Bibliata leeyqa kallpachawarqanpunin

Khaynatan willakun Marceau Leroy

CUARTOYPIN pakallapi kayta leerqani: “Qallariypin Diosqa hanaq pachata kay pachatawan kamarqan”, nispa. ¿Imaraykun pakallapi leerqani? Papayqa manan Diospi creerqanchu, Bibliata hap’ishaqta rikuwaspaqa imataraqchá niwanman karqan.

Chay kutipin chayllaraq Bibliata leerqani, Génesis libropi qallariy versiculoq nisqanta leespan imaymanata yacharqani. Chay raton yuyaykurqani: “Kunanraqmi entiendeni imarayku universopi kamachikuykuna (leyes físicas) k’apak kasqanta”, nispa. Astawan yachayta munaspan 8 horas ch’isinmanta 4 horas tutamantankama leerqani. Chay p’unchaymantapachan kunankamapas Diospa Simin Qelqata leeyqa kallpachawarqanpuni. ¿Imaraykun chayta nini? Willasqaykichis.

“Sapa p’unchaymi leenayki kanqa”

1926 watapin nacerqani, minakunaq kasqan Vermelles llaqtapi, Francia nacionpi. Segunda guerra mundial kashasqan tiempopiqa carbón minakunan ancha importante karqan. Chaymi minapi llank’aqkunataqa mana cuartelman waqyawarqankuchu. Aswan allinta kawsanaypaqmi radioelectrónica, electricidad nisqakunata estudiarqani, chaymi universopi kamachikuykuna imayna funcionasqanmantaqa anchata admirakurqani. 21 wataypi kashaqtiymi estudiomanta compañeroy huk Bibliata qowarqan, chay kutipin chayllaraq huk Bibliata hap’irqani, niwarqanmi: “Kayqa, kay librota leeyqa ancha allinmi”, nispa. Leeyta tukuspan sut’ita repararqani Bibliapiqa runakunapaq Diospa willakuynin kashasqanta.

Vecinoykunapas munanqakuchá Bibliamanta yachayta, nispan 8 Bibliakunatawan conseguirqani. Ichaqa manan munarqankuchu, aswanmi burlakuwarqanku mana allintataq rimarqanku. Yanqa creenciakunapi creeq familiaykunapas niwarqankun: “Maypachachus leeyta qallarinki chayqa, sapa p’unchaymi leenayki kanqa”, nispa. ¡Chaytapunin ruwarqani! Kunankamapas mana pesapakuspan Bibliataqa leeshallani.

Vecinoykunan repararqanku Bibliamanta astawan yachay munasqayta, chaymi Testigokunaq ruwamusqanku qelqakunata qowarqanku. Huknin kaq qelqan karqan francés simipi Un solo mundo, un solo gobierno nisqa folleto. * Chaypin willashan Diospa Gobiernollan runakunaq sasachakuynin allichananmanta (Mat. 6:10). Chayta yachaspan astawanraq hukkunaman willayta munarqani.

 Ñawpaqtaqa huch’uyllaraq kashaqtiyku amigoy Noëlmi Bibliata chaskiwarqan. Payqa catolicon karqan, paymi niwarqan sacerdote kananpaq estudiaq runaman visitanaykupaq. Qallariypiqa manchakurqanin, ichaqa Salmo 115:4-8, Mateo 23:9, 10 textokunapin Dios huchachan idolokuna yupaychayta, hatunchana sutikunawan religionpi umalliqkunata waqyaytapas. Chayta leeymi kallpachawarqan iñiyniymanta rimanaypaq. Chay qhepamanmi Noëlqa astawan Bibliamanta yachayta munarqan, kunankamapas Diostan tukuy sonqowan servishan.

