‘Makilla kayqa’, ¡ancha importanten!

HUK kutinmi Jesusta discipulonkuna tapurqanku: “Kutimunaykiña kashaqtinqa kay tiempopas p’uchukapunanpaqña kashaqtinqa, ¿imakunatan rikusaqku?” nispa (Mat. 24:3). Mateo 24, Marcos 13, Lucas 21 capitulokunapin sut’ita willarqan ima señalkuna sucedenanmanta. Chaymantataq nirqan: “Makilla kashaychis”, nispa (Mat. 24:42).

Sut’itaq señalkuna karqan chayqa, ¿imaraykun willarqan makilla kanankupaq? Ñawpaqtaqa, yacharqanmi wakin cristianokuna kay kawsaypi afanasqa kaspa chay señalkuna mana reparanankuta, chhaynapitaq iñiyninkupi pisipaspa manaña makillachu kankuman. Iskaypi, yacharqanmi llaqtankupi chay señalkuna mana hunt’akuqtin mana cuentapaqpas churanankuta. Chhaynapi tarikuspaqa, yaqapaschá yuyaykunkuman ‘manchay ñak’ariy’ manaraq chayamunanpaq, chayraykutaq mana makillachu kankuman (Mat. 24:21).

Mana kasukurqankuchu

Discipulonkunawan Jesús rimaspaqa Diluvio kasqan tiempopi kawsaq runakunamantan rimasharqan. Yaqa llapankun mana kasukurqankuchu. Paykunaqa rikurqankun hatun arca ruwakusqanta, Noepa predicasqanta, sinchi maqanakuy millay kawsay kasqantapas, ichaqa chaywanpas manan kasukurqankuchu (Mat. 24:37-39). Kay tiempopi runakunapas manan ancha kasunkuchu ima willakuytapas chaskispaqa. Ejemplopaq, maypachachus choferkuna rikunku velocidadta pisiyachinankupaq señalkunata chayqa, yachankun imachus kasqanta. Ichaqa askhan mana kasukunkuchu. Chayraykun autoridadkuna callekunapi rompe muelle nisqakunata churachinku ama sinchita phawanankupaq. Chhaynallataqmi wakin cristianokunapas reparanku tukukuy p’unchaykunapi sucedesqan señalkunata, ichaqa huk ruwaykunaman haykuspan Dios serviyninkuta qonqanku. Chaymi sucederqan África occidental ladomanta Arielle sipasta.

Paymanqa warmikunapaq balonmano nisqapi pukllaymi nishuta gustarqan. Chaymi televisionpi chay pukllaykuna qhawayta manapuni pierdekuqchu. Huk p’unchaymi yacharqan escuelanmanta chayta pukllanankuta. Payqa anchatan munarqan chaypi pukllayta. Chaymi iñiyninpi ima sasachakuykunapas kananpi mana yuyaykuspa arcopi bola hap’iq kananpaq anotachikurqan. ¿Imaynan chay pukllaypi tarikurqan? Paymi nin: “Wakin compañeraykunaq parlaqmasinkuqa fumaqku drogakuqku iman. Hukniray kasqayrayku burlakuwasqankutan aguantanay karqan, ichaqa chaykuna mana imanawananpaqmi yuyaykurqani. Astawanqa Balonmano nisqapi pukllasqaymi iñiyniyta pisiyachiwarqan. Sinchitan chaypi yuyaykurqani, huñunakuypi kashaqtiypas yuyayniyqa pukllayllapin kasharqan. Chaymantapas hukniraymanmi cambiarqani, manan pukllayllatachu munarqani, aswanpas ganayllatañan, chaymi mana samarispa entrenarqani atipaq kanaypaq. Ichaqa sinchi sayk’usqan sientekurqani, hinaspapas wakin amigaykunan saqepuwarqanku.”

