Mana qonqanapaq huñunakuy

QAYNA watan 2 octubre killapi sapa wata, corporación Watch Tower Bible and Tract of Society Pennsylvania nisqamanta 126 huñunakuy aparikurqan, Jersey City llaqtapi (Nueva Jersey, Estados Unidos). Chaypin Jehová Diospa testigonkunaq Umalliq T’aqamanta Stephen Lett khaynata qallarirqan: “Kay huñunakuy tukuqtinqa khaynatachá nisunchis: ‘Kay huñunakuytaqa manapunichá Diospa llaqtanqa hayk’aqpas qonqanqachu’, nispa”, nispa. Chayta nisqanwanmi uyariqkunata kallpacharqan makilla uyarinankupaq. ¿Imakunamantan chaypi rimakurqan?

Ñawpaq discursopin Lett iñiqmasinchis rimarqan Ezequielpa rikhuriypi rikusqan Diospa carretanmanta. Chay ancha hatun carretaqa Diospa llaqtanwanmi rikch’anachikun, chaytan Jehová Dios aparishan. Hanaq pacha llaqtanpi kaq angelkunamanta rimaspan willarqan rayo hinaraq phawashasqankuta, imaynan chay carretata apariqpas yuyaykun hinata. Kay pachapi llaqtanpas astawanmi ñawparishan, chaytan rikukun kay qhepa watakunapi imaymanakuna ruwakusqanpi.

Chayta rikuchinanpaqmi willarqan wakin sucursalkuna huk sucursalkunaman huñukapusqanta. Chaymi kunanqa Betel wasipi askha llank’aqkuna predicayllamanña tiemponkuta kallpankutapas qonqaku. Chaymantapas chaypi kaqkunatan kallpacharqan hunt’aq kamachipaq, Umalliq T’aqapaqwan Diosmanta mañapunankupaq chhaynapi tukuy sonqowan allin yuyaywan llank’ashanallankupaq (Mat. 24:45-47).

Allin willakuykuna

Haití sucursalpi encargakuqkunamanta hukninmi Tab Honsberger cristiano willarqan 2010 watapi, 12 enero killapi terromoto kasqanpi 300.000 runakuna wañusqankumanta. Curakunas runakunata nisqa: “Diospa castigasqanmi chay millay runakunaqa wañurqan, allin runakunatan ichaqa pakaykurqan”, nispa. Chhayna kaqtinqa, ¿imaynapitaq carcelpi kaq runakuna terremoto kaqtin carcelmanta ayqekurqanku? Kunanqa Haití llaqtapi askha runakunan thak sientikunku imarayku chhayna ñak’ariykuna kasqanmanta yachaspa. Discurso qoqmi willarqan warmin wañupuq cristianomanta, payqa ninsi: “Sapa p’unchaymi waqani. Manan yachanichu hayk’aqkama kay llaki ñit’iwananta, ichaqa sonqoymi ‘thak’ nin Diospa llaqtanpi munakuyta chaskispa.  Manan qonqanichu qhepaman sumaq kawsay kananta chaytan huk runakunamanpas willashaq”, nispa.

Brooklyn llaqta Betel wasipi llank’aq Mark Sanderson cristianon willallarqantaq Filipinas nacionpi predicación imayna aparikusqanmanta, ñawpaqqa chay Sucursalpi Encargakuqkunamanta hukninmi karqan. Ancha kusisqan willarqan chay nacionpi kinsa wata hinaña sapa killa publicadorkuna yapakusqanta, chay nacionpi predicaqkunamanta aswan askharaq Biblia estudiaqkuna kasqantapas. Willarqanmi Miguel sutiyoq cristianomanta. Chay cristianoqa tukuy atisqantan ruwasqa nieton wañuchiqta carcelman wisq’anankupaq. Huk kutinmi carcelpi predicashaqtin paywan tupasqa. Rikuruspa hinaqa manan ima ruwaytapas atisqachu, chaywanpas llamp’u simiwanmi rimapayasqa munachisqataqmi Bibliamanta estudiota. Payqa munasqan estudiayta, chaytaqmi yanaparqan Jehová Diosta munakunanpaq bautizakunanpaqpas. Kunanqa amigontinmi kanku, yanapashantaqmi carcelmanta usqhaylla lloqsipunanpaq. *

