Diospa espiritun pusariwananchistan necesitanchis

‘Qanmi Diosniyqa kanki, [...] espirituyki sumaq ñanninta pusawachun.’ (SAL. 143:10.)

1. ¿Imaynapin huk imán metal cosaskunata aysaykun?

¿HAYK’AQLLAPAS huk agujata imán nisqaq ladonman churarqankichu? Kaq ratun agujaqa imanman k’askan. ¿Imaraykun chay suceden? Imankunapiqa mana rikuna fuerza otaq kallpan kashan, chaytaq metal cosaskunata aysaykun. Unay tiempoñan runakunaqa imanta utilizanku metal cosaskunata maskhanankupaq.

2, 3. a) ¿Ima atiyniyoq kallpatan Dios utilizarqan waranqa-waranqa watakuna ñawpaq? b) ¿Imaynapin yachanchis santo espíritu pusariwananchista?

² Ichaqa kanmi huk mana rikuna aswan importante kallpa kawsayninchispi pusariwananchispaq. ¿Iman chay? Biblian qallariyninpi willashan. Waranqa-waranqa watakuna ñawpaqta Diospa ruwasqanmantan Génesis libro nin: “Qallariypin Diosqa hanaq pachata kay pachatawan kamarqan”, nispa. Chay qhepamantaq willan imawanchus chay ruwasqanta, ninmi: ‘Diospa espiritunmi unu patapi muyusharqan’, nispa (Gén. 1:1, 2). ¿Iman chaypi kasharqan? Santo espiritun, chay kallpawanmi tukuy imapas kamasqa karqan. Arí, ñoqanchismanpas chay kallpawanmi Dios kawsayta qowarqanchis (Job 33:4; Sal. 104:30).

³ Ichaqa manan chayllatachu yachananchis santo espiritumanta. Chay espirituqa hukniraykunamantapas yanapawasunmanmi. Diospa Churinpunin chayta willarqan, discipulonkunatan nirqan: “Espíritu hamuspanmi [...] tukuy cheqaqkaqta yachachisunkichis”, nispa (Juan 16:13). Ichaqa, ¿iman santo espíritu, imaynapin allinninchispaq kanman chaywan pusachikuy?

¿Imataq santo espirituri?

4, 5. a) ¿Imaynapin Trinidadpi creeqkuna pantasqata yuyaykunku santo espiritumanta? b) ¿Imaynatan sut’inchawaq santo espíritu imachus kasqanta?

⁴ Predicaspaqa askha runakunatan tarinchis Trinidadpi creeqkunata. Chaypi creesqankuman hinan paykunaqa pantasqata ninku: “Taytapas, Churipas, santo espiritupas kaqllan kanku”, nispa (1 Cor. 8:6). Chay yachachikuyman hinan, askha Biblia t’ikraqkuna chay rimayta hatun letrakunawan qelqanku: Santo Espíritu, nispa. Ichaqa griego rimaymanta profesor Joan F. Mira, 2006 watapi Evangeliokunata, Hechos, Apocalipsis qelqakunata lloqsichimurqan t’ikrasqata, chaypin chay rimayta huch’uy letrakunawan qelqarqan: santo espíritu, nispa. Willarqantaq Bibliaqa mana Diosta hinachu santo espirituta rikuchisqanta. *

⁵ Chhaynaqa, ¿imataq santo espirituri? Traducción del Nuevo Mundo de las Santas Escrituras (con referencias) nisqa Biblian huk notapi Génesis 1:2 textopi hebreo rimaypi rú·aj simita khaynata t’ikran: “Espíritu nispan rú·aj simitaqa t’ikrakun, ichaqa t’ikrakullantaqmi wayra nispa, otaq huk simikunawan mana rikuna kallpa kasqanta willananpaq”,  (tupachiy nota nisqakunata Génesis 3:8; 8:1). Wayrataqa manan rikunchischu, ichaqa reparanchismi atiyniyoq kasqanta, chhaynallataqmi santo espiritupas mana rikukuq, ichaqa reparasunmanmi atiyniyoq kasqanta. Chayqa Diospa kallpanmi, chaytan cosaskunaman otaq runakunaman qon munayninta hunt’ananpaq. ¿Mana creeyta atinapaq hinachu chay kallpa tukuy atiyniyoq ch’uya Diosmanta hamusqan? Manan (leey Isaías 40:12, 13).

6. ¿Imatan David valekurqan Diosmanta?

