Tukuy tiemponwan predicaq Charlotte White cristiana, Louisville (Kentucky, Estados Unidos) llaqtaman llantakunayoq maletantin chayaqtinmi runakuna qhawayurqanku.

WHITE cristianan 1908 watapi “auroramóvil” nisqata apaspa runakunata admirachirqan, chayllaraqmi chayqa lloqsimurqan. Paymi nin: “Runakunan rikuwaspa rimayta qallarirqanku, admirasqataq qhawaywarqanku”, nispa.

Jehová Diospa testigonkunaqa chay kutipin reqsisqa karqanku Biblia Estudiaqkuna nispa, paykunaqa entienderqankun Bibliata allinta t’aqwisqanku cheqaq yachasqankuta hukkunapas yachananku kasqanta. Askhan Bibliaq yachachikuyninkunata entienderqanku La Aurora del Milenio nisqa qelqakunaq yanapayninwan (qhepamanqa Estudios de las Escrituras nispan reqsikurqan). Llapa munaqkunapas atiqkunapas lliw llaqtakunaman viajaspan chay “Biblia Estudiaqkunata yanapaq” qelqakunata munachimuqku cheqaq yachayta munaq runakunaman.

1908 watapin White cristiana huk predicaqkunawan kuska munachirqanku telawan huñusqa hojakunayoq soqta librokunata 1.65 dolarpi. Manan kaq ratollachu librokunata qoqku, aswanpas anotaqkun ima librokuna munasqankuta qhepaman kutinankupaq, astawanqa qolqe chaskisqanku p’unchaykunapi pisi qolqellapaq saqemunankupaq. Chayraykun predicasqankuta hark’akuq huk runapas phiñakurqan chay librokuna nishu barato kasqanmanta.

Malinda Keefer cristianan yuyarirqan 200, 300 librokunata huk semanallapi mañakusqankuta. Ichaqa askha runakuna chay qelqakunata munasqankurayku huk sasachakuy karqan. Ejemplopaq: soqta  kaq lloqsimuq librollan 740 paginakunayoq karqan. Chaymi The Watch Tower revistaqa reconocerqan 50 librokuna 18 kilota pesasqanta, chaymi entreganankupaq apakachay hermanakunapaq sasa karqan.

Chay qelqakunata facilta entreganankupaqqa, James Cole cristiano maletaq tiyananpaq hina armarqan fierromanta llantakunayoqta, chaytan tornillokunawan hap’ichikuq. Manaña hunt’a librokunayoq cajakunata apakachana kaqtinmi chayta inventaq hermano nirqan: “¡Manañan kunanqa wasay p’akikunqañachu!”, nispa. 1908 watapi Cincinnati (Ohio, Estados Unidos) llaqtapi Hatun Huñunakuy apakusqanpitaq presentamurqan, chaypi kaqkunaqa anchatan kusikurqanku. Maletaq iskaynin waqtanpitaq auroramóvil nirqan (inglespi Dawn-Mobile) chaytaqa nikuq La Aurora del Milenio nisqa qelqakunata chay maletapi apakusqanraykun. Pisi-pisimantan chay maletataqa hunt’a librokunayoqta huk makillawan apay fácil karqan. Chay maletata aysanapaqqa atikuqmi wichachikuyta uraychikuytapas, hinaspapas maynintapas purichinallan karqan. Predicación tukuyta wasiman kutipunapaqqa atikuqmi maletinpa huknin waqtanman llantankuna doblakuyta, chhaynapi chakipi otaq carropi kutipunapaq.

Tukuy tiemponkuwan predicaq cristianakunaqa gratisllan chay maletata chaskiqku, wakin publicadorkunataq 2.50 dolarta pagaspa. Fotopi kaq Keefer cristianan allinta apayta yacharqan chay maletata, chaymi hunt’a librokunayoqta huk makillanwan apaq, huk lado makinpitaq hunt’a librokunayoq carterata. Pensilvaniapi tarikuq minaq kasqan llaqtapin askha runakuna qelqakunata munarqanku, chaymi entregana p’unchaypiqa kinsa otaq tawa viajeta ruwaq huk puententa pasaspa.

1980 watakuna tukushaqtinmi, avión manejaq runa inventarqan kay tiempopi rikusqanchis aeropuertokunapi, hatun llaqtakunapipas llantakunayoq maletata. Ichaqa pachak wata ñawpaqtaraqmi Biblia Estudiaqkunaqa Diosmanta cheqaq yachachikuykunata apanankupaq, auroramóvil nisqata apaspa runakunata admirachirqanku.

[32 paginapi willakuy]

Librokunata entregananpaqmi Keefer cristiana kinsa otaq tawa viajeta ruwanan karqan huk puententa pasaspa

[32 paginapi willakuy]

‘Qelqakunata facilta entreganankupaq inventarqan’