Qharikunata yanapasun espiritualpi ñawparinankupaq

“Kunanmantaqa runakunata challwaqmi kanki.” (LUC. 5:10.)

1, 2. a) ¿Imaynatan askha qharikuna qhawarirqanku Jesuspa predicasqanta? b) ¿Imamantan kay estudiopi yachasun?

GALILEA llaqtapi predicaspankun Jesusqa qatikuqninkunawan botepi ch’inneq cheqasman rirqanku. Runakunan ichaqa qhepanta qatirqanku. Paykunamantan “phisqa waranqa qharikuna karqan, warmikunawan wawakunawanqa manan yupasqachu karqan” (Mat. 14:21). Huk p’unchaypas askha runan Jesusman asuykurqanku qhaliyachisqa kanankupaq, rimasqanta uyarinankupaqwan. Chay kutipiqa “tawa waranqa qharikunan karqan”, hinallataq warmikunapas wawakunapas (Mat. 15:38). Jesusmanqa askha qharikunan asuykuqku yachachikuyninpi interesakuspa. Paypas munarqanmi hukkunapas chay ruwanankuta. ¿Imaynapin chayta yachanchis? Qatikuqninkunapaq milagrota ruwaspa askha challwata hap’ichisqan qhepamanmi Pedrota nirqan: “Kunanmantaqa runakunata challwaqmi kanki”, nispa (Luc. 5:10). Chay simikunawanmi willarqan qatikuqninkuna challwaypi hina runakunata yachachikuyninkuwan hap’imunankumanta. Chhaynapin askha qharikunata tarinkuman.

² Kunanpas, ñawpa tiempopi hinan askha qharikuna uyarikunku predicaqtinchis, munankutaq astawan yachayta (Mat. 5:3). Ichaqa askhan mana espiritualpi ñawparinkuchu. ¿Imaynatan paykunata yanapasunman? Jesusqa manan qharikunata maskhanapaq sapaq predicaytachu qallarichirqan, ichaqa uyariy munasqanku temakunamantan rimarqan. Ñoqanchispas, Jesús hinan qharikunata yanapanchis imaymana llakikuyninkuta atipanankupaq. Yachasunchis kinsa llakikuykunamanta: 1) kawsanapaq llank’aymanta, 2) runaq rimasqanta manchakuymanta, 3) mana atiqpaq hina qhawarikuymanta.

Kawsanapaq llank’ay

3, 4. a) ¿Imakunamantan astawan llakikunku qharikuna? b) ¿Imaraykun wakin qharikuna llank’ayta ñawpaqman churanku espiritual ruwaykunamanta?

³ Huk kutinmi Kamachikuy Simita yachachiq runa Jesusta prometerqan: “Yachachikuq, maytaña riqtiykipas qhepaykitan purisaq”, nispa. Ichaqa Jesusmi willarqan Runaq Churinqa mana imanpas “maypi puñuykunallanpas” kasqanta, chaymi iskayyapurqan pay qatikuyta. Yaqachus hina chay runaqa llakikurqan qhepaman imatachus mikhunanmanta maypichus alojakunanmanta ima, Bibliaqa manan willanchu Jesuspa qatikuqninman tukupusqanta (Mat. 8:19, 20).

⁴ Askha qharikunan imaymanayoq kayta ñawpaqta maskhaspa Dios serviyninkuta qhepaman churanku. Allin profecionniyoq kayta, allin pagasqa llank’anatan ñawpaqta maskhanku. Biblia estudiaymanta Dioswan allinpi kaymantapas qolqe ganay aswan importante kananpaqmi yuyaykunku. Yaqapaschá allinpaq qhawarinku Bibliamanta yachayta, ‘ichaqa kay kawsaypi afanakuykuna, qhapaq kaykuna’ ima q’otuspan chay munasqankuta chinkachipun (Mar. 4:18, 19). Yachasunchis imaynatachus Jesús qatikuqninkunata yachachirqan aswan importante kaqkuna ruwayta.

