Allin yuyaywan Diosta servisun

‘Aswan allin kaqtapuni akllakuychis.’ (FILI. 1:10.)

1, 2. ¿Imaraykun askha runakuna q’ochukuykunata maskhanku? ¿Ima tapukuykunatan kutichikunqa?

KAY tiempopiqa astawanmi imaymana llakikuykuna sasachakuykunapas kashan. Arí, ‘sasa tiempokunapin’ kawsashanchis. Chaymi Diosta mana reqsiq runakuna mana imaynanmantapas sasachakuyninkuta allichayta atinkuchu (2 Tim. 3:1-5). Tukuy atisqankutan kallpachakunku ichaqa manan tukuytachu allichanku. Chaymi sasachakuyninkuta qonqayta munaspa imaymana q’ochukuykunata maskhanku.

² Arí, askha runakunan q’ochukuykunata maskhanku sasachakuyninkuta qonqanankupaq. Chayta qhawarispan cristianokunapas kaqllatataq ruwayta munasunman, chaymi cuidakunanchis. ¿Imaynatan cuidakusunman? ¿Imaynatan qhawarina q’ochurikuykunata? ¿Imaynatan q’ochukuy yanapawasunman ruwananchista hunt’anapaq? Ancha allin kaqkunataña ñawpaqman churananchis chaypas, ¿Bibliapi ima yuyaychaykunan yanapawasun ama sinchita chayllamanña qokunapaq?

Aswan allin kaqta akllakusun

3, 4. ¿Bibliapi ima yuyaychaymi yanapawasun imatapas allin yuyaywan ruwananchispaq?

³ Kay tiempopi runakunaqa ‘aycha kusichiyllapin puriyta munanku’ (2 Tim. 3:4). Chay hinata kawsayqa Jehová Diosmantan karunchawasunman (Pro. 21:17). Chaymi Romapi cristianokunaman apóstol Pabloq carta apachisqan kallpachawanchis allin yuyaywan imatapas ruwananchispaq, ama paykuna hina yuyaykunanchispaqpas (leey Romanos 12:8).

⁴ Salomonmi willarqan q’ochukuykunata qhepaman churaspa aswan allin kaqkunata ruwanapaq (Ecl. 3:4; 7:2-4). Runaq kawsayninqa phuyu hina pasaqllan, chaymi kallpachakunanchis qespichisqa kayta aypanapaq (Luc. 13:24). Chaypaqmi ichaqa ‘aswan allin kaqtapuni akllakunanchis’ (Fili. 1:10). Arí, tukuy ima ruwasqanchispin cristiano hinapuni kawsananchis.

5. ¿Ima ruwaytan allinta hunt’ananchis?

⁵ Cristianokunaqa Jehová Diosta Jesusta qatikuspan llank’anankupi allinta imatapas ruwanku (Juan 5:17). Chaymi sapa kutilla hukkuna alabanku confianapaq hina honrado kasqankumanta. Taytakunan astawanqa allin llank’aq kananku familiankuta uywanankupaq, mana chayqa “mana iñiyniyoq” otaq Diosta cheqnikuq runa hinan kankuman (1 Tim. 5:8).

Allin yuyaywan Diosta servisun kusisqataq kasun

6. ¿Imaynapin yachanchis Jehová Dios allin yuyaywan yupaychana munasqanta?

⁶ Jehová Diosqa kamachikusqanman hina yupaychananchistan munan. Chaymi israelitakuna Kamachikuy Simi mana kasukusqankumanta ñak’arishaqtinku mana qespichirqanchu (Jos. 23:12, 13). Apostolkunaq tiemponpi cristianokunatapas kallpacharqanmi pantasqa yachachikuykunamanta mana allin yuyaykuykunamantawan cuidakunankupaq (2 Juan 7-11; Apo. 2:14-16).  Kunanpas kamachikusqanman hina yupaychananchistan munan (1 Tim. 6:20).

7. ¿Imatan Pablo ruwaq hukkunata yanapananpaq?

⁷ Hukkunaman yachachispaqa anchatan kusikunchis. Ichaqa kusisqalla kanapaqqa ancha allinpaqmi qhawarinanchis chay llank’ayninchista allintataqmi preparakunanchis. Pablopas sapanka runa imayna kasqanman hinan yachachiq. Kaytan qelqarqan: “Lliw runapaqmi paykuna hina kani, imaynallamantapas wakinta Cristopi iñichinaypaq. Tukuy chaykunataqa Cristomanta allin willakuykunaraykun ruwani, chay willakuypa saminchanwan saminchasqa kanaypaq”, nispa (1 Cor. 9:22, 23). Pabloqa kusikuqmi runakunaman Diosmanta yachachispa, necesitasqankuman hinataqmi allinta yuyaykuspa yanapaq. Chayta ruwaspan payqa hukkunata kallpachaq Diosta servinankupaq.

