Diosta tukuy sonqowan servishallasun
Diosta tukuy sonqowan servishallasun
“Churíy, [...] reqsikuy taytaykiq Diosninta, hinaspa serviy tukuy sonqowan.” (1 CRÓ. 28:9.)
TAPUYKUNATA KUTICHIY:
¿Imatan sonqo representan?
¿Iman yanapawasun sonqonchis imaynachus kashasqanta yachanapaq?
¿Imaynatan hunt’aq sonqowan Diosta servishallasun?
1, 2. a) ¿Cuerponchispi ima partemantan astawan Biblia riman? b) ¿Imaraykun yachananchis imatachus sonqo representasqanta?
BIBLIAPIQA askha textokunapin cuerponchispa partenkunamanta riman rikch’anachiy simipi. Ejemplopaq, Jobmi nirqan: “Ñoqaqa ñawsakunaq ñawinmi karqani, such’ukunaqpas chakinmi karqani”, nispa. Jesuspas nirqanmi: “Paña makiykitaqchus huchaman urmachisunkiman chayqa, kuchurqospa wikch’uy”, nispa (Job 29:15; Mat. 5:30).
2 Astawanqa sonqonchismantan Bibliaqa riman. Hunt’aq warmi Anan chay hinata sonqomanta rimarqan, Diostan nirqan: ‘Sonqoymi kusikushan’, nispa (1 Sam. 2:1). Sonqo simiqa yaqa waranqa kutitan Bibliapi rikhurin, yaqa llapanpitaqmi hukwan rikch’anachikun. Sonqo imatachus representasqanta yachayqa ancha importanten. ¿Imarayku? Biblia nin: “Sonqoykitaqa allintapuni waqaychay”, nispa (leey Proverbios 4:23).
¿IMATAN SONQO REPRESENTAN?
3. ¿Imatan ruwananchis Bibliaq willasqan sonqo simita entiendenapaq? Ejemplowan willay.
3 Bibliaqa manan huk diccionariopi hinachu willan imatachus sonqo simi significasqanta, ichaqa t’aqwirispan entiendenchis imachus kasqanta. ¿Imaynata? Kay ejemplopi yuyaykuy: huk mallkiq ladonpi sayaspaqa raphinkunallatan rikunki, manan rikuwaqchu chay mallki imaynachus kasqantaqa. Qhepaman kutirispan ichaqa imaynachus kasqanta llapanta rikunki. Chay hinallataqmi sonqo simipas, llapanpi imachus kasqanta yachanapaqqa, sonqomanta willaq askha textokunatan t’aqwirinanchis. ¿Imatan Biblia chaymanta yachachin?
4. a) ¿Imatan sonqo representan? b) ¿Imatan Jesús nisharqan Mateo 22:37 textopi?
4 Bibliapi sonqo simiqa, ukhunchispi imayna runa kasqanchismantan riman; chayqa imakuna munasqanchis, imayna yuyaykusqanchis, imatapas imayna qhawarisqanchis, imakuna ruway yachasqanchis, ima intencionwan ruwasqanchis, imakunaman aypay munasqanchis iman (leey Deuteronomio 15:7; Proverbios 16:9; Hechos 2:26). T’aqwinapaq qelqan willan rikch’anachisqa sonqoqa, “ukhunchispi imayna runa kasqanchis” kasqanmanta. Mayninpin ichaqa chay simi wakillanmanta riman. Ejemplopaq Jesusmi nirqan: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan”, nispa (Mat. 22:37). Chaypin huk runaq imayna sientekusqanmanta, imakuna munasqanmantawan rimashan. ‘Sonqomanta’, ‘almamanta’, ‘yuyaymantawan’ Jesús rimaspaqa, willasharqanmi Dios munakusqanchista mana imayna sientekusqallanchiswanchu rikuchinanchista, aswanpas kawsayninchista yuyayninchistapas imayna utilizasqanchiswan ima (Juan 17:3; Efe. 6:6). Ichaqa sonqo simi sapallan rikhuriqtinqa, ukhupi imayna runa kasqanchismantan rimashan.
