Cristianokunaqa honradon kananchis

KAY tiempopiqa manañan ancha kanchu honrado runakuna. Tukuyneqpin llullakunku, askhata imamantapas cobranku, suwakunku, manukusqankuta mana kutichipunkuchu, alabakunku negociota ruwaspa suwakusqankumanta. Chhayna runakuna ukhupi tiyasqanchisraykun sasa kanman honrado kay. ¿Iman yanapawasun chaykunaman mana urmanapaq? Jehová Diosta manchakuy, conciencianchista allinta yachachiy, imachus kapuqnillanchiswan kusisqa kawsay iman.

Diosta manchakuymi pakaykuwanchis

Profeta Isaías nisqan hina “Señor Diosqa juezninchismi, Señor Diosqa kamachiwaqninchismi, Señor Diosqa reyninchismi” (Isa. 33:22). Diosta kamachiqninchista hina qhawarispaqa manchakunchismi ima mana allin ruwaytapas. Proverbios 16:6 texton nin: “Señor Diosta manchakuspan runaqa mana allinmanta t’aqakun”, nispa. Ichaqa manan castigomanta manchakuy hinachu, aswanpas ancha munakuq Taytanchis kasqanrayku imawanpas sonqonta nanachiymanta manchakuymi (1 Ped. 3:12).

Qhawarisun imaynatan Diosta manchakuy cristianokunata yanapan. Ricardo esposan Fernandawanmi bancomanta 700 dolarta horqorqanku. * Hinan Fernandaqa qolqeta horqoruspa hina bolsanman churarqan. Pagokuna ruwanankuta tukuruspan wasinkuta ripurqanku. Qolqeta qhawayuqtinkutaq bancomanta horqosqanku 700 dolar yaqa llapallan kashasqa, chaymi nirqanku: “Bancopichá mana allinta yupaspa masta qoykamuwanchis”, nispa. Paykunaqa askha gastokunataraqmi ruwananku kasharqan, chaymi sonqonkupiqa chay qolqewan qhepakapuyta munarqanku. Ichaqa Ricardon nin: “Jehová Diosmantan kallpata mañakurqayku allinkaqta ruwanaykupaq. Paypa sonqontan kusichiyta munarqayku Proverbios 27:11 nisqan hina. Chaymi chay qolqeta kutichipurqayku”, nispa.

Conciencianchista yachachisun

Allin concienciayoq kanapaqqa Bibliatan estudiananchis chayman hinataqmi imatapas ruwananchis. “Diospa siminqa kawsaqmi, atiyniyoqmi”, chaymi sonqonchista tanqarinqa ‘tukuy imaymanapi allintapuni puriyta munananchispaq’ (Heb. 4:12; 13:18).

Chaymi sucederqan Rufino runawan. Payqa pusaq wata ñawpaqtan manaraq Bibliamanta yachashaspa 5.000 dolarmanta manu kasqanrayku huk llaqtaman chinkakapusqa. Ichaqa Biblia estudiasqanmi conciencianta mosoqyachipurqan, chaymi payqa qolqe manuqnin runata maskharqan pagapunanpaq. Rufinoqa esposanta tawa wawankunatawanmi uywanan karqan, pisillatan ganakurqanpas, chaymi nirqan sapa killa huñuspa pagapunanpaq, hinan manuqninqa munallarqan.

Kapuqllanchiswan kusisqa kasun

Pablon cristianokunata nirqan: “Pipas imachus kapuqninwan sonqopas sonqo kan chayqa, paypaqqa hatun qhapaq kayta tariy hinan Dios yupaychayqa. [...] Chayrayku, mikhunanchispaqpas p’achakunanchispaqpas  kashaqtinqa, chaykunawanmi sonqopas-sonqo kashananchis”, nispa (1 Tim. 6:6-8). Pabloq nisqanta kasukunapaqqa manan autoridadkunaq kamachikusqan contrapi negociokunata ruwanachu, nitaqmi ratolla qhapaqyanapaq negociokunatapas maskhanachu (Pro. 28:20). Aswanpas Diospa Gobiernontan ñawpaqta maskhana, Jehová Taytanchis imachus necesitasqanchista qowananchispi confiaspa (Mat. 6:25-34).

Mayqenninchispas urmasunmanmi ‘qhapaqyayta munapayayman’ (Mat. 13:22). ¡Cuidakunanchismi chay trampamanta! Ahán sutiyoq runata yuyarisun. Payqa rikurqanmi Dios milagrota ruwaspa Jordán mayunta israelitakuna chimpachisqanta, chaywanpas sonqonwan atipachikuspan huk sumaq p’achata, qolqeta, qoritawan suwakurqan. Chay ruwasqanqa wañuymanmi tanqaykurqan (Jos. 7:1, 20-26). Chaymi Jesús nirqan: “Qhawariychis, tukuy imaymana munapayaymanta cuidakuychis”, nispa (Luc. 12:15).

