¿Atinkumanchu bautizakuyta?

FILIPINAS nacionmanta Carlosmi * nin: “Ancha kusisqan kashani ususiy bautizakuspa Diosta servisqanmanta, paypas may kusisqachá kashan”, nispa. Grecia nacionmantan huk tayta nillantaq: “Ancha kusisqan ñoqapas warmiypas kashayku kinsantin wawaykuna waynallaraq kashaspa bautizakusqankumanta. Paykunaqa iñiyninkupin wiñashanku ancha kusisqataqmi Diosta servishanku”, nispa.

Tayta-mamakunaqa anchatan kusikunku wawanku bautizakuqtin, ichaqa llakikullankutaqmi. Huk cristianan nin: “Kusisqaña kasharqani wawaypa bautizakusqanmanta chaypas, llakikuqmi kani chay p’unchaymantapacha imaynatachus Diosman cuenta qonanmanta”, nispa.

Llapa wayna-sipaskunan bautismoman chayananku. Ichaqa yaqapaschá wakin taytakuna tapukunkuman: “Wawayqa allinmi kashan iñiyninpi, ichaqa ¿ch’uyatachu Diospa ñawpaqenpi kawsanqa, atinqachu millay qhelli ruwaykunamanta ayqekuyta?” nispa. Hukkunan tapukullanmantaq: “¿Tukuy sonqowanchu waway Diosta servishallanqa icha qolqeq qhepantachu phawanqa?” nispa. ¿Bibliapi ima yachachikuykunan tayta-mamakunata yanapanqa wawanku bautizakunankupaq hinañachus kashan icha manachus chayta yachanankupaq?

Jesusta qatikuqmi kananku

Bibliaqa manan willanchu hayk’a watankupi bautizakunankuta, aswanmi willan pikunachus bautizakunankupaq hinaña kasqankuta. Jesusmi nirqan: “Llapa suyu runakunata yachachimuychis, yachachisqaykuna [qatikuqniykuna] kanankupaq”, nispa (Mat. 28:19). Chaypi nisqan hina, Jesusta qatikuqkunallan bautismomanqa aypankuman.

¿Ima ninantaq ‘qatikuy’ nisqa simiri? Perspicacia para comprender las Escrituras nisqa libron nin: “Chaytaqa nishan Diospi iñispa Jesuspa yachachisqanta qatikuytan”, nispa. Chhaynaqa, ¿atikunmanchu waynallaraq kashaspa bautizakuyta? Huk misioneran  40 wataña huk nacionpi Diosta servishan, paymi nin: “Paraisopi tiyayta munaspan iskay ñañaykunawan ñoqapiwan decidirqayku Diosta servinaykupaq. Diosman qokusqaykun yanapawarqanku wayna-sipaskunapaq tentacionkunamanta ayqekunaykupaq. Manan pesapakuykuchu sipaschallaraq kashaspa bautizakusqaykumanta”, nispa.

Tayta-mamakuna, ¿imaynapin yachawaqchis wawaykichis Jesusta qatikushasqanta? Kawsayninkuta qhawarispan. Biblian nin: “Waynapas ruwasqankunawanmi reqsisqa kanqa, kawsayninpin rikukun ch’uyachus cheqanchus kasqanqa”, nispa (Pro. 20:11). ¿Imakunatan qhawarinaykichis? (1 Tim. 4:15.)

Jesusta qatikuq wayna-sipaskuna

¿Kasukuqchu? (Col. 3:20.) ¿Hunt’anchu wasipi kamachisqaykita? Biblian willan Jesús 12 watanpi kashaspa tayta-maman kasukuq kasqanta (Luc. 2:51). Ichaqa manan mayqen wawapas llapallanpiqa kasukuyta atinmanchu. Chaywanpas cheqaq cristianokunaqa Jesuspa ‘yupintan qatikunanchis’. Bautizakuyta munaq wawakunaqa kasukuq kasqankupin reqsichikunanku (1 Ped. 2:21).

Hinaspapas, ¿Diospa Gobiernonta ‘ñawpaqta maskhaq’ hinachu predicacionpi k’uchi llank’ashan? (Mat. 6:33.) ¿Icha tanqasqallachu predicacionman lloqsin predicanpas? ¿Hunt’ashanchu publicador kasqanwan? ¿Kutinchu predicasqanpi uyarikuq runakunaman? ¿Willanchu profesorninman estudiaqmasinkunamanpas Jehová Diospa testigon kasqanta?