¿IMANAQTINMI SONQONCHISTA CUIDANANCHIS?
5. ¿Imaraykun kallpachakunanchis Diosta tukuy sonqowan servinapaq?
5 Rey Davidmi wawanta aconsejarqan: “Qantaq, churíy Salomón, reqsikuy taytaykiq Diosninta, hinaspa serviy tukuy sonqowan, tukuy yuyaywan. Señor Diosqa llapan runakunaq sonqontan t’aqwin, yachantaq pakasqa lliw yuyaykusqakunatapas”, nispa (1 Cró. 28:9). Arí, Diosqa lliw sonqokunatan t’aqwin (Pro. 17:3; 21:2). Chayraykun Dioswan allinpi kananchispas, hamuq tiempopi kawsayninchispas imatachus sonqonchispi rikusqanmanta dependen. Chaymi ancha importante Davidpa aconsejasqanta kasukuspa tukuy sonqowan Diosta serviy.
6. ¿Imatan yuyarinanchis Dios serviy munasqanchismanta?
6 Cristiano kawsayninchispi anchata kallpachakusqanchismi rikuchin Jehová Diosta tukuy sonqowan serviy munasqanchista. Ichaqa kaytan yuyarinanchis: Diosta serviy munasqanchisqa pisiyanmanmi Saqraq kamachisqan pacha nishuta mat’ipayawasqanchisrayku, hinallataq huchayoq runa kasqanchisrayku (Jer. 17:9; Efe. 2:2). Chaymi Diosta servinapaq decidikusqanchispi mana pisipanapaqqa, sapa kutilla sonqonchista t’aqwirikunanchis. ¿Imaynata?
7. ¿Imaynapin yachakunman sonqonchis imayna kashasqanta?
7 Imaynan huk mallkiq chawpin mana rikukunchu, chay hinatan ukhunchispi imayna runa kasqanchispas mana rikukunchu. Ichaqa Orqo Patapi Jesús yachachispan nirqan huk mallkiq imayna kasqanta rurunkunapi rikukusqanta. Chay hinallataqmi ruwayninchiskuna rikuchin sonqonchis imayna kashasqanta (Mat. 7:17-20). Qhawarisunchis huknin ruwayta.
SONQONCHISTA T’AQWIRIKUSUN
8. Mateo 6:33 nisqanman hina, ¿imaynatan rikuchinchis imachus sonqonchispi kasqanta?
8 Chaypin Jesús uyariqninkunaman rimapayarqan Dios serviy munasqankuta huk ruwaywan rikuchinankuta. “Diospa qhapaqsuyunta [‘Gobiernonta’, NM], chanin-kaynintawan ñawpaqtaqa maskhaychis, payqa tukuy chaykunatapas qosunkichismi”, nirqanmi (Mat. 6:33.) Kawsayninchispi imatachus ñawpaqta ruwasqanchismi rikuchin imatachus sonqonchispi munasqanchista, yuyaykusqanchista, ima intencionwan ruwasqanchistapas. Chhaynaqa, imataraq ñawpaqta ruwasqanchista qhawarikuymi yanapawasun tukuy sonqowanchus Diosta servishanchis chayta yachanapaq.
9. ¿Ima invitaciontan Jesús ruwarqan wakin runakunaman, imatan paykuna rikuchirqanku kutichisqankuwan?
9 Arí, ruwasqanchiskunan rikuchin imachus sonqonchispi kasqanta, chayta qhawarillasuntaq qhepaman Jesusta sucedesqanpi. Lucasmi chaymanta willaspa khaynata qallarin: “Jesusqa Jerusalén llaqtaman riytapuni yuyaykukurqan”, nispa. Payqa yacharqanña sasachakuykunapi tarikunanta chaypas, decidisqan rinanpaq kasharqan. Chaymantataq apostolninkunapiwan ‘ñanta rishaqtinku’ huk runawan tuparqanku, paytan Jesús invitarqan: “Qhepayta hamuy”, nispa. Qatikuytaña munarqan chaypas, nirqanmi: “Señorníy, simiykimanta risaq taytayta p’ampaykamuq, chaymantataq qatikusqayki”, nispa. Huk runapas khaynatan kutichirqan: “Señorníy, ñoqapas qatikusqaykin ichaqa simiykimanta wasiypi kaqkunawanraq kacharparinakamusaq”, nispa (Luc. 9:51, 57-61). Sut’itan reparanchis Jesús decidisqa kaspa tukuy sonqowan ruwasqan, chay runakunaq yanqa pretextokuna maskhasqankuwan hukniray kasqanta. Reinota qhepaman churaspa kikinkuq interesninkutaraq ñawpaqta maskhaspan, paykunaqa rikuchirqanku mana tukuy sonqowanchu Diosta serviy munasqankuta.