5, 6. ¿Iman yanaparqan Andresta, Pedrota, Santiagota Juantapas imatachus ñawpaqman churanankuta yachanankupaq?

⁵ Andreswan wawqen Pedrowanqa challway negociopin llank’arqanku, kaq negociollapitaqmi karqanku Juan, wawqen Santiago (Jacobo) taytan Zebedeopas. Yaqachus hina negocionkuqa allin karqan chaymi llank’aqnikunayoq  karqanku (Mar. 1:16-20). Ichaqa Andrestawan Juantawan bautizaq Juan Jesusta reqsichiqtinmi paykunaqa creerqanku Mesías tarisqankupi. Andresqa phawayllan rirqan wawqen Simón Pedroman willamunanpaq, yaqapaschá Juanpas rirqan wawqen Santiagoman willaq (Juan 1:29, 35-41). Tawantinkun askha killakuna Jesuswan kamurqanku Galilea, Judea, Samaria llaqtakuna predicamusqanpi, ichaqa qhepamanqa kutipurqankun challway negocionkuman. Interesakurqankuña espiritual kaqkunapi chaypas, manan predicaytachu aswan importantepaq qhawarirqanku.

⁶ Chay qhepamanmi Jesús invitarqan Pedrota Andrestawan qhepanta qatikuspa ‘runakuna challwaq’ kanankupaq. ¿Imaynatan kutichirqanku? ‘Llikankuta saqerparispan Jesuspa qhepanta ripurqanku’. Santiagopas Juanpas “botenkuta taytankutawan saqerparispa Jesuspa qhepanta ripurqanku” (Mat. 4:18-22). ¿Iman yanaparqan tukuy tiemponkuwan Diosta servinankupaq? ¿Qonqayllachu chayta decidirqanku? Manan. Ñawpaq killakunapin Jesuspa yachachisqanta uyarimurqanku, rikumurqankun milagrokuna ruwasqanta, chanin kaq munakusqanta, predicasqanman runakuna imayna kutichisqankutapas. Chaymi iñiyninkupi allin kallpachasqa karqanku Diospipas astawan confiarqanku.

7. ¿Imaynatan estudiantekunata yanapasunman Dios cuidawasqanchispi confianankupaq?

⁷ Jesuspa ejemplonta qatikuspa, ¿imaynatan Biblia estudiaqkunata yanapasunman Diospi astawan confianankupaq? (Pro. 3:5, 6.) Imayna yachachisqanchiswanmi. Imamantapas yachachispaqa, willananchismi Reinota ñawpaqta maskhaqtinchisqa Dios bendeciwananchista (leey Malaquías 3:10; Mateo 6:33). Bibliawanña rikuchisunman llaqtanta Dios imayna cuidasqanta chaypas, ejemplonchiswan chayta rikuchiymi aswan allinqa. Willasunmanmi ñoqanchista imaynata Dios yanapawasqanchista. Chaymantapas allinmi kanman qelqanchiskunapi lloqsimuq experienciakunata willay. *

8. a) ¿Imaraykun estudiantekuna reparananku “may sumaqchus” Diosqa kasqanta b) ¿Imaynatan yanapasunman Diosqa sumaq sonqo kasqanta kikinkupuni yachanankupaq?

