Runakunata yanapasun ‘puñuymanta rikch’arinankupaq’

‘Ima tiempopichus kasqaykichista reparaspa, puñuymanta rikch’ariychis.’ (ROM. 13:11.)

¿KUTICHIWAQCHU?

¿Imaraykun cristianokuna espiritualpi rikch’ashaqlla kananku?

¿Imaraykun predicaspa makilla uyariq, allin reparaq kananchis?

¿Imaraykun sumaqllata respetowan rimananchis predicaspa?

1, 2. ¿Ima puñuymantan askha runakuna rikch’arinanku kashan?

SAPA watanmi waranqanpi runakuna carrota manejaspa aytimasqankurayku otaq puñurapusqankurayku wañunku. Wakintaq llank’anankumanta qarqochikunku tiempokama puñuspa tardeta chayasqankurayku otaq llank’anankupi puñusqankurayku. Espiritualpi puñuyqa chaykunamanta aswan mana allinraqmi. Biblia nin: “Kusisamiyoqmi makilla suyashaqqa”, nispa (Apo. 16:14-16).

² Jehová Diospa p’unchaynin asuykamuqtinmi runakunaqa astawanraq espiritualpi puñushanku. Chayraykun religioso umalliqkunapas misk’i puñushaqwan qatikuqninkunata rikch’anachinku. ¿Iman espiritualpi puñuy? ¿Imaraykun cheqaq cristianokuna rikch’asqalla kananku? ¿Imaynatan runamasinchista yanapasunman espiritual puñuymanta rikch’arinankupaq?

¿IMAN ESPIRITUAL PUÑUY?

3. ¿Imaynatan kawsanku espiritualpi puñuqkuna?

³ Puñuspaqa manan imatapas ruwanchischu. Espiritualpi puñuqkunan ichaqa yaqapaschá imaymana ruwaypi kashanku, manataq espiritual kaqkunapichu. Imaymanapi afanakuspan kawsanku, imaymana kusikuykunapi purispa, allin reqsisqa kayta otaq qhapaq kayta maskhaspa. Chaykunapi purispan espiritualpi necesitasqankuta mana hunt’ankuchu. Espiritualpi rikch’ashaqlla kaqkunan ichaqa yachanku tukukuy ‘p’unchaykunapi’ kawsasqanchista, chayraykun tukuy tiemponkuwan Diospa munayninta ruwanku (2 Ped. 3:3, 4; Luc. 21:34-36).

4. ¿Imaynatan qhawarinanchis “ama wakinkuna hinaqa puñusunchischu” nisqa yuyaychayta?

⁴ (Leey 1 Tesalonicenses 5:4-8.) Kay versiculokunapin  apóstol Pablo cristianokunata kallpachan ama hukkuna hina puñunankupaq. Yaqapaschá chay sucedewasunman Diospa kamachikuyninkunata mana kasukuqtinchis. Chaymantapas puñushallasunmantaqmi pisillamanta Dios kay millay pacha chinkachinanmanta willakuyta mana reparaspa. Chayraykun chhayna yuyaykuymanta chhayna kawsaymantapas cuidakunanchis.

5. ¿Imaynata runakunaq yuyaykusqanmi rikuchin espiritual puñuypi kasqankuta?

⁵ Wakin runakunaqa yuyaykunkun ima ruwasqankumantapas Diosman mana cuenta qonankuta (Sal. 53:1). Wakinpaqqa Diosqa manan runakunapi interesakunchu chaymi paykunapas Diospi mana interesakunkuchu. Chaymantapas, “Diospa amigon kanapaqqa mayqen religionpipas kasunmanmi”, nispa niq runakunaqa kanpunin. Chhaynata yuyaykuqkunaqa espiritual misk’i puñuypin kashanku. ¿Imaynatan yanapasunman rikch’arinankupaq?

ÑOQANCHISMI RIKCH’ASQA KANANCHIS

6. ¿Imaraykun huk cristiano kallpachakunan espiritualpi rikch’asqalla kananpaq?

⁶ Hukkunata rikch’achinapaqqa ñoqanchismi rikch’asqa kananchis. ¿Imaynataq chayri? Bibliaqa espiritualpi puñuytan tupachin ‘tutayaqpi hina ruwaykunawan’, chaykunaqa machay, qhelli huchapi kawsay, mana p’enqarikuspa kawsay, phiñakuy, envidiakuy iman (leey Romanos 13:11-14). Chhayna kawsaymanta karunchakuyqa sasan. Sichus carrota manejaq rikch’asqalla kayta mana importantepaqchu qhawarin chayqa, wañuytapas tarinmanmi. Espiritualpi puñuyqa wañuymanmi apawasunman, chaymi cristianokunaqa kallpachakunanchis rikch’asqalla kanapaq.

