Jehová Diospa ruwasqankunapi yuyaymanay

JESUSPA kawsarimpusqan qhepallamanmi iskay qatikuqninkuna Jerusalenmanta Emaús llaqtaman risharqanku. Lucas 24:15-21 nin: “Paykuna rimaspa tapunakuspa rishaqtinkun, kikin Jesusqa asuykuspa paykunawan kuska rirqan. Paykunaq ñawintaq ayphayasqa hina karqan Jesusta mana reqsinankupaq. Jesustaq paykunata tapuykurqan: –¿Imamanta tapunakuspan purishankichis? nispa. Chaymi paykunaqa llakisqa uyantin sayaykurqanku”, nispa. ¿Imaraykun llakisqa kasharqanku? Paykunaqa Roma llaqtaq makinmanta Jesuspa kacharichinantan suyakusharqanku, ichaqa manan chhaynachu karqan, payqa wañuchisqan kapurqan (Hech. 1:6).

Jesusqa ‘Moisespa qelqasqankunamanta llapallan profetakunaq qelqasqankama paymanta lliw qelqasqakunatapas sut’inchaspan’ paykunata yuyaymanachirqan. Hinaspapas manaraq wañupushaqtin tukuy imaymana sucedesqanwan iñiyninku kallpachasqa kasqantan yuyarichirqan. Chaykunata uyarispan paykunaqa kusikurqanku. Chay ch’isinta huñunakuspan ninakurqanku: “¿Manachu ñanpi rimapayawaspanchis Diospa Simin Qelqaq nisqanta willashawaqtinchisqa sonqonchis kawsarirqan?” nispa (Luc. 24:27, 32). ¿Imatan paykunamanta yachanchis?

Suyakusqanchis mana hunt’akuqtin

Jesuspa chay iskay yachachisqankunaqa suyakusqanku mana hunt’akusqanmantan llakisqa kasharqanku. Proverbios 13:12 nin: “Runaqa suyakusqan mana hunt’akuqtinmi llakikun”, nispa. Yaqapaschá kunanpas wakin cristianokuna, astawanqa unay watakunaña Jehová Diosta serviqkuna nirqanchis: “Ñachá kunanqa ‘manchay ñak’ariyta’ pasaspa mosoq pachapiña kashasunman”, nispa (Mat. 24:21; Apo. 7:14). Chanillantan llapa cristianokunapas suyakusqanchis mana hunt’akusqanmanta llakikunchis.

Ichaqa, ¿iman Jesuspa iskay qatikuqninkunata yanaparqan wakmanta kusikunankupaq? Profeciakuna Jesuspi hunt’akusqanta, paykunaq tiemponpi hunt’akusqanmantawan Jesuspa willasqanmi.  Ñoqanchispas Jehová Diospa ruwasqankunapi yuyaymanaspan yapamanta kusikuyta tarisunman. Allin experienciayoq Michael sutiyoq umallin nirqan: “Jehová Diospa ruwasqankunapi yuyaymanay ama manaraq ruwasqanpichu”, nispa. ¡Chay nisqanqa allinpunin!

¿Imakunatañan Jehová Dios hunt’arqon?

Yuyaymanasunchis Jehová Diospa ruwasqankunapi. Jesusmi nirqan: “Ñoqapi iñiqqa ñoqaq ruwasqaykunatan ruwallanqataq, chaykunamantapas astawanraqmi ruwanqa”, nispa (Juan 14:12). Kay tiempopi Jehová Diospa testigonkunan mana hayk’aq ruwakusqanta pachantinpi predicashanchis. Kunanqa qanchis millón masñan suyakushanchis manchay ñak’ariypi qespichisqa kayta. Manan hayk’aqpas chhaytukuy runakunaqa Diosta servirqankuchu. Jehová Diosmi hunt’achishan Churinpa rimasqanta. Cheqaqtapunin Diospa llaqtanqa Jesuspa ruwasqanmanta ‘astawanraq ruwashan’.

¿Imakunatawanmi Jehová Dios ñoqanchisrayku ruwashan? Payqa askha runakunatañan kay millay pachamanta horqospa llaqtanman pusamushan thakpi kawsayta tarinankupaq (2 Cor. 12:1-4). Yuyaymanay thakpi kanaykipaq imaymana chaskisqaykipi. Qhawariy wasiykipi otaq huñunakuna wasipi llapan qelqankuna kasqanta. Qhawariy Índice de las publicaciones Watch Tower nisqa librota, Watchtower Library nisqatapas. Grabasqa dramakunata uyariy. Yuyariy chayllaraq hatun huñunakuypi rikumusqaykita uyarimusqaykitapas. Yuyaymanay llapa cristianokunawan wawqe-panantin hina kawsasqanchispi. Jehová Diosqa sumaq sonqo kayninpin espiritual mikhunata askhanpi qowanchis ancha munakuq iñiqmasikunatapas. ¡Cheqaqtapunin Diospa llaqtanpiqa thakpi kawsashanchis!

Davidmi nirqan: “Diosnilláy Señor Dios, askhallañan musphana ruwasqaykikunaqa, askhallañan yuyarikuwasqaykikunaqa”, nispa (Sal. 40:5). Sichus Jehová Diospa tukuy ruwasqankunapi munakuwasqanchispi ima yuyaymanasun chayqa, mana pisipaspan hunt’aq sonqowan Jehová Taytanchista servishallasun (Mat. 24:13).

[31 paginapi dibujo]

Jesusqa qatikuqninkunatan yuyaymanachirqan paykunarayku Jehová Dios imaymana ruwasqanpi

[32 paginapi fotokuna]

Yuyaymanay chayllaraq hatun huñunakuyman rispa rikumusqaykipi uyarimusqaykipipas