Diosta serviq familiakuna, rikch’ashaqlla kashaychis

“Rikch’ashasunchis, allin yuyayninchispitaq kashasunchispas.” (1 TES. 5:6.)

1, 2. ¿Imatan sapankanchis ruwana familiantin iñiyninchispi rikch’ashaqlla kanapaq?

APÓSTOL Pablon ‘Diospa manchana hatun p’unchayninmanta’ rimaspa Tesalónica llaqtapi cristianokunata nirqan: “Wawqe-panaykuna, manan laqhayaqpiñachu kashankichis, chay hinaqa, Señorpa kutimunan p’unchayqa manañan suwa hinachu hap’isunkichis. Qankunaqa llapaykichismi k’anchaypi kawsaq runakuna kankichis, p’unchaypi kawsaq runakuna, qankunaqa manan tutayaqpi kawsaq runakunachu, nitaq laqhayaqpi kawsaq runakunapaschu kankichis”, nispa. Chayta nispan nillarqantaq: “Ama wakinkuna hinaqa puñusunchischu, aswanpas rikch’ashasunchis, allin yuyayninchispitaq kashasunchispas”, nispa (Joel 2:31; 1 Tes. 5:4-6).

² Pabloq chay qelqasqanqa ñoqanchistapas yanapawanchismi ‘p’uchukay tiempokunapi’ tiyasqanchisrayku (Dan. 12:4). Chaymi tukuy yuyayta churananchis makillataqmi kashanapas. ¿Imarayku? Millay runakunaq tukukunan p’unchay qayllaykamushasqanrayku, Dios serviq runakunata Satanás urmachiyta munasqanrayku ima. ¿Imaynatan familianchis chaykunamanta pakakunman? Sapankanchis Diospa kamachiwasqanchista hunt’aspa. Chaymi kunan yachasun imaynatan qosa, esposa, wawakunapas yanapakunkuman familiantin iñiyninkupi rikch’ashaqlla kanankupaq.

Qosakuna, ‘allin michiqta’ qatikuychis

3. 1 Timoteo 5:8 textopi nisqan hina, ¿imatan qosakuna ruwananku?

³ Biblian willan ‘qhari esposanpa uman’ kasqanta (1 Cor. 11:3). ¿Imaynatan qosakuna hunt’ankuman uma kasqankuta? Biblian nin: “Pipas ayllunta mana yuyarinchu, aswantaqa familianta mana uywanchu chayqa, cheqaq iñiymantan t’aqakapun, mana iñiyniyoq runamantapas aswan millayraqmi kapun”, nispa (1 Tim. 5:8). Chaypiqa rimashan qosakuna familiankuta uywanankumantan. Hinaspapas yanapanankun allin iñiyniyoq kanankupaq Dioswan allinpi kanankupaqwan, chhaynapin llapankupas rikch’ashaqlla kanqaku (Pro. 24:3, 4). ¿Imaynatan chayta ruwankuman?

4. ¿Imatan qosakuna ruwananku familianku iñiyninkupi rikch’ashaqlla kananpaq?

⁴ “Qosaqa esposaq umanmi, imaynan Cristopas iglesiaq [iñiq t’aqaq] uman hina.” Chaymi qosakunaqa yachananku imaynatan Jesús iñiq t’aqata umallin, chayman hinataqmi familiankuta umallinanku (Efe. 5:23). Jesusqa qatikuqninkunawan imayna kawsasqantan oveja michiqwan tupanachirqan (leey Juan 10:14, 15). Arí paymi “allin michiqqa”, chaymi qosakunaqa familianku iñiyninkupi allin taqyasqa kananpaq, Jesusmanta astawan yachananku ‘yupintataqmi qatikunanku’ (1 Ped. 2:21).

5. ¿Imatan Allin Michiq yachan ovejankunamanta?

 ⁵ ¿Imakunatan qosakuna yachankuman Jesusmanta? Jesuspa rikch’anachiy willasqanpin michiqqa ovejankunata allinta reqsirqan, ovejakunataq michiqninta reqsirqanku. Manan michiqninkuta manchapakurqankuchu chaymi kunkanta uyarispaqa kasukuqku. Jesusmi nirqan: ‘Ovejaykunatan reqsini, ovejaykunapas reqsiwankun’, nispa. Arí, Jesusqa allintan reqsin sapanka iñiqkunata. Griego rimaypi ‘reqsiy’ nisqa simiqa “ukhu sonqonta reqsiy” ninantan nin. Jesusqa yachanmi sapanka iñiq imayna kasqanta, imapi pantasqanta, imakuna necesitasqantapas, manan imapas paymantaqa pakasqachu kashan. Iñiqkunapas allintan Jesusta reqsinku chaymi payta qatikunku.

