Yanapanan llankʼaykunata chaskinankupaq
Yanapanan llank’aykunata chaskinankupaq
“Astawan yachaspaqa yachachiqnin hinan kanqa.” (LUC. 6:40.)
1. Kay pachapi Jesús predicaspa, ¿imatan ruwarqan iñiq t’aqa allin takyasqa kananpaq?
EVANGELIONTA qelqayta tukushaspañan Juan nirqan: “Askharaqmi kashan Jesuspa tukuy imaymana ruwasqankunaqa, sapankachus qelqasqa kanman chayqa, yuyaykunin manan kay pachantinpas aypanmanchu chay qelqakunata churanapaq”, nispa (Juan 21:25). Pisi tiempolla tukuy sonqo predicasqanpin Jesusqa qharikunata akllarqan, yanaparqan prepararqan ima, kay pachapi llank’aynin tukupuqtin paykuna predicayta umallinankupaq. Chhaynapin 33 watapi hanaq pachaman ripuqtin, iñiq t’aqa allin takyasqaña kasharqan, chay qhepamantaq waranqanpi runakuna yapakurqan (Hech. 2:41, 42; 4:4; 6:7).
2, 3. a) ¿Imaraykun necesitakushan bautizasqa qharikuna llank’aykunata chaskinankupaq preparasqa kanankuta? b) ¿Imamantan yachasunchis kay estudiopi?
2 Kunanqa Diospa Gobiernonmanta willaq runakunaqa qanchis millón masñan kashanchis, pachak waranqa más iñiq t’aqakunapi, chayraykun necesitakushan Diospa llaqtanta pusariqkunata. Ejemplopaq iñiq t’aqakunapin necesitakushan umallikunata. Chayrayku, sichus mayqen cristianopas chayman aypananpaq kallpachakushan chayqa, kusata ruwashan “allin llank’aytan akllakun” (1 Tim. 3:1).
3 Ichaqa, pipas iñiq t’aqapi ima llank’aytapas chaskinanpaqqa kallpachakunanmi. Chayman aypanapaqqa manan allin estudioyoq kaymantachu nitaq allin experienciayoq kaymantachu kanqa, aswanpas Bibliaq mañasqan ruwaykunatan hunt’ana. Arí, aswan importanteqa imayna runa kasqanmi, manataqmi imapas yachasqanchu nitaq imata estudiasqanchu. ¿Ima yanapaytan qharikuna chaskinku? Criston nirqan: “Astawan yachaspaqa yachachiqnin hinan kanqa”, nispa (Luc. 6:40). Kay estudiopin qhawarisun imaynatas Jesús qatikuqninkunata yanaparqan llank’aykunata chaskinankupaq, imayna ruwasqanmantataq askhata yachasun.
Amigonkunan karqanku
4. ¿Imaynatan Jesús rikuchirqan qatikuqninkunaq amigon kasqanta?
4 Jesusqa manan pisicharqanchu qatikuqninkunata, aswanpas amigonkunata hinan tratarqan. Tiempotan horqoq paykunawan kananpaq, confiarqantaqmi paykunapi. Chayraykun nirqan: ‘Yayaymanta lliw imaymana uyarisqaytan qankunaman willarqaykichis’, nispa (leey Juan 15:15). Huk kutinmi tapurqanku: “Kutimunaykiña kashaqtinqa kay tiempopas p’uchukapunanpaqña kashaqtinqa, ¿imakunatan rikusaqku?” nispa, chayta kutichisqanwanqa anchatachá kusikurqanku (Mat. 24:3, 4). Chaymantapas Jesusqa willarqanmi yuyaykusqankunata, imayna sientekusqantapas. Traicionasqanku tutapin Pedrota, Santiagota (Jacobo) Juantawan Getsemaní huertaman pusarqan, chaypin rikurqanku llakikuyninkunata Diosman willasqanta. Kinsantin qatikuqninkunaqa manapaschá uyarirqankuchu rimasqanta, ichaqa entienderqankun chay rato imaynapi tarikushasqanta (Mar. 14:33-38). Anchatachá admirakurqanku aswan ñawpaqta Jesuspa rikch’aynin huk-niraqman tukuqtin (Mar. 9:2-8; 2 Ped. 1:16-18). Jesuswan amigontin kasqankuqa qhepaman huk llank’aykunata allinta hunt’anankupaqmi yanaparqan.
