¿Diospa samakuyninpichu kashanki?

“Diospa siminqa kawsaqmi, atiyniyoqmi.” (HEB. 4:12.)

1. ¿Imatan ruwananchis Diospa samakuyninman haykunapaq? ¿Imaraykun chayta ruway sasa kanman?

ÑAWPAQ estudiopi yachasqanchis hina, Diospa samakuyninman haykunapaqqa kasukuqmi kananchis yanapakunanchistaqmi munaynin hunt’akunanpaq. Ichaqa sasan chay ruwayqa. Sichus ima ruway munasqanchispas mana Diospa munasqanman hinachu kashan chayri, ¿chuchupakusunmanchu cambianapaq? Chayta ruwaspaqa manan ‘tukuy sonqowan kasukuqchu’ kasunman (Rom. 6:17). Kay estudiopin yachasun imakunapin rikuchisunman kasukuq kasqanchista Diospa munayninman hina kawsay munasqanchistapas.

2, 3. ¿Imatan ruwananchis Diosta kusichinapaq?

² ¿Sasachu mayninpi Diospa kamachikuyninta kasukuy? Bibliaq nisqan hina, Diosqa ‘llapan suyukunaq [...] qhapaq kaynintan’ otaq chanin kaqta munakuq runakunatan huñuyta munan (Hageo 2:7). Yaqa llapanchismi manaraq Bibliata estudiashaspa mana allinkunapi kawsarqanchis. Ichaqa Jehová Diosta Churintawan munakusqanchismi  tanqawarqanchis kawsayninchispi rimasqanchispipas cambiananchispaq. Chaypaqqa anchatachá kallpachakurqanchis sapa kutillataqchá tukuy sonqowan Diosmanta mañakurqanchis, qhepamantaq bautizakurqanchis (leey Colosenses 1:9, 10).

³ Ichaqa, ¿chaykamallachu kallpachakunanchis karqan? Manan, pantaq runa kasqanchisraykun kallpachakushanallanchis allinta kawsanapaq. Diosta kusichinapaq sapa p’unchay kallpachakushallasun chayqa Jehová Diosmi saminchawasun.

Uyarikuq kasun

4. ¿Imaynatan Jehová Dios reparachiwanchis pantasqanchista?

⁴ Kawsayninchispi cambianapaqqa ñawpaqtan yachananchis imakunapi pantasqanchista. ¿Imaynatan Jehová Dios chayta reparachiwanchis? Yaqapaschá huk discurso uyarisqanchispi otaq huk qelqa leesqanchispi. Sichus chaykunapi mana reparakusunchu otaq mana kasukusunchu chayqa huk iñiqmasinchiswanmi reparachiwasunman (leey Gálatas 6:1).

5. ¿Imaraykun umallikuna iñiqmasikunata yanapananku? ¿Imakunatan mana ruwanachu huk umalli yuyaychawaqtinchis?

⁵ Mayninqa runamasinchis pantaqllataq kasqanta qhawarispan mana tukuy sonqowanchu yuyaychawasqanchista uyarikunchis. Ichaqa Jehová Diosmi michiqkunata kamachin ‘llamp’u sonqo-kaywan [iñiqmasinta] sayarichinanpaq’ otaq wanachinanpaq (Gál. 6:1). Yuyaychawasqanchista uyarisun chayqa Diosmi ‘qhapaq kayta’ hina qhawariwasun. Jehová Diosmanqa mana imata pakaspan lliw huchanchista willakunchis. Huk umalli imapi pantasqanchistapas niwaqtinchismi ichaqa “manan chhaynachu” ninchispacha. Nisunpaschá: “¿Imaraykutaq chayta niwan?”, “manan sumaqtachu niwan”, “manan imapas kanqachu” otaq mananchakusun (2 Rey. 5:11). Yaqapaschá phiñakusun otaq paytapas llakichisun familianchis ima mana allin ruwasqanmanta, imayna p’achakusqanchismanta, qhelli purisqanchismanta otaq mana allin kusirikuykuna akllasqanchismanta yuyaychawaqtinchis. Ichaqa allinta yuyaykuqtinchismi reparanchis mana allin ruwasqanchista yuyaychawasqanchispas allinninchispaq kasqanta.

6. ¿Imaynapin Diospa simin ‘sonqopi yuyaykusqakunatapas lliwtapuni sut’inchan’?