7. ¿Iman sucedenman sichus predicasqanchis runakunata mana uyarikuqta hina qhawariqtinchis?

⁷ Yaqapaschá huk cristiano predicasqan territoriopi lliw runata manapas uyarikuyta munankumanchu hinata qhawarinman (Pro. 6:10, 11). Ninmanpaschá: “Manataq uyariyta munankuchu chayqa, ¿imapaqtaq kallpayta usuchiyman?”, nispa. Askha runakunan espiritual puñuypi kashanku, ichaqa ima yuyaykusqankupas tarikusqankupas cambianmanmi. Askha runakunan puñuymanta rikch’arispa Bibliata estudiarqanku. Paykunata yanapanapaqqa ñoqanchismi rikch’asqa kananchis, chaypaqmi sonqonkuman chayaqta hina predicanapaq kallpachakunanchis. Chhaynaqa, espiritualpi rikch’asqa kayqa predicasqanchis ancha importante kasqanta yuyariymi.

¿IMARAYKUN PREDICASQANCHIS IMPORTANTE?

8. ¿Imaraykun importante predicasqanchis?

⁸ Runakuna uyariwanchisña manaña chaypas, predicaspaqa Jehová Diostan hatunchanchis, chaymantapas Diospa munaynin hunt’akunanpaqmi ruwakushan. Pisi tiempomantan Diosqa juzganqa allin willakuykuna mana uyarikuqkunata. ¿Imatan ñawpaqta qhawarinqa juzgananpaq? Predicasqanchista imayna uyarikusqanmantan (2 Tes. 1:8, 9). ‘Chaninkunatapas mana chaninkunatapas wañusqankumantan Dios kawsarichimpunqa’, chhaynaqa, predicayta yanqapaq qhawarispaqa pantashasunmanmi (Hech. 24:15). Biblian willan ‘cabra’ hina runakunaqa wiñaypaq wañunankupaq juzgasqa kanankuta. Predicasqanchismi rikuchin khuyapayakuq Dios kasqanta, chaywanmi runakuna atinkuman kawsayninkuta cambiaspa “wiñay kawsayman” aypayta (Mat. 25:32, 41, 46; Rom. 10:13-15). Mana predicaqtinchis, ¿imaynatan uyarinkuman kawsayninkuta salvaq willakuyta?

9. ¿Imaynatan predicasqanchis yanapawanchis ñoqanchistapas huk runakunatapas?

 ⁹ Predicasqanchisqa ñoqanchistapas yanapawanchismi (leey 1 Timoteo 4:16). Diosmanta, Gobiernonmantapas rimaspaqa repararqanchischá kaykunata: iñiyninchispas, Dios munakuyninchispas astawanmi yaparqan. Chaymantapas yanapawarqanchismi allin cristiano kanapaq. Predicaspa Dios sonqo kasqanchista rikuchispaqa anchatan kusikurqanchis. Cheqaq kaqta runakunaman yachachispan askha cristianokuna rikurqanku, estudiantenkuq kawsayninta cambiananpaq Diospa espiritun yanapasqanta.

ALLIN REPARAQ KASUN

10, 11. a) ¿Imaynatan Jesuspas Pablopas rikuchirqanku allin reparaq kasqankuta b) ¿Imakunapin reparaq kananchis aswan allinta predicanapaq?

¹⁰ Predicasqanchista runakuna allinta uyarinankupaqqa imaymanatan ruwasunman. Chaypaqmi Jesús hina allin reparaq kananchis. Payqa mana huchayoq kasqanraykun repararqan huk fariseoq sonqonpi phiñakusqanta, huchallikuq warmiq cheqaqtapuni pesapakusqanta, huk viuda sonqomanta qoykukuq kasqantapas (Luc. 7:37-50; 21:1-4). Chhaynapin sapanka runakunata yanaparqan Diosmanta yachanankupaq. Ichaqa Diosta serviqkunaqa manan ch’uyaraqchu kananchis allin reparaq kanapaqqa. Chaypaq yachasunchis apóstol Pablomanta, payqa runakuna imayna kasqanman hinan predicaq (Hech. 17:22, 23, 34; 1 Cor. 9:19-23).

¹¹ Jesús hina, Pablo hina allin reparaq kanapaq kallpachakuspaqa, predicaspan runakunaq sonqonman imayna chayayta yachasunchis. Ejemplopaq, piwanpas rimaspaqa kallpachakunanchismi maymanta kasqanta, imapi interesakusqanta, familianpas imaynapi tarikusqanta reparanapaq. Yaqapaschá qhawasunman imata chay ratopi ruwasqanta, hinaspataq sumaqllata rimasunman chay ruwasqanmanta.