⁸ Ichaqa manan mayqen estudiantepas chaykunallawanqa espiritualpi ñawparinmanchu. Kikinmi reparanan Diosqa sumaq sonqo kasqanta. Salmistan nirqan: “Reqsiykuychis, hinaspa rikuychis may sumaqchus Señor Diosqa kashasqanta. ¡Kusisamiyoqmi payman hap’ipaykukuq runaqa!”, nispa (Sal. 34:8). ¿Imaynatan yanapasunman Diosqa sumaq sonqo kasqanta reparananpaq? Kaypi yuyaykusun, yaqapaschá mayqen estudiantepas qolqewan pisichikushan, kallpachakushantaq cigarro pitayta, mana allin pukllayta otaq trago ukyayta saqenanpaq (Pro. 23:20, 21; 2 Cor. 7:1; 1 Tim. 6:10). Chhayna kaqtinqa, kallpachananchismi Diospa yanapayninta mañakunanpaq, ahinapi chay sasachakuyninta atipananpaq. Chhaynapin yachanqa Diosqa sumaq sonqo kasqanta. Chaymantapas kallpachananchismi espiritual ruwaykunata ñawpaqman churananpaq, tiempota t’aqaspa Bibliata estudiananpaq, huñunakuykunaman rinanpaq, chaypi estudiakuq qelqakunata preparakunanpaqpas. Kallpachakusqanta Dios saminchasqanta reparaqtinqa iñiyninmi astawan wiñanqa.

 Runaq rimasqanta manchakuy

9, 10. a) ¿Imaraykun Nicodemopas Arimatea llaqtayoq Josepas pakallapi Jesuspa yachachikuyninpi interesakurqanku? b) ¿Imaraykun wakin qharikuna iskayyanku Jesús qatikuyta?

⁹ Runaq rimananmanta manchakuspan wakin qharikunaqa iskayyanku Jesús qatikuyta. Chhaynapin tarikurqanku Nicodemopas Arimatea llaqtayoq Josepas. Iskayninkupas pakallapin Jesuspa yachachikuyninkunapi interesakurqanku judiokuna ima ninankumantapas manchakuspa (Juan 3:1, 2; 19:38). Paykunaqa manan yanqachu manchakurqanku. Judío religionpi umalliqkunaqa nishutan Jesusta cheqnikurqanku, chaymi paypi iñiqkunataqa sinagogakunamanta qarqoqku (Juan 9:22).

¹⁰ Kunanpas chhaynan kashan huk ladokunapi. Sichus huk qhari interesakun Diospi, Bibliapi, religionpi chayqa, llank’aqmasinkuna, amigonkuna familiankuna iman mana allinta tratanku. Wakin llaqtakunapiqa religionnin cambiayta yuyaykullaqtinraqmi chay suceden. Aswan sasachakuypin tarikun sichus ejercitopi llank’an politicapi kashan otaq llaqtanpi allin reqsisqa runa kaqtin. Alemania nacionmanta runan nirqan: “Bibliamanta Testigokunaq predicasqankuqa cheqaqmi. Ichaqa kunan Testigo kayman chayqa, paqarinqa llapa runañan yacharunman. ¿Ima ninkumanmi llank’anaypi, wasimasiykuna, reqsiwaqniy runakunapas? Manan chaytaqa aguantaymanchu”, nispa.

11. ¿Imaynatan Jesús qatikuqninkunata prepararqan runata ama manchakunankupaq?

¹¹ Jesuspa qatikuqninkunaqa valorwanña imatapas ruwaqku chaypas, kallpachakurqankun runata ama manchakunankupaq (Mar. 14:50, 66-72). ¿Imaynatan Jesús yanaparqan espiritualpi ñawparinankupaq runakunaña mana allinta tratarqanku chaypas? Ñawpaqtaqa prepararqanmi qatiykachaykunata atipanankupaq, willarqanmi discipulonkuna kasqankurayku cheqnisqa kanankuta, nirqanmi: “Kusisamiyoqmi kankichis Runaq Churin hawa runakuna cheqnisuqtiykichis, qarqosuqtiykichis, k’amisuqtiykichis, sutiykichistapas millayta hina pisichaqtinkuqa”, nispa (Luc. 6:22). Chaymantapas nirqanmi Diosmanta mañakuqtinkuqa kallpata chaskinankuta (Luc. 12:4-12). Yachachisqanpi chayllaraq interesakuq runakunatapas invitarqanmi qatikuqninkunawan huñunakuspa amigontin kanankupaq (Mar. 10:29, 30).

