Llakisqa ‘kaqkunata sonqochasun’

‘Señor Diosmi [...] kachamuwarqan llakisqa sonqoyoqkunata kusirichinaypaq.’ (ISA. 61:1, 2.)

1. ¿Imaynatan Jesús llakisqa tarikuqkunata yanaparqan, imaraykun chayta ruwarqan?

JESUSMI nirqan: “Mikhunayqa kachamuwaqniy Yayaq munayninta ruwaspa paypa ruwananta hunt’anaymi”, nispa (Juan 4:34). Chay ruwayta hunt’aspan Jesusqa Taytan hina sumaq kaqkunata rikuchirqan, astawanqa runakunata ancha munakusqanta (1 Juan 4:7-10). Jehová Diosqa consolawaspanchismi munakuyninta rikuchiwanchis. Chayraykun Pablo nirqan: ‘Tukuy imapi sonqochakuq Dios’, nispa (2 Cor. 1:3). Chhayna munakuynintan Jesuspas rikuchirqan Isaiaspa willasqan profeciaq nisqanman hina ruwaspa (leey Isaías 61:1, 2). Nazaret llaqtapi kaq sinagogapin chay profeciata leerqan, willarqantaqmi paypi hunt’akusqanta (Luc. 4:16-21). Payqa chaytapunin ruwarqan, kay pachapi llank’ashaspaqa munakuywanmi llakisqa tarikuqkunata sonqocharqan kallpacharqan ima.

2, 3. ¿Imaraykun cristianokuna runakunata Jesús hina consolananchis?

 ² Ñoqanchispas Jesuspa qatikuqninkuna hinan llakikuypi kashaqkunata kallpachananchis (1 Cor. 11:1). Pablon nirqan: “Hukkuna hukkunawan sonqochanakuychis kallpachanakuychis”, nispa (1 Tes. 5:11). Kay pachapi allin sonqoyoq runakunaqa necesitankun llakikuyninkupi kallpacharinanchista. Paykunaqa kay ‘sasa tiempokunapin’ atipananku allinnillankuta maskhaq runakunaq rimayninkuta ruwayninkutapas (2 Tim. 3:1).

³ Profeciakunaq willasqan hina, millay pachaq tukupunan p’unchaykunapiqa hunt’an kashan “paykuna kikinkuta munakuqkuna, qolqe sonqokuna, alabakuqkuna, hatunchakuqkuna, runamasinkuta k’amiqkuna, tayta-mamankuta mana kasuqkuna, mana reqsikuqkuna, Diosta mana manchakuqkuna, mana munakuyniyoqkuna, mana khuyapayakuqkuna, yanqa qasi tumpakuqkuna, aychankuq munaynillanta ruwaqkuna, millay yana alma runakuna, tukuy allinkaqta cheqnikuqkuna, amigonkunata hap’iykachiqkuna, waq’a hina ruwaqkuna, pay-payman tukuqkuna ima. Chay runakunaqa Dios munakunankutaqa aycha kusichiyllapin puriyta munan[ku]”. Chhayna kawsayqa astawanmi yapakushan, kaypi nisqanman hinataq: ‘Millay runakunapas q’otuq runakunapas aswan-aswanraq mana chanin-kayman chayanqaku’ (2 Tim. 3:2-4, 13).

4. ¿Imaynapin kay pacha tarikushan?

⁴ Chhayna kawsay kasqanqa manan admirakunapaqchu. Biblian willan ‘lliw kay pacha Saqraq munaychakusqan kasqanmanta’ (1 Juan 5:19). ‘Lliw kay pachapin’ tarikullantaq gobiernokuna, religionkuna, hatun negociokuna, chaykunamanta imaymana propagandakunapas. Chayraykun Satanasta sutichakun “kay pachapi kamachikuq”, hinallataq ‘kay pacha kamachiq dios’ nispa (Juan 14:30; 2 Cor. 4:4). ¿Imaraykun kay pacha aswan mana allinman tukushan? Saqran sinchi phiñasqa kashan pisillamanta manaña kamachiq kananta yachaspa (Apo. 12:12). Pisi tiempollamantan Dios manaña hinallatachu qhawanqa Satanasta kamachisqan millay pachatapas, chhaynapitaq imayna kamachisqanmanta iskayachiyta allichapunqa. ¡Chayraqchá thak sientekusun! (Gén., cap. 3; Job, cap. 2.)

Allin willakuykuna hinantinpi predicakushan

5. ¿Imaynatan kunan predicación aparikunanmanta profecía hunt’akushan?