Llank’ananchispi honrado kasun

¿Imakuna ruwasqanchispin rikuchisunman honrado kasqanchista? Hukmi kanman llank’ananchispi. Yaqa llapa runakunaña suwakuyta allinpaq qhawarinkuman chaypas cristianokunaqa manan ‘imatapas suwakunachu’ (Tito 2:9, 10). Jurandir runamanta yachasun. Payqa gobiernopaqmi llank’arqan, chaymi sapa kutilla viajaqku. Llank’aqmasinkunan ichaqa jefenkuq yachasqan viajasqankumanta gastokunata yapa-yapayuspa cobraqku. Paytaqmi ichaqa iman gastasqallanta cobrakuq. Jefenqa mana allinpaqmi qhawarirqan honrado kasqanta chaymi mana munapurqanchu viajananta. Qhepamanmi ichaqa gastokuna ruwasqankuta sut’inchakurqan, chaymi Jurandirta honrado kasqanmanta “kusa ruwasqayki” nirqanku, aswan allin llank’anapitaq churarqanku.

Yachallasuntaq huk empresapi vendeq André cristianomanta. Huk kutinmi jefen kamachirqan rantikuqkunamanta kasqan recibota iskay kutita cobrananpaq. Chaymi payqa Jehová Diosmanta kallpata mañakurqan Bibliapi kamachikusqanta hunt’ananpaq (Sal. 145:18-20). Hinan willarqan imaraykun chaykuna mana ruwasqanta. Manapuni chay jefen uyariyta munaqtinmi chay llank’anamanta lloqsipurqan, allintaña pagarqanku chaypas. Huk wata qhepamanmi chay jefen Andreta waqyarqan, nirqantaqmi chay llank’anapi manaña yapa-yapayuspachu cobrasqankuta, chay qhepamantaq jefe kananpaq nirqanku.

 Manukusqanchista pagapusun

Pablon cristianokunata nirqan: “Ama pimanpas ima manupas kaychischu”, nispa (Rom. 13:8). Yaqapaschá wakinqa manukusqanta mana kutichipuyta munaspa ninman: “Payqa qolqeyoqmá, imapaqtaq qolqeta necesitan” nispa. Ichaqa Biblian ‘manukusqanta mana kutichipuq’ runata nin ‘millay runa’ nispa (Sal. 37:21).

Ichaqa, ¿imatan ruwasunman qonqaylla ‘imapipas rikukuspa’? (Ecl. 9:11.) Franciscon chhaynapi tarikurqan. Paymi manunta kutichipunanpaq Alfredomanta 7.000 dolaresta manukusqa, ichaqa negocionpi fracasapuspan mana pagayta atipurqanchu. Chaymi Franciscoqa Alfredoman willarqan chay sasachakuyninta, nirqantaqmi pisi-pisimanta pagapunanpaq paytaq munallarqan.

Ama allin qhawarisqa kayta maskhasunchu

Yachasun ñawpa tiempopi Ananiasmanta Safiramantawan. Paykunaqa allin qhawarisqa kayta munaspan hallp’anku vendesqanku qolqeta llullakuspa apostolkunaman aparqanku. Ichaqa Diosmi santo espiritunwan Pedroman chayta willachirqan. Chay qhepamanmi Jehová Dios iskayninkuta wañuchirqan (Hech. 5:1-11).

Bibliata qelqaqkunan ichaqa honrado runakuna karqanku. Hukninmi karqan Moisés, payqa sut’intan willakurqan phiñakuspa mana allin ruwasqanmanta Diospa Prometesqan Hallp’aman mana haykusqanta (Núm. 20:7-13). Jonaspas sut’intan qelqasqanpi willakurqan manaraq Nínive llaqtapi predicashaspa, predicasqan qhepamanpas imakunapi pantasqanta (Jon. 1:1-3; 4:1-3).

Mana allinninchispaqña kanman chaypas, cheqaqllata rimanapaqqa kallpatan necesitanchis. 14 watayoq Nathaliamanta yachasun. Examen qosqan hojapin rikurqosqa pantasqa kutichisqanpi profesornin “allinmi” nispa churasqanta. Chaymi payqa notanpi pisitaña horqokunanta yachashaspapas nirqan: “Huch’uychaymantapachan tayta-mamay yachachiwarqan Jehová Diosta kusichinaypaqqa honrada kanayta. Ch’inlla kayman chayqa concienciaychá huchachawanman”, nispa. Chayta uyarispan profesorqa anchatapuni admirakurqan.

Honrado kasqanchisqa Diostan hatunchan

17 watayoq Giselle sipasmi estudiasqanpi huk billeterata tarikurqan documentoyoqta 35 dolarniyoqta ima, chaymi direccionman apapurqan dueñonman kutichipunankupaq. Huk killa qhepamanmi subdirector huk cartata leerqan Giselle honrado kasqanmanta, tayta-maman kawsayninpi iñiyninpipas allin yachachisqankumantawan. Chaypi rikusqanchis hina ‘allin ruwasqanchiskunaqa’ Jehová Diostan hatunchan (Mat. 5:14-16).

“Paykuna kikinkuta munakuqkuna, qolqe sonqokuna, alabakuqkuna, hatunchakuqkuna, [...] Diosta mana manchakuqkuna” ukhupi honrado kayqa sasan (2 Tim. 3:2). Ichaqa, sichus Diosta manchakusun, conciencianchista Bibliawan yachachisun, imachus kapuqllanchiswantaq kusisqa kasun chayqa Diospaq hinan kawsasun. “Señor Diosqa chaninmi, chanin-kaytapunin munakun” chaymi honrado kaspaqa Dioswan amigontin kasun (Sal. 11:7).

[Uranpi willakuy]

[7 paginapi fotokuna]

Diosta manchakuymi yanapawasun honrado kanapaq

[8 paginapi foto]

Honrado kaspaqa Diostan hatunchasun