10. a) ¿Imaynatan Cristota qatikunapaq invitacionta chaskirqanchis? b) ¿Ima nirqanmi Jesús Lucas 9:62 textopi?
10 Chay runakunaqa manan valorarqankuchu Jesuspa discipulon kayta, ñoqanchismi ichaqa chay invitacionta sumaqta chaskikurqanchis, chaymi kunanqa sapa p’unchay Diosta servinchis. Chhaynapin rikuchinchis pay munakusqanchista. Ichaqa iñiq t’aqapi llank’ayninchista hunt’ashaspapas huk peligromantan sonqonchista cuidananchis. ¿Imamanta? Kikin Lucas qelqapin Jesús nirqan: “Pipas yapunata hap’iykuspaña qhepaman qhawariqqa, manan Diospa qhapaqsuyunpi llank’ananpaq hinachu”, nispa (Luc. 9:62). ¿Imatan yachasunman chay simikunamanta?
‘ALLINKAQTA RUWAYCHIS’
11. ¿Iman sucederqan Jesuspa willasqan runaq llank’asqanwan, imarayku?
11 Lucas 9:62 textopi Jesuspa yachachisqanta allinta entiendenapaq, hukkunatawan willasun. Yuyaykusun chakra llank’aq runapi. Payqa yapushanmi, ichaqa sinchitan yuyaykushan wasinpi familian amigonkuna ima sumaqta mikhushasqankupi, chaypis paykuna musicata uyarispa kusisqa kashanku. “¡Chaypi rikhuriruyman!”, ninmi. Allintaña yapuruspan kusirikuy ganaswan atipachikuspa, kutirispa ‘qhepaman qhawarin’. Manaraq tarpushaqtin askha ruwana kashaqtinpas, manan llank’ananman yuyayta churanchu, chaymi mana allintachu hunt’an. Astawanqa chhayna llank’asqanwanmi patronninta llakichin.
12. ¿Imaynapin huk cristiano rikch’akunman Lucas 9:62 textopi chakra llank’aq runawan?
12 Kunanqa rikch’anachisun kay tiempopi sucedesqanwan. Chakra llank’aq runatan huk cristianowan tupachisunman, paypa sonqonmi peligropi tarikushan. Sapa kutinña predican, huñunakuykunaman rin chaypas, yuyaykushallanmi kay pachapi imaymana kaqpi. Sonqonpiqa munapayanmi chaykunata. Askha watakunaña hunt’aq sonqowan Diosta servishaspapas, manapuniñan aguantayta atinchu kay pachapi kaq imaymanawan kusirikuyta, hinan kutirispa ‘qhepapi’ tukuy saqemusqankunata ‘qhawarin’. Predicaypi imaymana ruwana kashaqtinpas, manañan ‘cheqaq kawsayman hap’ipakunchu’ chaymi espiritual ruwayninkunata mana allintachu hunt’an (1 Tim. 6:19). Chhaynata pisi kallpayaspa chakrayoq Jehová Diosta llakichiyqa mana yuyayniyoq kaymi kanman (Luc. 10:2).
13. ¿Iman Jehová Diosta tukuy sonqowan serviy?