Huk kutinpin kurak panayta visitarqani, qosanqa layqakunaq libronkunatan hap’irqan, chaymi supaykuna fastidiarqanku. Cuñadoyta mana yanapayta atinaypaq hinan qhawarikurqani, ichaqa Hebreos 1:14 textopin yacharqani Diospa angelninkuna yanapawananta. Bibliapi yachasqanman hinan ruwarqan, layqakuytapas saqepurqanmi chaymi supaykunaqa manaña fastidiarqankuchu. Qhepamanqa panaypas qosanpas Testigon kapurqanku.

1947 watapin Arthur Emiot sutiyoq Testigo visitamuwarqan. Chaywanqa anchatan kusikurqani. Testigokuna maypi huñunakusqankuta tapuqtiymi niwarqan Liévin llaqtapi huk t’aqa huñunakusqanta, chayqa kashan tiyasqaymanta 10 kilómetro karupin. Chay tiempopiqa manan tarikuqchu bicicletakuna rantinapaq, chaymi askha killakuna chakillapi huñunakuykunaman rirqani. Francia nacionpiqa 2.380 Testigokunallan karqan, askhataqmi Polonia nacionmanta karqanku, 8 wata hinañataqmi predicación hark’asqa kasharqan. Ichaqa 1947 watapi 1 setiembre killapin autoridadkuna hukmanta reconocerqanku, chaymi huk sucursalta ruwarqanku París llaqtapi Villa Guibert llaqtachapi. Francia nacionpiqa manan hukllapas precursor karqanchu, chaymi 1947 watapi Informador (kunanqa Diosmanta Willasunchis) qelqa iñiqmasikunata kallpacharqan precursor kanankupaq. Chay tiempopiqa 150 horatan killapi predicananku karqan, 1949 watapitaq 100 horaman pisiyachikurqan. 1948 watapin bautizakurqani Juan 17:17 textopi nisqanman hina, chaypin Diosta Jesús nin: “Simiykiqa cheqaq-kaypunin”, nispa. 1949 watapi diciembre killapitaq precursor karqani.

Carcelmanta Dunkerque llaqtaman rini

Ñawpaqtaqa Francia nacionpi Agen llaqtamanmi asignawarqanku. Ichaqa pisi tiempollan kamurqani, manañataq minapichu llank’arqani chayqa, soldado kanaypaqmi waqyamuwarqanku, mana munaqtiytaq carcelman apawarqanku. Chaypi Bibliata hap’iy hark’asqaña karqan chaypas Salmos libromanta hojakunatan conseguirqani. Chayta leesqaymi kallpachawarqan. Carcelmanta lloqsimuspayqa decidinaymi karqan llank’ashallaymanchus tukuy tiempoywan Diospaq, icha familiayoq kaspachus paykunapaq llank’ayman chayta. Chaypipas Biblian yanapawarqan. Filipenses 4:11-13 textopi apóstol Pabloq nisqanmi yuyaymanachiwarqan, chaypin nin: “Kallpachawaqniy [‘Jehová Dioswan’, NM] hukllachasqa kaspaymi tukuy imaymanata atini”, nispa. Chay qhepamanmi decidikurqani precursor hina llank’ashanallaypaq. 1950 watapitaq ñawpaq kutipi predicasqay Dunkerque llaqtaman asignawarqanku.

Chaymanqa mana imayoqmi chayarqani. Hinaspapas chay llaqtaqa segunda guerra mundial kasqanwanmi mana allinpi tarikusharqan, chayraykun mana maypipas qhepakuyta atirqanichu. Ñawpaqpi reqsisqay familiaman visitanaypaqmi yuyaykurqani. Rikuruwaspanmi señoraqa anchata kusikuspa niwarqan: “Wiraqocha Leroy, ¡hukmantamá libre kashasqanki! Qosaypa nisqanman hina, qan hina runakuna kaqtinqa manas guerra kanmanchu karqan”, nispa. Paykunaqqa karqanmi alojanankupaq wasi chaymi niwarqan turistakunaq hamunan tiempo qallarinankama qhepakunaypaq. Chay p’unchaymi Arthur cristianoq wawqen Evans tutapi barcota cuidaspa llank’anaypaq niwarqan, payqa huk nacionmanta barcopi chayamuq runakunaq rimasqantan t’ikraq. * Chayllaraqtaq carcelmanta lloqsimurqani chayqa, sinchi k’aspillañan kasharqani. Evans cristianon barcopi huknin oficialta reqsichiwaspa  willarqan imarayku sinchi flaco kashasqayta. Chaymi oficialqa niwarqan refrigeradoramanta ima munasqaytapas mikhunaypaq. Chhaynaqa, huk p’unchayllapin wasita, llank’anata mikhunatapas tarirqani. Chaykunan iñiyniyta astawan kallpachawarqan Mateo 6:25-33 textopi nisqanman hina kawsanaypaq.