5. ¿Imaynatan umallikuna rikuchinku hukkunata yanapanankupaq makilla kashasqankuta?
5 Umallikunapas Jesús hinan iñiqmasinkunata yanapanku, amigontintaq kankupas. Paykunapin interesakunku, tiempotapas horqonkun allinta reqsinankupaq. Umallikunaqa yachankun wakin asuntokunata hukkunaman mana willanankuta, chaywanpas Bibliamanta yachasqankutan iñiqmasikunaman yachachinku, confiankutaq paykunapi. Yanapakuq qharikunatapas (siervos ministeriales) manan pisichankuchu, paykuna waynallaraq kaqtinkupas. Aswanpas Dios sonqo runakunata hinan qhawarinku, iñiq t’aqapi allin llank’aqkunata, qhepaman allin yanapakuqkunata ima.
Ejemplonwanmi yachachirqan
6, 7. ¿Ima ejemplotan Jesús qatikuqninkunaman saqerqan? ¿Imaynapin paykunaq allinninpaq karqan?
6 Jesuspa qatikuqninkunaqa Dios sonqoña karqanku chaypas, may llaqtapi tiyasqankuman hina, imayna uywasqa kasqankuman hinan imatapas qhawariqku (Mat. 19:9, 10; Luc. 9:46-48; Juan 4:27). Ichaqa manan anyarqanchu nitaq amenazaqpaschu. Ruway atinallankutan mañaq, manataqmi nirqanchu: “Imachus nisqayta ruwaychis, amataq ruwasqaytachu”, nispa. Aswanpas ejemplonwanmi yachachirqan (leey Juan 13:15).
7 ¿Ima ejemplotan Jesús qatikuqninkunaman saqerqan? (1 Ped. 2:21.) Imachus necesitasqallanwan kawsaspan astawan runakunata yanaparqan (Luc. 9:58). Payqa yacharqanmi mana tukuy imata ruwananpaqchu autoridadniyoq kasqanta, chaymi Qelqapi nisqanman hina yachachirqan (Juan 5:19; 17:14, 17). Asuykunapaq hina sumaq sonqon karqan, munakuq kaspan imatapas ruwarqan (Mat. 19:13-15; Juan 15:12). Qatikuqninkunaqa imaymanatan paymanta yacharqanku. Santiagomanta yachasun. Payqa manan qatiykachayta manchakuspachu pisiparqan, aswanpas hunt’aq sonqowanmi Diosta servirqan wañuchisqa kanankama (Hech. 12:1, 2). Chhaynallataqmi Juanpas, Yachachiqninpa yupintan qatikurqan soqta chunka wata más (Apo. 1:1, 2, 9).
8. ¿Ima ejemplotan umallikuna qonku waynakunaman huk iñiqmasikunamanpas?
8 Diospaq allin llank’aq, k’umuykuq, munakuq umallikunaqa wayna cristianokunapaqmi ejemplo kanku (1 Ped. 5:2, 3). Paykunaqa allin ejemplotan qonku Dios confiaypi, allin yachachiypi, cristiano hina kawsaypi, allinta predicaypi ima, chayraykun kusikunku chhayna allin iñiyninkuta huk cristianokunapas qatikuqtinku (Heb. 13:7).
“Kay hinata kamachirqan”
9. ¿Imaynatan Jesús predicacionta aparinankupaq qatikuqninkunata prepararqan?
