Valorwan Diosmanta rimarqanku

Cheqaq cristianokunaqa qatiykachasqa kasqankupin mana manchakuq kasqankuta rikuchinku, chaykunamantan willashan “Testimonio cabal” del Reino de Dios; Los testigos de Jehová, proclamadores del Reino de Dios nisqa librokuna. Ñawpaq siglopi cristianokuna hinan Diospa santo espiritunta mañakunchis, Simin Qelqamanta valorwan rimananchispaq yanapaynintapas (Hech. 4:23-31).

Primera guerra mundial kashaqtin predicakusqanmantan huk cristiano nin: “Diosta serviqkunaqa tukuy sonqowan valorwanmi The Finished Mystery (El misterio terminado) librota askhatapuni rakiranku, chay libroqa Estudios de las Escrituras libromanta qanchis kaq t’aqanmi karqan. 1918 watapin Kingdom News (Noticias del Reino) ñawpaq kaq tratado lloqsimurqan. Chaymantataq iskay kaq tratado, chaypin willakurqan imarayku autoridadkuna The Finished Mystery libro rakikunanpaq hark’asqankuta. Qhepamanmi lloqsimullarqantaq kinsa kaq tratado. Chaytan hanaq pachapaq akllasqa cristianokuna askhata rakiranku, chaypaqqa iñiyta valortawanmi necesitakurqan”, nispa.

Kunanqa allintan mosoq publicadorkunata preparakun predicaq lloqsinankupaq, ñawpaqpin ichaqa mana chhaynachu karqan. Polonia nacionmanta Estados Unidospi tiyaq cristianon 1922 watapi chayllaraq predicasqanmanta yuyarispa nin: “Manan qelqakuna imayna rakiyta atirqanichu, inglestapas manan allintachu rimarqani, chaywanpas huk doctorpa atiendesqan punkutan takaykurqani, hinan huk enfermera kichamurqan. Manan chay kutipi sucedewasqantaqa qonqasaqchu, munaranin predicayta ichaqa manchakuranitaqmi. Maletinniyta kichaqtiymi lliw qelqakuna enfermeraq chakinman urmarqan. Manan yuyanichu ima nisqayta, ichaqa chaskiwaranmi huk librota. Chay qhepamanqa valortan hap’irqani, rikurqanitaqmi Dios bendeciwasqanta. Chay tiendakunaq kasqan callepiqa askha folletokunatan chay p’unchay saqerani”, nispa.

Huk cristianan nirqan: “1933 watakunapiqa askha cristianokunan parlanteyoq carrota utilizaqku predicanankupaq”, nispa. Huk kutinsi huk casarasqa cristianokunawan California (Estados Unidos) llaqtaq hawa llaqtakunapi predicasqaku. Paymi nin: “Qosanmi moqo pataman carrontin rirqan, ñoqaykutaq llaqtapi qhepakurqayku. Parlante waqamuqtinqa hanaq pachamantapas huk kunka uyarikunman hinan karqan. Llaqtapi runakunaqa maskharqankun chay hermanota ichaqa manan tarirqankuchu. Chay grabación waqayta tukumuqtintaq ñoqaykuqa wasinkuman visitaspa Diosmanta yachachimurqayku. Chaymantataq parlanteyoq iskay carrokunawan predicarqani, ichaqa askha runakunan mana uyariyta munarqankuchu. Chaywanpas  uyarirqankupunin, parlanteq waqasqanqa wasinku ukhumanraqmi uyarikurqan. Chhaynata predicanapaqqa mana manchakuqmi kana karqan, ichaqa chaywanqa Diospa sutintan hatunchakusharqan. Diosqa necesitakusqanman hinan huk niraymanta predicachiwanchis”, nispa.

1930 watakunapi hinallataq 1940 wata qallariypipas tocadiscokunawan, grabasqa discursokunawan iman predicakurqan. Huk cristianan willakun: “Huk sipasmi wasin-wasinta tocadiscowan predicasharqan. Huk wasipunkupi tocadiscota uyarinanpaq churaqtinmi, chay wasipi tiyaq runa phiñakurqan, chaymi tocadiscota hayt’aspa wikaparqan, ichaqa manan huk discopas p’akikurqanchu. Chay sucedesqantan rikumusharqanku camión ukhupi mikhushaq kinsa runakuna, hinan chay cristianata waqyamuranku discota uyarichinanpaq, mañakurqankutaqmi qelqakunatapas. Chayqa ñawpaqpi ruwasqankumantan kusichirqan”, nispa. Chhayna sasachakuykunata atipanapaqqa valortan necesitakurqan.

Chay cristianan nillantaq: “1940 watapin callekunapi revistawan predicayta qallarirqayku. Ñawpaq tiempopiqa callepin filapi puriqku letrerota apaspa, chaypin niq: ‘Religionqa seq’okuq waskha hinan, engañakuq ima, Diosta, Rey Cristotawan serviychis’, nispa. Chaymantapas tratadokunatan gratislla runakunaman rakillaqkutaq. Valortan chaypaqqa necesitakurqan, ichaqa Diospa sutinmanta llaqtanmantawan runakuna yachanankupaqmi chhaynata predicakurqan”, nispa.

Huk cristianan nillantaq: “Callekunapi revistata munachiyqa sasan karqan. Chay tiempopiqa Testigokuna contran askha kasharqanku [...]. Ancha valorniyoqmi kana karqan calleq esquinanpi revistata hap’ispa kasqan simikunallata qapariyqa. Ichaqa manan huk sabadopas chay ruwaytaqa saqeraykuchu. Mayninpiqa allintan chaskiwaqku; wakintaq grupopi phiñasqa muyuykuwaqku chaymi mayninpiqa ayqekunayku kaq”.

Segunda guerra mundialpi qatiykachasqaña karqanku chaypas, Jehová Diospa testigonkunaqa valorwanmi predicarqanku. Predicanankupaq huk campaña ruwasqankutan suticharqanku “Valor” nispa, chaymi aparikurqan 43 p’unchaykuna, 1940 wata 1 diciembre killamanta 1941 wata 12 enero killakama. Chaypin Estados Unidosmanta phisqa chunka waranqa publicadorkuna rakirqanku pusaq millón folletokunata.

Kuraq cristianokunan yuyarinku ñawpa tiempopi predicanankupaq valor necesitakusqanta. Wakinmi ninku valorniyoq kasqankuta qhepamanpas rikuchishallasqanta, chaytan rikuchiqku “mana manchakuspa punkunkuman chayasun”, nispa sapa kutilla askha watakuna nisqankuwan. Ichaqa kay millay pacha tukukunankamaqa yaqapaschá hukniraykunamantapas predicasunraq. Chaywanpas Diospa yanapayninwanqa iñiywan valorwan iman predicashallasun.

[9 paginapi willakuy]

Predicanapaqqa necesitakurqanpunin valorta