“Cuidakuychis fariseokunaq qonchunmanta”

Jesusmi discipulonkunata nirqan: “Cuidakuychis fariseokunaq qonchunmanta, chayqa iskay uya-kayninkun”, nispa (Luc. 12:1). ¿Imatan chaywan huchachasharqan? Huk texton willan fariseokunaq “yachachikuyninmanta” rimasqanta (Mat. 16:12).

Bibliaqa qonchuta otaq levaduratan mana allin ruwaykunawan tupachin. Fariseokunaq yachachisqan imayna kawsasqankupas chaykuna ruwaymanmi runakunata apaq. Ichaqa, ¿imaraykun mana allin karqan yachachisqanku?

1 Aswan chaninpaqmi qhawarikuqku, runakunatataq pisichaqku.

Huk rikch’anachiypin Jesús willarqan kawsayninkupi hatunchakusqankumanta, nirqanmi: “Fariseon sayaykuspa kay hinata mañakurqan: Diosníy, graciastan qoyki, manan wakin runakuna hinachu kani suwakuq, mana chanin, wasanchaq, manallataq kay contribución cobraq hinapaschu kani. Iskay kutitan semanapi ayunani, tukuy ima tarisqaymantan diezmotapas qoyki, nispa. Contribución cobraqtaq ichaqa karullapi sayaykuspa hanaq pachata qhawariyllatapas mana munarqanchu, aswanmi llakikuymanta qhasqonta takakuspa mañakurqan: Diosníy, ñoqa huchasapata khuyapayaykuway”, nispa (Luc. 18:11-13).

Ichaqa, allinpaqmi Jesusqa qhawarirqan contribución cobraqpa huch’uyaykukusqanta, nirqanmi: “Chay contribución cobraqmi wasinta Diospa chaninchasqan kutipurqan, manataqmi fariseochu. Pipas hatunchakuqqa k’umuykachisqan kanqa, k’umuykukuqtaqmi hatunchasqa kanqa”, nispa (Luc. 18:14). Contribución cobraqkunata hukkuna hina mana allinpaq qhawarinanmantaqa, Jesusqa yanaparqanmi uyarikuqkunata. Chhaynapin Mateowan Zaqueowan discipulon kapurqanku.

Ima ruway yachasqanchiswanpas, iñiq t’aqapi ima llank’ay chaskisqanchiswanpas otaq hukkunaq pantasqankuta reparaspapas yaqapaschá aswan allinpaq qhawarikusunman. Chhayna kaqtinqa cambiananchismi imayna yuyaykusqanchista, Biblian nin: “Pipas munakuqqa muchukuqllan, sumaq sonqollan, munakuqqa manan envidiakunchu, manan k’ankaykachanchu, manan hatunchakunchu, manan mana ruwanakunatachu ruwan, manan payllapaq kanantachu munan, manan phiñakunpachachu, manan sientepakunchu, manan mana chanin kaqmantachu kusikun, aswanpas cheqaqkaqmantan kusikun”, nispa (1 Cor. 13:4-6).

Apóstol Pablo hinan yuyaykunanchis, paymi nirqan: “Jesucriston kay pachaman hamurqan huchasapakunata qespichinanpaq, ñoqaqa paykunamanta aswan huchasaparaqmi kani”, nispa (1 Tim. 1:15).

Yuyaykunapaq:

¿Pantaq runa hinachu qhawarikuni, chhaynapi Diospa khuyapayakuyninpi salvasqa kanaypaq? Icha, ¿askha wataña Diosta servisqayrayku, Diospa llaqtanpi ima llank’aytapas chaskisqayrayku otaq imatapas yachasqayraykuchu aswan allinpaq qhawarikuni?

