Jehová yanapawanchis salvakunapaq

‘Diospi iñisqaykichisraykun paypa atiyninpi waqaychasqa kashankichis qespichisqa kanaykichispaq.’ (1 PED. 1:4, 5.)

¿IMAYNATAN KUTICHIWAQ?

¿Imaynatan Jehová Dios cheqaq religionman pusamuwarqanchis?

¿Imaynapin Diospa consejonkunawan pusachikunchis?

¿Imaynatan Jehová kallpachawanchis?

1, 2. a) ¿Ima promesatan tarinchis hunt’aq kananchispaq Dios yanapawananchismanta? b) ¿Maykaman Jehová reqsiwanchis?

“PIPAS p’uchukaykama qaqata sayaqmi qespichisqa kanqa.” (Mat. 24:13.) Chayta nispan Jesusqa sut’ita rikuchisharqan kay millay pachaman Dios juicionta apamuqtin salvakunapaqqa tukukuykama hunt’aq kananchista. Chaywanqa manan nishanchu yachayninchiswan kallpanchiswan aguantananchista. Biblian kayta prometewanchis: ‘Diosqa hunt’aqpunin. Maykamachus pruebata muchuyta atiwaqchis chaykamallan Diosqa probachisunkichis [“probasqa kanaykichista dejanqa”, NM], chaypin kallpachasunkichis qaqata sayanaykichispaq, ahinapin Dios yanapasunkichis chay pruebamanta lloqsinaykichispaq’ (1 Cor. 10:13). ¿Ima ninanmi chay simikuna?

² Chaypin yachanchis Diosqa allinta reqsiwasqanchista: imayna kasqanchista, ima sasachakuykunapi tarikusqanchista, maykama aguantay atisqanchistapas. Chhaynallapin yachanman tentacionkuna ama kallpanchismanta aswan sasa atipana kananta. Ichaqa, ¿cheqaqtachu allintapuni reqsiwanchis? Chaymantaqa manan iskayasunmanchu. Biblian willan payqa allintapuni reqsiwasqanchista, kawsayninchismanta costumbrenchiskunamantapas tukuytan yachan. Astawanqa yachanmi ima yuyaykusqanchista, ima intencionwan ruwasqanchistapas (leey Salmo 139:1-6).

3, 4. a) ¿Imaynatan Davidpa kawsaynin rikuchin Dios sapanka runapi interesakusqanta? b) ¿Ima hatun llank’aytan Dios kay tiempopi aparishan?

³ ¿Manachu admirakunapaq runakunapi Dios anchata interesakusqan? Chaytapunin Davidpas tapukurqan, Diostan nirqan: “Kamasqayki hanaq pachata qhawarispaymi chaypi churasqayki killatapas ch’askakunatapas rikuspaymi, nini: ¿Imataq runari payta  yuyarinaykipaq? ¿Imataq wañuq runari paymanta llakikunaykipaq?”, nispa (Sal. 8:3, 4). Chayta tapuspaqa yaqapaschá kikinpa kawsayninpi yuyaykusharqan. Isaipa sullk’a churin kashaqtinpas, Diosqa sumaqtan qhawarisqa, ‘campopi ovejakunata michispa purishaqtinmi’ pusamusqa ‘Israel llaqtata umallinanpaq’ (1 Sam. 13:14; 2 Sam. 7:8). ¡Maytachá Davidqa kusikurqan oveja michiqlla kashaqtinpas, tukuyta Kamaq Dios yuyaymanasqankunapi interesakusqanrayku!

⁴ Pay hinallataqmi sientekunchis ñoqanchispi Jehová Dios interesakusqanta yachaspa. Payqa cheqaq religiontan utilizan ‘llapa nacionkunamanta valorniyoq kaqkunata’ huñunanpaq, paykunatan yanapan servicionkupi hunt’aq kanankupaq (Ageo 2:7, NM). Imayna yanapasqanta allinta entiendenapaq, ñawpaqta qhawarisun imaynata cheqaq yupaychayman pusamusqanta.

