Solterokunapaq casarakuqkunapaqwan yuyaychaykuna
Solterokunapaq casarakuqkunapaqwan yuyaychaykuna
“Chaykunataqa qankunaq [...] allin chanin-kayman hina kawsanaykichispaqmi, ahinapi mana imaq hark’asqallan Señorta servinaykichispaq.” (1 COR. 7:35.)
1, 2. ¿Imaraykun soltero kaymanta casarakuymantawan Bibliaq yuyaychasqanta t’aqwinanchis?
ANCHA kusikunapaqmi warmikunawan qharikunawan sumaqta kawsayqa, mayninpin ichaqa llakikunapaq kanman. Cristianokunaqa Diospa yanapaynintan maskhanku allin yuyaywan warmita otaq qharitapas tratanankupaq. Ichaqa manan chay raykullachu hanaq pacha Taytankuq yanapayninta maskhanku. Kusisqaña solterokuna kawsanku chaypas, mayninpin sientekunku casarakunankupaq familiankuq mat’ipayasqan. Wakintaq casarakuyta munanku, ichaqa manan tarinkuchu paykunapaq hina qharita otaq warmita. Parlaqmasintin kaqkunapas yanapaytan necesitanku casarakuspa ruwayninkuta hunt’anankupaq. Chhaynaqa casadoña kanchis otaq manaña chaypas, llapanchismi kallpachakunanchis qhelli kawsayman ama urmanapaq.
2 Casarakunapaq, solterolla kanapaq decidisqanchisqa kusisqa kawsanapaqmi kanan, astawanqa Dioswan allinpi kananchispaq. Chayraykun allinta t’aqwinanchis soltero kaymanta casarakuymantapas Pabloq yuyaychay qosqanta, chayqa tarikun Corinto llaqtaman ñawpaq kaq carta apachisqan 7 capitulopin. Chaytaqa qelqarqan ‘allin chanin-kayman hina kawsananchispaqmi’, ‘mana imaq hark’asqallan Señorta servinanchispaq’ ima (1 Cor. 7:35). Casarasqaña otaq solteroña kanchis chaypas, chay yuyaychaymanta yachaspa yuyaymanasun Diosta astawan servinanchispaq.
Sapankan allinta decidina
3, 4. a) ¿Iman pasanman pipas amigon otaq familian solterolla qhepakushasqanmanta sinchita llakipakuqtin? b) ¿Imaynatan Pabloq yuyaychasqan yanapawanchis casarakuyta allin yuyaywan qhawarinapaq?
3 Qallariy siglopi judío runakuna ukhupiqa casarakuyqa allin qhawarisqan karqan. Chhaynallataqmi kay tiempopi askha llaqtakunapipas. Pipas solterolla qhepakushan chayqa, familiankuna amigonkuna iman paymanta llakipakuspa imaymanata yuyaychankuman casarakunankupaq. Rimapayankumanmi piwanpas casarakunanpaq kallpachakunan kasqanta, otaq ninkuman: “Paywan casarakuy”, “paymi allin kanman”, nispa. Hinaspapas, yaqapaschá imatapas ruwankuman piwanpas reqsinachinankupaq. Ichaqa chaykuna ruwayqa mana allinpin tukunman, yaqapaschá sientechinakuy kanman, manaña amigontinchu kapunkuman, sonqonkupas k’irisqa kanman.
4 Pabloqa manan pitapas mat’ipayarqanchu casarakunanpaq otaq mana casarakunankupaqpas (1 Cor. 7:7). Payqa kusisqaña Diosta servirqan mana esposayoq kaspa chaypas, pipas casarakuyta munaqtinqa manan hark’arqanchu. Casarakunapaq otaq solterolla kanapaqpas, sapankan chaytaqa decidina mana piqpa mat’ipayasqallan.
Soltero kasqaykita allinta aprovechay
5, 6. ¿Imaraykun Pablo kallpacharqan solterolla kanapaq?
5 Corinto llaqtapi iñiq t’aqaman cartata apachisqanpin, Pablo willarqan Dios servinapaq soltero kay imaymanapi allin kasqanta (leey 1 Corintios 7:8). Manaña casadochu karqan chaypas, manan pantasqa religionpi mana casarakuq umallikuna hinachu aswan allinpaq qhawarikurqan. Aswanpas willarqanmi solterokuna aswan allinta Diosta serviy atisqankuta, ¿imaynapi?