Turistakunaq hamunan tiempo chayamuqtinqa, Simon Apolinarski compañeroypiwanmi huk alojamientota maskhanayku karqan. Manan imaraykupas asignacionniykuta saqeyta munarqaykuchu. Chay qhepamanqa huk corralpin pajamanta colchonkunapi puñurqayku. Dueñotan predicarqayku, hinan payqa chay llaqtapi huk runakuna hina Bibliamanta yachayta munarqan. Sapa p’unchaymi askha horakuna predicarqayku, chaymi runakunaman periodicopi willamurqanku: “Jehová Diospa testigonkunan llaqtantinta hunt’aykushanku”, nispa. Ichaqa iskayllaykun iskay kinsa cristianokunawan chaypiqa predicasharqayku. Chay sasachakuytaqa hamuq tiempopaq suyakuyniykupi, hinallataq Dios imayna cuidawasqankupi yuyaymanaspan atiparqayku. 1952 watapi asignacionmanta cambiawaqtinkuqa yaqa 30 Testigokunañan Dunkerque llaqtapi kasharqanku.

Huk llank’aykunapaq preparakuni

Amiens llaqtapi huk tiempolla qhepakuspan precursor especial hina Boulogne-Billancourt llaqtapi llank’arqani, chayqa kashan París llaqtaq kinray ladonpin. Chaypi Biblia yachachisqaykunamantan askha precursor, misionero karqanku. Hukninmi Guy Mabilat wayna karqan, paymi iñiq t’aqakunata watukuq umalli karqan, qhepamantaq iñiq t’aqakuna qhawariq (superintendente de distrito). Chaymantaqa París llaqtaq cercanpi Louviers Betelpin qelqakunata ruwanankupaq wasi hatarichiypi umallirqan. Runakunaman Bibliamanta yachachiytan munaq kani, ichaqa manan kusikuyta tarisqayraykullachu, aswanpas chaymi yanapawaq cheqaq yachachikuykuna umaypi qhepananpaq aswan allin yachachiq kanaypaqpas.

1953 watapin qonqaylla Alsacia-Lorena llaqtapi iñiq t’aqakunata watukuq umalli kanaypaq nombrawarqanku. Chay llaqtataqa Alemania nacionmi 1871-1945 watakuna ukhupi iskay kutita hap’ikapurqanku. Chaypipas Alemán simitan rimakurqan, chaymi kallpachakunay karqan yachanaypaq. Wakin runallan carroyoq, televisionniyoq, qelqanapaq maquinayoq, radioyoqpas karqanku. Manan computadorakunapas karqanchu. Ichaqa manan chayraykuchu llakisqa, imapas faltawanman hina kawsarqani. Aswanpas ancha kusikunapaqmi chay tiempoqa karqan, mana tiempoyta usuchispan Jehová Diosta servirqani. Hinaspapas allin ‘ñawiyoq’ kaymanta yuyaychayman hinapunin kawsarqani (Mat. 6:19-22).

