“¿Atiymanchu predicayta?”

Pachantinpi askha cristianokunan sinchi onqosqa tarikuspapas tukuy sonqo predicashallanku. Chhaynapin tarikun Dalia cristiana, paymi tiyan Lituania nacionpi Vilna llaqtapi.

Daliaqa 35 watanpi hinan kashan. Naceqtin hinan ataque cerebral nisqa hap’irqan, chaymi cuerpon mana kuyuripurqanchu nitaq rimaytapas atipurqanchu. Chaymi paywan tiyaq familiankunalla rimasqanta entiendeqku astawanqa maman Galina, paymi cuidan. Kawsayninpi imaymana mana allinkunapiña tarikurqan chaypas, manan pisipanchu. ¿Imaynatan atipan?

Mamanmi nin: “1999 watapin, visitamuwarqanku primay Apolonija, payqa Testigon karqan. Bibliamanta allin yachasqantan repararqayku. Daliaqa askha tapuykunatan ruwarqan, chaymantataq Biblia estudiayta munarqan. Mayninpiqa ususiywan kuskan tiyaq kani rimasqanta entiendechinaypaq. Ñoqaqa rikurqanin chay yachasqan payta yanapasqanta, chaymi ñoqapas Biblia estudiayta munarqani”, nispa.

Bibliaq yachachikuyninkunata astawan endiendespanmi Daliaqa huk tapuypa kutichiyninta yachaytapuni munaq, hinan Apolonijata tapurqan: “Khayna onqosqa kaspay, ¿atiymanchu predicayta?” nispa (Mat. 28:19, 20). Hinan payqa “thak” niyachirqan: “Ama manchakuychu Diosmi yanapasunki”, nispa. Chhaynataqmi karqan.

¿Imaynatan predican? Cartakunata qelqaspan Bibliamanta yachachin. Chaypaqmi yanapachikun askha cristianakunawan, paykunan imachus niy munasqanta qelqanku. Chaymantapas telefonontan mensajeta apachin. Allin p’unchay kaqtintaq iñiq t’aqamanta wakin cristianokuna parquekunaman callekunaman apanku predicamunanpaq.

Daliaqa mamanwanmi iñiyninkupi wiñashallarqanku, chaymi 2004 watapi noviembre killapi bautizakurqanku. Watakuna qhepamanmi polaco rimaq t’aqata yanapakurqanku, chay t’aqaqa 2008 watapi setiembre killapin qallarirqan chaymi yanapanata necesitasharqan. Dalian nin: “Maynin killakunapiqa sinchitan llakikuni manaraq predicaq lloqsisqaymanta. Ichaqa Diosmantan mañakuni, chaymi pipas kanpuni predicaq pusawananpaq”, nispa. Imayna tarikusqanmantan nillantaq: “Onqosqayraykun cuerpoy mana kuyurinchu, yuyayniymi ichaqa funcionashallan. Anchatan kusikuni Jehová Diosmanta hukkunaman yachachispa”, nispa.