12. ¿Imaraykun wasin-wasinta rispa rimasqanchista qhawarinanchis?

¹² Allinta reparaqqa manan imawanpas distraekunchu. Predicaqmasinchiswan rimayqa allinmi. Ichaqa yuyarinanchismi predicaspaqa runakunawan rimaq risqanchista (Ecl. 3:1, 7). Chhaynaqa, wasin-wasinta rispa rimasqanchisqa manan distraewananchischu predicananchista. Runakunaman imachus willay munasqanchismanta rimaymi yanapawasun predicayman yuyayyninchista churanapaq. Celularqa serviwanchismi predicaq lloqsiqtinchis, ichaqa runakunawan rimashaqtinchisqa manan distraewananchischu.

INTERESAKUSUN RUNAKUNAPI

13, 14. a) ¿Imaynatan yachasunman runakunaman imachus interesasqanta? b) ¿Imatan ruwasunman predicasqanchispi runakuna interesakunankupaq?

¹³ Makilla kaspa predicaq cristianokunaqa allintan uyarinku runakunaq rimasqanta. ¿Imatan tapusunman imachus yuyaykusqankuta willawananchispaq? ¿Askha religionkunaq kasqan, tiyasqanpi mana chanin kawsay kasqan, mana allin kamachikuqkuna imachu llakichin? Predicasqanchispi interesakunankupaqqa yaqapaschá rimasunman imayna kamasqa kasqanchismanta, Bibliapi yuyaychaykuna allinninchispaq kasqanmantapas. Chaymantapas yaqa llapa runamanmi Diosmanta mañakuyqa interesan, wakin mana Diospi creeqkunamanpas. Askhan tapukunku mañakusqankuta pillapas uyarinchus chayta, wakintaq: “¿Llapa runaq mañakusqantachu Dios uyarin?”, “¿Imatan ruwayman mañakusqayta Dios uyarinanpaq?”, nispa.

¹⁴ Runakunawan allinta parla tupachiytan yachasunman experienciayoq predicaqkunata  qhawaspa. Reparananchismi imatan ruwan ama nishuta uyariqkunata tapupayananpaq otaq kawsayninman mana chapukunanpaqpas. ¿Imaynatan rikuchin rimasqanpas uyanpas uyarikuq runapi interesakusqanta? (Pro. 15:13.)

SUMAQLLATA RIMAPAYASUN

15. ¿Imaraykun sumaqllata rimananchis predicaspa?

¹⁵ ¿Munasunmanchu misk’i puñuymanta apuraylla rikch’achiwananchista? Askha runakunan chaywan phiñakunku, chaymi munayllata rikch’achina. Chhaynallataqmi espiritual puñuymanta runakunata rikch’achiypas. Sichus pipas phiñakunman wasinta visitaqtinchis chayqa, ¿imatan ruwasunman? Kallpachakunanchismi imayna sientekusqanta entiendenapaq, sut’inta willawasqanchismantan agradecekunanchis, hinaspataq mana rimapakuspalla ripunanchis (Pro. 15:1; 17:14; 2 Tim. 2:24). Yaqapaschá sumaqllata rimaqtinchisqa qhepa kaq Testigota uyarinqa.

16, 17. ¿Imaynatan allin yuyaywan rimasunman predicaspa?

¹⁶ Mayninpin runakuna niwanchis: “Gracias, manan munanichu, religionniyoqñan kani” otaq “manan interesawanchu”, nispa. Yaqapaschá paykunapaqqa aswan fácil chhaynata niy manaña predicananchispaq. Ichaqa allin yuyaywan, sumaqllata, imachus interesakusqanmanta tapuqtinchisqa munanmanmi yachayta (leey Colosenses 4:6).

¹⁷ Sichus predicaqtinchis niwasunman “ruwashanin”, nispa chayqa, mayninpiqa aswan allinmi ripuy. Ichaqa mayninpin atikusqanman hina allin chaninchasqata pisillata rimasunman. Askha hermanokunan manaraq huk minutopi interesakunanpaq hina huk versiculota leenku, chaymantataq huk tapuyta saqenku. Mayninpiqa ratulla sumaqta rimasqankun runaq sonqonman chayarqan, chhaynapin aswan unaytaraq parlarirqanku. ¿Chayta ruwasunmanchu atikusqanman hina?

18. ¿Imatan ruwasunman maypiña tarikuspapas aswan allinta predicananchispaq?