6. ¿Imaynatan qosa Jesusta qatikunman?

⁶ ¿Imaynatan qosa Jesusta qatikunman? Pay kikintan michiqta hina qhawarikunan familiantataq ovejachankunata hina. Allintan reqsinan esposanta wawankunatapas. Chaypaqqa tiempotan hap’inan sapankankuwan parlarinanpaq allintataqmi uyarinan ima willakusqankutapas. Hinaspapas allin ejemplon kanan, allintan aparinan Familiapi Dios Yupaychana Ch’isipi estudiota, huñunakuykunaman rinanku, predicacionman lloqsinanku, kusirikuykunatapas allintan akllarinan. Sichus Bibliaq nisqanman hina sapanka imayna kasqankuta qhawarispa decidinqa chayqa, familianmi paypi confianqa kusikunqataqmi huk nisqalla Jehová Diosta servisqankuwan.

7, 8. ¿Imaynatan qosakuna familiankuta qhawarinanku?

⁷ Hinaspapas allin michiqqa munakunmi ovejankunata. Chaytan Jesusmantapas yachanchis paymanta willakuykunata leespa. Payqa anchatan qatikuqninkunata munakurqan ‘ovejankunaraykun wañurqanpas’. Qosakunapas Diospa allin qhawarisqan kanankupaqqa Jesús hinan familiankuta munakunanku. Manan capataz hinachu esposankuta kamachinanku, aswanmi munakunanku ‘imaynan Cristopas iglesiata munakurqan’ hinata (Efe. 5:25). Hinaspapas llamp’u simiwanmi rimapayananku respetanankutaqmi kanpas (1 Ped. 3:7).

⁸ Diospa kamachikuyninkunata wawankuman yachachispapas taytakunaqa allin takyasqatan yachachinanku ichaqa munakuywan. Wakin wawakunaqa sasatan imatapas entiendenku. Chhayna wawayoqkunaqa pacienciayoqmi kananku. Sichus Jesusta tukuy ruwasqankupi qatikunqaku chayqa, familiankun thakpi kawsanqa manataqmi ima mana allinmantapas manchakunqakuchu (leey Salmo 23:1-6).

9. ¿Imatan Noé hina taytakuna ruwananku? ¿Imaynatan familiankuta yanapankuman?

⁹ Noemanta yachasun. Payqa rikurqanmi Jehová Dios millay runakunata millp’uq parapi wañuchisqanta, ‘qanchis runakunawan kuskataqmi’ qespichisqa karqanpas (2 Ped. 2:5). Noeqa familianpi umalliq kasqanraykun paykunata yanaparqan wañuymanta qespichisqa kanankupaq. Kunanpas chaytan taytakuna ruwananku (Mat. 24:37). Ichaqa, ¿imaynatan familiankuta yanapankuman? Jesusmantan astawan yachananku kallpachakunankutaqmi chayman hina imatapas ruwanankupaq.

Esposakuna wasiykichista sayarichiychis

10. ¿Imata ruwaspan ‘casarasqa warmikuna qosankuta kasukunkuman’?

¹⁰ Apostól Pablon qelqarqan: “Imaynan Señorninchista kasunkichis chay hinata casarasqa warmikuna qosaykichista kasuychis”, nispa (Efe. 5:22). Chay kamachikuyqa manan warmikunata pisichanapaqchu. Manaraq Evata kamashaspan Jehová Dios nirqan: “Manan allinchu qhariq sapallan  kanan, paypaq hinapuni yanapaqninta ruwapusaq”, nispa (Gén. 2:18). Familianta umallinanpaq qosata yanapayqa ancha sumaq llank’aymi.

11. ¿Imaynatan yachayniyoq warmi ‘wasinta sayarichin’?

