“Onqosqan kashani, ichaqa ¡manan wiñaypaqchu!”

Khaynatan willakun Sara van der Monde

Runakunan niwanku: “Sara, misk’itan asikunki. ¿Imaraykun kusisqallapuni kanki?”, nispa. Ñoqaqa willanin sumaq suyakuyniyoq kasqayta. Chaymi khaynata nini: “Onqosqan kashani, ichaqa ¡manan wiñaypaqchu! nispa.

PARÍS (Francia) llaqtapin nacerqani, 1974 watapi. Mamayqa sasatan onqokuwasqa, chay qhepamantaq parálisis cerebral nisqa onqoyniyoq kasqayta tariwasqaku. Sasatan makiykunatapas chakiykunatapas kuyuchisqani, rimasqaypas manas entiendekuqchu. Chaymantapas ataque onqoymi hap’iwasqa, huk onqoykunapas ratollas hap’iwaq.

Iskay wataypi kashaqtiymi Australia nacionpi tarikuq Melbourne llaqtaman ripusqayku. Iskay wata qhepamantaq taytay saqepuwarqanku mamaytawan. Chhaynapi tarikuspaymi Diosman astawan asuykurqani. Mamayqa Testigon karqan, huñunakuykunamanpas pusawaqmi, chaypin yacharqani Dios munakuwasqanta, ñoqapi interesakusqantapas. Chaykunata reparasqay, mamaypa munakuwasqan kallpachawasqan iman yanapawarqan ama nishuta llakikunaypaq.

Mamayqa yachachiwallarqantaqmi Diosmanta mañakuyta. Chay ruwayqa manan rimay hina sasachu, yuyayllaypin mañakuni chaymi mana kallpachakunaychu rimanaypaq. Anchatan kusikuni Dios entiendewasqanmanta yuyayllaypiña otaq k’aku-k’akuta rimaspaña mañakuni chaypas (Sal. 65:2).

Sasachakuyniykuna

Phisqa wataypi kashaytiymi parálisis onqoyniy astawan yapakurqan, chaymi purinaypaq yanapawaq aparatota necesitarqani. Chaywanpas manan allintachu purirqani. 11 wataypiqa manan purirqaniñachu. Chaymi camaymanta hatarinaypaq grúa nisqa maquinata necesitarqani motorniyoq sillayman tiyachiwananpaq.

Mayninpiqa llakikunin. Ichaqa yuyarinin familiaypi kay niwasqankuta: “Ama llakikuychu mana ruway atisqaykimanta. Atisqallaykita ruway”. Chhaynata yuyaykuspaymi atirqani caballopi sillaykuyta, botepi riyta, paseoman riyta, ch’in partekunapi carro manejaytapas. Imakunachus ruway atisqaytan rikuchini pintaspa, siraspa, bordaspa, colchakunata ruwaspa, t’uruwan imaymanakunata ruwaspa ima.

Chhayna onqosqa kasqayraykun wakin runakuna niwarqanku ñoqallamanta decidikuspay mana Dios serviy atisqayta. 18 wataypi kashaqtiymi profesoray niwarqan wasiymanta ripunaypaq, mamaypa religionninta saqenaypaqpas. Yanapawaytan munarqan huk ladopi tiyanaypaq. Ñoqan ichaqa nirqani iñiyniyta mana hayk’aqpas saqenayta, kikiymanta imatapas ruwayta atispallay wasiymanta ripunaytapas.

 Profesoraywan chay rimasqayku qhepallamanmi bautizakurqani Jehová Diospa testigon kanaypaq. Iskay wata qhepamantaq huk wasiman tiyaq ripurqani, chaypiqa thakmi kani, atikusqanman hinan sapallay imatapas ruwani.

Casarakunaypaq qonqayllamanta niwan

Watakunaq pasasqanmanqa sasachakuypin iñiyniypi tarikurqani. Huk kutinmi ñoqa hina onqosqa compañeroy niwarqan paywan casarakunaypaq, manan ima niyta atirqanichu. Kusikurqanin chayta niwasqanwan, ñoqapas askha sipaskuna hinan casarakuyta munani. Ichaqa manan kusisqachu kayman chhayna onqoyniyoqkama casarakuspaykuqa. Chaymantapas huk religionniyoqmi karqan, imachus iñisqaykupas, ruway munasqaykupas manan kaqllachu karqan. Chhaynaqa, ¿imaynatan kuska kawsayta atiykuman? Ñoqaqa kasukuytan munarqani iñiqmasillawan casarakunapaq Diospa kamachisqanta (1 Cor. 7:39). Chaymi sumaqllata kutichirqani paywan mana casarakuy munasqayta.

Manan pesapakunichu chay decidisqaymanta. Diospa prometesqan paraisopiqa kusisqan kawsasaq, chaymantaqa manan iskayyanichu (Sal. 145:16; 2 Ped. 3:13). Chay p’unchay chayamunankamaqa hunt’aq sonqon Diospaq kasaq, kusisqataq imaynapi tarikusqaywan kawsasaq.

May kusisqan suyakushani sillaymanta sayarispa, taruka hina phawanaypaq p’unchay chayamunanta. Hinaspan nisaq: “Onqosqan karqani, ichaqa allinñan kashani, ¡wiñaypaqmi qhalilla kasaq! nispa.