12. ¿Imaynatan estudiantekunata yanapasunman runata ama manchakunankupaq?

¹² Ñoqanchispas Biblia estudiaqkunatan yanapananchis runata ama manchakunankupaq. Ima sasachakuymantapas ñawpaqta willaqtinchismi astawanqa iñiyninkupi qaqa sayanqaku (Juan 15:19). Yaqapaschá llank’aqmasinkuna otaq huk runakunapas imaymanamanta tapunkuman, chaypaqqa yachachisunmanmi Bibliawan allinta pisillapi sut’inchanankupaq. Ñoqanchiswan amigontin kasqankumantapas, iñiq t’aqapi huk cristianokunatawanmi reqsichinanchis, astawanqa pay hina tarikushaqkunata. Chaymantapas, kallpachananchismi sapa kutilla tukuy sonqo Diosmanta mañakunankupaq. Chhaynapin Diosman astawan asuykunqaku, paytaqmi kanqa Hatun Qaqanku Pakakunankupas (leey Salmo 94:21-23; Santiago 4:8).

 Mana atiqpaq hina qhawarikuy

13. ¿Imaynatan mana atiqpaq hina qhawarikuy qharikunata hark’anman espiritualpi ñawparinankuta?

¹³ Wakin qharikunaqa manan espiritual kaqkuna ruwayta munankuchu pisillata leesqankurayku, mana kusa rimaqchu kasqankurayku otaq manchali kasqankurayku. Wakinqa manchakunkun runakunaq qayllanpi yuyaykusqankuta iñiyninkumantapas rimayta. Yaqapaschá sasapaq qhawarinku estudiayta, huñunakuykunapi comentayta, iñiyninkumanta rimaytapas. Huk cristianon nin: “Huch’uyllaraq kashaspayqa apuraylla punkuman rispan yanqallata tocaq kani, mana reparachikuq hinallataq ayqerikanpuq kani, ama pipas rikuwananpaq uyariwananpaqpas. Wasin-wasin predicayta yuyaykuyllaraqmi ñoqapaqqa uma nanay karqan”, nispa.

14. ¿Imaraykun Jesuspa qatikuqninkuna mana qhaliyachiyta atirqankuchu supaypa ñak’arichisqan waynachata?

¹⁴ Jesuspa qatikuqninkunapas mana atiqpaq hinachá qhawarikurqanku supaypa ñak’arichisqan waynachata mana qhaliyachiqtinku. Chay waynaq taytanmi Jesusman asuykuspa nirqan: “Churiyta khuyapayaykuy, ataquewan hap’ichikuspan sinchitapuni ñak’arin. Askha kutitan urmaykun ninamanpas unumanpas. Chaymi yachachisqaykikunaman pusamurqani, paykunataq mana qhaliyachiyta atinkuchu”, nispa. Hinan Jesús qhaliyachirqan supaykunata qarqospa. Chaymantan qatikuqninkuna Jesusta tapurqanku: “¿Imanaqtintaq ñoqaykuqa supayta mana qarqoyta atirqaykuchu?”, nispa. Paytaq kutichirqan: “Mana tukuy sonqochu Diospi iñisqaykichisraykun mana atirqankichischu. Cheqaqtan niykichis, huk mostaza ruru hinallapas iñiyniykichis kanman chayqa, kay orqotan niwaqchis: Kaymanta haqayman suchuriy, nispa, hinan suchunman. Iñiqtiykichisqa manan imapas mana atikuqqa kanmanchu”, nispa (Mat. 17:14-20). Chhaynaqa, orqo sayay hina sasachakuykunata atipanapaqqa iñinanchispunin Jehová Diospi. Ichaqa, ¿iman suceden pipas chayta qonqaspa munasqanman hina sasachakuyninta allichaqtin? Mana allinpin tukun, chaymi huk ruwaykunatapas mana atinanpaq hina qhawarin.

15, 16. ¿Imaynatan estudiantekunata yanapasunman mana atiqpaq hina qhawarikuyta saqenankupaq?