¹¹ Yachayniyoq warmiqa familian allin kananpaqmi tukuy atisqanta ruwan (leey Proverbios 14:1). Payqa manan mana yuyayniyoq warmi hinachu qosanpa umallisqanta pisichan aswanmi respetowan qhawarin. Manan kay pacha warmikuna hinachu munasqanta ruwan, aswanmi qosanpa nisqanta kasukun (Efe. 2:2). Mana yuyayniyoq warmiqa qosanpa pantasqantan qhawashallan. Yachayniyoq warmin ichaqa qosanta respetan munantaqmi hukkunapas respetanankuta, chaymi mana sapanpipas hukkunaq ñawpaqenpipas qosanta kutipakunchu nitaq hap’inakunchu. Mana yuyayniyoq warmiqa comuntan gastan sasawan tarisqa qolqeta. Allin yuyayniyoq warmin ichaqa qolqenta mat’iykun manataqmi qosanta mat’ipayanchu astawan llank’ananpaq.

12. ¿Imaynatan esposakuna familiankuta yanapankuman iñiyninkupi rikch’ashaqlla kanankupaq?

¹² Allin cristianaqa qosantan yanapan wawankuman Diosmanta yachachiypi, chaymi familianqa iñiyninkupi rikch’ashaqlla kanku (Pro. 1:8). Yanapanmi qosanta Dios Yupaychana Ch’isi sumaqta aparikunanpaq. Manan wawanman sayapakunchu qosan anyaqtin otaq wanachiqtinpas. Chhayna warmiqa manan mana yanapakuq warmi hinachu familianta mana allinman tanqaykun.

13. ¿Imaraykun cristianakuna qosankuta yanapananku Diospaq astawan llank’aqtinku?

¹³ ¿Imaynan sientikun allin yuyayniyoq esposa qosan Diospa llaqtanpi astawan llank’aqtin? Anchatan kusikun iñiqmasikunarayku umalli kaspa, yanapakuq qhari, Comité de Enlace con los Hospitales, Comité Regional de Construcción nisqapiña llank’aqtinpas. Chhayna esposaqa anchatachá kallpachakun qosanta yanapananpaq kallpachananpaqpas. Reparantaqchá qosan Diospaq astawan llank’asqan familianpa iñiyninpaq allin kasqanta.

14. a) ¿Ima sasachakuymi kanman esposakunapaq, ichaqa imatan ruwankuman? b) ¿Imaynatan esposakuna familiankuta yanapankuman thak kawsay kananpaq?

¹⁴ Mayninqa manapaschá allinpaqchu qhawarinku qosankuq decidisqanta. Chaywanpas ‘llamp’u sonqowan, sumaq sonqowanmi’ qosankuta yanapanku ima decidisqanpipas  (1 Ped. 3:4). Hinaspapas Sara, Rut, Abigail Jesuspa maman María hina warmikunaq ruwasqankutan qatikunku (1 Ped. 3:5, 6). Chaymantapas kay tiempopi “Diospaq t’aqasqa hinapuni” kurak warmikunatan qatikunku (Tito 2:3, 4). Qosankuta munakuywan respetowan qhawarisqankun yanapan warmi-qhari sumaqta kawsanankupaq, familiantin thakpi kawsanankupaqpas. Chay hina warmitaqa ancha chaniyoqpaqmi qhawarin Dios sonqo qhariqa (Pro. 18:22).

Wawakuna, mana rikukuq kaqkunata qhawaychis

15. ¿Imaynatan wayna-sipaskuna yanapakunkuman familianku rikch’ashaqlla kananpaq?

¹⁵ Wayna-sipas, ¿imaynatan yanapakuwaq familiayki iñiyninkupi rikch’ashaqlla kanankupaq? Jehová Diospa prometesqan premiopi yuyaykuy. Yaqapaschá tayta-mamayki huch’uyllaraq kashaqtiyki paraisomanta dibujokunata qhawachirqasunki, wiñasqaykiman hinataq Bibliawan qelqanchiskunawan ima yachachirqasunkiku wiñay kawsay imayna kananmanta. Sichus Diospaq astawan llank’anki chayllapaqñataq kawsanki chayqa qanpas rikch’ashaqllan kanki.

16, 17. ¿Imatan wayna-sipaskuna ruwankuman wiñay kawsay premiota chaskinankupaq?