⁶ Diosqa santo espiritunwanmi yanapawanchis kawsayninchispi pusawananchispaq. Chaytan Davidman prometerqan, nirqanmi: “Ñoqan yuyaychasqayki, ñoqan maynin purinayki ñanta yachachisqayki”, nispa (Sal. 32:8). Ichaqa, ¿munarqanchu David Dioswan pusachikuyta? Arí, chaymi valekurqan: ‘Qanmi Diosniyqa kanki, chayrayku, munayniyki ruwayta yachachiway, allin espirituyki sumaq ñanninta pusawachun’, nispa (Sal. 143:10). Ñoqanchispas chhaynatan munananchis Diospa espiritunwan pusachikuyta. ¿Imaraykun necesitanchis? Yachasunchis tawa razonkunata.

Necesitanchismi Dios pusawananchista

7, 8. a) ¿Imaraykun necesitanchis kawsayninchispi Dios pusawananchista? b) ¿Ima ejemplon rikuchin kay millay pachapi Dioswan mana yanapachikuspa kawsay mana yuyayniyoq kay kasqanta?

⁷ Ñawpaq kaq razonqa, Diospa espiritun kawsayninchispi pusawananchistan necesitanchis, manan chaytaqa ñoqallanchismanta atisunmanchu. Pusay nisqa simiqa “ñanta rikuchiy, yuyaychay” ninanmi (Diccionario Anaya de la Lengua). Runaqa manan Diospa mana yanapasqallan kawsananchispaqchu kamasqa karqanchis, astawanqa huchayoq kasqanchisraykun chayta ruwayta mana atinchischu. Jeremiasmi nirqan: “Señor Diosníy, yachanin, manan runaq munayninchu imayna kananpaqpas, runaqa manan yachakunchu imayna kanantapas”, nispa (Jer. 10:23). Chaymantapas, Diosqa willallarqantaqmi sonqonchis pantaq kasqanrayku yanapaynin necesitasqanchista, nirqanmi: “Runaq sonqonqa tukuy imamantapas aswan q’otukuqmi, millay ruwaqtaq kanpas, ¿pitaq chay sonqotari reqsinman?”, nispa (Jer. 17:9; Mat. 15:19).

⁸ Kaypi yuyaykusun, huk runa paseoman lloqsispan mana reqsisqan ch’inneq cheqasman haykun, manataqmi mapatapas apanchu. Sichus astawan haykunman chay cheqasta mana reqsiq runawan, manataq apanmanchu brújula nisqatapas chayqa, mana allin yuyaywanmi ruwashanman. Chhayna ch’in cheqaskunapi mana imayna puriyta yachanchu chayqa, kawsaynintapas chinkachinmanmi. Chhaynallataqmi suceden Dioswan mana yanapachikuspa kay millay pachapi yuyaykusqanman hinalla kawsaq runawanpas. Kay pachapi Dioswan mana pusachikuspa kawsayqa wañuymanmi apawasunman, chaymi David hina Diosta rogakunanchis: “Diosníy, ñanniykikunata rikuchiway,  purinaykikunatapas yachachiway”, nispa (Sal. 25:4; 23:3). ¿Imaynatan Diospa ñanninpi pusachikusunman?

9. 17 paginapi rikukusqan hina, ¿imaynatan Diospa santo espiritun yanapawanchis kawsayninchispi?

⁹ K’umuykukuq kasun Diospipas confiasun chayqa, paymi santo espiritunta qowasun mana manchakuspa allinta kawsananchispaq. Ichaqa, ¿imaynatan chay kallpa yanapawasun? Jesusmi discipulonkunata nirqan: ‘Kallpachaq santo espiritutan Yaya sutiypi kachamunqa, paymi tukuy imaymanata yachachisunkichis, yuyarichisunkichistaqmi tukuy imakunatachus qankunaman nisqaytapas’, nispa (Juan 14:26). Sapa kutillan Diospa yanapayninta mañakunanchis Bibliatapas estudiananchis, chaypin kashan Cristoq yachachikuyninkuna. Chhaynapin santo espíritu yanapawasun Diospa allin t’aqwina yachachikuyninkunata entiendenanchispaq, ahinapitaq kamachikuyninkunata kasukusun (1 Cor. 2:10). Chaymantapas, cristiano kawsayninchispi imapas cambiaqtinqa santo espiritun yanapawasun imachus ruwananchispaq. Yuyarichiwasunmi Diospa kamachikuyninkuna estudiasqanchista kawsayninchispi yanapachikunapaq.

Jesús espirituwan pusachikurqan

10, 11. ¿Imatan Jesús anchata munarqan, imaynatan santo espíritu yanaparqan?

