Leeqkunaq tapukusqan

¿Yachanchischu Hebreo Qelqakunamanta hayk’a profeciakuna Jesucristopi hunt’akusqanta?

Hebreo Qelqakunata leespan tarinchis Jesucristopi askha profeciakuna hunt’akusqanta. Chay profeciakunan willarqan Mesías maypi nacenanta, ima watapi rikhurimunanta, imakuna ruwananta, ñak’arichisqa kananta, Diospa munasqanta hunt’anantapas. Tukuy chay profeciakuna hukllapi hunt’akusqanmi rikuchin Jesuspuni Mesías kasqanta. Ichaqa manan yachayta atisunmanchu Bibliapi hayk’a profeciakuna Jesuspi hunt’akusqanta.

Ichaqa manan llapa runakunachu allinpaq qhawarinku Mesiaspi profeciakuna hunt’akusqanta. Alfred Edersheim runan Comentario bíblico histórico nisqa qelqapin willan Sinagogamanta ñawpa qelqakunapi Hebreo Qelqamanta 456 textokunata Mesiasmanta profeciakunata hina qhawarisqankuta, manaña chay textokuna Mesiasmantachu riman chaypas. Ichaqa chay 456 textokunata t’aqwirispan reparakun mana llapanchu Mesiasmanta rimashasqanta. Edersheim runan willan judiokunapaqqa Génesis 8:11 texto Mesiasmanta willashasqanta. Ninkus: “Olivos raphita [Noepa arcaman] palomaq apasqantaqa Mesiaspa orqonmantan aparqan”, nispa. Éxodo 12:42 textomantas nillankutaq: “Ch’inneq aqo pampamanta Moisespa lloqsisqanta hinan Mesiaspas Romamanta lloqsimunqa”, nispa. Bibliamanta yachaqkuna, Bibliata leeqkunapas manan Jesucristomanta rimashasqanta hinachu qhawarinku.

Hinaspapas manan yachakunchu Jesucristopi hayk’a profeciakunaq hunt’akusqanta. Qhawarisun Isaías 53 capitulopi tarikuq profeciakunata. 2-7 versiculokunapin willan: “Manan allin rikch’ayniyoqpaschu munaypaschu karqan. [...] Runakunaq pisichasqanmi qhawarparisqanmi karqan [...]. Paypunin onqoyninchiskunata muchurqan, nanayninchiskunatapas muchurqanpunin [...]. Huchanchiskunamanta sinchi muchuchisqa karqan [...]. Nak’anapaq apasqa borrego hinan karqan”, nispa. ¿Huk profeciata hinallachu chayta yupasunman ichaqa sapaq-sapaqtachu?

Qhawarillasuntaq Isaías 11:1 textopi nisqanta, chaypin nin: “Ichaqa wit’usqa kurkumanta ch’ikchimuq hinan Isaipa mirayninmanta huk rey paqarimunqa, saphinmantan ch’ikchi hina phutumunqa”, nispa. 10 versiculopas kaqllatataqmi willan. ¿Iskay profeciakunata hinachu chayta yupana icha hukta hinallachu? Isaías 53, 11 capitulokunapi profeciakunata imaynatachus yupasqanchismantan kanqa Mesiaspi hayk’a profeciakunaq hunt’akusqan.

Chaymi mana nishutaqa llakikunanchischu Hebreo Qelqakunapi hayk’a profeciakuna kasqanmanta. Diospa llaqtanpi lloqsimuq askha qelqakunapin lloqsimun chay profeciakuna imayna hunt’akusqanpas. * Chaykunamanta yachaymi yanapawasun sapanchispi otaq familianchiswan estudiasqanchispi, predicananchispaqpas. Hayk’a profeciakunaña kanman chaypas, chay profeciakunaq hunt’akusqanmi iñiyninchispi kallpachawanchis, rikuchitaq Jesuspuni Mesías otaq Cristo kasqanta.

[Uranpi willakuy]