¿Yuyashankichu?

¿Leerqankichu kay killakunapi chayamuq Qhawaq revistakunata? Chhayna kaqtinqa, ¿kutichiwaqchu kay tapuykunata?

¿Imaynatan Salomonpa kawsaynin yanapawanchis?

Diosqa bendecirqanmi rey Salomonta, serviqnin kananpaqtaq akllarqan. Ichaqa kamachisqan tiempopin Salomonqa Diospa kamachikuyninkunata mana kasukurqanchu. Diosta mana yupaychaq faraonpa ususinwanmi casarakurqan. Hinaspapas askha esposakunayoqmi karqan, paykunan pantasqa yupaychayman aparqanku. Chhaynaqa, kallpachakunanchismi ñoqanchispi ama millay yuyaykuykuna ruwaykunapas wiñananpaq (Deu. 7:1-4; 17:17; 1 Rey. 11:4-8) (15/12, 10-12 paginakuna).

¿Imaraykun ninchis: “Qallariy siglomantapachan karqanpuni kay pachapi akllasqa cristianokuna”, nispa?

Huk rikch’anachiypin Jesús willarqan qallariy siglomantapacha tukuy tiempo kay pachapi akllasqa cristianokuna kananta. Paykunatan ‘chirisuela’ qora ukhupi wiñaq ‘trigowan’ tupachirqan (Mat. 13:24-30, 38). ¿Pikunan otaq ima t’aqa runakunan “trigo” hina karqanku? Manan sut’itaqa niyta atisunmanchu. Ichaqa seguron kasunman qallariy siglomantapacha kunankamapas akllasqa cristianokuna kasqanta (15/1, 7 página).

¿Imaynatan envidiakuyta atipasunman?

Kaykunan yanapawasunman: kallpachakuna iñiqmasinchiskunata munakunapaq, Dios sonqo runakunawan huñunakuna, allinkaqta ruwana, kusikuqkunawan kusikuna (Rom. 12:15) (15/2, 16, 17 paginakuna).

Consejota qonanchis kaqtin, ¿Bibliapi ima yachachikuykunan yanapawasunman?

Averiguay yachachikuykuna maskhasqanmanta, ama usqhaylla kutichiychu, huch’uyaykukuspa Bibliaq nisqanman hina yanapay. Atikuqtinqa organizacionpi kaq qelqanchiskunata maskhay. Ama hukpa rantinpi decidiychu (15/3, 7-9 paginakuna).