8. a) ¿Imaynatan qhawarinanchis Bibliamanta yachachiyta? b) ¿Imaraykun hukkunaman yachachispa anchata kusikunchis?

⁸ Apóstol Pabloqa ancha allinpaqmi predicacionninta qhawarirqan. Chaymi Jehová Diospaq llapa uyarikuy munaqkunapaqpas kamachi hina karqan (Rom. 12:11; 1 Cor. 9:19). Ñoqanchispas runakunamanmi Bibliamanta yachachinchis wasinkupi, huñunakuykunapi discursota qospa, familianchiswan Bibliata estudiaspa ima. ¿Hunt’ashanchischu chay ruwaykunawan? Yaqapaschá sasa kanqa imaymana ruwananchis kashaqtin huk runaman Bibliamanta yachachiy. Ichaqa, ¿manachu Jesús nirqan: “Aswan kusisamiyoqqa qoqmi chaskiqmantaqa”, nispa? (Hech. 20:35.) Arí, runakunaman qespichisqa kanankupaq yachachiyqa anchatan kusichiwanchis.

9, 10. a) Allin yuyaywanña llank’ananchis chaypas, ¿huchachu kanman samariy otaq q’ochurikuy? b) ¿Iman umallikunata yanapanqa sumaq runa kanankupaq?

⁹ Allin yuyaywan llank’ananchista hunt’ananchis chaypas, t’aqasunmanmi tiempota amigonchiskunawan huk rato q’ochurikunapaq. Jesusmi chayta yachachiwarqanchis. Paypas manan llank’ayllamanchu qokurqan aswanmi tiempota t’aqarqan samarinanpaq hukkunawan astawan reqsinakunankupaq ima (Luc. 5:27-29; Juan 12:1, 2). Chaymantapas manan tukuy tiempochu mana asirikuspa kana. Sichus Jesús mana asirikuq kanman karqan chayqa manachá pipas asuykunmanchu karqan. Payqa sumaq runan karqan chaymi wawakunapas kusikuqku paywan kaspa (Mar. 10:13-16). ¿Imatan ruwasunman pay hina kanapaq?

¹⁰ Huk cristianon huk umalliqmanta nirqan: “Payqa kallpachakunmi tukuy imatapas allinta ruwananpaq, ichaqa manan kaqllatataqchu hukkunamanta suyan”, nispa. ¿Ñoqanchisri imaynan kanchis? Allinta imatapas ruwanankupaq hukkunata kallpachayqa allinmi. Tayta-mamakunapas yanapankun kallpachankun wawankuta imakunamanpas aypanankupaq, chaytaqmi wawakunata tanqan aypay yuyaywan llank’anankupaq. Diospa llaqtanpipas kusikuytan tarinchis umalliqkuna yanapawaqtinchis iñiyninchispi wiñanapaq kallpachawaqtinchispas. Chaypaqmi ichaqa pay kikin imaynachus kasqallanta yuyaykunan, chaymi yanapanqa rimaykunapaq hina sumaq runa kananpaq (Rom. 12:3). Huk cristianan nirqan: “Manan munaymanchu umalliqkuna sinchi chansakuq kanankuta manataqmi asuykuymanchu mana asirikuq umallimanqa”, nispa. Huk cristianan nillantaq: “Mana asirikuq umalliqa manchakunapaq hinan”, nispa. Manachá mayqen umalliqpas munanmanchu iñiqmasinkuna ‘kusikuq’ Diosta servishaspa manchapakuspa kanankutaqa (Sal. 104:31).

Diospa llaqtanpi llank’ay munaq qharikuna

11. ¿Imaynatan huk cristiano rikuchinman ‘allin llank’ay akllakuy’ munasqanta?