13 Chaypiqa sut’itan kayta reparanchis: huñunakuykunaman riy, sapa kutilla predicacionman lloqsiy, hukkunata hunt’aypas allinmi, ichaqa Diosta tukuy sonqowan serviyqa manan chayllachu (2 Cró. 25:1, 2, 27). Sichus huk cristiano munapayashallan, ‘qhepapi’ saqemusqankunata, otaq kay pachapi imaymana kaqta chayqa, Diospa favornintan pierdenman (Luc. 17:32). Gobiernonpi kanapaq hina, Dios qhawariwananchispaqqa ancha importanten kay kamachikuyta kasukuy: “Mana allinkaqta cheqnikuychis, allinkaqtataq ruwaychis” (Luc. 9:62; Rom. 12:9). Satanaspa kamachisqan pachaqa yaqapaschá imaymana allinkunata qhawarichiwasunman, tukuy sonqowan Dios serviyninchista hark’awananchispaq; ichaqa amapuni dejasunchu chaykuna distraewananchista (2 Cor. 11:14; leey Filipenses 3:13, 14).
MAKILLA KASHASUN
14, 15. a) ¿Imaynatan Saqra sonqonchista waqllichinman? b) ¿Imaynatan parrafopi ejemplo rikuchin Satanaspa ruwasqanmanta cuidakunanchista?
14 Diosta munakusqanchismi kallpachawarqanchis payman qokunapaq. Chaymantapachan askha watakuna rikuchirqanchis Diosta tukuy sonqowan servinapaq decidisqa kasqanchista. Saqraqa mana sayk’uspan sonqonchista qhawashallan wakllichinanpaq (Efe. 6:12). Payqa repararqanpaschá Dios serviyninchista mana qonqayllachu saqenanchista. Chaymi “kay kawsaypi afanakuywan” as-asmanta tukuy sonqo serviyninchista pisiyachinman (leey Marcos 4:18, 19). ¿Imaynatan chayta ruwan?
15 Chayta kutichinapaq kay ejemplopi yuyaykuy: ch’isinmi huk qelqata leeshanki, 100 watt focota churakuspa, ichaqa qonqayllan foco quemarukun. Chaymi laqhayaqpi rikukuspa huk focota churanki, Ichaqa mana yachasqallaykin 95 watt focowan cambiarqanku. Qhepa kaq ch’isinta k’ancharichiqtiykiqa manapaschá reparankichu cambiasqankuta. Chaymanta paqaristin 90 watt focowanñataq cambiaqtinkupas, manapaschá reparallankitaqchu. ¿Imanaqtin? Focoq k’anchaynin as-asmanta pisiyasqanrayku. Chay hinallataqmi, kay pachapi imaymana kaqkuna mat’ipayawasqanchisrayku as-asmanta Diosta tukuy sonqowan serviyninchis pisiyanman. Sichus huk cristiano mana makillachu kashanman chayqa, yaqapaschá mana reparanmanchu Saqra pisi-pisimanta sonqonta waqllichisqanta (Mat. 24:42; 1 Ped. 5:8).
DIOSMANTA MAÑAKUYQA IMPORTANTEN
16. ¿Iman yanapawasun Saqraq trampanmanta cuidakunapaq?
16 ¿Iman yanapawasun Saqraq trampanmanta cuidakuspa tukuy sonqowan Diosta servishanallapaq? (2 Cor. 2:11.) Diosmanta mañakuymi. Apóstol Pablon cristianokunata kallpacharqan Saqraq “q’otukuq yuyayninkuna” contra qaqata sayanankupaq. Chay qhepallamanmi nirqan tukuy rogakuywan valekuywan ‘mana p’itiyta [...] Diosmanta mañakunankupaq’ (Efe. 6:11, 18; 1 Ped. 4:7).
17. ¿Imatan yachanchis Jesuspa imayna mañakusqanmanta?
