Chaninkayta tukuy sonqowan munakusun

‘Chaninkaytan munakunki.’ (SAL. 45:7.)

1. ¿Iman yanapawasun chanin ñanninta purinapaq?

JEHOVÁ DIOSQA Bibliawan santo espiritunwan iman serviqninkunata ‘chanin ñanninkunata pusawanchis’ (Sal. 23:3). Ichaqa huchayoq runa kasqanchisraykun mayninqa mana allin ñanninta puriyta munanchis. Chay ñankunaman urmaspaqa kallpachakunanchismi yapamanta chanin ñanninta purinapaq. ¿Iman chaypaq yanapawasun? Jesús hinan chaninkaqta munakunanchis (leey  Salmo 45:7).

2. ¿Iman ‘chanin ñan’?

² ¿Imataq chay ‘chanin ñankunari’? Chanin ñan nispaqa nikun Diospa kamachikusqanman hina kawsaytan. Hebreo rimaymanta griego rimaymantawan t’ikrakamuq “chanin” nisqa simiqa allinkuna ruwayman k’askakuymi. Diospa ñanninkunaqa “chaninmi, cheqaqmi”, chaymi serviqninkunaqa payman asuykunchis kawsayninchispi yanapawananchispaq allin kaq ñanninta purichiwananchispaqwan (Apo. 15:3).

3. ¿Imatan ruwananchis Diospa chanin kamachikuyninkunamanta allinta yachanapaq?

³ Diospa sonqonta kusichinapaqqa chanin kamachikuyninkunatan kasukunanchis (Deu. 32:4). Chaypaqqa ñawpaqtan Bibliata estudiaspa paymanta astawan yachananchis. Diosta astawan reqsispaqa astawanmi payman asuykusun chaninkaqtapas munakusun (Sant. 4:8). Chayta ruwaspaqa Bibliaq nisqanman hinan imatapas decidisun.

Diospa chaninkayninta maskhasun

4. ¿Iman Diospa chanin kayninta maskhay?

⁴ (Leey Mateo 6:33.) ¿Imataq Diospa chaninkayninta maskhayri? ¿Predicayllachu? Manan. Diospa chaninkayninta maskhayqa sapa p’unchay kamachikuyninkunata kasukuymi, chayllan Jehová Diosqa yupaychasqanchista chaskiwasun. Diospa chaninkayninta maskhaqkunaqa ‘Diosman rikch’akuq kamasqa mosoq runawanmi p’achallikunanku, chaymi rikuchikun chanin kawsaypi cheqaq ch’uya kawsaypiwan’ (Efe. 4:24).

5. ¿Iman yanapawasun mana pisi kallpayanapaq?

⁵ Maytaña kallpachakunchis Diosta kasukunapaq chaypas pantanchispunin. ¿Iman yanapawasun mana pisi kallpayanapaq chaninkaqta munakuspa chayman hina kawsanapaqpas? (Pro. 24:10.) Chaypaqqa Diosmantan sapa p’unchay mañakunanchis “cheqaq sonqowan, mana kuyuriq hunt’asqa iñiywan” (Heb. 10:19-22). Llapa cristianokunan Jesusta rikunanchis Qespichiqninchista hina Uma Sacerdotenchista hina (Rom. 5:8; Heb. 4:14-16). 1879 watapi julio killapin kay revista inglés rimaypi willarqan Jesucristoq yawarnin huchamanta qespichiwananchispaq atiyniyoq kasqanmanta (1 Juan 1:6, 7). 6 paginapin khaynata nirqan: “Imatapas sansaq puka colorniyoqta puka qespiwan k’anchaypi qhawaqtinchisqa yuraq hinan rikukun. Chay sansaq puka hinaña huchanchis kanman chaypas, Jehová Diosmi Cristoq yawarninwan sumaqta yurakyachin”, nispa. ¡Maytan kusikunchis Jehová Dios Churinpa yawarninwan qespichiwasqanchismanta! (Isa. 1:18.)

Tupapakuna p’achanchista qhawarisun

6. ¿Imaraykun tupapakuna p’achanchista qhawarinanchispuni?