9 Iskay wata tukuy sonqonwan predicaspan, Jesusqa chunka iskayniyoq apostolninkunata kacharqan astawan predicakunanpaq. Ñawpaqtaqa willarqanmi imayna ruwanankuta (Mat. 10:5-14). Waranqanpi runakunata milagrota ruwaspa mikhuchinanpaqpas, qatikuqninkunatan nirqan imachus ruwanankuta, manaraq mikhuna rakikushaqtin (Luc. 9:12-17). Rikusqanchis hina, entiendenankupaq hina imatapas allinta willaspan paykunata prepararqan. Chhayna preparasqa kasqankurayku santo espirituq yanapayninwan iman, paykunaqa atirqanku 33 watamantapacha predicación aparikunanpaq imayna organizayta.
10, 11. ¿Imaynatan pisi-pisimanta mosoqkunata entrenakun?
10 Kay tiempopiqa estudiota qosqanchismantapachan huk runa Diosta servinanpaq preparacionta chaskin. Mayninpiqa yanapanan kanqa leeypi allinyananpaq. Biblia estudiaypi avanzaqtinqa astawanmi espiritualpi ñawparinanpaq yanapana kanqa. Llapa huñunakuykunamanña rishan chayqa, kallpachananchismi, Allin Yachachiq Kanapaq Escuelaman matriculakunanpaq, hinamantaq manaraq bautizasqa publicador kananpaq. Bautizakusqan qhepamanqa, chay iñiqmasitan preparana imaymana ruwaykunapi yanapakuqta churaspa, yaqapaschá Huñunakuna Wasita mantenimiento ruwaypi. Tiempowantaq willana yanapakuq qhari kananpaq imakuna necesitakusqanta.
11 Huk bautizasqa qhariman ima llank’aytapas encargakuqtinqa, huk umallin explicanqa imayna aparinanta. Chaymantapas sut’inchanqan paymanta imata suyakusqanta. Sichus sasachakunqa ruwananta hunt’ananpaq chayqa, sumaq sonqo umalliqa manan chayta ruwananpaq mana preparasqata hinachu qhawarinqa. Aswanpas willanqan imakunapi allinyanan kasqanta, imapaqsi chay hinata ruwakun, imaynatachus chayta hut’anantapas. Umallikunaqa ancha kusisqan sientekunku huk qhari yanapasqankuman hina ruwaqtinqa, Diosta kusisqa serviqtinpas (Hech. 20:35).
Yachayniyoqqa yuyaychaytan uyarikun
12. ¿Imaraykun Jesuspa consejonkuna allinpuni karqan?
12 Qatikuqninkunataqa necesitasqankuman hinan sapankata aconsejaq. Ejemplopaq, huk kutinmi Jesusta discipulonkunatawan Samaria runakuna mana chaskirqankuchu, hinan Santiagowan Juanwan mañakuyta munarqanku hanaq pachamanta nina uraykamuspa chay runakunata ruphananpaq, chaymi Jesusqa paykunata nirqan mana allinta yuyaykusqankuta (Luc. 9:52-55). Chaymantapas, iskayninkuq mamanmi Jesusta valekurqan Diospa Gobiernonpi kamachimuqtin sapanka ladonpi tiyanankupaq. Jesusqa Santiagowan Juanwan chay mañakusqankuta yachaspan nirqan: “Paña ladoypi lloq’e ladoypiwan tiyaykunaykichismi ichaqa mana ñoqaq tiyaykachinaychu, aswanpas Yayaypa akllasqankunapaqmi chay tiyanakunaqa”, nispa (Mat. 20:20-23). Cristoqa manan yuyaychallarqanchu discipulonkunata, aswanpas yachachirqanmi Bibliaq nisqanman hinapuni yuyaykunankupaq (Mat. 17:24-27). Manan hayk’aqpas maykamalla atisqankuta qonqarqanchu, nitaq suyarqanchu mana imapi pantanankutapas. Paykunata sonqomanta munakusqanraykutaq imatapas aconsejaq.
13, 14. a) ¿Pikunan astawanqa yuyaychaykuna chaskiyta necesitanku? b) ¿Imakunapin umalliq yanapanman espiritualpi mana ñawpariq cristianota?