DIOS PUSAMUWARQANCHIS CHURINMAN

5. ¿Imaynatan Dios runakunata pusamun Churinpa qayllanman? Ejemplowan willay.

⁵ Jesusmi nirqan: “Manan pipas ñoqaman hamuyta atinmanchu, kachamuwaqniy Yaya payta mana pusamuwaqtinqa”, nispa (Juan 6:44). Chay nisqanpin yachanchis Cristoq discipulon kananchispaqqa Diospa yanapaynin necesitasqanchista. Ichaqa, ¿imaynatan Jehová Dios Churinpa qayllanman pusamun oveja hina samp’a runakunata? Predicacionwan espiritunpa yanapayninwan ima. Ejemplopaq, Pablo huk misionerokunapiwan Filipos llaqtaman chayaspa, Lidia sutiyoq warmita predicarqanku. Biblia nin: “Paypa sonqontan Señorqa kicharirqan Pabloq nisqanta tukuy sonqo uyarinanpaq”, nispa. Rikusqanchis hina, Diosmi espiritunta qorqan willasqankuta entiendenanpaq, chhaynapin paypas wasinpi kaqkunapas bautizakapurqanku (Hech. 16:13-15).

6. ¿Imaynatan Dios cheqaq religionman pusamuwarqanchis?

⁶ ¿Lidiallatachu chay sucederqan? Manan. Kawsayninchista Diosman qorqanchis chayqa, paymi Lidiata hina llaqtanman pusamuwarqanchis. Imaynan Lidiaq sonqonpi sumaq kaykunata rikurqan, chhaynatan ñoqanchispipas rikurqan. Allin willakuykunata uyariqtinchisqa entiendenanchispaqmi espiritunwan yanapawarqanchis (1 Cor. 2:11, 12). Yachasqanchisman hina kawsanapaq kallpachakuqtinchismi bendicionninta chaskirqanchis. Qhepaman payman qokuqtinchistaq anchata kusikurqan. Arí, kawsayman aypanapaq purisqanchismanta pachan payqa tukuy tiempo yanapawasharqachis.

7. ¿Imaynapin yachanchis Jehová Dios hunt’aq kanapaq yanapawananchista?

⁷ Maypachachus Jehová yanapawanchis espiritualpi puriyta qallarinanchispaq chayqa, manan saqewanchischu. Yachanmi mana ñoqallanchismantachu cheqaq kayta yachasqanchista, llaqtallanpi kanapaqpas yanapaynin necesitasqanchista. Akllasqa cristianokunatan Pablo nirqan: “Qankunaqa Diospi iñisqaykichisraykun paypa atiyninpi waqaychasqa kashankichis qespichisqa kanaykichis p’unchaykama, chay qespikuytan  Diosqa wakichirqan p’uchukay p’unchaypi rikuchinanpaq”, nispa (1 Ped. 1:4, 5). Chay simikunaqa lliw cristianokunatan yanapawanchis, sapankanchistaqmi chaypi interesakunanchis. ¿Imarayku? Hunt’aq kanapaqqa yanapaynintan necesitanchis.

URMANANCHISMANTA CUIDAWANCHIS

8. ¿Imaraykun kallpachakuna ama imapipas urmanapaq?

⁸ Kay kawsaypi imaymana afanakuykuna, pantaq runa kasqanchispas espiritualpin distraewasunman. Chhaynapin mana reparakushallaqtinchis urmananchis patapiña rikukusunman (leey Gálatas 6:1). Chhayna kasqanta qhawarisun Davidta sucedesqanpi.

9, 10. ¿Imaynatan Dios hark’arqan David huchaman ama urmananpaq, imaynatan kay tiempopi yanapawanchis?