¹⁵ Estudiantekuna mana atiqpaq hina qhawarikuyta saqenankupaqqa, kallpachananchismi paykunapi yuyaykunankumantaqa Diospi yuyaykunankupaq. Chaypaqmi Pedro kallpachawarqanchis: “Huch’uyaykukuychis yanapananpaq atiyniyoq Diospa qayllanpi, tiempo chayamuqtin pay hatunchanasuykichispaq. Tukuy llakikuyniykichista Diosman saqeychis”, nispa (1 Ped. 5:6,7). Chayta ruwanankupaqqa Dios sonqo kaytan yachachinanchis. Dios sonqo runaqa espiritual kaqkunata, Bibliapi yachachikuykunatan valoran kawsayninpitaq ‘santo espirituq’ rurunta rikuchin (Gál. 5:22, 23). Sapa kutillanmi Diosmanta mañakun (Fili. 4:6,7). Chaymantapas kallpatan mañakun sasachakuyninta atipananpaq otaq ima ruway chaskisqantapas hunt’ananpaq (leey 2 Timoteo 1:7, 8).

¹⁶ Wakin estudiantekunaqa kallpachakunankun aswan allinta leenankupaq, runakunawan rimanankupaqpas. Wakinqa manaraq Diosta reqsishaspan mana allinkunata ruwarqanku, chaymi mana Diosta servinankupaq hinachu qhawarikunku. Imaynapiña tarikuqtinkupas, munakuywan pacienciawan yanapasqanchispaschá paykunapaq allin kanman. Jesusmi nirqan: “Qhalikunaqa manan hampiqta necesitankuchu, aswanpas onqosqakunallan”, nispa (Mat. 9:12).

 Qharikunata Diosmanta yachachisun

17, 18. a) ¿Imatan ruwasunman predicacionpi askha qharikunata tarimunanchispaq? b) ¿Imamantan yachasunchis qatimuq estudiopi?

¹⁷ Llapanchismi munanchis Bibliapi yachachikuykunata qharikuna uyarinankuta, chayllan Diospa yachachikuyninmanta ch’akichikusqankuta thasnunqa (2 Tim. 3:16, 17). Chhaynaqa, ¿imatan ruwasunman predicacionpi askha qharikunata tarimunanchispaq? Wasinkupi kashaqtinkun visitananchis, chayqa kanman: ch’isin, semana tukuy p’unchaykuna, tardenkunata otaq feriadokunapi. Allin kaqtinqa, tapusunmanmi wasipi umalliqmanta. Atikusqanman hina llank’anapi qharikunaman predicasun, amataq qonqasunchu iñiq t’aqanchispi mana iñiq qosakunawan rimayta.

¹⁸ Allin sonqoyoq runakunaqa uyariwasunmi Diosmanta willaqtinchis, chayrayku kallpachakushallasun llapa runaman predicananchispaq. Bibliapi interesakuq runakunatapas yanapashallasun pacienciawan. Ichaqa, ¿ima nisunmanmi bautizasqa qharikunamanta? ¿Imaynatan yanapasunman espiritualpi astawan kallpachakuspa Diospa llaqtanpi llank’aykunata chaskinankupaq? Chaymantan qatimuq estudiopi yachasunchis.

[Uranpi willakuy]

¿Imaynatan kutichisunman?

• ¿Ima yanapaytan qharikuna chaskinku espiritual kaqkunata ñawpaqman churanankupaq?

• ¿Imaynatan estudianteta preparanchis runata ama manchakunanpaq?

• ¿Iman wakin qharikunata yanapanqa mana atiqpaq hina qhawarikuyta saqenankupaq?

[Tapuykuna]

[25 paginapi foto]

¿Kallpachakunchischu qharikunaman predicanapaq?

[26 paginapi foto]

¿Imaynatan estudiantekunata preparanchis sasachakuykunata atipanankupaq?