⁶ Kay estudiopaq texton yuyarichiwanchis ‘Diospa siminqa [...] atiyniyoq’, kasqanta. Arí, Diospa atiyninmi yanapawanchis bautizakusqanchis ñawpaqta qhepatapas kawsayninchispi cambianapaq. Pabloqa nillarqantaqmi: “Diospa siminqa [...] almatapas, espiritutapas, moqo-moqotapas, chilinatapas taripanankaman haykun, sonqopi yuyaykusqakunatapas lliwtapunin sut’inchan”, nispa (Heb. 4:12). ‘Alma’ nispaqa hawanchis imayna kasqanmantan nishan; ‘espíritu’ nispataq ukhunchispi imayna kasqanchista. ¿Imatan chaywan nisharqan? Bibliapi Diospa kamachiwasqanchista kasukusqanchispi otaq mana kasukusqanchispi imayna runa kasqanchista rikuchisqanchismantan rimasharqan. ¿Imaynan sapankanchispas kanchis? ¿Tupanchu ukhunchispi imayna kasqanchis hawanchispi imayna kasqanchiswan? (Leey Mateo 23:27, 28.) ¿Imatan ruwasunman kay hina sasachakuykuna kaqtin?

Diospa llaqtanwan kuskalla purisun

7, 8. a) ¿Imaraykun wakin cristianokuna Kamachikuy Simiman k’askakurqanku? b) ¿Imaraykun Diospa contranpi chayta ruwasharqanku?

⁷ Yaqa llapanchismi Proverbios 4:18 textoq nisqanta reqsinchis, chaypin nin: “Chaninkunaq puriyninqa pacha illarimuy k’anchay hinan, allinta p’unchayamuqtin aswan-aswanta k’anchariq hinan”, nispa. Chaypi nisqanmi rikuchin kawsayninchispas Bibliamanta yachasqanchispas p’unchay-p’unchaymanta aswan allin kananta.

 ⁸ Ñawpaq estudiopin yacharqanchis Jesuspa wañupusqan qhepaman wakin cristianokuna Kamachikuy Simiman k’askakusqankuta (Hech. 21:20). Chay cristianokunamanmi Pablo willarqan chay kamachikuykunata amaña kasukunanku kasqanta, wakin cristianokunan ichaqa mana kasukurqankuchu (Col. 2:13-15). ¿Imarayku? Yaqapaschá wakin kamachikuykunata kasukuspa judiokunaq mana qatiykachasqan kayta yuyaykuspa. Hebreo cristianokunaman carta apachisqanpin Pablo willarqan Diospa yuyaykusqanta yanapakuspalla Diospa samakuyninman haykuy atisqankuta (Heb. 4:1, 2, 6; leey Hebreos 4:11). * Diospa chaskisqan kayta munaspaqa huk hinamanta llaqtanpaq yuyaykusqantan kasukunanku karqan.

9. ¿Imaynatan qhawarinanchis hunt’aq kamachi ima yachachikuytapas astawan sut’inchaqtinku?

⁹ Kay tiempopipas Bibliapi askha yachachikuykunan sut’inchakurqan. Ichaqa manan chaykunamanta iskayanchischu, aswanmi hunt’aq kamachipi astawan confianchis. Yachasqanchis hina, hunt’aq kamachiq sutinpin Umalliq T’aqa sapa kutilla ñawpaqpi lloqsimuq yachaykunata t’aqwirishanku, sut’inchana kaqtataq astawan sut’inchashanku. Paykunaqa manan manchakunkuchu runakunaq rimakusqanta. Paykunapaqqa Diospa yuyaykusqanman hina ruwaymi aswan importante. Ñoqanchisri, ¿imaynatan qhawarinchis ima yachachikuypas astawan sut’inchakuqtin? (Leey Lucas 5:39.)

10, 11. ¿Imatan yachanchis huk hinamanta predicanapaq kamachikuy lloqsimuqtin wakin cristianokunaq ruwasqanmanta?

¹⁰ Yachasun 1800 watakuna tukuyta 1900 watakuna qallariypipas imachus sucedesqanta. Chay tiempopi allin rimaq wakin cristianokunan yuyaykuqku allin discursokunata qospa predicay allin kasqanta. Maytan munaqku ñawpaqmanta rimayta, wakintaq hukkunaq alabananta munaqku. Qhepamanmi ichaqa Diospa llaqtan qhawarirqan Diospa yuyaykusqanta yanapakunapaq wasinta-wasinta predicay allin kasqanta. Ichaqa wakin allin discursantekunan mana yanapakuyta munarqankuchu. Allin iñiyniyoq cristianokunapaqmi qhawarikurqanku, ichaqa Diospa kamachikuynin huk hinamanta hunt’ana kasqanta yacharuspan sonqonkupi imayna runakuna kasqankuta yachakurqan. Chhayna kasqankumantan Diosqa mana chaskirqanchu qhepamantaq Diospa llaqtanmanta karunchakapurqanku (Mat. 10:1-6; Hech. 5:42; 20:20).