17 Saqraq contranpi qaqata sayanapaqqa Jesuspa ejemplontan qatikunanchis. Payqa oracionpin Taytanman asuykullaqpuni, chaywanmi rikuchirqan tukuy sonqowan serviy munasqanta. Qhawarisunchis wañupunanpaq ñawpaq tutapi imayna mañakusqanta. Lucasmi qelqarqan: “Sinchitapuni llakikuspataq aswan tukuy sonqowan mañakurqan”, nispa (Luc. 22:44). Jesusqa ñawpaqpi tukuy sonqowanña mañakurqan chaypas, chay kutipiqa hatun pruebapin tarikurqan, manan kay hallpapi tukuy kawsasqan tiempopipas chhaynapiqa tarikurqanraqchu. Chayraykun aswan tukuy sonqowan mañakurqan, chaymi Taytan uyarirqan. Jesuspa ejemplonmi rikuchin oracionta mana kaq sonqollawanchu ruwasqanchista. Chhaynaqa, aswan sasa pruebakunapi tarikuspa, Saqraq churawasqanchis trampakunapas aswan sasa atipana kaqtinqa, ‘aswan tukuy sonqowanmi’ Diosmanta mañakunanchis pakaykuwananchispaq yanapawananchispaq ima.
18. a) ¿Imatan tapukunanchis mañakuyninchismanta, imarayku? b) ¿Imakunan yanapawasunman tukuy sonqowan Diosta servinapaq? ( 16 paginapi recuadrota qhaway.)
18 ¿Imapin yanapawasun oracionta ruwasqanchis? Apóstol Pablon nirqan: “Tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis. Hinan Diosqa thak-kayta qosunkichis runakunaq mana aypay atisqan thak-kayta, chay hinapin sonqoykichistapas yuyayniykichistapas Jesucristopi Diosqa waqaychanqa”, nispa (Fili. 4:6, 7). Mana p’itiyta sonqomantapacha Diosmanta mañakuyqa allinpunin tukuy sonqowan payta servishanallapaq (Luc. 6:12). Chaymi sapanka tapukunachis: “¿Mañakullanipunichu tukuy sonqowan?”, nispa (Mat. 7:7; Rom. 12:12). Imayna kutichisqanchismi rikuchinqa imayna sonqowan Diosta serviy munasqanchista.
19. ¿Imakunatan ruwanki Diosta hunt’aq sonqowan servinaykipaq?
19 Rikusqanchis hina, imataraqchus ñawpaqta ruwasqanchismi rikuchin sonqonchis imayna kashasqanta. Qhepapi saqemusqanchiskunapi yuyaykuy, Saqraq trampankunapas pisiyachinmanmi Diosta hunt’aq sonqowan servinapaq decidikusqanchista, chaymi makilla kashananchis (leey Lucas 21:19, 34-36). Chaymantapas David hinan Diosta valekunanchis ‘tukuy sonqo servinanchispaq’ (Sal. 86:11).
[Tapuykuna]
[16 paginapi recuadro]
SONQOTA CUIDANAPAQ KINSA YANAPAYKUNA
Cuerponchispi sonqonchis qhali kananpaqqa imaymana yanapaykunan kan, chhaynallataqmi rikch’anachisqanchis sonqo allin kananpaqpas yachananchis imayna cuidayta. Yachasun kinsa yanapaykunamanta.
1 Allinta mikhuy. Cuerponchispi sonqonchisqa alimentoyoq mikhunatan necesitan. Huk cristianoqa espiritual mikhunawanmi allinta alimentakunan, chaytan tarinqa sapallanpi estudiaspa, yuyaymanaspa, huñunakuykunaman rispa ima (Sal. 1:1, 2; Pro. 15:28; Heb. 10:24, 25).
2 Ejerciciota ruway. Sonqonchis qhali kananpaqqa mayninpin yawarta bombeananpaq ejerciciota ruwaspa phatatatachinanchis. Chhaynallataqmi rikch’anachisqanchis sonqo qhali kananpaqqa, astawan predicanapaq kallpachakuna, yaqapaschá chaypaq kikinchista obligakunanchis kanqa (Luc. 13:24; Fili. 3:12).
3 Sayk’uyta pisiyachiy. Cuerponchispi sonqo, rikch’anachisqa sonqopas sayk’unmi, cristianokuna kay millay pachapi kawsasqankurayku. Chayta pisiyachinapaqqa iñiqmasikunawanmi huñunakunanchis, paykunaqa cheqaqtan ñoqanchispi interesakunku, tukuy sonqowantaq Diosta servinku (Sal. 119:63; Pro. 13:20).