¹⁰ Diosqa santo espiritunwanmi sapan Churinta pusarqan, chaymi iskay kaq razón ñoqanchispas chayta necesitananchispaq. Manaraq kay pachaman hamushaspan Jesusqa yacharqanña kay profeciata: ‘Señor Diospa espiritunmi mana p’itiyta paywan kashanqa, ahinapin yachayniyoq allin yuyayniyoq kanqa, payqa kusa yuyaykuqmi allin kallpayoqmi kanqa, Señor Diospa munaynintan reqsinqa, paytan manchakunqa’ (Isa. 11:2). Anchatachá payqa munarqan santo espirituq yanapayninta, chhaynapi kay pachapi kaspa imaymana sasachakuykuna atipananpaq.

¹¹ Jesusqa rikurqanmi Diospa prometesqan hunt’asqanta. Evangelio qelqakuna willan bautizakusqan qhepata imachus sucedesqanta: ‘Jesusmi santo espirituwan hunt’a, Jordán mayumanta kutimpurqan, hinan ch’inneqman espíritu pusarqan’ (Luc. 4:1). Chaypin payqa ayunarqan, Diosmanta mañakurqan, yuyaymanarqan, yaqapaschá chaypi kamachikuykunata qospa Diosqa prepararqan imachus ruwananta hunt’ananpaq. Diospa espiritunqa Jesuspa yuyayninpi, sonqonpin kasharqan yuyaykusqanpi decidisqanpi yanapananpaq. Chaymi payqa yacharqan imachus ruwayta, Diospa munayninman hinataq kawsarqan.

12. ¿Imaraykun Diosmanta mañakunanchispuni espiritun pusawananchispaq?

¹² Jesusqa entienderqanmi santo espirituq yanapaynin kawsayninpi ancha importante kasqanta, chaymi discipulonkunaman willarqan Diosmanta espiritunta mañakuy, chaywan pusachikuypas necesario kasqanta (leey Lucas 11:9-13). ¿Imaraykun chayta ruwananchispuni? Diosqa chay atiyninwanmi yuyayninchista cambianman Cristoq hina kananpaq (Rom. 12:2; 1 Cor. 2:16). Espiritunwan kawsayninchispi pusachikuspaqa Cristo  hinan yuyaykusun, kallpachakusuntaq pay hina kawsanapaq (1 Ped. 2:21).

Kay pacha espiritumanta cuidakuna

13. ¿Iman kay pacha espíritu? ¿Imapin rikukunqaku chay espirituwan pusachikuqkuna?

¹³ Santo espirituqa yanapawallanchistaqmi yaqa llapa runapi kaq mana allin espíritu waqllichiwananchismanta. Chaymi kinsa kaq razón Diospa espiritunta necesitananchispaq. Kay pacha runakunapiqa huk atiyniyoq kallpan kashan, chay kallpan tanqan Diospa espiritunpa contranpi ruwanankupaq. Cristo hina yuyaykunankupaq yanapananmantaqa, kallpachanmi kay pachata kamachiq Saqra hina yuyaykunankupaq ruwanankupaqwan (leey Efesios 2:1-3; Tito 3:3). Chay espirituwan pusachikuspa aychaq munasqanman hina ruwaqkunaqa mana allinkunapin tarikunqaku. Manataqmi haykunqakuchu Diospa Reinonman (Gál. 5:19-21).

14, 15. ¿Imaynatan atipasun kay pachaq espiritunta?

¹⁴ Diosqa imaymanatan qowanchis chay espirituta atipananchispaq. Chayraykun Pablo yuyaycharqan: “[Diospi] kallpachakuychis paypa atiyniyoq kallpanwan [...] mana allin p’unchaypi allinta tupapakunaykichispaq”, nispa (Efe. 6:10, 13). Espiritunwanmi Diosqa kallpachawanchis Saqraq trampankunaman ama urmananaq (Apo. 12:9). Kay pacha espíritu atiyniyoq kaspa pantachiytaña munawasunman chaypas, manan waqllichiwasunchu Diospa espiritun aswan atiyniyoq kaspa yanapawasqanchisrayku.

¹⁵ Cristiano kaymanta t’aqakuqkunamanta rimaspan Pedro nirqan: “Cheqaq ñanmanta waqllispan chinkapunku”, nispa (2 Ped. 2:15). ¡Anchatan agradecekunchis ‘mana kay pacha espiritutachu chaskisqanchismanta, aswanpas Diosmanta kaq espirituta’! (1 Cor. 2:12.) Sichus dejallasun Diospa espiritun ñoqanchispi kananta, Dioswantaq yanapachikusun chayqa, allin ñanllantan purisun kay millay pachaq espirituntataq atipasun (Gál. 5:16).

