Kusisqalla kashay onqosqaña kaspapas

¿HAYK’AQLLAPAS rikch’arirqankichu chay p’unchay ch’isiyarunantaña munaspa? Huk p’unchaytawanmi atipanayki karqan onqoyniykita otaq ima llakikuyniykitapas. Yaqapaschá Job hina sientekurqanki, paymi nirqan: “Aswanpas wañukapusaq kawsanaymantaqa”, nispa (Job 7:15). Ichaqa, ¿unay tiempo chhaynapi tarikuwaq chayri? Iman yanapasunkiman.

Chhaynapin tarikurqan Mefiboset, payqa Davidpa amigon Jonatanpa wawanmi karqan. Phisqa watayoq kashaqtinmi pampaman urmaspa “wist’u kapurqan” (2 Sam. 4:4). Tiempowanmi reyta traicionaymanta yanqa tumpasqa karqan, chayraykun llakisqa tarikunman karqan wist’u tarikusqanmantapas. Ichaqa allin ejemplon karqan onqoykunata, tumpasqa kayta, llakikuykunatapas atipaq kasqanmanta, chhaynapi tarikushaspapas kusisqalla kasqanrayku (2 Sam. 9:6-10; 16:1-4; 19:24-30).

Apóstol Pablopas allin ejemplon karqan. Huk kutinmi qelqarqan ‘khiska t’ipasqa hina nanay cuerponpi’ kasqanmanta (2 Cor. 12:7). Chay khiskaqa imawanpas onqosqa kasqanmi kanman karqan otaq apóstol kaspa llank’asqanmanta runaq rimasqanta aguantanan karqan. Imaynaña kaqtinpas sasachakuyninqa manan chinkarqanchu, chaymi onqoyninwan kawsanan karqan, hinallataq chay hawa llakikuyninwan (2 Cor. 12:9, 10).

Kay tiempopipas mana hampiy atina onqoykuna hawa otaq llakisqa tarikusqankun wakin Dios serviqkunata ñak’arichin. 18 watayoq kashaqtinmi Magdalenata tarirqanku lupus eritematoso sistémico nisqata. Chay onqoy hap’iwaqtinchisqa cuerpopi defensakunan organismonchista atacan. Paymi nin: “Sinchi manchasqan kasharqani. Nishutan onqoyniy yapakurqan, hinan mikhusqayta mana organismoy chaskiqchu, simiypi úlcera hap’iwarqan, hinallataq tiroides onqoypas”. Izabelaq onqoyninqa mana reparayñataqmi karqan. Paymi nin: “Huch’uyniymantapachan depresión onqoywan karqani, chaymi sinchi manchakuy hap’iwan, manan samayta atinichu otaq wiksaypi calambre hap’iwan. Mana kallpayoqtan saqewan”, nispa.

Onqoywan kawsay

Onqoykunaqa manan allintachu kawsachiwanchis. Chhayna kaqtinqa, allinmi kanman imaynapi tarikushasqanchista qhawarikuy. Mayninqa sasan maykamalla atisqanchista reconocey. Magdalena nin: “Sasachakuyniyqa astawanmi yapakun, mayninpiqa sinchi sayk’usqan tarikuni, chaymi mana camaymanta hatariytapas atinichu. Hinaspapas, manataq hayk’aq onqonayta yachanichu chayqa, manan imata ruwanaypaqpas ñawpaqmanta planeayta atinichu. Astawanqa llakikuni manaña ñawpaqpi hinachu Diosta serviy atisqaymantan”, nispa.

 Zbigniew nin: “Watakunaq pasasqanman hinan, artritis onqoy kallpayta pisiyachiwan, tulluykunata pisi-pisimanta huñuspa. Mayninpiqa, nishu inflamasqa kaspan mana imatapas ruwayta atinichu. Chayraykun sinchi llakisqa tarikuni”, nispa.

Qayna ura watan Barbaraq umanpi tumorta tarirqanku. Pay nin: “Qonqayllan cuerpoypi cambiokuna kan. Mana kallpayoqmi tarikuni sapa kutillanmi umaypas nanawan, manataqmi imamanpas yuyayta churayta atinichu. Mana lliwtapas ruway atisqayta reparakuspaymi kawsayniypi ima ruwanayta qhawarikunay karqan”, nispa.

Ñawpaqpi qhawarimusqanchis runakunaqa Jehová Diosta serviq cristianokunan kanku, paykunaqa kallpachakunkun munayninta ruwanankupaq. Tukuy sonqon Diospi confianku, yanapaynintataq sumaqta qhawarinku (Pro. 3:5, 6).