¹¹ Apóstol Pablon qharikunata kallpacharqan Diospa llaqtanpi huk llank’aykunata  aypanankupaq. Chaytaqa nirqan manan aswan allin qhawarisqa kanankupaqchu aswanmi Diospaq astawan llank’anankupaq, nirqanmi: “Pipas umalli kaytapuni munan chayqa, allin llank’aytan akllakun”, nispa (1 Tim. 3:1, 4). ¿Imaynatan huk cristiano rikuchinman ‘allin llank’ay akllakuy’ munasqanta? Iñiqmasinkunata tukuy sonqowan servispa, sumaq cristiano kananpaq kallpachakuspa iman. Sichus huk cristiano huk wataña bautizasqa kashan, 1 Timoteo 3:8-13 textopi yanapakuq qhari kananpaq kamachikuykunatapas hunt’ashanña chayqa, umallikunan carta de recomendación nisqata ruwankuman. Chaypaqmi ichaqa 8 versiculopi nisqanta hunt’anan, chaypin nin: “Chay hinallataqmi diaconokunapas [yanapakuq qharikuna] respetana [otaq allin yuyaywan ruwaq] runakuna kananku”, nispa (1 Tim. 3:8-13).

12, 13. ¿Imakunata ruwaspan waynakuna rikuchinkuman Diospa llaqtanpi astawan llank’ay munasqankuta?

¹² Qanri wayna, ¿bautizasqañachu kanki, allin yuyaywanchu Diosta servishanki? Wiñay hunt’asqaña kashanki chayqa, kallpachakuwaqmi Diospa llaqtanpi ima llank’aykunapipas yanapakunaykipaq. Yaqapaschá kallpachakuwaq astawan predicanaykipaq. ¿Kurak iñiqmasikunawan sullk’akunawan imachu predicanki? ¿Kallpachakushankichu Bibliamanta yachay munaqta tarinaykipaq? Huñunakuykunapi yanapaykuna chaskisqaykiman hina yachachinki chayqa, allin yachachiqmi kanki. Kawsayninkupi cambiananku kaqtinpas pacienciawanmi sumaqllata Bibliaq nisqanman hina kawsanankupaq yanapanki.

¹³ ¿Tapurirqankichu mayqen yuyaq iñiqmasitapas imapi yanapana necesitasqanta? ¿Yanapakushankichu Yupaychana Wasi pichaypi? Sichus qan kikiykimanta yanapakunki ima ruwaypipas chayqa, Diospaq llank’ay munasqaykitan rikuchinki. Kallpachakunki chayqa Timoteo wayna hinan qanpas iñiqmasikunata allinta yanapanki (leey Filipenses 2:19-22).

14. ¿Imaynapin yachakun huk wayna allin llank’aq kasqanta?

¹⁴ Umallikuna, Diospa llaqtanpi llank’achiychis ‘waqllisqa munapayaykunamanta ayqespa’ “chanin kawsayta, hunt’aq-kayta [iñiyta], munakuyta, hukkunawan sumaq kawsayta” maskhaq waynakunata (2 Tim. 2:22). Chaypin ‘allinta qhawarinkichis’ imayna llank’aq kasqanta. Ima llank’aytapas allinta hunt’anqa chayqa, ‘iñiypi wiñasqankutan lliwpas sut’ita rikunqaku’ (1 Tim. 3:10; 4:15).

Allin yuyaywan kawsasun iñiqmasinchiskunawan familianchiswanpas

15. 1 Timoteo 5:1, 2 textopi nisqan hina, ¿imaynatan huk cristiano allin yuyaywan kawsasqanta rikuchinman?

¹⁵ Iñiqmasinchiskunawan allin yuyaywan kawsananchispaqqa, Timoteoman Pabloq yuyaychasqan hinan respetowan sumaqta llapankutapas qhawarinanchis (leey 1 Timoteo 5:1, 2). Chaytan rikuchinanchis warmiwan qhariwan huñunakuspa. Job runan allin ejemplo karqan, payqa manan hayk’aqpas huk warmikunata munapayarqanchu, chaypin rikuchirqan esposanta llapa warmikunatapas  respetasqanta (Job 31:1). Allin yuyaywan kawsaq cristianoqa manan pitapas rimapayashananchu mana casarakuyta munaspaqa. Casarakunankupaq rimanakuqkunapas paykunapuran respetanakunanku. Cristianoqa manan hayk’aqpas piqpa sonqontapas k’irinanchu (Pro. 12:22).

16. ¿Imaynatan runakuna qhawarinku taytakunata qosakunatapas, ichaqa imaninmi Biblia?

¹⁶ Familia ukhupipas sapankanchismi imachus ruwananchista allinta hunt’ananchis. Saqraq makinpi kaq runakunaqa manapas respetanapaqchu kankuman hinatan taytakunata qosakunatapas qhawarichinku. Chaytan ruwanku imaymana kusirikuykuna rikhurichimusqankupi. Biblian ichaqa nin: “Qosaqa esposaq umanmi”, nispa (Efe. 5:23; 1 Cor. 11:3).