⁵ Kay tiempopiqa Jesuspa willasqan huk profecian hunt’akushallantaq. Paymi nirqan: “Qhapaqsuyumanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa (Mat. 24:14). Pachantinpi llank’asqanchisqa astawanmi yapakushan. Kunanqa 7.500.000 más predicaqkunan 107.000 más iñiq t’aqakunapi kashanku, paykunan hinantinpi Jesuspa willasqan Gobiernonmanta yachachimushanku (Mat. 4:17). Chay ruwasqankuraykun  llakikuypi tarikuq runakunaqa sonqochayta tarinku. Chaytan rikuchin qayna iskay watakunallapi 570.601 runakuna Jehová Diospa testigon hina bautizakusqanku.

6. ¿Imaynatan qhawarinki predicación llank’ay yapakusqanta?

⁶ Chaymantapas, Diosmanta willasqanchis yapakusqantan rikuchin 500 más simikunapi Bibliamanta qelqakunaq t’ikrakusqan lloqsisqanpas. ¡Manan hayk’aqpas chhaynataqa ruwakurqanchu! Kay pachapi Diospa llaqtan mana chinkasqan, llank’ayninku astawan yapakusqanpas anchata admirakunapaqmi. Chayqa manan atikunmanchu karqan santo espirituq mana yanapayninwanqa, kay pacha Saqraq munaychakusqan kasqanrayku. Allin willakuykuna hinantinpi predicakusqanraykun askha runakuna Reinomanta willakuyta uyarikushanku, hinaspa Diosta serviqkuna hina sonqochayta tarishanku.

Iñiqmasinchiskunata sonqochasun

7. a) ¿Imaraykun huk cristiano mana suyananchu imapas ñak’arichisqanta ratolla Dios chinkachinanta? b) ¿Imaynapin yachanchis qatiykachaykunata llakikunatapas aguantay atisqanchista?

⁷ Kay tiempopiqa kanqapunin imapas llakichiwaqninchis, kay millay pachapiqa nishun kashan llakikuykuna millay kawsaypas. Chaykunata Dios chinkachinankamaqa kashallanqan llakikuykuna. Chaymantapas, qatiykachaykunatan atipananchis, chaytaqa Diospaq hunt’aq sonqo kanapaq oportunidadta hinan qhawarina, apoyananchistaq paylla kamachikunanpaq derechoyoq kasqanta (2 Tim. 3:12). Diospa yanapayninwan sonqochayninwan iman ñawpaqpi Tesalónica llaqtamanta cristianokuna hina kasun, paykunaqa allin ejemplon karqanku ‘tukuy qatiykachaykunata sinchi llakikunatapas ancha pacienciawan iñiywan muchusqankurayku’ (leey 2 Tesalonicenses 1:3-5).

8. ¿Ima ejemplokunan rikuchin serviqninkunata Dios consolasqanta?

⁸ Jehová Diosqa kallpachanpunin serviqninkunata. Eliasmanta rimasun. Millay warmi Jezabel payta wañuchinanpaq willachiqtinmi sinchita mancharikurqan, chaymi ayqekurqan wañupuyllatañataq munarqan. Diosqa manan phiñakurqanchu aswanpas munakuywanmi consolarqan, kallpacharqantaq llank’ayninta hunt’ananpaq (1 Rey. 19:1-21). Diosqa consolanpunin llaqtanta, chaytan rikuchin qallariy siglopi cristianokunaq kawsasqan. Biblian nin: “[Iñiq t’aqakunan] samarirqanku qatiykachasqa kaymanta tukuy Judea provinciantinpi, Galilea provinciantinpi, Samaria provinciantinpi ima. Santo Espirituq kallpachasqan kaspataq iñiyninkupi wiñaspa askhayarqanku, ahinapin Señor Diosta manchakuspanku kawsarqanku”, nispa (Hech. 9:31). Ancha kusikunapaqmi ñoqanchispas paykuna hina ‘santo espirituq kallpachasqan’ kasqanchisqa.

9. ¿Imaraykun Jesuspa ejemplonmanta yachasqanchis kallpachawanchis?

⁹ Jesusmanta yachaspa yupinta qatikuymi cristianokunataqa kallpachawallanchistaq. Jesusmi nirqan: “Ñoqaman hamuychis llapa sayk’usqakuna q’episapakuna, ñoqan samachisqaykichis. Yugoyman k’umuykukuychis, hinaspa ñoqamanta yachaqakuychis llamp’ulla, huch’uyyaykukuq sonqoyoq kasqayta, chaymi qankunaqa samakuyta tarinkichis. Yugoyqa ch’usallan, q’epiypas manan llasachu”, nispa (Mat. 11:28-30). Yachasqanchis hina, Cristoqa kallpachananpaq hinan munakuywan runakunata trataq. Chaymi ejemplonmanta yachaspa, pay hina kanapaq kallpachakuqtinchisqa kallpata hap’isun, hinaspa kawsayninchispi imaymana ruwaykunamanta thak sientekusun.