6 Mayninpiqa Diospa llaqtanpin llank’aykunata chaskinku, chaykunataqa manapaschá hunt’ankumanchu casado kaspaqa. Pabloqa ‘mana judío runakunaman’ predicananpaq apostolmi karqan (Rom. 11:13). Hechos libropi 13-20 capitulokunata leespan yachanchis karu llaqtakunata misionerokunawan predicaq risqanmanta, mana hayk’aq predicakusqan llaqtakunata chayasqanmanta, askha llaqtakunapi iñiq t’aqakunata hatarichisqanmantapas. Chaymantapas, Dios serviyninpiqa mana hayk’aq tarikusqanchis sasachakuykunatan atiparqan (2 Cor. 11:23-27, 32, 33). Anchatan kusikuq runakunaman Diosmanta yachachispa, chaymi imaymana sasachakuykunapiña tarikuspapas mana pisiparqanchu (1 Tes. 1:2-7, 9; 2:19). ¿Esposayoq wawakunayoq kaspa chaykunata ruwayta atinmanchu karqan? Yaqapaschá mana.
7. ¿Imaynatan iskay soltera precursorakuna tiemponkuta aprovechanku?
7 Askha soltero cristianokunan kallpachakushanku astawan Diospa Gobiernonmanta predicanankupaq. Chaytan ruwashanku Bolivia nacionmanta Sarawan Limbaniawan precursorakuna, paykunaqa askha watakuna manaña predicakusqan huch’uy llaqtachamanmi rirqanku. Chay llaqtachapi manaña electricidad kanchu chaypas, paykunapaqqa manas sasachakuychu, ninkun: “Manataq radiopas, televisionpas kanchu chayqa, runakunaqa samarisqanku tiempopin librokunata leenku”, nispa. Wakin runakunan askha manaña lloqsimuq qelqanchiskunata rikuchisqaku, chay qelqakunatas paykunaqa leeshankuraq. Chay iskay cristianakunaqa yaqa llapan wasikunapin Diosmanta yachay munaqkunata tarinku, chaymi ñak’ayta llaqtantin predicayta tukunku. Huk kutinsi huk yuyaq señora nisqa: “Jehová Diospa testigonkuna kay llaqtakama chayamunku chayqa, ¡kay pacha tukupunanpaqqa pisillañan kashan!”, nispa. Chay solterakuna kallpachakusqankuraykun askha runakuna huñunakuykunaman hamuyta qallarirqanku.
8, 9. a) Soltero kay allin kasqanmanta rimaspa, ¿imapin Pablo yuyaykusharqan? b) ¿Imakunatan ruwankuman mana casado cristianokuna?
8 Casado cristianokunaqa kusatan llank’anku sasa predicana territoriokunapi. Ichaqa soltero precursorkunapas atinkumanmi ima asignacionpipas llank’ayta, chayta ruwayqa yaqapaschá sinchi sasa kanman casadokunapaq otaq tayta-mamakunapaq. Diosta servispa soltero kay allinpuni kasqanmanta rimaspaqa, Pabloqa yuyaykusharqanmi Diospa llaqtanpi askha llank’aykuna kasqanta. Pabloqa munarqanmi pay hina kusisqa servinankuta.
9 Estados Unidosmanta huk soltera precursoran nin: “Wakinqa piensanku kusisqa kanapaq casarakuna kasqantan, ichaqa repararqanin kusisiqa kawsanapaqqa mana chaymantachu kasqanta, aswanpas Dioswan amistadninchismanta kasqanta. Anchatan kallpachakuna, ichaqa allinta aprovechaqtinchisqa huk sumaq regalon. Llakichiwananchismantaqa soltero kayqa kusichiwanchismi. Jehová Diosqa llapanchistan munakuwanchis casadoña kanchis otaq manaña chaypas”, nispa. Kay iñiqmasinchismi kunan llank’ashan maypichus predicaqkunata astawan necesitakushan chaypi. Manaraq casarakuqkunaqa kaytan tapukunanku: “¿Sapallay kasqayta aprovechaymanchu astawan predicanaypaq?”, nispa. Paykunaqa reparankumanmi soltero kasqanku ancha valorniyoq Diospa sumaq regalon kasqanta.
Casarakuyta munaq solterokuna
10, 11. ¿Imaynatan Jehová yanapan casarakunankupaq manaraq allin iñiqmasita tariq cristianokunata?
10 Huk tiempo solterolla qhepakuspan askha cristianokuna casarakuypi yuyaykunku. Paykunaqa yachankun Jehová Diospa yanapaynin necesitasqankuta, chaymi yanapayninta mañakunku allin iñiqmasita tarinankupaq (leey 1 Corintios 7:36).
11 Wakin cristianokunaqa Diosta tukuy sonqowan serviq iñiqmasitan reqsiyta munanku. ¿Chhaynapichu qanpas tarikushanki? Chhaynaqa, oracionpi Diosmanta mañakushallay (Fili. 4:6, 7). Unay tiempoña suyashanki chaypas, ama pisikallpayaychu. Diosqa yachanmi imaynapi tarikusqaykita, chaymi kallpachasunki chay llakikuyniykipi (Heb. 13:6).