17. ¿Imaynatan rikuchisunman familianchispa iñiyninpi interesakusqanchista?

¹⁷ Sichus huk qosa tukuy imaymanata familianman qonman manataq Diosmanta yachachinmanchu chayqa, mana allin yuyayniyoq kasqantan rikuchishanman (Deu. 6:6, 7). Pipas Diospa llaqtanpi astawan llank’ayta munaspaqa 1 Timoteo 3:4 textopi nisqan hinan ‘wasinpi kaqkunata allinta kamachinan, wawankunatapas kasukuqta, respetakuqta yachachinan’. Tayta kanki chayqa tapukunaykin: “¿Sapa semanachu familiaywan Diosta yupaychashayku?” nispa. Llapa qosakunan chaytaqa hunt’ananku, esposakunapas yanapakunankun chay ruwaypi. Wakin familiakunapiqa esposakunan qosankuta rogankuraq chayta ruwanankupaq.

18. ¿Iman wawakunata yanapanqa allin ruwaykunata yachanankupaq?

¹⁸ Diospa Siminqa wawakunatapas kallpachanmi tukuy allin kaqkunata allin yuyaywan ruwanankupaq (Ecl. 12:1). Wawakunata atisqankuman hina yachasqankuman hina wasipi imatapas kamachiyqa ancha allinpunin. Chhaynapin yachanku allin llank’aq kayta (Lam. 3:27). Rey Davidpas waynachanmantapachan yacharqan oveja michiyta, takikuna ruwayta, tocayta ima, chaymi payqa rey Saulta servirqan (1 Sam. 16:11, 12, 18-21). Davidqa llapa wawakuna hinachá pukllakurqan, ichaqa allin ruwaykunata yachasqanmi yanaparqan qhepaman Diosta servinanpaq. Oveja michiq kaspa pacienciayoq kasqanpas yanaparqanmi Israel llaqtata kamachinanpaq. Wayna-sipaskuna, ¿kallpachakushankichischu allin ruwaykunata yachaspa chaywan Diosta aswan allinta servinaykichispaq Diospa llaqtanpi astawan llank’anaykichispaqpas?

Allin yuyaywan imatapas ruwasun

19, 20. ¿Imaynatan kikinchista Dios serviyninchistapas qhawarinanchis?

¹⁹ Llapallanchismi kallpachakunanchis iman kaqllata qhawarikunanchispaq ama  sinchita ñoqallanchispi yuyaykunanchispaqpas. Manan mayqenpas ‘sinchi chanin kasqanpi yuyaykunanchu’ (Ecl. 7:16). Wasinchispi, huñunakuypi, otaq llank’ananchispi kashaspa ruwananchiskunawan ñit’isqa kasunman chayqa asirikuymi yanapawasunman. Hinaspapas manan familianchispa tukuy imapi pantasqanta qhawashanachu, chayta ruwasunman chayqa manan thak kawsay kanmanchu. Iñiqmasinchiskunawan kashaspapas kusisqan kananchis. Ichaqa kallpachanapaq hinapunin kanan rimasqanchispas yachachisqanchispas (2 Cor. 13:10; Efe. 4:29).

²⁰ Kay pachapi runakunaqa manan Jehová Diosta respetankuchu nitaqmi kamachikusqanta kasukunkuchu. Cristianokunan ichaqa kallpachakunchis Diosta kasukunapaq hunt’aq sonqo kanapaqpas. ¡Ancha kusikunapaqmi allin yuyaywan Jehová Diosta serviq runakunawan huñukuyqa! Kunanmantaqa astawanchá kallpachakusun allin yuyaywan kawsanapaq Diosta yupaychanapaqpas.

¿Imaynatan kutichiwaq?

• ¿Imaraykun mana kay pachapi runakuna hinachu yuyaykunanchis?

• ¿Iman yanapawasun Diosta allin yuyaywan kusikuywan servinapaq?

• ¿Imaynatan allin yuyaywan kawsaq cristiano qhawarin Diospaq llank’ayta?

• ¿Imaraykun familianchista iñiqmasinchiskunatapas respetananchis?

[Tapuykuna]

[12 paginapi fotokuna]

Qosakunaqa familianpa tukuy necesitasqantan qonanku Diosmantapas yachachinankun