⁶ Cristianokunaqa chaninkaywanmi “fierro  unkuwan hina” churakunanchis (Efe. 6:11, 14). Pisi tiempollaraq otaq unayña Diosta servishanchis chaypas, sapa p’unchaymi qhawarinanchis tupapakuna p’achanchis imayna kashasqanta. ¿Imarayku? Saqra supayninkunantin kay pachaman wikch’uykamusqa kasqanrayku (Apo. 12:7-12). Payqa sinchi phiñasqan kashan pisi tiempollaña kasqanta yachaspa, chayraykun Diospa llaqtanta urmachinanpaq astawanraq kallpachakushan. Chayta yachaspan astawanqa ‘chaninkaywan fierro unkuwan hina’ churakushanallanchis.

7. ¿Imaynatan kawsasun ‘chaninkaywan fierro unkuwan hina’ churakuspa?

⁷ ¿Imapaqmi fierro unku? Sonqonchista pakaykunanpaqmi. Huchayoq kasqanchisraykun sonqonchisqa mana allin yuyaykuq, q’otukuq, millay ruwaqtaq kanpas (Gén. 8:21; Jer. 17:9). Chaymi allinta cuidananchis allin kaqllata yuyaykunanpaq. ‘Fierro unkutaqa’ manan huk ratollapas ch’utikunanchischu. Arí, manan Diospa cheqnisqan ruwaykunawan kusirikunanchischu, nitaq millay ruwaykunapi yuyaykushananchischu. Manan tiemponchista usuchinanchischu televisionta nishuta qhawaspa. Aswanmi kallpachakunanchis allin kawsasqanchiswan Diosta kusichinapaq. ¿Qonqaylla mana allin yuyaykuykunaman otaq mana allin ruwayman urmasunman chayri? Chaykunatapas Diospa yanapayninwanqa atipallasunmi (leey Proverbios 24:16).

8. ¿Imaraykun necesitanchis ‘iñiyninchista hark’aq escudota’?

⁸ Chaymantapas ‘iñiyninchista hark’apakuna escudotan hap’inanchis, chaywanmi Saqraq llapa rawrashaq wach’isqankunatapas thasnuyta atisunchis’ (Efe. 6:16). Iñiyninchismi yanapawanchis chanin ñanninta purishanallapaq, chaytaqmi wiñay kawsayman apawasun. Jehová Diostapas anchatan munakunanchis. Payta astawan munakuspaqa astawanmi chaninkayta munakusun. Hinaspapas conciencianchismi yanapawasunman chanin kaqta ruwanapaq. ¿Imaynatan yanapawasunman?

Allin concienciayoq kasun

9. ¿Imaynatan yanapawanchis allin concienciayoq kay?

⁹ Bautizakusqanchis p’unchaymi Diosmanta ‘ch’uya sonqoyoq kayta mañakurqanchis’ (1 Ped. 3:21). Jesucristoq sacrificionpi iñisqanchisraykun yawarnin huchanchista pampachan, chaytaqmi Jehová Dioswan allipunachiwanchis. Ichaqa Diospa allin qhawarisqan kanapaqqa ch’uya concienciayoqmi kananchis. Ima mana allin ruwasqanchismantapas conciencianchis huchachawaqtinchisqa otaq willawaqtinchisqa kusikunanchismi. ¿Imarayku? Chaypin yachanchis conciencianchis allin kasqanta, Jehová Diospa chanin kamachikuyninkunata kasukunanpaq hina kashasqantapas (1 Tim. 4:2). Conciencianchisqa yanapawallanchistaqmi huk hinamantapas.

10, 11. a) ¿Imaraykun conciencianchista kasukuna? Huk experienciata willay. b) ¿Imaraykun kusikunchis chaninkaqta ruwaspa?

¹⁰ Mana allinkaqta ruwaqtinchisqa conciencianchismi huchachawanchis manataqmi  thakchu sientekunchis. Huk waynan chhaynapi tarikurqan, chayllaraq Diosmanta yachashaspan ‘chanin ñanmanta’ t’aqakapurqan. Payqa nishutan qhelli ruwaykunata qhawaq marihuana nisqatapas pitaq. Huñunakuykunapi kaqtinmi conciencian sinchita huchachaq, predicacionman lloqsispapas iskay uya hinan sientekuq. Chaymi manaña Diosta servipurqanchu. Paymi willakun: “Diospa llaqtanmanta karunchakapusqay qhepamanpas sapa kutillanmi concienciay huchachawaq. Chaywanpas tawa watan mana yuyayniyoq hina mana allinta ruwaspa kawsarqani”, nispa. Qhepamanmi ichaqa Diospa llaqtanman kutimpuyta munarqan. “Jehová Diosqa manan uyariwanmanchu mañakusqayta” nispaña yuyaykurqan chaypas, huchanta pampachananpaqmi Diosmanta mañakurqan. Manaraq chunka minuto pasashaqtinmi mamanqa visitarqan, kallpacharqantaqmi huñunakuykunaman hukmanta rinanpaq. Mamanta kasuspan huk umallita maskharqan Bibliamanta estudiachinanpaq. Qhepamanmi bautizakapurqan, kunantaq anchata Jehová Diosta agradecekun qespichisqanmanta.