¹¹ ¿Dios sonqo runakunari? Paykunapaqpas ñawpaqtaqa sasapunin karqan wasin-wasinta predicay, ichaqa kasukurqankun. Paykunaqa pisi-pisimantan manchakuyninkuta atiparqanku, Diostaq samincharqan. Qanri, ¿kasukunkichu huk hinamanta predicanaykipaq nisuqtiykiku? ¿Kallpachakunkichu chayta ruwanaykipaq?

Diospa llaqtanmanta familianchis karunchakapuqtin

12, 13. a) ¿Imaraykun Dios kamachikun huchapi kawsasqankumanta mana pesapakuqkunata llaqtanmanta qarqonankuta? b) ¿Ima sasachakuypin tayta-mamakuna rikukunku wawanku qarqosqa kaqtin?

¹² Yachasqanchis hina, Jehová Diosqa tukuypi ch’uya kananchistan munan (leey Tito 2:14). Chay kamachikuyta pipas familianchismanta mana kasukusqanmi sasachakuyman churawasunman. Kaypi yuyaykusun, huk cristianokunaq sapan wawankun Diosmanta karunchakuyta qallarin. Chay waynaqa pisipaqmi qhawarin Dioswan tayta-mamanwan iñiypi hukllachasqa kasqankuta,  hinan ‘huchaq kusichikuyninpi kawsaspa’ qarqochikun (Heb. 11:25).

¹³ May llakisqachá tarikun tayta-maman. Paykunaqa yachankun 1 Corintios 5:11, 13 textopi nisqanta, ninmi: “Mayqenpas ‘Diospi iñiqmi kani’ nishaspa qhelli huchapi purishanman, otaq payllapaq kananta munaqpas kanman, ídolo yupaychaqpas kanman, millay k’amiqpas kanman, machaqpas kanman, suwapas kanman chayqa, ama chay hina runawanqa huñukuychischu, amapuni chay hina millaywanqa kuskapas mikhuychischu”, nispa. Paykunaqa entiendenkun “mayqenpas” nispa nisqanqa wasimanta sapaqpiña tiyaq familiakunamantawan rimashasqanta. Ichaqa Jehová Diosta wawankutapas munakusqankuraykun ninkuman: “Wawanchismanta karunchakapusun chayqa, ¿imaynatataq yanapasun Diosman kutimpunanpaq? ¿Manachu aswanpas yanapasunman?” nispa. *

14, 15. ¿Imatan tayta-mamakuna decidinanku kanqa?

¹⁴ Ñoqanchispas chay tayta-mamakuna hinan llakikunchis chaykuna kaqtin. Paykunaqa wawankuq huchanpin chay llakikuypi rikukunku. Wawankun huchapi purispaqa Diospa llaqtanmanta tayta-mamanmantapas karunchasqa kananta yachashaspa huchallapi kawsarqan. ¿Pi tayta-mamataq chhaynapi tarikuspa mana llakikunmanchu?

¹⁵ Tayta-mamakunapas kaytan decidinanku kanqa: kasukunqakuchu Diospa kamachikusqanta icha manachu. Yaqapaschá mayninqa familiapi ima sasachakuypas kaqtin paywan huñunakunanku kanqa. Ichaqa, ¿chayraykuchu sapa kutilla paywan huñukunanku? Imachus ruwanankuta decidinankupaqqa yuyarinankun Diospa nisqanta. ¿Imaraykun Jehová Dios huchasapakunaq qarqosqa kananta kamachikun? Llaqtan ch’uya kananpaq, huchallikuqpas yuyayman kutinanpaq. ¿Imaynatan tayta-mamakuna yanapakunkuman chhayna kananpaq?

16, 17. ¿Imatan yachanchis Aaronta sucedesqanmanta?

¹⁶ Moisespa wawqen Aaronpas chhayna sasachakuypin rikukurqan. Nadab, Abihú churinkunan Diosman mana haywananku inciensota q’osñichispa huchallikurqanku, chaymantan Dios huchachaspa iskayninkuta wañuchirqan. ¡Maytachá taytankuq sonqon nanarqan manaña paykunawan rimay atisqanmanta tupay atisqanmantapas! Chaymantapas Aaronta huk wawankunatawanmi Dios kamachirqan: “Aman chukchaykichista t’ampayachinkichischu, amallataq p’achaykichistapas llakipi kasqata rikuchinapaq llik’ikunkichischu, paqtan wañuwaqchis, lliw llaqtantinpaqtaq Señor Diosqa k’arakta phiñakunman”, nispa (Lev. 10: 1-6). Chaymi kayta yachachiwanchis: ñoqanchisqa mayqen familianchismantapas astawanqa huchanmanta mana pesapakuqmantaqa Jehová Diostan ñawpaqta munakunanchis.

