‘Sumaq umalli, munasqa amigo’

JOHN BARR iñiqmasinchismi 2010 wata 4 diciembre killapi 97 watanpi kashaspa wañukapurqan (amigonkunaqa Jack niqkun). Payqa Jehová Diospa testigokunaq Umalli T’aqamantan karqan, reqsiqkunapaqqa “sumaq umalli, munasqa amigon” karqan.

Familianqa Aberdeen (Escocia) llaqtapin tiyarqan, tayta-mamanmi hanaq pachapaq akllasqa cristianokuna karqanku, tawa churikunamanta sullk’akaqtaqmi karqan. Payqa ancha kusisqan willakuq wawallaraq kasqan tiempomanta anchatataqmi tayta-mamanta agradecekuq sumaq ejemplo kasqankumanta.

Waynallaraq kashaspaqa sinchi manchalin karqan. Chaymi sasachakuq runakunawan rimananpaq. Ichaqa saqerqanmi chay manchali kayninta. 1927 watapi 14 watanpi kashaspan huk domingo tardenta taytanta nirqan: “Listoñan kashani wasin-wasinta predicaq rinanchispaq”, nispa. Chaymantapachan Jehová Dios serviyta qallarirqan. Wañupunankamapas tukuy sonqowanmi predicarqan.

Huk kutinmi maman yaqalla huk accidentepi wañupurqan. Chay sucedesqanmi yuyaymanachirqan kawsayninpi, hinan 1929 watapi Diosman qokurqan bautizakunanpaq. Ichaqa 1934 watapiñan bautizakurqan. Phisqa wata qhepamanmi Inglaterra nacionpi Londres llaqtapi Betelman invitarqanku, chaymantapachan 71 wata tukuy tiemponwan Diosta servirqan.

1960 watapi 29 octubre killapin Barr iñiqmasinchis, Mildred Willett tukuy sonqowan predicaq allin experienciayoq misionerawan “huk sumaq amistadta ruwarqanku”, qhepamantaq casarakapurqanku. Paykunaqa huk hinallan sumaqta kawsaqku allin iñiyniyoqtaqmi karqankupas, ichaqa 2004 watapi octubre killapin Mildred wañukapuspa kay pachapi llank’ayninta tukurqan. Casarakusqankumantapachan sapa p’unchay Bibliata kuska leeqku.

Jack Barr cristianoqa allin yuyaychaq, imatapas iman kanallanta ruwaq, llamp’u sonqo, Bibliaq nisqanman hinapuni yachachiq kasqanpin reqsichikurqan. Chaymantapas mana samaspa llank’aq, sumaq umalli, ancha munakuq amigon karqan. Rimasqanpi, discursokuna qosqanpi, Diosmanta mañakusqanpi iman rikuchirqan Dios sonqo kasqanta Jehová Dioswan amigontin kasqantapas.

Maytan sonqonchis ch’usaqrayashan Barr iñiqmasinchismanta. Ichaqa kusikunchismi mana wañuq kawsay chaskisqanmanta. Chaytan payqa mayta suyakurqan, chayllamantan hukkunawan parlaspapas rimaq (1 Cor. 15:53, 54). *

[Uranpi willakuy]