12. ¿Imaraykun allinta yuyaykuna pipas casarakunapaq niwaqtinchis?
12 Wakin casarakuyta munaq cristianokunawanqa, iñiyninkupi mana allin kashaq otaq mana Testigochu kaq runakunan casarakuyta munarqanku. Sinchi sasaña kanman sapallanku sientekusqanku chaypas, yuyarinankun mana allinta akllaqtinkuqa aswan llakipi otaq ñak’ariypi tarikunankuta. Hinaspapas allinpaqpas mana allinpaqpas, sichus ninqaku “arí, munanin” nispa chayqa, nisqañan kanqa, chaytataq hunt’ananku kanqa (1 Cor. 7:27). Chhaynaqa amapuni hayk’aqpas usqhayllaqa decidisunchu. Yaqapaschá pantarusunman, hinaspa chaymanta tukuy kawsasqanchis tiempo pesapakusunman (leey 1 Corintios 7:39).
¿Imaynatan preparakuna casarakunapaq?
13-15. ¿Ima sasachakuykunamantan manaraq casarakushaspa rimananku?
13 Yachasqanchis hina, Pabloqa rimarqanmi soltero kay allin kasqanta, ichaqa manan pisicharqanchu casarakunankupaq decidikuqkunata. Aswanpas santo espirituq yanapasqanmi casarasqakuna sasachakuykunata atipanankupaq, huk nisqalla kawsanankupaqwan yanapaykunata qelqarqan.
14 Parlaqmasikunaqa allintan qhawarinanku casado kawsay imayna kasqanta. Paykunaqa yuyaykunkumanpaschá sumaqta munanakusqankurayku casarakuspa mana ima sasachakuypi tarikunankuta. Cuentokunapi hina kawsaypi yuyaykuspan casarakunku, mana imamanta llakikuspa tukuy tiempo kusisqalla kawsanankupaq. Ichaqa allin yuyaywan qhawarispan entiendenanku casado kawsayninkupi sasachakuykuna kananta, mosqoypi hina munanakuspa kawsasqankuqa manan yanapanqachu sasachakuykunata allichanankupaq (leey 1 Corintios 7:28). *
15 Askha chayllaraq casarasqakunan cuentata qokunku importante asuntokunapi mana lliwpichu tupachisqankuta otaq pesapakunkuraq. Manapaschá kaqllatachu yuyaykunku qolqemanta, imakunapi kusirikuymanta, maypi kawsanankumanta, familiankumantapas rimaspa. Yaqapaschá manaraq casarakushaqtinku, ima ruwasqankutapas pantasqankutapas “manan imananpaschu” niqku, kunantaq ichaqa chaykunata qhawarispa phiñakunku hinaspa mana allinta kawsanku. Chayraykun manaraq casarakushaspa chaykunamantaqa rimananku.
16. ¿Imaraykun casadokuna rimanakunanku sasachakuyninkuta allichanankupaq?
16 Casado kawsaypi kusisqa kawsanapaqqa iskayninkumantan sasachakuykuna kaqtin allichananku. Parlanankun imaynata wawankuta educanankumanta kurak tayta-mamankuta atiendenankumanta ima, ichaqa manan dejanankuchu familiata qhawarisqanku t’aqanachinanta. Sichus Bibliaq nisqaman hina ruwanqaku chayqa, allichanqakun sasachakuykunata, chhaynapitaq huk nisqalla kusisqa kawsanqaku (1 Cor. 7:10, 11).
17. ¿Ima ‘kay pacha kaqkunapin’ casadokuna llakikunku?
17 Pablon rimallantaq casadokunaq huk llakikuyninkumanta (leey 1 Corintios 7:32-34). Willanmi casarasqakunaqa ‘kay pacha kaqkunapi yuyaykusqankuta’, chaykunaqa mikhunamanta, p’achamanta, wasimanta, hukkunamantapas llakikuykunan. ¿Imaraykun chaykunamanta llakikunku? Qosaqa esposantan cuidanan, kusichinantaq kanpas. Ñawpaqpiqa astawanmi Diosta servirqan, casarakusqan qhepamanmi ichaqa tiempontapas kallpantapas esposanpaq t’aqanan. Kaqllatataqmi esposapas ruwanan. Taytanchis chaykunata yachasqanqa, ¡ancha kusikunapaqmi! Diosqa yachanmi casadokuna astawan hukllachakunankuta, chaypaqqa tiempota kallpatan necesitakun, chaykunatan ñawpaqqa Dios serviyninkupi utilizaqku.