¹¹ Chaninkaqta ruwaqkunaqa kusisqan kawsanku. Sichus sapa p’unchay Diosta kusichinapaq hina kawsasun chayqa kusisqan kasun. Pisi tiempomantan hanaq pacha Taytanchisman ruwasqanchiskunapi rikch’akusun, chaypiqa manañan imamantapas conciencianchis huchachawasunchu, ¡ima munaychá chayqa kanqa! Ichaqa kunanmi chaninkayta sonqonchispi wiñachinanchis, chhaynapin Jehová Diospa sonqonta kusichisun (Pro. 23:15, 16).

12, 13. ¿Imaynatan conciencianchista yachachisunman?

¹² ¿Imaynatan conciencianchista yachachinanchis? Bibliata qelqanchiskunatawan allinta estudiaspan, chaymantapas Proverbios 15:28 nisqantan kasukunanchis, chaypin nin: “Chanin runaqa allintan yuyaykun”, nispa. Chaypaq rimasun llank’anamanta. Huk llank’ana munachiwasqanchismanta iskayasunman chayqa allinmi kanman chaypi yuyaymanay. Sichus hunt’aq kamachiq apachimusqan qelqakunapi tarisun chay llank’ana Diospa kamachikuynin contrapi kasqanta chayqa, manan chay llank’anaman haykunanchischu. Sichus mana qelqanchiskuna chaymanta rimanmanchu chayqa, Jehová Diosmantan mañakunanchis kamachikuyninkunata entiendespa allinta decidenapaq. * Hukkuna misk’achinamanta cuidakuymi yanapawallasuntaq allinta decidenanpaq (1 Cor. 10:31-33). Jehová Dioswan allinpi kaymi astawanqa yanapawasun. Sichus Jehová Diosta amigonchista hina qhawarinchis chayqa kaytan tapukunanchis: ¿“Imaynatan Jehová Dios sientekunqa kay llank’anaman haykuqtiy?” nispa (Sal. 78:40, 41).

¹³ Qhawaq revistata otaq Bibliata Estudianapaq Huñunakuypi qelqata preparakuspaqa allintan yuyaymanananchis. ¿Sapa kutillachu  hawan ukhunta qelqanchiskunata marcashanchis? Chhaynata preparakuyqa manan yanapawasunchu allin concienciayoq kanapaq nitaq chaninkayta munakunapaqpas. Chaymi kallpachakunanchis Bibliata allinta estudiananchispaq yuyaymanananchispaq ima. Kallpachakusun chayqa Diospa chanin kamachikuyninkunan sonqonchispi saphichakunqa.

Chaninkayta munakusun

14. ¿Imayna servinanchistan Jehová Diospas Jesucristopas munanku?

¹⁴ Jehová Diospas Churinpas munankun Diosta servispa kusikunanchista. ¿Iman chaypaq yanapawasun? Chaninkaqta munakuymi. Jesusmi orqo patapi yachachishaspa nirqan: “Kusisamiyoqmi chanin-kaymanta yarqachikuqkunaqa, ch’akichikuqkunaqa, paykunaqa saksachisqan kanqaku”, nispa (Mat. 5:6). ¿Imatan chaywan nisharqan?

15, 16. ¿Imaynatan Dios saksaykachinqa chaninkay munakuqkunata?