  2 Hukkunaq allin qhawarisqan kayta munaspan Dios sonqo runaman tukuqku. Allin sutiwan reqsisqa kaytataq munaqku.

Jesusmi willarqan: “Tukuy imatapas runakunaq rikunallanpaqmi ruwanku. Diospa Simin Qelqayoq qara cajachankutan hatunta ruwaspa churakunku, p’achankuq ch’ullpanpin hatun chhaqchata ruwakunku. Hatun mikhuykunapin allinkaq tiyanakunapi tiyayta munanku, sinagogakunapipas kurak runakunaq tiyanankunapin tiyayta munanku, plazakunapipas runakunaq napaykunantan munanku, ‘Yachachiq’ ninankutawan”, nispa (Mat. 23:5-7). Jesusmi ichaqa mana chhaynachu karqan. Diospa Churinña, mana huchayoqña karqan chaypas huch’uyaykukuqmi karqan. “Allin yachachikuq”, nispa huk wayna niqtinpas, Jesusqa nirqanmi: “¿Imaraykun ‘allin’ niwanki? Manan pipas kanchu ‘allinqa’, aswanpas sapan Diosllan”, nispa (Mar. 10:18). Huk kutipas huch’uyaykukuq kaytan discipulonkunata yachachirqan chakinkuta mayllispa (Juan 13:1-15).

Cheqaq cristianoqa sonqomantan iñiqmasinkunata yanapan (Gál. 5:13). Iñiq t’aqapi umalli kayta munaqkunaqa chaytan ruwananku. Manan huchachu ‘umalli kayta munayqa’, ichaqa runamasinchista yanapanapaqmi chaytaqa munananchis. Umalli kaspaqa manan atiyniyoqchu kanchis nitaq aswan allin qhawarisqachu. Llapa umallipas Jesús hinan “huch’uyyaykukuq sonqoyoq” kananku (1 Tim. 3:1, 6; Mat. 11:29).

Yuyaykunapaq:

¿Iñiq t’aqapi umallikunallatachu allinta tratani yaqapas ima llank’aytapas chaskiyta munaspay? ¿Allin qhawarisqa kanapaq llank’aykunallapichu yanapakuyta munani? ¿Hukkunamanta allin qhawarisqa kaytachu munani?

  3 Imaymana kamachikuykunatan yuyaykusqankuman hina rikhurichirqanku, chhaynapin Diospa kamachikuyninta sasapaq qhawarichirqanku.

Kamachikuy Simiqa Jehová Diosta allinta yupaychanankupaqmi karqan, ichaqa mana chaypiqa llapanchu qelqasqa karqan. Huknin kamachikuymi karqan sábado p’unchaypi ama llank’anapaq, ichaqa manan nirqanchu ima ruwaykuna llank’ay kasqanta (Éxo. 20:10). Chayraykun fariseokunaqa yuyaykusqankuman hina kamachikuykunata “yaparqanku”. Jesusmi ichaqa chay pantasqa kamachikuykunata mana kasurqanchu aswanpas Kamachikuy Simitan allinta hunt’arqan (Mat. 5:17, 18; 23:23). Payqa qhawariqmi imatapunis Diospa Kamachikuynin nisharqan chayta, imaraykus Dios chaykunata nirqan chaytapas, entienderqantaqmi khuyapayakuq kay ancha importante kasqanta. Allin yuyaywanmi imatapas ruwarqan discipulonkunaña pantaqtinkupas. Wañuchinankupaq hap’inanku tutapas kinsa qatikuqninkunatan nirqan rikch’asqalla kanankupaq, paykunan ichaqa sapa rato puñupurqanku. Chhaynaña kaqtinpas khuyapayakuqmi karqan, nirqanmi: “Sonqoqa [espirituqa, NM] munallanpunin, aycha cuerpon ichaqa pisi kallpa”, nispa (Mar. 14:34-42).

Yuyaykunapaq:

¿Yuyaykusqayman hinachu kamachikuykunata churani? ¿Yuyaykusqaykunatachu kamachikuykunaman tukuchini? ¿Allin ruwanallankutachu hukkunamanta suyani?

Fariseokunaq yachachikuyninmanta Jesuspa yachachikuyninkuna hukniray kasqanpin yuyaymanananchis, chhaynapi imallapipas allinyanapaq. Chay ruwayqa allinpunin kanqa.

[28 paginapi dibujo]

Fariseokunaqa Diospa Simin Qelqayoq qara cajachakunatan apaqku (Mat. 23:2, 5)

[29 paginapi dibujokuna fotokunapiwan]

Fariseokunaqa hatunchakuqmi karqanku, umallikunan ichaqa k’umuykukuspa hukkunata servinku

[30 paginapi dibujo]

¿Jesús hinachu allin yuyaywan imatapas ruwanchis?