Jehová Diosta yupaychananpaq llaqtanpa ruwasqanta yuyariyqa ancha munaymi, chaykunamantaqa manan qelqanchiskunata leespallachu yachanchis, yachallasunmantaqmi fotokunamanta, cartakunamanta, kawsayninkumanta cristianokunaq willakusqanmanta, hinallataq predicanapaq imaymana cosaskuna utilizasqanchismantapas. Ichaqa, ¿imapaqmi serviwanchis chay cosaskunata waqaychay chaykunamanta yachaypas? Ñawpa tiempopin Israel llaqtapi familiapi umalliqkuna wawankuman yachachinanku karqan Diospa kamachikuyninmanta admirakunapaq hina ruwasqankunamantapas, chhaynapi paykunapas ‘Diosman sonqollikunankupaq’ (Sal. 78:1-7).

Ñawpa tiempopiqa Diospa munaynin hunt’akunanpaqmi waqaychasqa kaqkunata t’aqwispa sut’incharqanku. Ejemplopaq, Jerusalén llaqtapi templota hukmanta hatarichishaqtinkun Diospa llaqtan contra hatariqkuna tatichiyta munarqanku, chaymi t’aqwirikurqan Media hap’iypi Ecbatana llaqtapi kaq qelqakunata, chaypin tarirqanku templota hatarichikunanpaq rey Ciroq kamachikusqan documentota (Esd. 6:1-4, 12). Chhaynapin chay llank’ayqa hunt’akurqan Jehová Diospa nisqanman hina. Lucaspas ‘allintapunin t’aqwirqan’ tiemponpi kaq waqaychasqa documentokunata (Luc. 1:1-4).

Diosta servisqanchispiqa imaymanakunatan ruwarqanchis, chaykunapin Umalli T’aqamanta cristianokuna anchatapuni interesakunku. Paykunamanta hukninkun nirqan: “Mayman risqanchista  yachananchispaqqa, maymanta hamusqanchistan yachananchis”, nispa; chaytaqa nirqan chaykunata waqaychay importante kasqanraykun, hinallataq hukkunapas yachananku kasqanrayku. Chaymi Brooklyn (Nueva York) llaqtapi huk mosoq departamentota chayllaraq kichakun: Qelqasqamanta Waqaychasqakuna, nisqata. Chaytan umallinku Yachachikuykuna Qelqaymanta Encargakuqkuna.

FOTOKUNA HUKKUNAPAS

Tiempoq pasasqanman hina ima ruwasqanchispas yuyarinallapaqña, chayrayku, ¿pin mana waqaychayta munanmanchu karqan familianpa fotonkunata? Chayraykun Dios servisqanchispi imaymana cosaskuna utilizasqanchista waqaychakunanpaq allinta llak’akushan. Chaypi waqaychasqa fotokunataqa “familianchispa fotonkunata” hinan qhawarisunman. Chaymantapas waqaychakushanmi chayllaraq lloqsimuq qelqanchiskunata, kawsayninkumanta ancha kusikunapaq willakusqankuta, curioso kaspa imakuna ruwasqankupas. Lliw ñawpaqpi kaqninchiskunan yanapawanchis Dios serviyninchispi imakuna ruwasqanchismanta yachanapaq, Diosta serviqkuna qhepaman imaynapi tarikunankutapas.

Invitaykikun Qelqasqamanta Waqaychasqakunata qhawaq rinaykipaq, hinaspa visitawashaqpas hina, Qhawaq revistapi chaykunata t’aqwirinaykipaq. Chaymi mayninpi lloqsimunqa “Waqaychasqanchiskuna” nisqa sutiwan. Qatimuq revistapin huk sumaq tema lloqsimunqa, chaypin kay tapuykunata kutichinqa: ¿Iman karqan “auroramóvil”? ¿Pikunan utilizaqku? ¿Hayk’aqmi chayta utilizakurqan, imapaq?

Familiamanta fotokuna hinan, Qelqasqamanta Waqaychasqakunapi tarikuq cosaskunaqa imaymanatan willawanchis. Chaykunan: Diospa llaqtanmanta, ñawpaqpi Diosta serviqkunamanta, paykunaq iñiyninkumanta valorniyoq kasqankumanta, munakuq Jehová Diosninchista servispa kusikuypi sasachakuykunapi tarikusqankumanta, hinallataq llaqtanta Dios imayna pusasqanmanta yanapasqanmantapas (Deu. 33:27). Chay cosaskuna allin waqaychasqa kananpaqmi allinta llank’ashanku, chay ruwasqankutaqa Diosmi bendecinqa, chayqa kallpachawasunmi hukllachawasuntaq Diospa munayninta ruwananchispaq.

[31 paginapi foto recuadropiwan]

Kashallantaqmi

Qelqanchiskunata, videokunata, Bibliamanta huk qelqakunatapas preparakuqtinqa, investigaqkuna, dibujaqkuna, hukkunapas, chaypi kaq waqaychasqakunatan t’aqwirinku. Chayraykun Qelqasqamanta Waqaychasqakuna, nisqapi llank’aq iñiqmasikuna chay cosaskunata huñushanku sucursalkunamanta, Betel wasikunamanta, iñiq t’aqakunamanta, institucionkunamanta hukkunamantapas. Yachasunchis wakin llank’asqankumanta:

Adquirisqakuna, t’aqwiriypas. Sapa kutillanmi imaymana cosaskunata huñushanku. Unay wataña Diosta serviq familiakunan mayninpiqa qomunku otaq mañamunkupas. Chay cosaskuna imayna kasqanta qhawaspa, tupanachispa iman astawan yachanchis Diospa llaqtanmanta, chay tiempopi kawsaq cristianokunamantapas.

Ordenasqanku. Huñusqanku cosaskunaqa waranqanpiñan kashan, wakinqa pachak wata más watayoqñan. Chay cosaskunaqa imaymana clasen imaymana sayayniyoqtaq, chaymi allinta ordenakunan qhepaman chaykunata investigakunanpaq.

Allichanku, cuidanku. Wakin librokunatapas, ratolla malograkuq cosaskunatapas sumaqtan allichanku, allin waqaychasqan kashanpas. Documentokuna, fotokuna, noticiapi lloqsimuqkuna, peliculakuna huk grabacionkunatapas computadorapin waqaychanku. Chhaynapin chaykunata qhawayta atikun chay cosaskunata mana hap’ispalla .

Allin waqaychasqa. Waqaychana cosaskunataqa ordenpin hap’ikun, hinallataq allinta waqaychakun mana malograkunanpaq hina. Chaymantapas chaypi kaqkunatan computadorapi qelqakun, ahinapi maskhaspa tarinapaq, chaykuna ama chinkapunanpaqpas. Chhaynatan ñawpaq tiempomanta valorniyoq kaqninchiskunata waqaychakushan.

[32 paginapi fotokuna]

1) Foto-Dramata qhawanapaq propaganda. 2) Revistata chaskinapaq hoja. 3) Parlanteyoq carro. 4) 15 de abril 1912 The Watch Tower. 5) J. F. Rutherford carcelman haykunanpaq orden. 6) WBBR radioq microfonon. 7) Tocadisco. 8) Librokunapaq maletin 9) Anotanapaq hoja. 10) J. F. Rutherfordpaq telegrama