¹⁵ Kay pachaqa Saqraq munaychakusqanmi kashan (1 Juan 5:19). Maypiña tiyanchis chaypas sapa kutinmi astawan noticiakunapi uyarinchis wañuchinakuymanta maqanakuymanta ima. Chaninkaqta munakuqkunaqa mancharikunchisraqmi runakuna runamasinkuta millayta ñak’arichisqankuta rikuspa (Ecl. 8:9). Jehová Diosta chanin kamachikuyninkunatawan munakuqkunaqa yachanchismi paylla chaninkaymanta ch’akichikuqtapas yarqachikuqtapas saksaykachiy atisqanta. Pisi tiempomantaqa manañan kanqachu millay runakuna. Chanin runakunaqa manañan rikunqakuñachu huchasapakunata mana allin kawsaq runakunatapas (2 Ped. 2:7, 8). ¡May allinmi chayqa kanqa!

¹⁶ Jesusta qatikuspa Jehová Diosta serviqkunaqa chaninkaywanmi ‘saksaykachisqa kanqaku’. Chayqa hunt’akunqa Diospa prometewasqanchis mosoq hanaq pachapi mosoq hallp’a pachapi ‘tukuy imapas chaninkama kapuqtinmi’ (2 Ped. 3:13). Chaymi tukuy ima mana allintapas rikuspaqa mana manchakunchischu nitaq pisi kallpayanchischu (Ecl. 5:8). Jehová Diosqa tukuytan rikumushan, yanapanqataqmi chaninkaq munakuqkunata.

Chaninkayta munakuqkunaqa saminchaykunatan chaskisun

17. ¿Ima saminchaykunatan chaskinchis chaninkayta munakusqanchisrayku?

¹⁷ Salmo 146:8 texton nin: “Señor Diosmi chanin runakunata munakun”, nispa. ¿Imatan chay textomanta yachanchis? Chanin kaqta ruwaqkunataqa Tukuy Atiyniyoq Diosmi munakun. ¡Ancha kusikunapaqmi chayqa! Paypa munaynintaraq ñawpaqta ruwasun chayqa qowasunmi ima necesitasqanchistapas (leey Salmo 37:25; Proverbios 10:3). Kay Hallp’apiqa llapa chaninkaqta munakuqkunallan tiyanqaku (Pro. 13:22). Paykunaqa sumaq paraisopin wiñaypaq tiyanqaku hunt’aq sonqowan Diosta servisqankumanta. Kunanpas thakpin kawsashanku familiankuwan iñiqmasinkuwanpas (Fili. 4:6, 7).

18. ¿Imatan ruwananchis Diospa p’unchaynin chayamunankama?

¹⁸ Diospa p’unchaynin chayamunankaman Diospa chaninkayninta maskhananchis (Sof. 2:2, 3). Chanin ñanninkuna munakusqanchistan rikuchinanchis. ‘Chaninkaywanmi fierro unkuwan hina’ churakushanallanchis sonqonchis pakaykusqa kananpaq.  Kallpachakunanchismi conciencianchis ch’uya kananpaq chayllan kusisqa kawsasun, hanaq pachapi Taytanchistapas kusichisun (Pro. 27:11).

19. ¿Imata ruwananchispaqmi kallpachakusun? ¿Imamantan yachasun qatimuq estudiopi?

¹⁹ Jehová Diosqa “kay pachantintan qhawashan tukuy sonqo payta serviqkunarayku atiyninta rikuchinanpaq” (2 Cró. 16:9). Chayqa anchatan kusichiwanchis kay millay kawsay ukhupi chaninkaqta ruwanapaq llapa kallpachakuqkunata. Diosta mana reqsiqkunaqa yaqapaschá mana allinpaq qhawarinqaku Diospa nisqanman hina kawsasqanchista, ichaqa yachanchismi chhayna kawsay allinninchispaq kasqanta (Isa. 48:17; 1 Ped. 4:4). Chayrayku tukuy sonqowan kallpachakushallasun Diospa chanin kamachikuyninman hina kawsanapaq. Ichaqa manan chayllatachu ruwananchis. Diospaq hunt’aq sonqo kasqanchista rikuchinapaqqa mana chaninkaqtan cheqnikunanchis. Qatimuq estudiopin chaymanta yachasun.

[Uranpi willakuy]

¿Ima nispan kutichisunman?

• ¿Imaynapin Jesuspa sacrificionmanta yachasqanchis yanapawanchis chaninkaqta astawan munakunapaq?

• ¿Imaraykun ‘chaninkaywan fierro unkuwan hina’ churakunanchis?

• ¿Imaynatan conciencianchista yachachina?

[Tapuykuna]

[26 paginapi foto]

Allin yuyaywan llank’anata akllakunapaqqa conciencianchistan allinta yachachinanchis