¿Ancha chaninpaqchu qhawarin huñunakuykunata? (Sal. 122:1.) ¿Kusisqachu Qhawaq revista estudiaypi Biblia Estudianapaq Huñunakuypipas tapuykunaman kutichin? ¿Yanapakunchu Bibliamanta Allin Yachachiq Kanapaq Escuelapi? (Heb. 10:24, 25.)

¿Kallpachakunchu ch’uyata kawsananpaq, allin amigokunata akllakunanpaqpas? (Pro. 13:20.) ¿Imatan qhawan televisionpi, videojuego, Internet nisqapipas? ¿Imayna takikunatan uyarin? ¿Bibliaq nisqanman hinachu kawsanpas rimanpas?

¿Allintañachu Bibliamanta yachan? ¿Umallanmantachu kutichin Familiantin Diosta Yupaychana Ch’isipi tapukuykunaman? ¿Allintachu sut’inchan almamanta, infiernomanta, trinidadmanta huk yachachikuykunamantapas? (Pro. 2:6-9.) ¿Estudianchu Bibliata, hunt’aq kamachi apachimusqan qelqakunatapas? (Mat. 24:45.) ¿Tapukunchu Bibliapi yachachikuykunamanta?

Chay tapukuykunan yanapasunkichis wawaykichis imaynachus kashasqanta yachanaykichispaq.  Yaqapaschá ninki: “Manaraqmi wawayqa wakinta hunt’ashanchu, manan bautizakuyta atinmanraqchu”, nispa. Otaq ninki: “Wawayqa ñan Diosman qokunña, Jesustapas qatikushanñan, ñan bautizakuyta atinmanña”, nispa.

Wayna-sipaskunapas hatunchankumanmi Diosta

Askha runakunañan wayna-sipas kashaspa otaq warmallaraq kashaspa Diosta servirqanku. Paykunan karqan: José, Samuel, Josías, Jesús, hukkunapiwan (Gén. 37:2; 39:1-3; 1 Sam. 1:24-28; 2:18-20; 2 Cró. 34:1-3; Luc. 2:42-49). Felipeq tawa profetiza ususinkunapas wawa kashallaqtinkuraqchá Diosmanta yacharqanku (Hech. 21:8, 9).

Grecia nacionmanta cristianon nin: “12 wataypin bautizakurqani, manataqmi pesapakunichu chaymanta. 24 watañan bautizakusqaymanta kashan, chaymantan 23 wata precursor kashani. Diosta munakusqaymi yanapawarqan wayna-sipaskunapaq sasachakuykunata atipanaypaq. 12 wataypiqa manan kunan hinachu Bibliamanta yacharqani, ichaqa anchatan Diosta munakurqani, wiñaypaq serviytataqmi munarqani. Anchatan agradecekuni payta servishanallaypaq yanapawasqanmanta”, nispa.

Cristota qatikuqkunaqa hayk’a watayoqña kanku chaypas bautizakuyta atinkumanmi. Pablon nirqan: “Sonqoykiwan iñiqtiykin Diosqa chaninchasunki, simiykiwan ‘Jesusqa Señormi’ niqtiykin Diosqa qespichisunki”, nispa (Rom. 10:10). Tayta-mamakuna, wawaykichis bautizakuqtinqa familiaykichispa aypay munasqantan hunt’ankichis. Chayrayku ama imawanpas hark’achikuychischu chay hatun kusikuyman aypanaykichispaq.

[Uranpi willakuy]

[5 paginapi recuadro]

Allinta yuyaykuspan decidina

Wakin tayta-mamakunan ninku: “Wawaypa bautizakusqanqa allinninpaqmi kanqa, ichaqa mana allinkunapin rikukullanqataq, carrota manejananpaq breveteyoq runa hina”, nispa. ¿Cheqaqtachu bautismopas Diosta serviypas mana allinkunaman apaykuwasunman? Bibliaqa manan chaytachu nin. Proverbios 10:22 texton nin: “Señor Diospa saminchayninqa qhapaqyachinmi, chay saminchayqa manan llakichinchu”, nispa. Timoteoman qelqaspataq Pablo nirqan: “Pipas imachus kapuqninwan sonqopas sonqo kan chayqa, paypaqqa hatun qhapaq kayta tariy hinan Dios yupaychayqa”, nispa (1 Tim. 6:6).

Chaywanpas Diosta servisqanchispiqa kanqan sasachakuykuna. Jeremiasta yuyarisun. Paypaqqa imaymana sasachakuykunan karqan Diosta servisqanpi. Ichaqa, ¿imaynatan qhawarirqan Dios servisqanta? Sumaq llank’ayta hinan, nirqanmi: “Simiykikunatan llapachallanta uyarirqani, chaykunan sonqoyman chayaqpuni karqan, anchatapunin kusikurqani”, nispa (Jer. 15:16). Jeremiaspa nisqan hina, Diosta serviyqa kusichiwanchismi. Saqraq kamachikusqan ukhupi kaytaq llakikuykunallata apamun. Tayta-mamakuna, qankunan wawaykichisman yachachinaykichis Diosta serviy aswan allin kasqanta (Jer. 1:19).