¹⁷ Kay tiempopiqa manan kaq ratopachachu huchallikuqkunata Dios wañuchin. Ancha munakuq kayninpin suyan huchankumanta kutirikunankuta. Huchankumanta mana pesapakuqkunan ichaqa qarqosqa kanku. ¿Imanispan Jehová Dios qhawarinman qarqosqa wawanwan sapa kutilla huñunakuq tayta-mamakunata? ¿Manachu qhepanchasqa hina sientekunman?

18, 19. ¿Ima kusikuymi kanman Diospa kamachikusqanta kasukuqkunapaq?

¹⁸ Askhan Diospa llaqtanman kutimpuq cristianokuna willanku, familianku amigonku paykunamanta karunchakusqankurayku yuyayman kutisqankuta. Huk sipas Diospa llaqtanman kutimpunanpaq carta qelqasqankupin umallikuna willarqanku, chay sipaspa “kurak turan qarqosqakunapaq Diospa kamachikusqanta kasukusqan” anchata yanapasqanmanta. Chay sipasmi nin: “Diospa kamachikusqanta kasukusqanmi yanapawarqan Diospa llaqtanman kutimpunaypaq”, nispa.

¹⁹ Chaypi yachasqanchis hina, manan sonqonchispa nisqantaqa kasunachu. Ima kamachikuypas sasaña kanman kasukunapaq chaypas, kasukunan Jehová Diospa yachachiwasqanchis allinninchispaq kasqanpi yuyaykuspa.

“Diospa siminqa kawsaqmi”

20. ¿Imakunatan Pablo nirqan “Diospa siminqa kawsaqmi” nispa? (Willakuytawan qhawariy.)

²⁰ Pabloqa manan Bibliamantachu rimasharqan “Diospa siminqa kawsaqmi” nisqanpi (Heb. 4:12). Chaypiqa Diospa lliw promesankunamantan rimasharqan. * Chaywanmi rikuchisharqan Diospa rimasqan llapallan hunt’akusqanta. Jehová Dios kikinmi nirqan: “Rimasqay simiyqa manan hinallachu kutimuwanqa, aswanpas [...] kamachisqayta llapantapuni hunt’anqa”, nispa (Isa. 55:11). Chaymi mana sinchitaqa llakikunanchischu imapas mana munasqanchisman hina ruwakuqtinqa. Jehová Diosqa “llank’ashallanpunin”, yuyaykusqan hunt’akunankamapas llank’ashallanqan (Juan 5:17).

21. ¿Imaynatan Hebreos 4:12 texto yanapan ‘ancha askha runakunamanta’ kaq yuyaq cristianokunata?

²¹ ‘Ancha askha runakunamanta’ kaq cristianokunan unayña Diosta servishanku (Apo. 7:9). Wakinqa manan yuyaykullarqankupaschu yuyaqman chayayta, chaywanpas llank’ashallankun Diospaq (Sal. 92:14). ¿Imarayku? ‘Diospa simin kawsashaq’ kasqanrayku; Jehová Diosqa llank’ashallanmi lliw promesankuna hunt’akunanpaq. Payqa munanmi Hallp’apaq yuyaykusqan hunt’akunanta, kusikuntaqmi ñoqanchispas chayta munaqtinchis. Kunanpas Diospa sapaqchasqan qanchiskaq p’unchaypin kawsashanchis, suyashantaqmi munaynin hunt’akunanta, munasqanman hina llaqtan kawsanantapas. Kaypi yachasqanchis hina, llapallanchismi Diospa samakuyninman haykuyta atisunman. ¿Chaypichu qanpas kashanki?

[Uranpi willakuykuna]

Yuyarisun yachasqanchista

• ¿Imatan ruwananchis Diospa samakuynin p’unchayman haykunapaq?

• ¿Imatan ruwananchis Bibliapi yuyaychaykunata entiendespa?

• ¿Imakunapi rikukuspan rikuchinanchis Dios sonqo kasqanchista? ¿Imaraykun kasukuq kananchis?

• ¿Imakunatan Pablo nirqan “Diospa siminqa kawsaqmi” nispa?

[Tapuykuna]

[31 paginapi foto]

Tayta-maman sonqonkupi sinchi k’irisqa tarikunku