⁹ Saúl qatiykachashaqtinmi, David rikuchirqan controlakusqanta, manan vengakurqanchu chay envidioso reyta (1 Sam. 24:2-7). Ichaqa qhepamanmi huchayoq runa kasqanwan atipachikurqan. Runankunapiwan yarqasqa ch’akisqa purishaqtinkun Nabalpa yanapayninta valekurqan. Ichaqa chay runan millayta k’amimurqan, chaymi Davidqa sinchita phiñakuspa vengakuyta munarqan. Nabalpa wasinpi llapa runatan wañuchiyta munarqan. Payqa manan yuyaykurqanchu runa wañuchiymanta Dios huchachananpi. Nabalpa esposan Abigail allin yuyaywan ruwasqallanmi hark’arqan chayman urmananmanta. Chaypin Davidqa repararqan Diospa kachamusqan kasqanta, nirqanmi: “Saminchasqa kachun Israelpa Diosnin Señorqa ñoqaman qanta taripachimuwasqanmanta. Saminchasqataq qanpas yuyaykusqaykipas kachun, ñoqa kikiy munayniyman hina makiykunawan wañuchispa yawar unuta ruwanay kashaqtin hark’aykuwasqaykimanta”, nispa (1 Sam. 25:9-13, 21, 22, 32, 33).

¹⁰ ¿Imatan yachachiwanchis kay willakuy? Diosqa Davidtan Abigailwan yanaparqan ama huchaman urmananpaq. Kunan tiempopipas runakunawanmi yanapawanchis. Ichaqa manan suyananchischu ima huchamanpas urmananchis kashaqtin pitapas kachamuwananchista. Chaymantapas, manan yachanchischu munayninta imayna aparinanta, ima sucedenantapas permitenqachus icha manachus chaytapas (Ecl. 11:5). Ichaqa Jehová Diosqa yachanmi imaynapi tarikusqanchista, yanapawanchistaq hunt’aq kananchispaq. Kaytan prometewanchis: “Qantan qhawashayki. Ñoqan yachachisqayki, ñoqan yuyaychasqayki, ñoqan maynin purinayki ñanta yachachisqayki”, nispa (Sal. 32:8). ¿Imaynatan Dios aconsejawanchis? ¿Imaynapin allinninchipaq? ¿Imaraykun seguro kasunman kay tiempopi Dios llaqtanta pusarishasqanmanta? Apocalipsis libron chaykunata kutichin, qhawarisunchis.

CONSEJONKUNAWAN CUIDAWANCHIS

11. ¿Maykaman Dios yachan iñiq t’aqakunapi sucedesqanta?

¹¹ Apocalipsis 2, 3 capitulokunapi willasqan hina, Jesucriston Asia Menorpi kaq qanchis iñiq t’aqakuna imayna kashasqankuta qhawarin. Chay rikhuriypin reparanchis Jesusqa mana hawallantachu qhawarisqanta, aswanpas allintapuni t’aqwirisqanta. Mayninpiqa sutinmantaraqmi wakin runakunata waqyan, lliw qhawarisqanpitaq necesitakusqanman hina kallpachan aconsejanpas. ¿Imatan yachanchis chaymanta? Chay rikhuriyqa 1914 watamantapachan hunt’akushan. Qanchis iñiq t’aqakunaqa akllasqa cristianokunatan representan. Jesuspa qosqan consejokunaqa pachantinpi kaq llapa iñiq t’aqakunapaqwanmi. Chaykunapin sut’ita reparanchis Diosqa Churinwan llaqtanta pusarishasqanta. ¿Imatan ruwananchis ñoqanchistapas pusariwananchispaq?

12. ¿Imaynatan Dioswan pusachikunchis?

