¿Yuyashankichu?

¿Tukuy yuyaywanchu leerqanki kay killakunapi chayamuq Qhawaq revistakunata? Chhayna kaqtinqa, ¿kutichiwaqchu kay tapuykunata?

• ¿Ima kinsa yanapaykunan kan honrado kanapaq?

Kaykunan yanapawasun: 1) Diosta manchakuy (1 Ped. 3:12); 2) conciencianchista Bibliawan yachachiy, 3) kapuqllanchiswan kusisqa kawsay (15/4, 6, 7 paginakuna).

• ¿Imaynatan Diosta servispa allin yuyaywan kusisqataq servinanchis?

Jesusmi chayta yachachiwarqanchis, payqa sumaqtan amigonkunawan mikhuspa kusirikuq, manan llank’anallanmanchu qokurqan nitaqmi mana asirikuqchu karqan, chaymi wawakunapas mana manchakuspa payman asuykurqan (15/4, 10 página).

• ¿Imatan chayllaraq wawayoq tayta-mamakuna ruwankuman wawanku nacesqan qhepaman sasachakuykuna kaqtin?

Munanakusqankutan rikuchikunanku. Qosaqa tukuy atisqantan ruwanan esposan munakuyninmanta mana iskayananpaq. Iskayninkun parlarinanku ima necesitasqankumanta imayna sientekusqankumantapas (1/7, 19, 20 paginakuna).

• ¿Imamanmi rikch’akun Romanos 11 capitulopi olivos sach’a?

Chay sach’aqa abrahampa mirayninwanmi rikch’anachisqa kashan, chayqa Israel espiritual nisqan. Chay sach’aq saphinmi Jehová Diosman rikch’akun, sach’aq k’ulluntaq rikch’akun Jesusman. Ñawpa tiempopiqa yaqa llapa judío runakunan Jesusta mana chaskirqankuchu, chaymi Jehová Dios mana judío runakunamanta akllarqan Abrahampa mirayninmanta kanankupaq (15/5, 22-25 paginakuna).

• ¿Ima allin noticiakunan kan wakchakunapaq?

Jehová Diosmi Churinta Kamachikuqta churan. ¿Imaraykun allin kamachikuq kanqa? Payqa atiytan chaskin Hallp’antinpi runakunata kamachinanpaq, wakchakunata khuyapayan, payllan runakunaq sonqonmanta munapayaq kayta chinkachinqa, chay yuyaykuy runakunata wakcha kayman tanqaykusqanrayku (1/7, 7 página).

• Jesuspa miraynin kanman karqan chayri, ¿chay mirayninpiwanchu kacharichiyta apamunkuman karqan?

Manan. Waranqa-waranqanpi ch’uya mirayniyoqña kanman karqan chaypas, manan paykunapiwanchu kacharichiyta apamunkuman karqan. Jesuspa ch’uya kawsaynillanmi tupan Adanpa ch’uya kawsayninwan (1 Tim. 2:6) (15/6, 13 página).

• ¿Imaynatan rikuchisunman Hechos 20:29, 30 textopi llulla yachachiqkunamanta cuidakusqanchista?

Manan napaykunchischu nitaq wasinchispi chaskinchischu (Rom. 16:17; 2 Juan 9-11). Manan hayk’aqpas leenchischu qelqankunata, manan kutichinchischu Internetpi qelqamusqankuman nitaqmi uyarinchischu televisionpi propagandankutapas (15/7, 15, 16 paginakuna).