“¿Fotota horqomuwankikumanchu?”

Iskay p’unchay hatun huñunakuytan, Josueqa huk hermanokunawan ima Querétaro llaqtapi paseaq lloqsirqanku, payqa México betelpin servirqan. Colombia nacionmanta Javier Maru casarasqakunan visitasharqanku chay llaqtata, chaymi nirqanku fotota horqonanpaq. Josueqa amigokunantin allin p’achasqan karqanku qhasqonkupi tarjetayoq ima, chaymi paykunaqa tapurqanku huk graduacionpi otaq huk hatun fiestapichu kamurqanku chayta. Josueqa willarqanmi Testigokunaq hatun huñunakuyninman risqanta, chaymi invitarqan domingo p’unchay rinankupaq.

Chay parejaqa piensarqanmi huñunakuyman haykuspaqa mana allin qhawarisqa kanankuta, manan chaypaq hina p’achankuta apamusqakuchu. Chaywanpas, Josueqa qosqan sutinta Betelpa telefonontawan.

Tawa killa qhepatan Javierwan Maruwan Josueta telefonopi waqyasqaku asambleaman risqankumanta willanankupaq, paykunaqa México nacionpin tiyashasqaku, munarqankutaqmi Testigokuna visitanankuta, chayta uyarispan Josueqa anchata kusikurqan. Pisi tiempollamantan Biblia estudiayta qallarirqanku, huñunakuykunaman riytapas. 10 killa qhepatan publicador kapurqanku. Qhepamanqa Toronto (Canadá) llaqtamanmi ripurqanku, chaypiqa Biblia estudiayninkupin wiñarirqanku chaymantataq bautizakapurqanku.

Chay qhepamanmi, Josueqa huk cartata chaskirqan Javiermanta, chaypin willarqan Biblia estudiananpaq imachus kallpachasqanmanta. Nirqanmi: “Asambleaq ñawpantaraqmi esposaywan ima rimanakurqayku Diospa yanapaynin necesitasqaykumanta. Qankunaqa allin p’achasqan kasharqankichis, chaymi piensarqayku chay huñunakuyman risqaykichisqa ancha allinpuni kasqanpi. Asambleapiqa admirasqan qheparqayku chaypi kaqkunaq imayna comportakusqankuwan, chaymantapas imayna munakuywanmi tiyachiwarqanku Biblia maskhaytapas yanapawarqankun. Manaña paykuna hina p’achasqachu karqayku chaypas, manan pipas imaniwarqankupaschu”, nispa.

May cheqaqpunin Josuepaqqa karqan rey Salomonpa nisqanqa: “Tutamanta muhuykita tarpuy, ch’isinkamapas llank’ashallaypuni, manan yachankichu mayqenchus aswan allin kananta, ñawpaq tarpusqachus icha qhepakaqchus, icha iskayninchus allinkama kananta” (Ecl. 11:6). ¿Atiwaqchu qanpas muhu tarpuyta asambleaman otaq huk discursoman pitapas invitaspa? Ama qonqasunchu, Jehová Diosqa imaynatapas utilizawasunmanmi Javier Maru hina Diospa yachayninmanta ch’akichikuq runakunata llaqtanman apamunanchispaq (Isa. 55:1).

[32 paginapi foto]

Lloq’emanta pañaman: Alejandro Voeguelin, Maru Pineda, Alejandro Pineda, Javier Pineda Josué Ramírez México sucursalpi