Departamento de Escuelas Teocráticas nisqapi yachachiq Mark Noumair cristianon tapurqan Alex, Sarah Reinmueller; David, Krista Schafer; Robert, Ketra Ciranko casarasqa cristianokunata. Qelqakuna Ruwaymanta Encargakuqkunata yanapakuq Reinmueller cristianon willakurqan 15 watanpi kashallasparaq cheqaq yachachikuyman k’askakusqanta. Chay tiempopaqqa Canadá nacionpin precursor karqan, sapa kutillataqmi sapallan predicaq. Iñiyninpi pikuna yanapasqanmanta tapuqtinmi willarqan Betelpi llank’aq Dios sonqo kinsa cristianokunamanta. Sarah warminpas willarqanmi, China nacionpi iñiyninrayku askha watakuna carcelpi wisq’asqa cristianawan amigantin kasqankuta. Nillarqantaqmi Diosmanta mañakuspa paypi astawan hap’ipakusqanta.

Yachachikuymanta Encargakuqkunata yanapakuq David Schafer cristianopas willarqanmi maman allin iñiyniyoq kasqanmanta, waynallaraq kashaspa precursor auxiliar kananpaq llant’a ruwaq cristianokuna yanapasqantapas. Warmin Kristapas Betelpi llank’aq kuraq cristianokunaq yanapasqankutan munakuywan yuyarirqan, chay cristianokunaqa Jesuspa nisqan hinan ‘pisillapipas hunt’aq’ kasqaku (Luc. 16:10).

Yachachikuykuna Qelqaymanta Encargakuqkunata yanapakuq Robert Ciranko cristianopas tawantin abuelonkunamantan  rimarqan, paykunaqa hanaq pachapaq akllasqan karqanku. Paytaqa 1950 watakunapi wawallaraq kashaspa hatun huñunakuykunaman risqanmi rikuchirqan Diospa llaqtan hatunpuni kasqanta, chaymi kallpacharqan Diosta astawan servinanpaq. Ketra warminpas willarqanmi precursora kashaqtin iñiymanta t’aqakuqkunawan, sasachakuyniyoq cristianokunawan kaspa Diospaq hunt’aq sonqo kay yachasqanta. Payqa mana sayk’uspan Diospaq llank’arqan, qhepamantaq precursora especial kaspa hukllachasqa kallpachakuq iñiq t’aqapi servirqan.

Manfred Tonak cristianon willamurqan Etiopía nacionpi Predicación aparikusqanmanta. Chaypiqa 9.000 más publicadorkunan kashanku. Yaqa llapallankun Adís Abeba hatun llaqtapi hinallataq qayllankunapi tiyanku. Chaymi hawa llaqtakunapi predicaqkunata necesitakusqanrayku huk nacionkunapi tiyaq Etiopía llaqtayoqkunaq yanapayninta mañakurqan. Askhañan chayta uyarikuspa yanapakushanku tiemponkuq kasqanman hina. Paykunaqa askhatan Diosmanta yachay munaqkunata tarimushanku, kallpachashankutaqmi iñiqmasinkutapas.

Rusia nacionpi iñiqmasinchiskuna juiciopi kasqankumantan discursokuna qokurqan. Rusia Sucursalpi Encargakuqkunamanta Aulis Bergdahl cristianon pisillapi willarqan Moscú llaqtapi Testigokuna qatiykachasqa kasqankumanta. Estados Unidos sucursalpi Departamento de Asuntos Legales nisqapi llank’aq Philip Brumley cristianon willallarqantaq kay qhepa killakunapi Rusia nación Testigokuna contra isqon juiciokunata Tribunal Europeo de Derechos Humanos nisqa qhawarisqanta. Chay tribunalmi nirqan Testigokuna contra rimasqankumanta mana ima pruebapas kasqanta. Manaña yachanchischu imaninqan Rusia nación chay sentencia lloqsimusqanmanta chaypas, Brumley cristianon willarqan huk nacionkunapi chhayna sasachakuyniyoq iñiqmasikunata chay sentencia yanapananta.

Chay qhepamanmi Lett cristiano willallarqantaq chay tribunal Francia nacionpi gobierno Testigokunata impuesto cobrasqankumanta juiciota qhawarisqanta. Chay tribunalqa ancha allin respetasqan, manataqmi ima juiciotapas comunllataqa chaskinchu. Kunankamaqa 39 juiciokunatañan Testigokunamanta chaskinku, 37 juiciokunatataq allinninchispaq dictamurqan. Chaymi llapa uyariqkunata kallpacharqan chay juiciokuna allinta aparikunanpaq Diosmanta mañakunankupaq.

 Umallikunapaq Escuelapi yachachiq Richard Morlan cristianon tukuy sonqonwan willamurqan chay Escuela allinpuni kasqanmanta, chaypi kaq umallikuna ancha agradecido kasqankumantawan.