18. ¿Ima cambiokunatan ruwananku casarakusqanku qhepaman?
18 Apóstol Pabloq nisqanmantaqa kaytawanmi yachasunman. Casarasqakunaqa Diosta servinankumantataq tiempota horqonku qosankupaq otaq esposankupaq chayqa, chay hinatan ruwananku amigonkuwan kusirikunankupaq t’aqasqanku tiempowanpas. Sichus huk qosa soltero kashaspa hina, sapa kutilla amigonkunawan pukllaq rinman chayri, ¿imaynan esposa sientekunman? ¿Imayna qosapas sientekunman esposan amigankunawan pasakuqtin? Yaqapaschá qosanpa otaq esposanpa munakuyninmanta iskayanman, wikch’urparisqa llakisqataq sientekunmanpas. Ichaqa sapankanku kallpachakunqaku huk hinalla kawsanankupaq chayqa, manan chhayna sasachakuykunapi tarikunqakuchu (Efe. 5:31).
Diosmi ch’uya kawsananchista munan
19, 20. a) ¿Imaraykun casarakuy mana pakaykuwanchischu qhelli huchamanta? b) ¿Imamanmi urmankuman unayta t’aqanasqa kawsaq casarasqakuna?
19 Diosta serviqkunaqa yachanchismi qhelli huchamanta karunchakunanchis kasqanta. Wakinqa chaykunaman mana urmanankupaqmi casarakunku. Ichaqa manan casarakuychu chaykunamantaqa pakaykuwasunchis. Ñawpaq tiempopi llaqtakunaq muyuriqninpi perqaqa, chay ukhupi kaqkunallatan pakaykuq. Hawapi tarikuqtinkuqa faciltan suwachikuqku otaq wañuchisqa kaqku. Chay hinallataqmi, casarakuyta paqarichiq Diospas huk perqata hinan kamachikuyta churan casarasqakuna qhelli huchamanta pakaykusqa kanankupaq.
20 ¿Mayqenmi chay kamachikuy? Pablon willarqan 1 Corintios 7:2-5 textopi. Esposaqa qosallanwanmi warmi qhari puñuypi kanan, kaqllataqmi qosapas. Bibliaq nisqan hina ‘qosaqa esposanpaqmi qosa kasqanta hunt’anan, hinallataq esposapas qosanpaq hunt’anan’. Ichaqa llakikunapaqmi casarasqakuna chayta mana hunt’asqankuqa, yaqapaschá llank’asqankurayku otaq maytapas viajaspa unayta t’aqanakunku. May llakikunapaqmi kanman ‘cuerponkuta mana sujetasqankurayku’ wasanchay huchaman Saqra urmachiqtinqa. Casado kawsayninkuta allinta cuidaspa familiankuta allinta uywaq qosakunataqa Jehová Diosmi saminchanqa (Sal. 37:25).
Bibliapi yuyaychaykunaqa allinninchispaqmi
21. a) ¿Imaraykun sasa solterolla kanapaq otaq casarakunapaqpas decidiy? b) ¿Imapin yanapawanchis 1 Corintios 7 capítulo?
21 Solterolla kanapaq otaq casarakunapaqpas decidiyqa manan facilchu. Llapanchispas pantaqmi kanchis, chay hawan astawanqa runakuna ukhupi sasachakuykuna kan. Chayraykun solterokunapas casadokunapas Diospa allin qhawarisqanña kanchis chaypas, mayninpi runamasinchiskunawan phiñachinakusunman. Chaywanpas, 1 Corintios 7 capitulopi nisqanta kasukuq cristianoqa imaymana sasachakuykunamantan karunchakunqa, astawanqa Diospaqmi ‘allinta ruwanqa’ solteroña otaq casadoña kaspapas (leey 1 Corintios 7:37, 38). Yachasqanchis hina, Dioswan allinpi kaymi aswan allinqa. Chaypaq kallpachakusunchis chayqa, lliw runan mosoq pachapi sumaqta kawsakusun, kay pachaq mana mat’ipayasqallan.
[Uranpi willakuy]
¿Kutichiwaqchu?
• ¿Imaraykun mana pitapas mat’ipayanachu casarakunanpaq?
• ¿Imatan soltero cristiano ruwanan tiemponta ama usuchinanpaq?
• ¿Imaynatan parlaqmasintin kaqkuna preparakunkuman casado kawsaypaq?
• ¿Imaraykun casarakuy mana qhelli huchamanta pakaykunchu?
[Tapuykuna]
[14 paginapi fotokuna]
Solterokunaqa Diosta astawan servispan aswan kusisqa kanku
[16 paginapi foto]
¿Ima cambiokunatan ruwananku casarakusqanku qhepaman?
