Allin umalliq Cristota qatikusun

POLÍTICO runakunata qatikuqkunan qhepaman paykunamanta karunchakapunku mana allinkuna ruwasqankuta rikuspa. Jesucristota qatikuqkunan ichaqa askha saminchaykunata chaskinku. Paymi prometerqan: “Ñoqaman hamuychis llapa sayk’usqakuna q’episapakuna, ñoqan samachisqaykichis. Yugoyman k’umuykukuychis, hinaspa ñoqamanta yachaqakuychis llamp’ulla, huch’uyyaykukuq sonqoyoq kasqayta, chaymi qankunaqa samakuyta tarinkichis”, nispa (Mat. 11:28, 29). Jesusta qatikuqtinchisqa sonqonchismi llanllarin kallpachasqataqmi tarikunchis. Payqa yanapanmi llakiq ñit’isqan runakunata, invitantaqmi payta qatikunapaq. Ichaqa, ¿imaynatan payta qatikusunman?

Apóstol Pedron nirqan: “Cristopas ñoqanchisraykun muchurqan, muchusqanta qhawarispanchis yupinta qatikunanchispaq”, nispa (1 Ped. 2:21). ¿Imaraykun Jesuspa yupinta qatikunanchis? Rikch’anachisun kaywan: Minawan p’ampasqa camponta askha purishanchis, chaypiqa hukllan yachan maypi sarunata chaymi makilla qhawanchis mayman sarusqanta kallpachakunchistaq yupintakama purinapaq. Chaytan ruwananchis Cristota qatikuqkunapas. Chaypaqqa makillan ima niwasqanchistapas uyarispa kasukunanchis, paypa churasqan runakunatapas kasukunanchismi.

Makilla uyarispa kasukusun

Orqo Patapi yachachishaspan Jesús nirqan: “Pipas uyariwaspan nisqaykunata hunt’aq runataqa qaqa patapi wasinta ruwaq yuyayniyoq runawanmi rikch’anachisaq. Para chayamuqtinmi mayukuna wasapaspa wasiman haykurqan, wayrapas sinchita wayramuspa wasiman waqtakurqan, ichaqa qaqa patapi teqsichasqa kaspanmi chay wasiqa mana thunikurqanchu”, nispa (Mat. 7:24, 25).

Jesusqa uyarikuspa kasukuq runakunatan nirqan “yuyayniyoq” nispa. ¿Ñoqanchisri yuyayniyoq runakunachu kanchis? ¿Tukuy sonqowanchu Cristoq lliw kamachikusqanta kasukushanchis? ¿Icha munasqallanchistachu kasukushanchis? Jesusqa nirqanmi: “Ñoqaqa paypa [Diospa] sonqonman chayaqtapunin ruwani”, nispa (Juan 8:29). Chaytan ñoqanchispas ruwananchis.

Ñawpa tiempopi cristianokunaqa tukuy sonqomantan Cristota kasukuqku. Huk kutinmi Pedro Cristota nirqan: “Ñoqaykuqa lliw imaymanaykuta saqespan qhepaykita hamuyku”, nispa (Mar. 10:28). Paykunaqa ancha chaninpaqmi qhawarirqanku Jesuspa yachachikuyninta chaymi tukuy imankutapas saqesparaq payta qatikurqanku (Mat. 4:18-22).

Kasukusun Cristoq churasqan runakunata

Chaymantapas manaraq wañupushaspan Jesús willarqan imatawan ruwananchis kasqanta, nirqanmi: “Pipas ñoqaq kachasqayta chaskiqqa, ñoqatan chaskiwan”, nispa (Juan 13:20). Hanaq pachapaq akllasqa cristianokunatan ‘wawqeykuna’ nirqan (Mat. 25:40). Paykunatan Jesusqa ‘[paypa] rantinpi willaqkuna’ kanankupaq churarqan. Paykunan Jesuspa sutinpi llapa runakunata invitashanku Jehová Dioswan allipunakapunankupaq  (2 Cor. 5:18-20). Chaymi Cristota llapa qatikuqkunaqa ‘wawqenkunata’ kasukunanku.

¿Sumaqtachu qhawarishanchis Bibliapi, qelqanchiskunapi, huñunakuykunapi ima sumaq yuyaychaykuna chaskisqanchista? Chaykunapiqa hatun Umalliqninchispa yachachisqantan yuyarinchis (2 Ped. 3:1, 2). Chaymi chaykunata ancha chaniyoqpaq qhawarisqanchista rikuchinapaqqa allinta estudiananchis. Ichaqa, ¿imaynatan qhawarinchis yapamanta lloqsimuq yachachikuykunata? Chaypaq qhawarisun “Señorpi iñiqwanpuni” casarakuy nispa Bibliaq nisqanmanta (1 Corintios 7:39). Chay yachachikuyqa pachak wata hinañan Qhawaq revistapi yapa-yapamanta lloqsimun. Sapa kutillanmi chay hina yachachikuykunata Cristoq wawqenkuna apachimuwanchis. Chaypin paykunaqa rikuchinku munakuwasqanchista ñoqanchispi interesakusqankutapas. Chay yachachikuykunaman hina kawsasqanchispin rikuchisun Jesús qatikusqanchista.

Proverbios 4:18 texton nin: “Chaninkunaq puriyninqa pacha illarimuy k’anchay hinan, allinta p’unchayamuqtin aswan-aswanta k’anchariq hinan”, nispa. Chaypi nisqan hina, Jesusqa ñawpaqllamanpunin Diospa llaqtanta aparishan. Chaymi Cristoq ‘wawqenkunata’ kasukunapaqqa “allin yuyayniyoq hunt’aq kamachi” qelqakuna apachimusqanpi mosoq yachachikuykunata kusisqa sonqowan chaskikunanchis (Mat. 24:45).

¿Imaynatan rikuchillasunmantaq Cristoq wawqenkuna respetasqanchista? Pablon nirqan: “Umalliykichiskunata uyariychis, paykunata kasuychis, paykunaqa qankunatan michishallasunkichispuni”, nispa (Heb. 13:17). Arí, iñiq t’aqapi umalliqkunatan kasukunanchis. Yaqapaschá huk umalli kallpachawasunman sapa semana Familiantin Diosta Yupaychana Ch’isipi Bibliata estudianapaq otaq yuyaychawasunman aswan allinta predicanapaq. Otaq iñiq t’aqata watukuq umalli yuyaychawasunman allinta kawsanapaq. Chay yuyaychaykunata uyarikuspan rikuchisun Cristo qatikusqanchista.

Kay pachapiqa manan allin kamachikuq tarikunchu. Ñoqanchismi ichaqa ancha kusisqa kashanchis umalliqninchis Cristota qatikuspa. Kunanqa kusisqachá Cristoq churasqan runakunata kasukusun.

[27 paginapi fotokuna]

¿Imaynatan qhawarinchis “Señorpi iñiqwanpuni” casarakuy nispa Bibliaq nisqanta?