Huk discursokuna

Qatimuq discursokunataqa Umalliq T’aqamanta kaqkunan qomurqanku. Guy Pierce cristianon kay watapi lloqsimuq textomanta sumaqta rimamurqan, chay texton nin: Jehová Diospa sutinpi pakakusun (Sof. 3:12, NM). Willamurqanmi kusikunapaq tiempopi kawsasqanchista, Jehová Diospa p’unchaynin qayllaykamusqanrayku allin yuyaywan kawsananchismantawan. Runakunaqa pantasqa religionkunapi, politicapi, qolqenkupi iman pakakunku. Ichaqa allin pakaykusqa kanapaqqa Jehová Diospa sutintan hoqarina, chaypaqqa Diostan reqsinanchis, respetananchis, paypi hap’ipakunanchis, tukuy sonqowantaq munakunanchis.

David Splane cristianon “¿Diospa samakuyninpichu kashanchis?”, nisqa sumaq discursota qomurqan. Sábado otaq samakunan p’unchaypiña kashan chaypas, Diosqa “llank’ashallanpunin” kay Hallp’api munaynin hunt’akunanpaq, chaytan Jesuspas ruwashan (Juan 5:17). ¿Imaynatan ruwana Diospa samakuynin p’unchayman haykunapaq? Huchatan saqenanchis, manataqmi allin ruwasqanchiskunaraykuchu ninanchis: “Ñoqaqa chaninmi kani”, nispa. Hinaspapas manan qonqananchischu imachus Diospa munaynin kasqanta chaypitaqmi iñinanchis, tukuy atisqanchispitaq yanapakunanchis. Mayninqa sasachakusunpaschá chaykunata hunt’anapaq, ichaqa Diospa llaqtanpin yanapayta tarisun. Tukupunanpaqtaq llapa uyariqkunata kallpacharqan Diospa samakuyninman haykunankupaq.

Tukunapaqmi Anthony Morris cristiano “¿Imatan suyashanchis?”, nisqa discursota qomurqan. Munakuq tayta hinan uyariqkunata yuyarichirqan “thak-kaypin kashanchis, allin waqaychasqan kashanchis” nisqa profeciata, pantasqa religionkunaq chinkachisqa kanantawan suyashanallanchispaq (1 Tes. 5:2, 3; Rev. 17:15-17). Ichaqa willamurqanmi Armagedonmanta yanqa willakuykunawan ama q’otuchikunanchispaq. Kallpachamurqanmi Miqueas 7:7 textopi nisqan hina pacienciawan kusikuywan Diospi suyakunapaq. Hinallataq maqanakuypi kaq soldadokuna hina Umalliq T’aqawan hukllachakuspa llank’ashanallanchispaq. Tukunanpaqtaq nirqan: “Señor Diosman llapa hap’ipaykukuqkuna, kallpachakuychis, sonqoykichispas kawsarichun”, nispa (Sal. 31:24).

Tukunapaqmi sumaq willakuykuna karqan. Geoffrey Jackson cristianon willamurqan Qhawaq revista facíl entiendena inglés simipi yachanallapaq lloqsimunanmanta, chayqa kanqa chay simita pisillata entiendeqkunapaqmi. Stephen Lett cristianon willallarqantaq Estados Unidospi iñiq t’aqakunata qhawariq umallikunata warminkutawan, huk umallikuna kallpachananpaq visitanankuta. Willallarqantaqmi Escuela de Entrenamiento Ministerial nisqa kunanqa Soltero Qharikunapaq Escuela nisqa kapusqanta, asllaman Casarasqa Cristianokunapaq Escuela kanantapas. Chaymantapas Lett cristianon willarqan T’aqakuna Watukuqkunapaq Esposankupaqwan Escuela, Sucursalmanta Encargakuqkunapaq Esposankupaqwan Escuela, sapa watan Patterson nisqapi aparikunanta. Qhepamanqa chay Escuelaman riqkunaqa wakmantan rinkuman.

Chay huñunakuy tukupunanpaqmi Umalliq T’aqamanta 97 watanpiña kashaq John E. Barr cristiano tukuy sonqowan sumaqta Diosmanta mañakurqan. * Chay huñunakuytaqa mana qonqanapaq hinapunin qhawarirqanku.

[Uranpi willakuykuna]

[19 paginapi willakuy]

Sumaq experienciakunatan willamurqanku

[20 paginapi willakuy]

Jehová Diosmi Etiopía nacionpi predicasqankuta samincharqan