¹⁶ Wayna-sipaskuna, apóstol Pabloq yuyaychasqanta uyarikuychis (leey 1 Corintios 9:24). Phawashallaychis kawsachiq premiota chaskinaykichispaq. Wiñay kawsayman apaq ñanta akllakuychis. Askha wayna-sipaskunan chay ñanta saqepurqanku qolqe maskhaypi afanakuspa. ¡Chayta ruwasqankuqa yanqapaqmi karqan! Qolqewanqa manan cheqaq kusikuyta tarisunmanchu manataqmi wiñaypaqchu. Aswan allinqa ‘mana rikukuq kaqkunata’ qhawaymi chaykunan ‘wiñay-wiñaypaqqa’ kanqa (2 Cor. 4:18).

¹⁷ ‘Mana rikukuq kaqkunapin’ kashallantaq Diospa kamachikuyninpi sumaq saminchaykuna. Chay saminchaykunata chaskikunaykipaq hina llank’ay. Cheqaqtapuni kusisqa kayta munanki chayqa Jehová Diosta serviy. Kallpachakuspaqa aypawaqmi Diospa llaqtanpi ima llank’aymanpas. * Sichus ima munasqaykitapas aypay yuyaywan llank’anki chayqa, tukuy yuyaywanmi Jehová Diosta servinki wiñay kawsayta suyakuspa (1 Juan 2:17).

18, 19. ¿Imaynapin yachasunman huk wayna Diospaq hina kawsasqanta?

¹⁸ Wiñay kawsay ñanninta purinapaqqa Jehová Diostan allinta reqsina. Qanri, ¿allintañachu Diosta reqsishanki? Tapukuy: “¿Ñoqa kikiymantachu Diosta servishani, icha tayta-mamay niwasqanraykullachu? ¿Kallpachakushanichu allin cristiano kanaypaq? ¿Sapa kutillanchu Diosmanta mañakuni, Bibliata estudiani, huñunakuykunaman predicacionmanpas rini? ¿Amigoyta hinachu Jehová Diosta rikuni?” nispa (Sant. 4:8).

¹⁹ Moisespa kawsayninpi yuyaymanay. Huk costumbreyoq runakuna ukhupiña wiñarqan chaypas, Jehová Diospa kamachin hinan  reqsichikurqan manan Faraonpa ususinpa wawan hinachu (leey Hebreos 11:24-27). Qanpas Jehová Diosta hunt’aq sonqowan serviyta munaspaqa chaytan ruwanayki. Chhaynapin allinta kawsanki, kusisqa kanki, ‘cheqaq kawsaytataqmi’ suyakunki (1 Tim. 6:19).

20. ¿Pikunan chaskikunqaku wiñay kawsay premiota?

²⁰ Pabloq willasqan llallinakuykunapiqa hukllan atipaq. Wiñay kawsayman aypanapaqqa manan chhaynachu. Diosqa munan “llapan runakuna qespichisqa kanankuta, cheqaq-kayta reqsinankutapas” (1 Tim. 2:3, 4). Askhañan chay llallinakuypi atipanku, askhataqmi qanwan kuska phawashanku (Heb. 12:1, 2). Wiñay kawsay premioqa mana sayk’uspa phawaqkunapaqmi kanqa. Qanpas chaskikuwaqmi chay premiota.

21. ¿Imamantan yachasun qatimuq estudiopi?

²¹ ‘[Jehová] Diospa hatun mancharikuy p’unchayninqa’ chayamunqapunin (Mal. 4:5). Ñoqanchisqa familiantinmi makilla suyakunanchis chay p’unchayta. Chaypaqqa sapankanchismi Diospa kamachiwasqanchista hunt’ananchis. Ichaqa, ¿imatawanmi ruwananchis makilla kashananchispaq Jehová Dioswanpas allinpi kananchispaq? Qatimuq estudiopin yachasun familianchis allin iñiyniyoq kananpaq kinsa yanapaykunamanta.

[Uranpi willakuy]

¿Yuyashankichu?

• ¿Imaraykun familiakuna rikch’ashaqlla kashananku?

• ¿Imaynatan qosakuna Jesusta qatikunkuman?

• ¿Imaynatan allin yuyayniyoq warmi qosanta yanapan?

• ¿Imaynatan wawakuna yanapakunkuman familianku rikch’ashaqlla kananpaq?

[Tapuykuna]

[9 paginapi foto]

Yanapakuq warmiqa ancha chaniyoqmi Dios sonqo qharipaq