 “Imaynapi tarikushasqaytan astawanqa repararqani huk partidopi defrenteta arcoman bolata chanqamunankupaq ordenta qoqtinku. ¡Chay raton Diosmanta mañakurqani hap’inaypaq yanapawananta! Cuentatan qokurqani iñiyniypi chiriapushasqayta. ¿Imaynapin hukmanta Dioswan allinpi kapurqani?”

“Yuyarirqanin DVD Los jóvenes preguntan... ¿Qué haré con mi vida? * nisqata. Chaytaqa qhawarqaniñan, ichaqa hukmantan qhawayta munarqani, chay kutipiqa tukuy yuyaywanmi qhawarqani. Repararqanin peliculapi Andy wayna hina tarikushasqayta. Chaymi payman umalliq yuyaychasqanta ñoqapas ruwarqani, Filipenses 3:8 textota leespan chaypi yuyaymanarqani. Chayraqmi yuyayniyta hap’ikurqani, manaña chaypi pukllanaypaqtaq decidikurqani.”

“Chayta qhawaspan kawsayniyta cambiarqani. Manañan ganaypi yuyaykurqaniñachu, chaymi manaña sinchi sayk’usqachu sientekurqani. Hinaspapas aswan kusisqan sientekurqani iñiqmasiykunawantaqmi kasharqanipas. Espiritualpi ruwayniykunaqa aswan allinmi karqan. Huñunakuykunapiqa allintataq uyarirqani chayqa, kusikuytan tarirqani. Hinaspapas yaparqanin predicacionpi llank’ayniyta. Kunanqa sapa killan precursora auxiliar hina llank’ashani.”

Sichus Arielleta hina ima ruwaypas hark’awashachis Jesuspa willasqan señalkunata reparananchispaq chayqa, manan hinallachu kananchis. Chhaynaqa, ¿imatan ruwasunman? Índice de las publicaciones Watch Tower nisqa libropin maskhasunman imaymana yachachikuykunata. Chay libroqa “askha qorita tarinapaq pusawaqninchis mapa hinan”. Chaypiqa allin yuyaychaykunata, imaynatas huk cristianokuna atiparqanku chhayna tentacionkunapi tarikuspa chaykunamantan yachasunchis. Chaymantapas ancha importanten huñunakuykunaman riy, allinta preparakuy, uyarisqanchista qelqaypas. Yachachikusqanta allinta uyarinapaqqa ñawpaqpin tiyananchis. Tapuywan kutichiywan estudiakuqtinpas ancha allinmi kanman qallariy parrafokunamantapacha kutichiy. Chaymantapas iñiyninchispi makilla kanapaqqa noticiakunatan leenanchis, uyarinanchispas. Chhaynapin allinta reparasunchis Jesuspa willasqan señalkuna kay ‘tukukuy qaylla p’unchaykunapi’ hunt’akushasqanta (2 Tim. 3:1-5; 2 Ped. 3:3, 4; Apo. 6:1-8).

“Makilla kashaychis”

Tukukuy p’unchaykunapi sucedenan señalkunaqa ‘pachantinpin’ rikukushan (Mat. 24:7, 14). Yachasqanchis hina, millonninpi runakunan ñak’arinku onqoykunawan, yarqaykunawan, terremotokunawan otaq Bibliaq willasqan huk llakikuykunawanpas. Ichaqa askha runan wakin llaqtakunapi mana chhaynapichu tarikunku, aswanpas mana nishuta llakikuspallan kawsanku. ¿Chhaynatachu ñoqanchispas kawsashanchis? Chhayna kaqtinqa, manan piensananchischu manchay ñak’ariy chayamunanpaq nishu tiemporaq faltananta.