¹⁸ Llank’asqanchispiqa huk runakunawanmi huñunakunchis. Sichus allin preparasqa kasun chayqa, interesakunqakun willasqanchispi. Askha cristianokunan qelqanchiskunata apanku bolsillonkupi otaq bolsonkupi. Yaqapaschá ima textotapas umankupi hap’inku oportunidad kasqanman hina predicanankupaq. Chaymantapas superintendente de servicio otaq precursorkunaq yanapaynintan mañakusunman.

FAMILIANCHISTA MUNAYLLATA RIKCH’ARICHISUN

19. ¿Imaraykun mana pisipanachu familianchista yanapaspa?

¹⁹ Lliwmi munanchis familianchiskunapas allin yachachikuykuna uyarikunankuta (Jos. 2:13; Hech. 10:24, 48; 16:31, 32). Qallariypi mana uyariwaqtinchisqa yaqapaschá pisikallpayasunman, otaq nisunman:  “Imata niqtiypas ruwaqtiypas manan cambianqachu”, nispa. Ichaqa imapas kanmanmi yuyaykusqanta cambiananpaq. Yaqapaschá kunanqa aswan allinta yachachispa sonqonman chayasunman.

20. ¿Imaraykun familianchiskunata sumaqllata rimapayananchis?

²⁰ Familianchiskunataqa sumaqtan tratananchis (Rom. 2:4). Predicasqanchis runakunata hinan paykunatapas llamp’u sonqowan respetowan rimapayananchis. Rikuchinanchismi cheqaq yachachikuy imayna yanapawasqanchista, chaypaqqa manan sapa kutiraqchu rimapayana (Efe. 4:23, 24). Imaynamantapas reparachinanchismi Jehová Diosta servisqanchis kawsayninchista kusichisqanta allinninchispaq kasqantapas (Isa. 48:17). Reparanankun kawsayninchispi allin cristiano kasqanchista.

21, 22. ¿Ima experiencian rikuchin familianchista Diosmanta yachachispa mana sayk’unanchis kasqanta?

²¹ Qaynallan huk hermana qelqarqan: “Kallpachakurqanipunin 13 ñaña turaykunata rimaspapas ejemploywanpas predicanaypaq. Sapa watanmi llapankuman qelqani. Chaywanpas 30 wata masmi familiaypi sapallay Testigo karqani”, nispa.

²² Chay hermanan nillantaq: “Huk kutinmi karupi tiyaq ñañayta telefonopi waqyarqani. Willawarqanmi Bibliamanta yachachinanpaq pastorninta mañakusqanta, ichaqa manan hayk’aqpas yachachisqachu. Ñoqa yachachinaypaq niqtiymi payqa niwarqan: ‘Allinmi, ichaqa manan hayk’aqpas Testigoqa kasaqchu’, nispa. ¿Imatapunin Biblia yachachin?, nisqa librota apachisqay qhepamanmi sapa pisi p’unchaykunamanta waqyaq kani. Ichaqa manan chay librota leerqanchu, chaymi huk kuti nirqani leenanpaq, 15 minuto hinan leerqayku, chaymantapas maskharqaykun chaypi rikhuriq textokunata. Qhepakunata waqyaqtiyqa 15 minuto mastan estudiayta munaq. Chaymantaqa paymi waqyamuwaq estudianaykupaq, mayninpiqa manaraq puñusqaymanta sayarishaqtiy, p’unchaypi iskay kutita imaraq. Qhepa watamanqa bautizakapurqanmi, huk wata qhepamantaq precursora karqan”, nispa.

23. ¿Imaraykun mana sayk’unanchischu espiritual puñuymanta runakuna rikch’achiyta?

²³ Runakunata espiritual puñuymanta rikch’achinapaqqa kallpachakushanallanchismi. Chaywanpas kashanraqmi allin sonqoyoq runakuna predicasqanchista uyariwananchispaq. Sapa killanmi Jehová Diospa testigon kanankupaq 20.000 más runakuna bautizakunku. Chhaynaqa allinta hap’ikusun Arquipo cristianota Pabloq yuyaychasqanta, nirqanmi: “Señorpa qosqasuyki llank’anataqa allintapuni hunt’ay”, nispa (Col. 4:17). Qatimuq estudion yanapawasun usqhaylla predicay imachus kasqanta entiendenapaq.

[Tapuykuna]

[13 paginapi recuadro]

RIKCH’ASQALLA KANAPAQ

▪ Astawan Diospa munayninta ruway

▪ Karunchakuy tutayaqpi hina ruwaykunamanta

▪ Espiritual puñuymanqa pipas urmayunmanmi

▪ Allin yuyaywan territoriokiypi runakunata qhawariy

▪ Hukniraykunamanta predicanaykipaq yuyaykuy

▪ Ama qonqaychu ancha importante predicay kasqanta