Kusikuyta tariy Bibliata estudiaspa

LORRAINE cristianan nin: “Bibliata leeyta qallarishaqtiyqa umayraqmi nanawaq. Manan leesqayta entiendeqchu kani maypichá yuyayniypas kakuq”, nispa.

Askha cristianokunan chhaynata sientekurqanku. Ichaqa allinninkupaq kasqanta yachaspan kallpachakurqanku. Marc cristianon nin: “Ratollan imaymana ruwananchiskunawan afanakuspa Biblia leeyta estudiaytapas saqepusunman. Ñoqapas sapa kutillanmi Diosmanta mañakurqani, anchatataqmi kallpachakurqani Bibliata sapa p’unchay leenaypaq”, nispa.

¿Imatan ruwawaq Diospa Siminta ancha chaninpaq qhawarinaykipaq? ¿Iman yanapasunkiman estudiasqaykipi kusikuyta tarinaykipaq? Chaypaq yanapaykunata qhawarisun.

¿Imakunatan ruwasunman?

Diosmanta mañakuy tukuy yuyaywantaq estudiay. Diosmanta mañakuy Biblia estudiayta munanaykipaq, sumaq yachachikuyninkunata entiendenaykipaq, sonqoykita kicharinanpaqpas (Sal. 119:34). Mana chayqa manan kusikuyta tarinkichu Bibliata estudiaspa saqepuwaqtaqmi kanpas. Lynn cristianan nin: “Mayninqa usqhayllan leeni, manataqmi imapas umaypi qhepanchu. Chayraykun Jehová Diosta mañakuni Bibliata leeshaspa ama hukkunapi yuyaykushanaypaq”, nispa.

Yachasqaykita ancha chaninpaq hap’ikuy. Qhepaman kawsayninchisqa Diospa kamachikuyninkunata allinta entiendespa chayman hina kawsasqanchismantan kanqa. Chaymi Bibliata estudiaspaqa kawsayninchispi yanapawananchispaq hina yachachikuykunata maskhananchis. Chrismi nin: “Bibliata estudiaspaqa imakunapichus necesitani cambiayta chaypaq hinan yanapaykunata maskhani. Anchatan kusikuni Bibliapi huk qelqanchiskunapipas ñoqapaq hina yachachikuykunata tarispa. ¡Anchatan admirakuni chay qelqaqkuna mana reqsiwashaspa ñoqapaq hinapuni qelqamusqankuta rikuspa!” nispa.

Atinaykipaq kaqkunata ruway. Bibliaq willasqan warmikunamanta qharikunamanta astawan yachay. Chaypaqqa Perspicacia para comprender las Escrituras otaq Índice de las publicaciones Watch Tower nisqa qelqakunapin maskhawaq. Paykunaq sientesqankumanta ruwasqankumanta yachanki chayqa kawsayniykipin astawan yanapasunki.

Yuyaymanachiq yachachikuykunata maskhay (Hech. 17:2, 3). Chaytan Sophia ruwan, paymi nin: “Estudiaspan mana yachasqay yachachikuykunata maskhani. Chaymi yanapawan aswan allinta predicanaypaq yachachinaypaqpas. Chaypaqqa Qhawaq qelqapi lloqsimuq yachachikuykunawanmi yanapachikuni”, nispa (2 Tim. 2:15).

Rikushawaqpas hina leey. Hebreos 4:12 textopin nin: “Diospa siminqa kawsaqmi”, nispa. Bibliata leespaqa paykuna ukhupipas kashawaq hinan leenayki. Uyariy rimasqankuta, qhaway ruwasqankuta, paykuna hina  kusikuy, llakikuy, waqay. Tapukuy: “¿Paykuna hinachu tarikushani? ¿Imaynatan paykunamanta yachasqay yanapawanman?” nispa. Chaykunan yanapasunki chay willakuykunata allinta entiendenaykipaq yuyarinaykipaqpas.

Qelqanchiskunapi maskhay sasa entiendena textokunata. Bibliata estudiaspaqa manan ratollachu imatapas leenayki. Mana yachasqayki yachachikuykunata tarispaqa astawan t’aqwiriy, mana yachasqayki simikunata diccionariopi maskhay, Bibliaq uranpi otaq tukuyninpi willakuykunata leey. Astawan Bibliamanta yachaspayki, chayman hina kawsaspayki iman kusikuyta tarinki Biblia estudiasqaykipi. Chhaynapin salmista hina Jehová Diosta ninki: “Kamachikusqaykikunan wiñay herenciaykuna, chaykunan sonqoyta kusirichiwan”, nispa (Sal. 119:111).

