3 texton ñoqapi hunt’akun”, nispa.

14. ¿Imatan mana ruwananchischu sayk’usqa kaspa, imarayku?

¹⁴ Yaqapaschá sinchi sayk’usqa kaspa nisunman: “Huk kutipiña Bibliata leesaq familiaywanpas estudiasaq, huk p’unchayña huñunakuyman predicacionmanpas risaq”, nispa. Chayta ruwaspaqa astawanmi pisi kallpayasunman. ¿Imarayku? Bibliata estudiaspa, huñunakuyman rispa, hukkunata ruwaspa iman santo espirituta chaskinchis, chaymi kallpachawanchis (leey Mateo 11:28, 29). Mayninpiqa sayk’usqan chayanchis huñunakuykunaman, huñunakuy tukuytan ichaqa chayraqpas samasqanchismanta hatarishasunman hina sientekunchis. Imaynan bateriata cargaruqtinchis mosoq hinaraq funcionan hinata.

15. a) ¿Imaninmi Biblia Dios serviymanta? b) ¿Imatan Jehová Dios prometewanchis? ¿Ima tapukuymi kan?

¹⁵ Cristiano kayqa manan facilchu, sapa p’unchaymi kallpachakunanchis Diosta hunt’aq sonqowan servinapaq (Mat. 16:24-26; Luc. 13:24). Ichaqa Jehová Diosmi santo espiritunta qowasun sayk’uqtinchis kallpata hap’inanchispaq. Profeta Isaiasmi qelqarqan: “Señor Diospi confiakuqkunan [...] wakmanta kallpachasqa kanqaku, anka hinan phalanqaku, phawanqakun, manataqmi sayk’unqakuchu, purinqakun, manataqmi pisipanqakuchu”, nispa (Isa. 40:29-31). Ichaqa, ¿imaraykun hukkuna llasa q’epita hina qhawarinku Dios serviyta?

16. ¿Imatan ruwana mana sayk’usqa sientekunapaq?

¹⁶ Biblian kallpachawanchis ‘aswan allin kaqtapuni akllakunanchispaq’ (Fili. 1:10). Apóstol Pablon cristiano kawsayta rikch’anachirqan carrerapi phawaywan, nirqantaqmi: “Tukuy ima hark’awaqninchistapas [...] wikch’uspa, phawananchispaq kaq phawanata tukuy sonqo phawasun”, nispa (Heb. 12:1). Chaywanqa niwashanchismi yanqa ruwaykunata sasa q’epikunatapas wikch’unanchispaq. Yaqapaschá imaymana ruwanayoq kashaspa astawan huk ruwaykunata yapakuspa sayk’ushanchis. Chhayna kaqtinqa tapukunanchismi: “¿Hayk’a tiempon llank’ashani? ¿Hayk’a tiempon kusirikuykunapi huk ruwaykunapipas kani?”, nispa. Sichus imatapas allinta yuyaykuspa ruwasun chayqa, manan tiemponchista yanqa ruwaykunapi usuchisunchu.

17. ¿Imaraykun wakin cristianokuna pisi kallpayanku? ¿Imata yuyariymi paykunata kallpachanman?

¹⁷ Wakin cristianokunaqa p’uchukay p’unchay mana chayamusqanwanmi pisi kallpayanku (Pro. 13:12). ¿Iman paykunata yanapanman? Habacuc 2:3 textoq nisqanmi, chaypin nin: “Manaraqmi tiempo chayamunchu kay rikhuriypa hunt’akunanpaq,  ichaqa hunt’akunqapunin, chay p’unchayqa sispaykamushanñan, qheparimunqaña chaypas, suyallay, tiemponpipunin chayamunqa”, nispa. Chaypi nisqan hina, Jehová Diospa p’unchayninqa paypa yuyaykusqan p’unchaypipunin chayamunqa.

18. a) ¿Diospa ima promesankunan kallpachawanchis? b) ¿Imamantan yachasun qatimuq estudiopi?

¹⁸ Jehová Diosta tukuy sonqowan serviqkunaqa sayk’uypas pisi kallpayaypas tukupuqtin ‘wayna-sipas’ kawsaytan suyakushanchis (Job 33:25). Diosta servishallasun chayqa, paymi santo espiritunta qowasun kallpawan imatapas ruwanapaq (2 Cor. 4:16; Efe. 3:16). Sayk’uywan atipachikuspaqa manan Diospa saminchayninta chaskisunchu. Ñan p’unchay chayamushanña sayk’uypas, pisi kallpayaypas, tentacionkunapas tukupunanpaq. Qatimuq estudiopin yachasun imaynatan santo espíritu kallpachawanchis qatiykachayta, mana allin ruwaykunata huk sasachakuykunatapas atipanapaq.

¿Ima nispan kutichiwaq?

• ¿Imaynatan Bibliata leespa atiyta chaskisunman?

• ¿Imaynatan Diosmanta mañakuypas yuyaymanaypas kallpachawanchis?

• ¿Imaynatan pisi kallpayayta atipasunman?

[Tapuykuna]

[24 paginapi foto]

Huñunakuykunaqa kallpachawanchismi