Santo espirituqa allintan rurun

16. ¿Imakunatan santo espíritu ñoqanchispi rurun?

¹⁶ Diospa espiritunqa allinkunatan ñoqanchispi rurun, chaymi tawa kaq razón chay espirituta necesitananchispaq (leey Gálatas 5:22, 23). ¿Mayqen cristianotaq mana munanmanchu munakuyta, q’ochukuyta, llamp’u sonqo kaytapas kawsayninpi rikuchiyta? ¿Pipaqtaq mana necesariochu kanman pacienciayoq-kayta, sumaq sonqo-kayta, allin runa-kayta kawsayninpi rikuchiy? ¿Pitaq mana kallpachakunanchu iñiyta, llamp’u sonqo-kayta, cuerpo kamachiq kaytapas wiñachinapaq? Santo espirituq rurusqanqa yanapawanchismi allin runa kananchispaq, chayqa familianchispa iñiqmasinchiskunaq allinninpaqmi. Mana p’itiytan chaytaqa ñoqanchispi wiñachishanallanchis, atisunmanmi kawsayninchispi aswan allin runa kayta.

17. ¿Imaynatan astawan espirituq rurunta ñoqanchispi wiñachisunman?

¹⁷ Tapukunanchismi: “¿Rikuchinchu rimasqay ruwasqaypas santo espirituwan pusachikusqayta, kawsayniypi rurusqantapas?”, nispa (2 Cor. 13:5a; Gál. 5:25). Yaqapaschá wakillanpipas allinyananchis kashan. Chhayna kaqtinqa, ¿imatan ruwananchis? Diospa espiritunwanmi yanapachikunanchis allinyananchispaq. ¿Imaynata? Bibliata qelqanchiskunata estudiaspan yuyaymanananchis kawsayninchispi imayna yanapachikunanchispaq, kallpachakunanchistaq aswan allinta rurunanchispaq. * Ñoqanchistapas iñiqmasinchiskunatapas imaynatachus espíritu yanapawasqanchista qhawarispan entiendenchis, imarayku chaywan pusachikuy ancha importante kasqanta.

¿Pusachikushanchischu Diospa espiritunwan?

18. ¿Imaynatan Jesús chaskikurqan santo espirituq yanapayninta?

¹⁸ Jehová Dios universota kamaqtinqa Jesusmi  ‘llank’aysirqan’. Chayraykun payqa allinta yacharqan Hallp’api kaq magnetismo nisqamanta, chay kallpan runakunata yanapan brujulawan orientakunankupaq (Pro. 8:30; Juan 1:3). Bibliaqa manan willanchu Jesús kay pachapi kashaspa chay kallpawan orientakusqanta. Ichaqa willanmi kawsayninpi santo espíritu sinchi atiyniyoq kasqanta reparasqanta. Payqa munaqmi yanapananta chaymi imatapas ruwananpaq kallpachaqtinqa usqhaylla ruwaq (Mar. 1:12, 13; Luc. 4:14). ¿Chhaynatachu ñoqanchispas ruwanchis?

19. ¿Imatan ruwananchis santo espíritu kawsayninchispi pusariwananchispaq?

¹⁹ Espirituwan tukuy kawsayninkupi pusachikuy munaqkunatan chay kallpaqa yanapan. ¿Imatan ruwananchis yanapawananchispaq allin ñanninta pusawananchispaqpas? Sapa kutillan Diosmanta mañakunanchis espiritunta qowananchispaq, chaywan pusawananchispaqpas (leey Efesios 3:14-16). Chaymantataq mañakusqanchisman hina ruwananchis, chaypaqmi Bibliapi yuyaychaykunata maskhananchis, chayqa santo espirituq yanapayninwanmi qelqakurqan (2 Tim. 3:16, 17). Kasukunanchismi Bibliapi kamachikuykunata, pusachikunanchistaqmi santo espirituwan. Arí, kawsayninchispiqa rikuchisunpuni Diospa pusariwananchispi confiasqanchista, payllan yanapawasun kay millay pachapi allinta purinanchispaq.

[Uranpi willakuykuna]

¿Imakunatan yacharqanchis?

• ¿Imaynatan santo espíritu kawsayninchispi yanapawanchis?

• ¿Ima tawa razonkunaraykun Diospa espiritunta necesitanchis?

• ¿Imatan ruwana espirituq pusariwasqanchis allinninchispaq kananpaq?

[Tapuykuna]

[15 paginapi dibujo]

Jesusqa tukuy ruwasqanpin Diospa espiritunwan pusachikurqan

[17 paginapi foto]

Espirituqa sonqonchistan kallpachan ruwananchispaq, yuyayninchistapas pusarin