10, 11. ¿Pikunan iñiq t’aqapi llakisqa kaqkunata sonqochankuman?

¹⁰ Diospa llaqtanpipas tarillanchistaqmi sonqochayta. Umallikunan astawanqa sasachakuypi tarikuq cristianokunata yanapanku. Santiagon nirqan: “¿Pipas qankuna ukhupi onqosqachu kashan? [...] umalli runakunata waqyachikamuchun, paypaq Diosmanta mañapunankupaq”, nispa. ¿Imapin chay ruwasqanku tukunqa? “Iñiywan Diosmanta mañakuyqa onqosqatan qhaliyachinqa, hinan Señorqa payta sayarichinqa, huchallikunmanña  karqan chaypas pampachasqan kanqa.” (Sant. 5:14, 15.) Ichaqa llapanchismi hukkuna hukkunawan kallpachanakuytaqa atisunman.

¹¹ Wakin sasachakuykunamantaqa warmi puran parlariyta munanku. Allin iñiyniyoq experienciayoq kurak warmikunaqa allintan yanapankuman sipaskunata yuyaychaspa, paykunaqa yaqapaschá chay hina sasachakuykunapi tarikurqanku. Khuyapayakuywan, munakuywan sasachakuyninkupi interesakusqankuqa ancha allinmi (leey Tito 2:3-5). Ichaqa umallikunapas huk cristianokunapas iñiq t’aqapi llakisqa tarikuq ‘pisi kallpakunatan’ kallpachananku (1 Tes. 5:14, 15). Manan qonqananchischu Diosqa ‘tukuy llakikuyninchispi sonqochawasqanchista’, chaytaqa ruwan ‘ñoqanchispas ima llakipiña kaqkunatapas [...] sonqochananchispaqmi’ (2 Cor. 1:4).

12. ¿Imaraykun importante huñunakuykunaman riy?

¹² Huñunakuyninchiskunapi Bibliamanta yachasqanchisqa ancha importanten sonqochawananchispaq. Judaswan Silaswanmi “allin-allinta rimaykuspa iñiqkunata sonqochaspa kallpacharqanku” (Hech. 15:32). Chaymantapas huñunakuy manaraq qallarishaqtin hinallataq tukuqtinpas kallpachanakunchismi parlarispa. Chayrayku, sichus sasachakuykunapi tarikushanchis chayqa, manan iñiqmasinchiskunamanta karunchakunanchischu, chayta ruwaspaqa manan imatapas allichasunchu (Pro. 18:1). Aswanpas Pabloq yuyaychawasqanchista kasukusun, paymi nirqan: “Hukkuna hukkunawan kallpachanakusunchis aswanta munanakunanchispaq, allin ruwaykunatapas ruwananchispaq. Ama huñunakuyninchista saqesunchu, imaynan wakinkuna saqenku hinataqa, aswanpas astawanraq kallpachanakusun, Señorpa kutimunan p’unchay qayllaykamushasqanta yachashaspanchisqa”, nispa (Heb. 10:24, 25).

Diospa Simin Qelqa consolawanchis

13, 14. ¿Imaynatan Biblia kallpachawanchis?

¹³ Unayña bautizasqa kanchis otaq chayllaraq Jehová Diosmanta munayninmantapas yachashanchis chaypas, llapanchismi Bibliapi sonqochayta tarinchis. Chaytan Pablo nirqan: “Ñawpa tiempopi Qelqasqakunaqa yachaqananchispaqmi qelqasqa karqan, ahinapi chay Qelqakunaq takyachisqan sonqochasqan kaspa suyakuyniyoq kananchispaq”, nispa (Rom. 15:4). Bibliaqa kallpachanmi cristianota yanapantaqmi ‘allin yachachisqa kananpaq, tukuy allin kaqkunata ruwananpaqpas allin-allin wakichisqa’ kananpaq (2 Tim. 3:16, 17). ¡Anchatan consolawanchis Diospa munayninmanta yachay, hamuq tiempopaq sumaq suyakuyniyoq kaypas! Chhaynaqa, allinta estudiasun Bibliata, chaymanta willaq qelqakunatapas. Chayta ruwaspaqa sonqochaytan tarisun, imaymanapitaq allinninchispaq kanqa.