 [6 paginapi foto recuadropiwan]

¿Qhepamanñachu waway bautizakunan?

Wakin tayta-mamakunaqa wawanku bautizakunankupaq hinaña kashaqtinpas manan munankuchu bautizakunanta. ¿Imarayku?

“Manchakunin imapipas huchallirukuqtin qarqosqa kananmanta.” Manaña bautizakunmanchu chaypas, ¿manachu Dios paytapas cuentata mañanqa? Salomonmi wayna-sipaskunata nin: “Ichaqa yachay, tukuy chaykunamanta Dios cuentata mañanasuykita”, nispa (Ecl. 11:9). Pablopas llapa runakunamantan nirqan: “Sapankanchismi kikinchismanta Diosman cuentata qosun”, nispa (Rom. 14:12).

Bautizasqakunapas mana bautizasqakunapas llapallanchismi Diosman cuentata qosun. Pay serviqkunatan Dios prometen: “Maykamachus pruebata muchuyta atiwaqchis chaykamallan Diosqa probachisunkichis”, nispa (1 Cor. 10:13). ‘Allin yuyaywan’ kawsaqkunatapas tentacionkunamanta ayqekuqkunatapas yanapanqan (1 Ped. 5:6-9). Huk cristianan nin: “Wayna kashaspa bautizakuqkunaqa aswan kallpachasqan kanku mana allinkunamanta ayqenankupaq. 15 watanpi bautizakuq wawaymi nin: ‘Jehová Diostan tukuy imapipas kasukuyta munanki’ nispa. Bautizasqa kaspaqa ch’uya kawsaytan munanki”, nispa.

¿Allin ejemplochu wawaykipaq kanki, yachachinkichu Dios kasukuytapas? Chayta ruwashanki chayqa paypas bautizakuspaqa hunt’aq sonqowanmi Diosta servinqa. Proverbios 20:7 texton nin: “Chanin runaqa chanin-kayninpi purin chayqa wawankunapas kusisamiyoqmi”, nispa.

“Munaymanmi ñawpaqtaqa allinta kawsananpaq hukkunamanraq aypananta.” Yaqapaschá tayta-mamakunaqa munanqaku profecionniyoq kanankuta. Waynakunaqa qhawarinankun qhepaman imawanchus kawsanankuta, ichaqa Dios servinankumantaqa profecionniyoq kanankupaq, allin qolqeyoq kanankupaq pipas tanqayunqa chayqa mana allinkunapin rikukunkuman. Yuyarisun Jesuspa nisqanta: “Khiska-khiskapi muhu t’akasqaqa Diospa siminta uyariqkunan kanku, ichaqa kay kawsaypi afanakuymi qhapaqyayta munapakuykunapiwan, simi uyarisqankuta qonqachispa mana ruruchipunchu”, nispa (Mat. 13:22). Arí, chaykunata ñawpaqta maskhayqa wayna-sipaskunaq sonqonpi Diosmanta yachasqantan chiriyachipunman, manañataqmi Diostapas serviyta munankumanchu.

Sichus wawakuna bautizakunankupaq hinaña kashaqtin tayta-mamakuna hark’ankuman chayqa manan wawakunaq allinninpaqchu kanman. Unayña Diosta serviq umallin nin: “Bautizakunankuta hark’anqaku chayqa, iñiyninkupin pisiyapunkuman manataqmi qhepaman bautizakuyta munankumanñachu”, nispa. Iñiq t’aqakunata watukuqmi nillantaq: “Iñiyninpin hukkunamanta pisipaq qhawarikunman iskayapunmantaqmi kanpas. Yaqapaschá Diospa llaqtanmanta t’aqakuspa kay pachapi ima munasqantapas maskhanman”, nispa.

[Foto]

¿Ñawpaqtachu universidadpi estudianan?

[3 paginapi foto]

Waynallaraq kashaspa Cristo qatikusqankutan rikuchinku...

[3 paginapi foto]

Huñunakuykunapaq preparakuspa, tapuykunaman kutichispa

[4 paginapi foto]

Tayta-mamankuta kasukuspa

[4 paginapi foto]

Predicacionman lloqsispa

[4 paginapi foto]

Jehová Diosmanta mañakuspa