1955 watapin París llaqtapi hatun huñunakuy karqan, “Reino Triunfante” nisqa temayoq. Chay huñunakuypin reqsirqani Irène Kolanski cristianata, payqa precursor kasqaymanta huk wata  ñawpaqtan precursora kasqa. Tayta-mamanqa Polonia nacionmantan karqanku, unayñataq Jehová Diosta reqsisqaku. Paykunatan Francia nacionpi tiyashaqtinkuña Adolf Weber visitasqa, payqa Russell iñiqmasinchispa huertanpin llank’asqa, qhepamantaq Europa ladoman ripusqa chaypi allin willakuykunata predicamunanpaq. 1956 watapin Irènewan casarakapurqani, paymi iñiq t’aqakunata watukuq umalli kasqaypi yanapawarqan. ¡Anchatan agradecekuni mana sayk’uspa askha watakuna yanapawasqanmanta!

Iskay wata kasarakusqay qhepamanmi ¡iñiq t’aqakunata qhawariq umallipaq churawarqanku! Manan ancha allin yachachiq iñiqmasikuna kaqkuchu, chaymi huk tiempo iñiq t’aqakunata watukuq umalli kallarqanitaq. Imaymana ruwanayoq kasqayraykun mana tiempo aypawaqchu. Killapin 100 horata predicanay kaq, sapa semanan askha discursokunata qonay kaq, librota estudianapaq huñunakuypin kinsa grupota visitanay karqan, chaymantapas iñiq t’aqapi papelkunatan revisanay kaq, hinallataq informekunata ruwanay karqan. Manan Bibliata leeynaypaqpas tiempo aypawaqchu. Chaymi thanta Bibliamanta sapanka paginata qhasuspa apaq kani pitapas suyaspa chaypi leenaypaq. Chay ratopi Bibliata leesqayqa ch’akiyniypaq unu hinan karqan, anchatataqmi kallpachawaq ñawpaqllaman purinaypaq.

1967 watapin Betel wasiman invitawarqanku, chay tiempopiqa Boulogne-Billancourt llaqtapin tarikurqan. Departamento de Servicio nisqapin llank’arqani, chaypin 40 wataña llank’ashani. Astawanqa kusikuni Bibliamanta runakunaq tapukuyninkuta kutichispan. Gustawanmi Bibliata astawan t’aqwiriy chhaynapi ‘allin willakuykunata defendeypas’ (Fili. 1:7). Chaymantapas anchatan kusikuni t’aqwisun folletota sapa tutaymantan aparispa, 1976 watapitaq Francia nacionpi Sucursalmanta Encargakuqkunamanta huknin karqani.

Aswan allin kawsay

Kawsasqayku tiempopiqa sasachakuykunapiña tarikurqayku chaypas, aswan sasaqa kurakña kasqaykurayku manaña astawan Diospaq llank’ayta atisqaykun. Chaywanpas Bibliata kuska leesqayku estudiasqaykun yanapawanku Diospa promesanpi suyakushanallaykupaq. Anchatan kusikuyku predicacionman lloqsispapas, chaymanqa carropin riyku. 120 wata masñan iskayniykumanta tukuy tiempoykuwan llank’ashayku, chaymi hukkunatapas kallpachayku kay sumaq llank’aypi llank’anankupaq. Rey David hinan sientekuni, paymi nirqan: “Waynallan karqani, kunantaq machuyapuniña, manan hayk’aqpas rikurqanichu chanin runata Señor Diospa saqerparisqanta”, nispa (Sal. 37:25).

Tukuy kawsasqay tiempon Diospa Simin qelqata leeyqa anchata kallpachawarqan. 60 wata ñawpaqta familiaykunaq nisqanqa cheqaqmi karqan, Bibliataqa sapa p’unchaymi leerqani. Arí, manan hayk’aqpas chay ruwaytaqa saqerqanichu, manataqmi hayk’aqpas chaymantaqa pesapakusaqchu.

[Uranpi willakuykuna]

[5 paginapi foto]

Simonwan kashayku

[5 paginapi foto]

Iñiq t’aqakunata qhawariq kaqtiy

[5 paginapi foto]

Ñawpaqkaq Bibliata leesqay

[6 paginapi foto]

Casarakusqayku p’unchay

[6 paginapi foto]

Irènewan kuskan Bibliata leeyku estudiaykupas