Kallpachakusqaykiqa allinpunin kanqa

FAMILIANTIN DIOSTA YUPAYCHANA CH’ISIQA yanapasunkichismi wawaykichista ‘kasuchikuspa uywanaykichispaq, [Jehová] Señormanta yachachinaykichispaqpas’ (Efe. 6:4). Wawakunaqa ratollan imata yachachiqtinchispas sayk’urqapunku. ¿Imatan ruwawaqchis makilla uyarinankupaq? Yachasun Estados Unidos nacionpi tiyaq iskay casarasqa cristianokuna imatachus ruwasqankumanta.

California llaqtapi tiyaq George cristianon willakun: “Wawaykuna huch’uyllaraq kashaqtinkun warmiywan kallpachakuq kayku sumaqta yachachinaykupaq. Mayninpin Bibliamanta willakuq libroy nisqamanta yachachispayku dibujokunapi runakuna hina p’achakuq kayku. Chayman hinan espadakunata, kamachikuna varata, canastakunata ima ruwaq kayku. Bibliaq willasqan runakunamanta p’achakuspan pukllaq kayku, wakintaq pimanta p’achasqa kasqaykuta watuqku. Hukkunapiqa Bibliamanta yachasqaykutan tapunakuq kayku. Arcatapas pukllaq hinan ruwaq kayku; imamantapas yachayta munaspaqa maskhaqmi kayku hayk’aqchus imaynatachus chaykuna sucedesqantapas. Dibujaqmi kayku Bibliaq willasqan runakunata imakunachus sucedesqantawan. Kay p’unchaykunan Efesios 6:11-17 textopi willasqan tupapakuna p’achata dibujasaqku. Tukusqayku qhepamanmi sapankayku willasaqku sapanka p’acha imawan tupasqanmanta. Chaykunata ruwasqaykun yanapawanku familiapi estudiasqayku sumaq kananpaq”, nispa.

Michigan llaqtamanta Debi cristianan nin: “Kinsa watachanpi wawayku kashaqtinqa sasan karqan Bibliamanta yachachinaykupaq. Huk p’unchaymi Bibliamanta willakuq libroy nisqapi Isaacmanta Rebecamantawan leeshaqtiy iskay muñecokunata titereta hina hap’ispay yachachirqani. ¡Chayraqmi makita uyariwarqan! Chaymantapachan chay muñecokunawan Bibliapi huk runakunamanta yachachiq kani. Tukusqayku qhepamanmi hukmanta yachanaykupaqñataq ¡pakasqa qoritapas maskhashanman hina k’uchun-k’uchunta huk pukllanakunata maskhaq! Mayninqa zapatokuna cajata puka q’aytullatawanmi necesitaq kayku Rahab warmimanta yachanaykupaq. Números 21:4-9 textopi willasqan mach’aqwaymanta yachanaykupaqpas, pichanaq k’aspinmanmi huk metro kuskan sayayniyoq trapomanta machaqwayta mayt’uruq kayku. Llapa pukllasqayku muñecokunatan huk costalman waqaychaq kayku. Asikuspan qhawaq kayku wawayku salapi tiyaruspa chay costalta t’aqwiyuspa payñataq chay muñecokunawan munasqanman hina pukllasqanmanta”, nispa.

Sasan wawakunata yachachiyqa. Jehová Diosta tukuy sonqonkumanta servinankupaqqa manan semanapi huk kutillatachu yachachina. Chaywanpas familiapi yachasqaykichisqa yanapanqan iñiyninpi wiñanapaq. Kallpachakusqaykiqa allinpunin kanqa.