 ¹² Dioswan pusachikunapaqqa sapallanchispin Bibliata t’aqwinallanchispuni. Allin yuyayniyoq hunt’aq kamachiq apachimuwasqanchis qelqakunawanmi payqa imaymanamanta Bibliawan aconsejawanchis (Mat. 24:45). Sichus chaykunata allinta aprovechayta munanchis chayqa, tiempotan hap’inanchis t’aqwinapaq chayman hinataqmi kawsananchis. Sapallanchispi estudiasqanchiswanmi Diosqa cuidawanchis, chhaynapin ‘mana urmananchispaq waqaychawanchis’ (Jud. 24). ¿Hayk’aqllapas repararqankichu huk qelqanchispi willakusqan qanpaq hinapuni kasqanta? Chhayna kaqtinqa, Jehová Diospas nishasunkiman hinata chaskiy. Mayninpin huk amigo tanqarispa imatapas reparachisunkiman. Chay hinallataqmi Jehová Diospas espiritunwan reparachisunkiman comportakusqaykipi imayna runa kasqaykipipas allinyanaykipaq. Dios pusariwananchispaqqa Bibliaq nisqantan makilla kasukunanchis (leey Salmo 139:23, 24). Chaypi yuyaykuspan qhawarikunanchis imaynatachus estudiashasqanchista.

13. ¿Imaraykun qhawarikunanchis imayna estudiasqanchista?

¹³ Sichus horarionchis kusirikuykunawan hunt’a kashan chayqa, manan tiempo aypawasunchu sapallanchis estudionchista aparinapaq. Huk hermanon nirqan: “Faciltan sapallanchis estudiaytaqa qonqasunman, kay tiempopiqa imaymanan kusirikunapaq kashan, pisi qolqellapaqtaq kanpas. Chaykunan tarikun televisionpi, computadorapi, celularpi ima, maypipas kashallanmi”. Mana cuidakuqtinchisqa sapallanchis estudiananchis tiempon as-asmanta pisiyanman, hinaspa manaña aypawasunmanchu (Efe. 5:15-17). Chaymi llapanchis tapukunanchis: “¿Sapa kutillachu tiempota horqoni Diospa Siminta estudianaypaq? Icha, ¿huñunakuykunapi asignacionniy kallaqtinchu estudiani?”, nispa. Sichus chay ruwayman urmarqanchis chayqa, aswan allintan aprovechananchis familiapi yupaychayninchista, otaq sapallanchispi estudio aparisqanchista, chhaynapin allinta beneficiakusun salvakunanchispaq Diospa qowasqanchis chaniyoq espiritual yachachikuykunamanta (Pro. 2:1-5).

DIOSMI KALLPACHAWANCHIS

14. ¿Imaynatan Biblia rikuchin Jehová Dios imayna sientekusqanchismanta yachasqanta?

¹⁴ Davidqa imaymana sasachakuykunapin tarikurqan (1 Sam. 30:3-6). Diospa yuyaychasqan qelqasqanpin reparanchis Jehová Dios paypi anchata interesakusqanta (leey Salmo 34:18; 56:8). Ñoqanchispipas kaqllatan interesakun. Payqa ‘llakisqa sonqoyoq’ “llakiq ñit’isqan” tarikuqtinchismi asuykamuwanchis. Chayqa Davidta hinan anchata kallpachawanchis. Paymi huk takinpi nirqan: “Anchatapunin munakuwanki, chaymi q’ochukuspa kusikusaq. Qanmi muchusqaykunata rikurqanki, llakikusqaykunatapas yacharqanki”, nispa (Sal. 31:7). Diosqa manan sasachakuynillanchistachu yachan, aswanpas kallpachawanchismi sonqochawanchistaq. Chaytan huñunakuykunawan ruwan.

15. ¿Imatan yachanchis Asafta sucedesqanmanta?