13 Mayqen qharipas Diospa llaqtanpi llank’aykuna chaskiyta munan chayqa, necesitanmi Bibliaq nisqanman hina yuyaychaykunata. Chaymantan Proverbios 12:15 nin: “Yachayniyoqmi ichaqa kunaykusqakunata [yuyaychaykunata] kasukun”, nispa. Chaypi nisqan cheqaq kasqanmantan huk wayna nirqan: “Imakunapi pantasqayta reqsikuymi ñoqapaqqa sasa karqan. Ichaqa huk umalliq consejokuna qowasqanmi yanapawarqan allin yuyaywan chayta qhawarinaypaq”, nispa.
14 Sichus huk hermano mana allin yuyaywan imatapas ruwasqanrayku mana espiritualpi ñawparishanchu chayqa, umalliqkunan llamp’u sonqo-kaywan yuyaychanqaku (Gál. 6:1). Chaymantapas, yaqapaschá huk cristianota yanapananku kanqa imayna runa kasqanpi allinyananpaq. ¿Imatan umalli ruwanman huk cristiano Dios serviyninpi mana kallpachakuqtin? Yuyarichinanmi Jesusqa Diospa Reinonmanta willaspa allin llank’aq kasqanta, qatikuqninkunatapas runakuna yachachimunankupaq kamachisqanta (Mat. 28:19, 20; Luc. 8:1). ¿Allin reqsisqa kayta munanman chayri? Importantepaq qhawarikuy mana allin kasqanmanta Jesús yachachisqantan t’aqwirinman (Luc. 22:24-27). ¿Imaynatan yanapanman hukkunaq huchanta mana pampachayta munaq cristianota? Kamachimanta willaq rikch’anachiytan qhawarichinman. Chay kamachiqa manan kamachimasinta pisi qolqella manukusqanta pampachayta munarqanchu, paypa nishu askha qolqe manukusqantaqa pampachapusqaña patronnin chaypas (Mat. 18:21-35). Yuyaychanata necesitakuqtinqa usqhayllan qona, manan tiempo pasananchu (leey Proverbios 27:9).
Kallpachakushallay
15. ¿Imaynatan huk cristianota familian yanapanman iñiq t’aqapi servinanpaq?
15 Umallikunaq ruwananmi llank’aykunata chaskinanpaq huk cristianota preparayqa, ichaqa hukkunapas yanapallankumantaqmi. Ejemplopaq familianmi yanapanman astawan ñawparinanpaq. Sichus umalliña chayqa, necesitanqan esposan wawankunapiwan sumaqta yanapanankuta. Mana chayqa manan llank’ayninta hunt’ayta atinmanchu. Sacrificiota ruwaspa yanapaqtinkuqa kusikuywanmi ruwayninkunata hunt’anqa, iñiq t’aqapas sumaqpaqmi hap’inqa tukuy ruwasqanta (Pro. 15:20; 31:10, 23).
16. a) ¿Pimantan dependen huk hermano espiritualpi ñawparinanpaq? b) ¿Imaynatan huk cristiano rikuchin iñiq t’aqapi llank’aykuna chaskiy munasqanta?
16 Hukkunaña preparanku, yanapanku huk cristianota chaypas, pay kikinmi espiritualpi ñawparinanpaqqa kallpachakunan (leey Gálatas 6:5). Manan yanapakuq qhari otaq umalliraqchu kana hukkunata yanapanapaq, predicaypi llank’anapaqpas. Ichaqa, Biblian willan pipas chay llank’aykunapi serviyta munan chayqa, chaypaq imakunachus necesitakusqanta hunt’anan kasqanta (1 Tim. 3:1-13; Tito 1:5-9; 1 Ped. 5:1-3). Chayman aypananpaqqa, qhawarikunanmi imakunapichus espiritualpi allinyanan kasqanta. Bibliata sapa kutilla leenan, sapallanpi estudionta aparinan, yachasqanpi yuyaymananan, tukuy sonqo mañakunan, allintataq predicaypipas yanapakunan. Chhaynapin Timoteoman Pabloq kay yuyaychasqanta kasukushanqa: “Dios sonqo kawsanaykipaq yachaqashallaypuni” (1 Tim. 4:7).