¹⁴ Jesusqa allin ejemplotan saqewarqanchis. Payqa Diospa Simin Qelqawanmi runakunata yachachirqan sonqocharqanpas. Kawsarimpusqan  qhepatan iskay qatikuqninkunaman rikhurispa ‘Diospa Simin Qelqaq nisqanta willarqan’, chaymi yachachikuyninwan paykunaq ‘sonqonku kawsarirqan’ (Luc. 24:32). Pabloqa allintan chay ruwaypi Cristoq yupinta qatikurqan. Payqa askha kutipin ‘Diospa Simin Qelqakunamanta [uyariqninkunawan] tapunakuspa rimarqan’, chhaynata yachachispan paykunata allinta yuyaymanachirqan. ¿Imapin chay ruwasqan tukurqan? Berea llaqtamanta runakunan “Diospa siminta tukuy sonqo chaskikurqanku, chaykunaqa hinapunichus kasqantataq Diospa Simin Qelqakunapi sapa p’unchay t’aqwirqanku” (Hech. 17:2, 10, 11). Arí, ancha allinmi sapa p’unchay Bibliata leeyqa. Chayta ruwaspa qelqakunatapas leespaqa, sonqochayta suyakuytawanmi kay sasa tiempokunapi tarisun.

Hukniraykunamantapas sonqochasunmanmi

15, 16. ¿Imaynatan iñiqmasinchiskunata consolasunman yanapasunmanpas?

¹⁵ Imaymanakunata ruwaspan iñiqmasinchiskunaq llakikuyninkuta pisiyachisunman. Yaqapaschá onqosqa otaq yuyaqña kashaq iñiqmasinchiskunapaq necesitasqankuta rantimpusunman. Chaymantapas wasipi ima ruwayninkupipas yanapanata necesitaq iñiqmasikunapipas interesakunanchismi (Fili. 2:4). Chaymantapas lliw iñiqmasinchiskunatan munakuyninkumanta, valorwan ruwasqankumanta, allin iñiyninkumanta otaq ima allin ruwasqankumantapas, “kusan” nisunman.

¹⁶ Kurak iñiqmasinchiskunata consolanapaqqa visitasunmanmi, hinaspa allinta uyarinanchis ñawpaqpi kawsayninkumanta willawaqtinchis, hinallataq imaynatas serviyninkupi Dios bendecirqan chaytapas. Chayta ruwayqa ñoqanchistapas kallpachawasunmi. Chaymantapas leepusunmanmi Bibliata otaq qelqanchiskunatapas. Allinmi kanman estudianapaq chay semanapi tupawasqanchis Qhawaq revistata otaq Biblia Estudianapaq Huñunakuypi estudiananchis qelqata t’aqwiriy. Hinaspapas kuskan qhawallasunmantaq Bibliamanta DVD nisqata, otaq leesunman willasunmanpas qelqakunamanta sumaq experienciakunata.

17, 18. ¿Imaraykun confiananchis Dios yanapawananchispi, sonqochawananchispipas?

¹⁷ Sichus reparasunman huk cristiano consolanata necesitasqanta chayqa, sapallanchis Diosmanta mañakuspan sutinmanta paypaq mañapusunman (Rom. 15:30; Col. 4:12). Hukkunata yanapanapaqña kallpachakunchis otaq ima sasachakuypipas tarikushanchis chaypas iñiywan mana iskayyaspa Salmista hinan chaykunata atipananchis, nirqanmi: “Señor Diosman llakipakuyniykikunata saqey, paymi qaqata sayachisunki, manan hayk’aqpas chanin runataqa urmachisqa kananta munanqachu”, nispa (Sal. 55:22). Diospaq hunt’aq sonqo kasun chayqa, ñoqanchiswanmi kashanqa yanapawananchispaq kallpachawananchispaqpas.

¹⁸ Ñawpaq tiempopin Jehová Dios serviqninkunata nirqan: “Ñoqapunin sonqochaqniykiqa kani”, nispa (Isa. 51:12). Kunanpas kallpachawanchismi, llakipi tarikuqkunata sonqochananpaq kallpachakusqanchistapas saminchanmi. Hanaq pachapaqña otaq kay pachapaqña suyakuyninchis chaypas, kallpachaytan tarinchis hanaq pachapaq akllasqamasinkunaman Pabloq nisqanta leespa, nirqanmi: “Kikin Señorninchis Jesucriston Dios Yayanchispiwan, munakuwaspanchis sumaqta qhawariwanchis, wiñaypaqmi sonqochawanchis, allin suyakuytapas qowanchis. Paypunin sonqoykichista kallpachasunkichis, hinallataq tukuy allin rimaypipas ruwaypipas allinta takyachisunkichis”, nispa (2 Tes. 2:16, 17).

¿Yuyashanchischu?

• ¿Hayk’a runatan sonqochashanchis kay tiempopi?

• ¿Imaynatan hukkunata consolasunman?

• ¿Ima textokunan rikuchiwanchis Dios sonqochawasqanchista?

[Tapuykuna]

[28 paginapi foto]

¿Sonqochanchischu llakipi tarikuqkunata?

[30 paginapi foto]

Wayna-sipaskunapas kurakkunapas kallpachasunmanmi hukkunata