 ¹⁵ Asafta sucedesqanmi yanapawanchis huñunakuykunaman riy importante kasqanta entiendenapaq. Chay sacerdoteqa mana chanin ruwaykunatan rikurqan, chaymi iskayarqan Dios serviyninmanta, pisikallpayarqantaq. “Ñoqaqa haya sonqoyoqmi kasharqani”, nirqanmi. Chaymi yaqalla Dios serviyta saqesqa. Ichaqa, ¿iman yanaparqan allin yuyaywan ruwananpaq? Pay kikinmi nirqan: ‘Diospa ch’uya wasinman haykusqan’ yanapasqanta. Chaypin iñiqmasinkunawan kuska kaspa allin yuyaywan qhawarirqan. Entienderqanmi millay runakunaq t’ikarisqanqa huk tiempolla kasqanta, Jehová Dios tukuytapas chaninta juzgananta (Sal. 73:2, 13-22). Kay tiempopipas yaqa chhaynapin tarikunchis. Yaqapaschá sayk’usqa sientekunchis Saqraq kamachisqan pachapi mana chanin ruwaykunata aguantaspa. Ichaqa iñiqmasinchiskunawan huñunakuspan kallpachayta chaskinchis, Diosta servishanallapaq yanapaytapas.

16. ¿Imaynatan Anaq ejemplon yanapawanchis?

¹⁶ Ichaqa, ¿sichus imapas sasachawasunman huñunakuyman rinapaq chayri? Yaqapaschá p’enqasqa tarikusunman iñiq t’aqapi ima llank’aytapas saqesqanchiswan. Otaq huk iñiqmasinchiswan phiñachinakusqanchisrayku. Chhayna kaqtinqa, Anaq ejemplonmi yanapawasun (leey 1 Samuel 1:4-8). Penina warmiwanmi sasachakuypi tarikurqan, payqa qosanpa huk kaq esposanmi karqan. Aswan llakikuypiraqmi tarikurqan sapa watan Silo llaqtata Dios yupaychaq rinanku kaqtin. Anaqa mana allinmi sientekuq chaymi “khuyayta waqaq manataq mikhuqpaschu”. Ichaqa manan chayraykuchu Jehová Dios yupaychayta saqerqan, chaymi hunt’aq kasqanrayku Dios sumaqta bendecirqan (1 Sam. 1:11, 20).

17, 18. a) ¿Imaynapin huñunakuykunapi kallpachayta chaskinchis? b) ¿Imaynan sientekunki salvakunanchispaq Dios cuidawasqanchispi yuyaymanaspa?

¹⁷ Cristianokunaqa Anaq ejemplonta qatikuspan huñunakuykunaman rinanchis. Lliwmi yachanchis huñunakuykunapi kallpachay chaskisqanchista (Heb. 10:24, 25). Iñiqmasikunaq ñoqanchiswan kasqanku sumaqta qhawariwasqanchispas anchatan kallpachawanchis. Yaqapaschá iñiqmasinchispa comentasqan otaq huk discurso sonqonchisman chayanman. Hinallataq huk iñiqmasi uyariwasunman otaq kallpachawasunman paywan rimaqtinchis, manaraq huñunakuy qallarishaqtin otaq qhepamanpas (Pro. 15:23; 17:17). Chaymantapas kallpachawanchismi kuska Diosman takisqanchis. ‘Sonqonchista llakikuna ñit’iykuwaqtinchismi’ aswantaqa huñunakuykunapi kallpachayta necesitanchis. Chaypin Dios ‘sonqochaykuwanchis’ hunt’aq kananchispaqpas kallpachawanchis (Sal. 94:18, 19).

¹⁸ Taytanchis Jehová munakuywan cuidawasqanchisraykun Asaf hina sientekunchis, paymi takirqan: “Paña makiymantan hap’iykuwarqanki. Yuyaychawaspaykin pusawanki”, nispa (Sal. 73:23, 24). ¡Maytan agradecekunchis salvakunanchispaq Dios yanapawasqanchismanta!

[Tapuykuna]

[28 paginapi foto]

Qantapas Jehová Diosmi pusamurqasunki

[30 paginapi fotokuna]

Diospa consejonkunaqa yanapawanchismi

[31 paginapi foto]

Kallpachayta chaskisqanchismi yanapawanchis hunt’aq kanapaq