Jesusqa willarqanmi “yarqaykuna, onqoykuna” kananmanta (Luc. 21:11). Chaypiqa manan nirqanchu pachantin lliw llaqtakunapi chay llakikuna kaqkamalla sucedenanta. Aswanpas “kayneqpi chayneqpi” sucedenanmantan rimarqan. Chayraykun mana yuyaykunachu señalta willaq profeciakuna Hallp’antinpi kaqlla hunt’akunanta. Chaymantapas, Jesusqa willallarqantaqmi yarqaykuna kasqan tiempopi wakin qatikuqninkuna nishu mikhuq kanankumanta,  nirqanmi: “Qankuna kikiykichista qhawakuychis, paqtataq sonqoykichis musphachisqa kanman sajsapakuywan”, nispa (Luc. 21:34, Mosoq Rimanakuy). Chayraykun mana suyananchischu kikinchistapuni lliw señalkunaq sucedesqan afectawananchista. Yuyarinanchismi Jesuspa kay nisqanta: “Kaykuna hunt’akusqanta rikuspaykichisqa Diospa qhapaqsuyun qayllaykamushasqanta yachankichis” (Luc. 21:31). Llaqtanchispiqa manaña profeciaq willasqan llapan señalkunachu hunt’akushan chaypas, radiopi televisionpi otaq Internetpi chaykunaq sucedesqanta yachaspaqa, ñawinchiswanpunin rikushanchis.

Hinaspapas, kaytan mana qonqanachu: Diosqa yachanñan hayk’aq ima ratopi manchay ñak’ariy qallarinanta. Chhaynaqa, imaña kay pachapi sucedenqa chaypas, manan cambianqachu ‘chay p’unchayta chay horatawanqa’ (Mat. 24:36).

Jesusmi qatikuqninkunata nirqan: “Makilla kashaychis”, nispa (Mat. 24:44). Arí, ancha importanten listopuni kashayqa. Ichaqa chaywanqa manan nishanchischu tutantin p’unchaynintin espiritual ruwaykunallapiña kashananchista. Manataq yachanchischu ima ratopi manchay ñak’ariy qallarinanta chayqa, yaqapaschá llank’ashaqta, campopi, wasipi otaq maypipas hap’iwasun (Mat. 24:40, 41). Chhaynaqa, ¿imatan ruwasunman imaña kaqtinpas preparasqa kashanapaq?

Emmanuel, Victorine iñiqmasinchiskunamanta yachasun. Paykunaqa soqta ususinkunawanmi África lado llaqtapi tiyanku, tiyasqankupiqa manan ancha tukukuy p’unchaykunapi hunt’akuq señalkunamanta sinchi sasachakuykunata rikunkuchu. ¿Imatan ruwanku preparasqa listo kashanankupaq? Sapa p’unchaymi espiritual yachachikuykunata t’aqwirinku. Emmanuel willan imakuna ruwasqankuta: “Qallariypiqa manan ima hora huñunakuyta atirqaykuchu, chaymantan ichaqa decidirqayku las seis tutamantanmanta hasta seis y media horaskama huñunakunaykuta. Ñawpaqtaqa T’aqwisun folletotan estudiayku, chaymantataq iñiq t’aqapi chay semana estudianapaq qelqakunata”, nispa. Chhaynaqa, chay ruwaymi paykunata yanapan rikch’asqalla kashanankupaq. Emmanuel iñiqmasinchisqa umallikunaq llank’ayninpi yanapaq umallin. Esposan Victorineqa llank’allanpunin precursora auxiliar hina, ahinapin askha runakunata yanaparqan, llapa ususinkunataq iñiyninkupi ñawparishanku.

Jesusmi niwarqanchis: “Cuidakuychis, makilla kashaychis”, nispa (Mar. 13:33). Chhaynaqa, amapuni ima ruwaywanpas rikch’asqa kasqanchistaqa hark’achikusunchu. Arielli hina kasukusun qelqakunapi, hinallataq huñunakuykunapi yachasqanchis yuyaychaykunata. Chaymantapas Emmanuel hina sapa p’unchay espiritual ruwaykunapi kasun, chaykunan yanapawasun makilla listo kashananchispaq.

[Uranpi willakuy]

[4 paginapi foto]

Emmanuelwan familianwanqa liston kashanku qelqakunata sapa p’unchay t’aqwispa