¿Imaynatan Jehová yanapan?

Ima onqoyniyoqpas kaspaqa manan yuyaykunanchischu Dios mana allinpaq qhawariwasqanchista (Lam. 3:33). Yuyarinanchismi Job ‘chanin runa’ kashaspapas imaynapi tarikusqanta (Job 1:8). Diosqa manan pitapas mana allinkunawan pruebaman churanchu (Sant. 1:13). Lliw onqoykunapas imaymana llakikuykunapas ñawpaq tayta-mamanchiskunaq saqewasqanchismi (Rom. 5:12).

Jehová Dioswan Jesuswanqa yanapanqakupunin chanin runakunata (Sal. 34:15). Astawanqa, sasachakuypi tarikuspan reparanchis Diospa ‘yanapayninta, pukara’ qaqa hina kasqanta (Sal. 91:2). Chhaynaqa, sichus mana hampiy atina onqoyniyoq kasunman chayqa, ¿iman yanapawasunman kusikuyninchis ama chinkananpaq?

Mañakuy: Ñawpaq tiempopi Dios serviqkuna hinan ñoqanchispas llakikuyninchiskunata Diosman saqesunman paywan rimaspa (Sal. 55:22). Chhaynapin ‘Diosqa thak-kayta qowasun runakunaq mana aypay atisqan thak-kayta’, chay thak kaytaq ‘sonqonchistapas yuyayninchistapas [...] waqaychanqa’ (Fili. 4:6, 7). Magdalenaqa onqoynintan aguantan Diosmanta tukuy sonqo mañakusqanrayku.  Paymi nin: “Sonqoyta payman kicharisqaymi thak sientekuni kusisqataq kanpas. Kunanqa entiendenin Diospa yanapayninta sapa p’unchay necesitasqayta”, nispa (2 Cor. 1:3, 4).

Mañakusqanchista uyarispan Diosqa santo espiritunwan kallpachawasun, Simin Qelqawan, iñiqmasinchiskunawanpas. Manan suyasunmanchu onqoyninchista milagrota ruwaspa chinkachinanta; ichaqa chaskisunmanmi yanapayninta ima llakikuyninchistapas aguantanapaq (Pro. 2:7). Bibliaq nisqan hina, paymi ‘hatun atiyta’ qowasun (2 Cor. 4:7).

Familia: Familiapi sumaq kawsay khuyapayakuq kaypas yanapanmi onqoywan kawsanapaq. Familianchis chaypiña kashankuman yanapawananchispaq chaypas, paykunapas ñoqanchis hinan llakikunku, chaymi mayninpiqa mana ima ruwaytapas atinkuchu. Kuska mañakuymi llapa familiata yanapanqa thak kawsay kananpaq (Pro. 14:30).

Barbaran ususinmanta iñiq t’aqapi sipaskunamantawan nin: “Paykunaqa kusatan yanapawanku predicacionpi. Kallpachawanmi sumaqta llank’asqanku”, nispa. Zbigniew iñiqmasinchisqa anchatan valoran esposanpa yanapayninta, ninmi: “Paymi wasipi yaqa llapa ruwanakunata ruwan. Chaymantapas, yanapawanmi p’achakunaypaq, maletinniytataq apaysiwan huñunakuykunaman predicaq ima riqtiyku”, nispa.

Iñiqmasikuna: Iñiq t’aqapi iñiqmasikunawan kayqa, anchatan kallpachawanchis consolawanchispas. Ichaqa, ¿iman suceden pipas onqosqanrayku mana huñunakuyman riyta atiqtin? Magdalena nin: “Iñiqmasikunan huñunakuykunapi yachachikusqanta grabapuwanku. Chaymantapas, visitamuwankun imakunapiraq yanapawanankupaq. Wakintaq cartakunata apachimuwanku. Ñoqamanta yuyarispa interesakusqankun yanapawan aguantanaypaq”, nispa.

Izabela kayta nin: “Iñiq t’aqapiqa askha taytaykuna mamaykunan kan, paykunan uyariwanku entiendewankutaq imayna sientekusqayta. Familiayqa iñiq t’aqapi kaqkunan, chaypin thak kusisqa kani”, nispa.

