¿Imaynatan hukkunata aconsejanki?

¿Hayk’aqllapas mañakurqasunkikuchu consejota?, yaqapaschá khaynata tapurqasunkiku: “¿Imatan ruwanay?”, “¿Chay fiestaman riymanchu?”, “¿Chay profesionta estudiaymanchu?”, “¿Rimanakuymanchu chay personawan lloqsinaykupaq?”, nispa.

Yaqapaschá pipas yanapayniykita munanman imata decidinanpaqpas, amigonkunawan familianwan astawanqa Dioswan ima kawsayninpi afectaqtin. ¿Imaynatan kutichinki? ¿Imatan ruwanki pimanpas consejota qospa? Imaynaña chay probleman kanman chaypas, Proverbios 15:28 texton aconsejawanchis: “Chanin runaqa allintan yuyaykun kutichinanpaq”, nispa. Kunanqa rikusunchis Bibliamanta pisqa yachachikuykunata consejota qonapaq.

1 Allinta yachay imaynachus kasqanta.

“Manaraq allinta uyarishaspa simita kutichiqqa mana yuyayniyoqmi.” (PRO. 18:13.)

Allin consejota qonapaqqa, yachananchismi imaynapi tarikushasqanta, imayna yuyaykusqantapas. Huk rikch’anachiypi yachasun: sichus pipas telefonopi waqyamusunkiman wasiykiman imaynata chayamunanpaq chayqa. ¿Imatan yachanayki yanapanaykipaq? ¿Niwaqchu mayninta hamunanpaq maypi tarikusqanta mana yachashaspa? Manan riki. Chhaynallataqmi, pimanpas allin consejota qonapaqqa ñawpaqta yachananchis “maypi tarikusqanta”, otaq imayna kashasqanta imayna yuyaykusqantapas. ¿Imatawanraqmi yachananchis? Situacionninta mana allinta yachaspaqa, yaqapaschá consejota qospa astawan pantachipuwaq chay runata (Luc. 6:39).

Averiguay yachachikuykuna maskhasqanmanta. Chaymantapas, consejo mañakuqtan kaykunata tapusunman: “¿Bibliapi ima kamachikuykunan yanapasunkiman situacionniykipi? ¿Imakunapin allin imakunapitaqmi mana allin kanman chaykuna yuyaykusqaykimanta? ¿Ñachu qelqakunapi yanapayta maskharqankiña? ¿Imaynatan yanaparqasunkiku umalliqkuna, tayta-mamayki Bibliamanta yachachiqniykipas?”, nispa.

Chay tapuykunaman imayna kutichisqanwanmi yachanki sasachakuyninta allichananpaq may tukuy kallpachakusqanta, ima yanapaykunaña chaskisqantapas. Chaymantapas, reparankin sichus uyariy munasqallanta ninankupaq consejota mañakushan chayta (2 Tim. 4:3).

  2 Ama usqhaylla kutichiychu.

“LLapaykichis usqhaylla uyariq kaychis, ichaqa allin yuyaywan rimaychis.” (SANT. 1:19.)

Allintaña kutichiyta munashanchis chaypas, mayninpiqa manan allinchu kanman mana allinta t’aqwirishaspa usqhaylla kutichiyqa. Proverbios 29:20 texton nin: “¿Rikurqankichu hawan-ukhun rimaq runata? Mana yuyayniyoq runamantan aswan suyakuy kan, manataq hawan-ukhun rimaq runamantaqa”.

Tiempota hap’ispa qhawariy aconsejanaykipaq yuyaykusqaykikuna Bibliaq nisqanman hinachus kashan chaypi. Tapukuy: “¿Consejo qosqaykunapi ‘kay pacha espirituchu’ kashanman, hinallataq imayna yuyaykusqanpas?”, nispa (1 Cor. 2:12, 13). Ichaqa yuyariy, manan yanapayta munaspa niyllachu. Apóstol Pedron Jesuspa sasa kamachikuy hunt’ananta yacharuspa nirqan: “Señor, amapuni Diospas munachunchu chay hina sucedenasuykitaqa”, nispa. Chay kutichisqanmi yachachiwanchis, allin sonqoyoq runapas mana rimayninta cuidakuqtinqa, ‘manan Dios hinachu yuyaykunman, aswanpas runa hinallan’ (Mat. 16:21-23). ¡Allinpunin manaraq rimashaspa piensayqa! Ama qonqasunchu, experiencianchisqa Diospa yachayninmanta aswan pisi kasqanta (Job 38:1-4; Pro. 11:2).

3 Bibliaq nisqanman hina yanapay.

“Manan ñoqa kikillaymantachu ruwani, aswanpas Yayaq yachachiwasqallantan willaykichis.” (JUAN 8:28.)

¿Tapukuqta niwaqchu: “Qan kaspayqa kaytan ruwayman, nispa? Problemanta allichanapaq sut’iña imata ruwananpas kashanman chaypas, allinmi kanman Jesús hina k’umuykukuq kay. Payqa runamantapas aswan yachayniyoq aswan experienciayoqmi karqan, chaywanpas nirqanmi: “Manan ñoqaqa kikillaymantachu rimani, aswanpas kachamuwaqniy Yayan kamachiwarqan imaynatachus rimanayta imatachus ninaytapas”, nispa (Juan 12:49, 50). Jesusqa Taytanpa munayninman hinan aconsejarqan yachachirqanpas.