Ama hawan ukhunta estudiaychu. Allillamanta estudiay amataq qonqaychu huñunakuykunapaq preparakunayki kasqanta. Raquelmi nin: “Askha ruwanay kasqayraykun mayninqa hawan-ukhunta estudiani. Chaymi allinta entiendenaypaq pisi-pisillamanta preparakuni”, nispa. Chris nillantaq: “Hawan ukhunta estudiaqtiyqa manan imatapas entiendenichu nitaqmi sonqoyman chayanchu, chaymi concienciay huchachawan”, nispa. Chaymi chaykuna mana kananpaqqa allillamanta estudiana.

Anchatapuni munay Diospa Siminta. Apóstol Pedron nirqan: “Chayllaraq nacesqa wawakuna hina Santo Espirituq qosqan mana chhaqrusqa lecheta anchatapuni munaychis, chaywan wiñaspa qespichisqa kanaykichispaq”, nispa (1 Ped. 2:2). Wawakunaqa nacesqankumantapachan lecheta anchatapuni munanku, ñoqanchismi ichaqa kallpachakunanchis Diospa Siminta anchata munananchispaq. Sichus sapa p’unchay huk paginallata leenki chayqa astawanmi munanki Diospa Simin estudiayta. Qallariypiqa sasapaschá kanqa, ichaqa pisi-pisimantan estudiasqaykipi kusikuyta tarinki.

Yuyaymanay leesqaykipi. Yuyaymanaypas yanapasunkin yachasqaykita chayllaraq yachasqaykiwan tupachinaykipaq. Chhaynapin yachayta tarinki, chaytaqmi kunkaykipi perlamanta walqana hina kapunqa (Sal. 19:14; Pro. 3:22).

 Saminchaykunatan chaskikunki

Bibliata sapa p’unchay estudiayqa sasan kanman, ichaqa saminchasqan kanki kallpachakunki chayqa. Arí, astawanmi Bibliamanta yachanki (Heb. 5:12-14). Yachayta allin reparayta iman tarinki, hinan thakpi kawsanki kusisqataq kankipas. Yachayqa “kawsay sach’a” hinan yachayman k’askakuspa chayman hina kawsaqkunapaqqa (Pro. 3:13-18).

Bibliata allinta estudiaspaqa yachayniyoq runamanmi tukupunki (Pro. 15:14). Chaytaqmi yanapasunki hukkunata Bibliaq nisqanman hinapuni yuyaychanaykipaq. Sichus Bibliaq nisqanman hina, “allin yuyayniyoq hunt’aq kamachi” nisqanman hinataq imatapas decidinki chayqa kallpachasqan sientikunki, manataqmi imamantapas manchakunkichu (Mat. 24:45). Kusisqan imatapas ruwanki, tukuy ruwasqaykipas, rimasqaykipas yuyaykusqaykipas Diospaq hinan kanqa. Chaykunamanta astawanqa Diostan aswan allinta servinki (Sal. 1:2, 3).

Jehová Diosta tukuy sonqowan munakusqanchismi kallpachawanchis paymanta rimananchispaq. Chay ruwaypas kusichiwanchismi. Sophian kallpachakurqan umanpi askha textokunata hap’ispa chaywan runakunata predicananpaq, chaymi kunanqa runakunaq sonqonman chayaqta predicashan. Paymi nin: “Anchatan kusikuni Bibliata leeqtiy runakunaq ñawin k’anchariqtin”, nispa.

Ichaqa tukuy imamantapas aswan hatun saminchayqa Dioswan amigontin kasqanchismi. Bibliata estudiaspan yachanki Diospa kamachikuyninmanta, munakuyninmanta, qoykukuq kasqanmanta, chanin kasqanmanta hukkunamantapas. Chaykunataqa manan maypipas yachankichu, nitaqmi imawanpas tupanmanchu. Chayrayku kallpachakuy Bibliata sapa p’unchay estudianaykipaq. Chay ruwasqaykimantaqa manan hayk’aqpas pesapakunkichu (Sal. 19:7-11).

[5 paginapi fotokuna recuadropiwan]

¿IMAKUNATAN RUWASUNMAN BIBLIATA LEESPA?

▪ Diosmanta mañakuy tukuy yuyaywantaq estudiay.

▪ Yachasqaykita ancha chaninpaq hap’ikuy.

▪ Atinaykipaq kaqkunata ruway.

▪ Yuyaymanachiq yachachikuykunata maskhay.

▪ Rikushawaqpas hina leey.

▪ Qelqanchiskunapi maskhay sasa entiendena textokunata.

▪ Ama hawan ukhunta estudiaychu.

▪ Anchatapuni munay Diospa Siminta.

▪ Yuyaymanay leesqaykipi.

[4 paginapi dibujo]

Paykuna ukhupipas kashawaq hina Bibliata leey