Sasachakuykunapi tarikuqkunaqa manan hukkunamanta t’aqakunankuchu, aswanpas  iñiq t’aqawanmi huñukushallanku (Pro. 18:1). Chhaynapin hukkunatapas kallpachanqaku. Yaqapaschá qallariypiqa necesitasqankumanta iñiqmasikunaman willakuyta iskayyankuman. Ichaqa, sut’inta willaqtiykiqa agradecekusunkikun ‘munanakuyninkuta’ rikuchinasuykikupaq oportunidadta qosqaykirayku (1 Ped. 1:22). Chhaynapi tarikuspaykiqa, niwaqmi huñunakuyman rinaykipaq yanapaynin necesitasqaykita, paykunawan predicaq lloqsiy munasqaykita, otaq llakikuyniykimanta parlay munasqaykita. Ichaqa manan iñiqmasinchiskunataqa mat’ipayananchischu, aswanpas agradecekunanchismi yanapayninkuta.

Allin yuyaywan qhawarisun: Mana hampiy atiy onqoykunata kusisqalla aguantanapaqqa makinchispin kashan. Sinchi llakisqa kayqa mana allin yuyaykuymanmi apan. Biblian nin: “Onqosqataqa kawsayta munasqanmi kallpachan, ichaqa, ¿pitaq kallpachanqa llakiq ñit’isqantari?”, nispa (Pro. 18:14).

Magdalena nin: “Anchatan kallpachakuni ama sasachakuyniypi nishuta yuyaykunaypaq. Allin kashasqay tiempotaqa sumaqtan pasarini. Mana hampiy atina onqoyniyoq kashaspapas hunt’aq sonqo kaq iñiqmasikunaq experiencianta leeymi kallpachawan”, nispa. Izabela iñiqmasinchistaqa kallpachanmi Jehová Dios payta munakusqan anchata valorasqantapas yachay. Pay nin: “Necesitasqa kasqaytan qhawarini Diosta servispay, yachanitaqmi pipaq kawsanayta. Chaymantapas, kanmi hamuq tiempopaq sumaq suyakuyniy”, nispa.

Zbigniew nin: “Onqoyniywanmi yacharqani huch’uyaykukuq kayta, kasukuq kayta, allin yuyaywan imatapas ruwayta, Diosta kusisqa serviyta, kikiyta ama khuyapayakuytapas. Chaymantapas, kallpatan hap’irqani astawan espiritualpi wiñarishanallaypaq”, nispa.

Diosqa yachanmi imayna aguantasqaykita khuyapayakuqtaqmi kanpas. Yuyariy: “Diosqa chaninpunin, payqa manan qonqanchu ruwasqaykichiskunataqa, iñiq wawqe-panakunata yanapaykuspa payta munakusqaykichistapas” (Heb. 6:10). Diospa kay promesanpi tukuy sonqo confiay: “Manan saqerparisqaykichu, manataqmi wikch’urparisqaykipaschu” (Heb. 13:5).

Sichus hayk’aqllapas llakisqa sientekunki chayqa, mosoq pachapi sumaqta kawsanaykipi yuyayniykita churay. Pisi tiempollamantan ñawiykiwanpuni rikunki Diospa Gobiernon sumaq bendicionkunata kay Hallp’aman apamusqanta.

[28, 29 paginakunapi fotokuna recuadropiwan]

Onqosqa kashaspapas predicashallankun

“Manañan callepi sapallay puriyta atinichu, chaymi esposaywan otaq huk hermanowan predicaq lloqsiyku. Umallaypin hap’ini ima nispa rimay qallarinayta, hinallataq textokunatapas.” (Jerzy, manan ñawin rikunchu.)

“Telefonomanta predicaspa cartakunatan qelqani, hinallataq wakin yachay munaq runakunawan cartapi qelqaspa rimanakuyku. Hospitalpi kashaspayqa camaypa ladonpin saqenipuni Bibliata huk qelqanchiskunatapas. Chaymi askha kutipi yanapawarqan allinta parlarinaykupaq.” (Magdalena, lupus onqoyniyoq.)

“Wasin-wasinta predicaymi gustawan, ichaqa mana lloqsinaypaq hinachu sientekuni chayqa, telefonomantan predicani.” (Izabela, depresión clínica onqoyniyoq.)

“Gustawanmi revisitakuna ruway estudiokunata qoq iñiqmasikunata acompañaypas. Allin sientekusqay p’unchaykunaqa rinin wasin-wasinta predicaq.” (Barbara, umanpi tumor hap’in.)

“Revistakunatan pisillata apani, hinan predicashallani sinchita nanawaqtin manaña atinaykama.” (Zbigniew, artritis onqoyniyoq.)

[30 paginapi foto]

Wayna-sipaskunapas kurakkunapas kallpachankumanmi