Ejemplopaq, Lucas 22:49 texton willan Jesusta hap’inankupaqña kashaqtinku apostolninkuna maqanakunankupaq tapusqankumanta. Huk apostolninqa espadantaraqmi horqokurqan. Mateo 26:52-54 textopi kaqllamantataq willasqanpin rikunchis, Jesusqa chhaynapiña tarikushaspapas Diospa munayninmanta apostolninkunawan yuyaymanananpaq tiempo t’aqasqanta. Jesusqa yacharqanmi Génesis 9:6 textoq nisqanta, Salmos 22 , Isaías 53 profeciakunatapas. Chayraykun allin consejokunata qorqan, chhaynapin runakunaq kawsayninta salvarqan Diostapas kusichirqan.

  4 Qelqanchiskunata utilizay.

“Allin yuyayniyoq hunt’aq kamachi hina kaychis. Paytan patronninqa wasinpi kaqkunata kamachinanpaq churarqan, tiempollanpi kamachinkunaman mikhunatapas qonanpaqwan.” (MAT. 24:45.)

Jesusmi churarqan allin yuyayniyoq hunt’aq kamachi paykunata, espiritual mikhuna necesitasqanchista qowananchispaq. Sichus qowaq consejota importante asuntomanta chay, ¿ñawpaqtachu Bibliapi huk publicacionkunapipas investiganki?

Índice de las publicaciones Watch Tower, hinallataq Watchtower Library, * chaykunapin imaymana allin yachachikuykuna tarikun, chaymi t’aqwinapuni. Chay temakunan consejo maskhaqkunata yanapan. ¿Hukkunata yachachiwaqchu Bibliaq nisqanta chaypi maskhanankupaq, hinaspa Diospa Simin Qelqaq nisqanpi yuyaykunankupaq? Imaynan mapa huk runata yanapanman maypi kasqanta yachananpaq, hinallataq chayanan llaqtaman rinanpaq; chay hinallataqmi t’aqwinapaq yanapaykunapas rikuchisunkiman imaynapi tarikusqaykita, imaynatachus kawsayman apaq ñanninta puriwaq chaytapas.

Askha umalliqkunan publicadorkunata yachachinku Índice otaq Watchtower Library, nisqapi maskhanankupaq. Chhaynapin hermanokunaqa mana tapukuyninkuman kutichiyllatachu yachanqaku, aswanpas sapa kutillan investiganqaku astawanqa Diospa yachachiyninpi confiaspanku. chhaynapi, ‘yuyayninkupi allinkaqta mana allinkaqta reparayta yachanku’ (Heb. 5:14).

5 Ama hukpa rantinpi decidiychu.

“Sapankan ruwananchistaqa hunt’ananchispuni.” (GÁL. 6:5.)

Imaynaña kaqtinpas, sapankan decidinan ima consejota kasukunanpaqpas. Jehová Diosmi sapankamanpas qowarqanchis ñoqallanchismanta kamachikuyninkunata kasukunapaq otaq mana kasukunapaqpas (Deu. 30:19, 20). Mayninpiqa askha yanapaykunan Bibliapi tarikun, ichaqa paymi decidinan mayqentapas akllakunanpaq. Ima asuntochus kasqanman hina chaymantapas hayk’a watanpi kasqanman hinan tapukuwaq: “¿Ñoqachu chay sasachakuyninpi yanapanay?”, nispa. Wakin asuntokunataqa umalliqkunan yanapanan, wayna-sipaskunatataq tayta-mamanku.

[Uranpi willakuy]

[8 paginapi foto recuadropiwan]

¿Imakunamantan Familiantin Diosta Yupaychana Ch’isipi yachawaq?

Allinmi kanman chayllaraq tapuy ruwawasqanchiskunamanta maskhay. ¿Maskhawaqchu qelqakunapi Bibliapi textokunatapas tapukuyninkunata kutichinaykipaq? Sichus huk iñiqmasi tapusunkiman casarakuy munasqan runawan lloqsinanpaq chay, ¿imatan ruwawaq? Ñawpaqtaqa maskhawaqmi Índice otaq Watchtower Library nisqapi “Concertar citas” otaq “Matrimonio” nisqa temakunata. Chaypin yachay munasqayki temakunata qhawanayki, chaymantapas “Véase también”, nisqa tema kaqtinqa qhawallawaqtaqmi, chaymi yanapasunkiman astawan entiendenaykipaq.

[9 paginapi recuadro]

Jehová Dios yanapakuykunata llaqtanwan qowasqanchismi yanapawanchis allin consejokunata chaskinanchispaq qonanchispaqpas. Eclesiastés 12:11 niwanchis: “Yachayniyoqkunaq siminqa t’urpukuq hinan, huk michiqpa uywakunata watananpaq allin takasqa takarpukuna hinan”, nispa. Llank’aq wakakunata qatispa filochasqa k’aspiwan ‘t’urpuy hinan’, munakuywan allin yuyaywan qosqa consejokunaqa pi runatapas cheqaq ñanninta purichin. ‘Takasqa takarpukunaqa’ allintan imatapas hap’in. Chhaynallataqmi allin consejokunapas thak kayta qon. Yachayniyoqkunaqa qelqakunata estudiaspan kusikuyta tarinku, chaypin kashan ch’ullalla ‘michiqninchis’ Jehová Diospa yachaynin.

Chay Michiqpa yuyaychasqankunata consejota qospa rimasun. Ancha kusikunapaqmi hukkunata uyariyqa, atisqanchisman hina consejota qoypas. Chaykuna Bibliaq nisqanman hina kaspaqa, allin consejokunan kanqa, chaskikuqpa wiñay allinninpaqtaq kanqa.