17, 18. ¿Imatan huk hermano ruwanman sichus llakisqa kasqanrayku, mana atiqpaq qhawarikusqanrayku otaq mana animakusqanrayku espiritutalpi mana ñawpariqtin?
17 Sichus huk hermano mana huk llank’ayman aypanchu llakikusqanrayku otaq mana atinanpaq hina qhawarikusqanrayku chayqa, Jehová Diospas Jesuspas ñoqanchisrayku imaymana ruwasqankupi yuyaymanaymi yanapanman. Arí, hanaq pacha Taytanchismi “p’unchay-p’unchay sasa kawsayninchiskunapi kawsaysiwanchis” (Sal. 68:19). Diosmi yanapanqa iñiq t’aqapi ima llank’aynintapas hunt’ananpaq. Huk cristiano manaraq yanapakuq qharichu otaq umalliqchu chayqa, kallpachakunqan chayman aypananpaq sichus yuyaymananqa Diospa llaqtanpi chaypaq allin iñiyniyoq cristianokunata anchata necesitakushasqanta chayqa. Chaykunata qhawarispaqa yaqapaschá decidikunqa chay mana allin yuyaykuykunata atipananpaq. Chaymantapas, santo espiritutan mañakunan, yuyarinantaqmi espirituq rurunpiqa thak-kay, cuerpo kamachiy ima kasqanta. Chaykunan yanapanqa llakikuyta mana atiqpaq qhawarikuytapas atipananpaq (Luc. 11:13; Gál. 5:22, 23). Sichus servinanrayku kallpachakunqa espiritualpi ñawparinanpaq chayqa, Diosmi tukuy ruwasqanpi bendecinqa.
18 Wakin bautizasqa cristianokunaqa manan paykunallamantaqa iñiqmasikunata yanapankuchu. ¿Imatan ruwawaq astawan llank’ayta chaskinaykipaq mana animakuqtiyki? Apóstol Pablon qelqarqan: “[Diosmi] allinkaq ruwayta munachisunkichis hinaspa ruwachisunkichis”, nispa (Fili. 2:13). Rikusqanchis hina, Jehová Diosmi sonqonchista kuyurichiwasun hukkunarayku llank’anapaq, paymi huk cristianota kallpachanqa servinanpaq (Isa. 12:2). Llapanchispas mañakusunmanmi imaynachus kasqanman hina ruwananchispaq (Sal. 25:4, 5).
19. ¿Imatan yachanchis Miqueas 5:5 textopi willaq profeciamanta?
19 Diosqa sumaqtan bendicen qharikunata preparanankupaq umallikunaq kallpachakusqanta. Chaymantapas, allinpaqmi qhawarin umallikunaq yanapayninman hina llank’aykunata chaskinankupaq kallpachakuqkunata. Biblian prometewanchis Jehová Taytanchis “qanchis kamachikuqkunata”, “pusaq umalli runakunatapas” churananta. Arí, llaqtanta pusarinankupaqmi necesitakusqan umalliqkunata churanqa (Miq. 5:5). Kay tiempopiqa askha cristianokunan allin preparasqa kanankupaq yanapayta chaskishanku. Arí, chaypaqmi huch’uyyaykukuspa kallpachakushanku, chhaynapi Jehová Diosta hatunchanankupaq. ¡Chaykuna ruwasqankuqa ancha kusikunapaqmi!
¿Imaynatan kutichisunman?
• ¿Imaynatan Jesús qatikuqninkunata prepararqan astawan llank’aykunata chaskinankupaq?
• ¿Imaynatan umallikuna qharikunata Cristo hina yanapankuman?
• ¿Imaynatan familia yanapanman qosa espiritualpi ñawparinanpaq?
• ¿Imaynatan qhari rikuchinman ima llank’aymanpas aypay munasqanta?
[Tapuykuna]
[31 paginapi fotokuna]
¿Imaynatan yanapasunman espiritualpi ñawpariyta munaq estudianteta?
[32 paginapi foto]
¿Imaynatan qharikuna rikuchinku astawan llank’aykuna chaskiy munasqankuta?
