Kallpachakuy matrimonioyki ama fracasananpaq

“Casarasqakunatan ichaqa mana ñoqachu kamachini, aswanpas Señormi.” (1 COR. 7:10.)

¿KUTICHIWAQCHU?

¿Imaynapin Dios hukllachan casarakuqkunata?

¿Imaynatan umallikuna yanapankuman casado kawsayninkupi problemayoq cristianokunata?

¿Imaynatan matrimoniota qhawarina?

1. ¿Imaynatan cristianokuna matrimoniota qhawarinku, imarayku?

CASARAKUQ cristianoqa Diospa ñawpaqenpin huk promesata ruwan, chayraykun hunt’ananpuni (Ecl. 5:4-6). Jehová Diosmi casarakuyta qallarichirqan, paytaqmi casarakuqkunataqa ‘hukllachan’ (Mar. 10:9). Diospa qhawarinanpaqqa hukllachasqan kashanku, nacionpi leykuna hukniraytaña kamachinman chaypas. Cristianokunaqa pay hinan qhawarinanku, hinaña manaraq Diosta reqsishaspa casarakurqanku chaypas.

2. ¿Ima tapuykunatan kay estudiopi t’aqwirisun?

² Matrimonioqa kusikuytan apamunman. Ichaqa, ¿imatan casadokuna ruwankuman hukllachasqa kawsayninku peligropi tarikuqtin? Parejata hukllachaq kaqkuna chinkapushaqtin, ¿atikunmanraqchu hukmanta allin takyasqa kayta? ¿Iman yanapanman matrimonio fracasoman haykushaqtin?

¿KUSIKUNAPAQCHU ICHA LLAKIKUNAPAQCHU KANQA?

3, 4. ¿Iman sucedenman parejata akllananpaq huk cristiano mana allinta decideqtin?

³ Casado kawsaypi sumaqta kawsaq cristianokunaqa kusikunkun, Jehová Diostataq hatunchanku. Matrimonio fracasaqtinmi ichaqa llakikuyta apamun. Casarakuyta yuyaykuq cristianoqa allintan matrimonionta qallarinman Diospa pusariyninta kasukuspa. Ichaqa parejata akllaspa comunta decidiyqa llakikuypi sonqo k’irinakuypi iman tukun. Ejemplopaq, wakin wayna-sipaskunaqa piwanpas parlaqmasintin kaytan qallarinku, manaraq casado kawsaypaq preparasqa kashaspa. Wakinqa Internetpi piwanpas reqsinakuspa hinan parlaqmasintin kanku, chaymi qhepaman matrimonionku mana allinpi tukun. Wakintaq parlaqmasintin kashaspa hatun huchaman urmanku, chaymantataq casarakunku,  ahinapin mana allinta qallarinku iskayninku mana respetanakuspa.

⁴ Wakin cristianokunaqa “Señorpi iñiqwanpuni” nisqa kamachikuyta mana kasukusqanku hawan llakikunapi tarikunku (1 Cor. 7:39). Chhaynapi tarikuspaqa Diospa pampachayninta yanapaynintawan mañakuy. Payqa manan libranchu ñawpaqpi huchallikusqarayku sasachakuykunamanta, ichaqa huchankumanta pesapakuq runakunamanqa kallpatan qon (Sal. 130:1-4). Tukuy sonqomanta kallpachakuy munayninman hinapuni kawsanaykipaq, ahinapin Dios ‘kallpachasunki’ (Neh. 8:10).

HUKLLACHASQA KAWSAYNINKU PELIGROPI TARIKUQTIN

5. ¿Imakunatan mana yuyaykunankuchu mana kusisqa kawsaq casadokuna?

⁵ Parejankuwan mana kusisqachu kawsaqkunaqa ninkumanpaschá: “Yanqañachus hina kanman matrimonioyta salvayqa. ¡Ñawpaq tiempollaman kutiruyman, hukwan casarakunaypaq!”, nispa. T’aqakuyta munaspapaschá yuyaykunkuman: “Divorciakapuyman chayqa ¡hukmantan libre kapuyman! Chay ruway manaña Bibliaq kamachisqanman hinachu kanqa chaypas, ¡t’aqakapuspayqa hukmantan vidata pasayman!”, nispa. Chaykunata yuyaykushananmanta otaq karan-karan nispa pesapakunanmantaqa, huk cristianoqa Diospa yanapaynintan maskhanan, kallpachakunantaqmi kasukunanpaq imaynapiña tarikunman chaypas.

6. Mateo 19:9 textopi Jesuspa nisqanta explicay.

⁶ Sichus huk cristiano divorciakun nacionpi leykuna kamachisqanman hinalla chayqa, manan librechu hukwan casarakunanpaq Bibliaq nisqanman hina. ¿Imarayku? Jesusmi nirqan: “Ñoqan niykichis, pipas esposan qhelli huchaman mana urmashaqtin divorciakuspa hukwan casarakunman chayqa, wasanchay huchatan ruwan”, nispa (Mat. 19:9, NM). Qhelli huchapin tarikun wasanchay hucha huk qhelli ruwaykunapas. Chhaynaqa, sichus huk cristiano divorciakuypi yuyaykushan mana mayqenpas qhelli huchaman urmashaqtin chayqa, Diospa yanapaynintan maskhanan.

7. ¿Imatan yuyaykunkuman cristiano matrimonioq fracasasqanta qhawariqkuna?

⁷ Huk matrimonio fracasaqtinqa espiritualpi imayna kashasqankumantan mana allinta rimachikunkuman. Apóstol Pablo nirqan: “Wasinpi kaqkunata mana kamachiyta yachaqqa, ¿imaynatan Diospa iglesianta [otaq iñiq t’aqanta] cuidanman?”, nispa (1 Tim. 3:5). Sichus iskayninku cristiano hina reqsichikunku, ichaqa matrimonionkutaq fracasanman chayqa, chayta qhawariqkunan yuyaykunkuman predicasqankumantaqa huknirayta kawsasqankuta (Rom. 2:21-24).

8. ¿Iman mana allinchu kashanman casado cristianokuna t’aqanakuyta otaq divorciakuyta decideqtinku?

 ⁸ Sichus bautizasqa cristianokuna yuyaykushanku mana Bibliaq nisqanman hina t’aqanakunankupaq otaq divorcianakunankupaq chayqa, sut’itan reparakun espiritualpi mana allinchu kashasqankuta. Yaqapaschá hukninku otaq iskayninku Bibliaq nisqanta mana allintachu hunt’ashanku. ‘Tukuy sonqonkuwan’ Diospi confiankuman chayqa, atinkumanmi matrimonionku salvayta (leey Proverbios 3:5, 6).

9. ¿Imaynapin wakin cristianokuna rikurqanku kallpachakusqanku allinpi tukusqanta?

⁹ Askha matrimoniokunan fracasoman haykushaspaña sasachakuyninku allichayta atirqanku. Yaqa llapa cristianokunan rikurqanku mana usqhaylla t’aqanakunankupaq kallpachakusqanku allinpi tukusqanta. Apóstol Pablo qelqarqan: “Qankunapas, casarasqa warmikuna, qosaykichista kasuychis. Ahinapin Diospa siminpi mana iñiq mayqen qosapas mana rimapayasqalla iñinqa warminpa allin purisqanta, ch’uya kawsasqanta manchakuyniyoq kasqanta, sumaq respetowan kawsasqanta rikuspa ima”, nispa (1 Ped. 3:1, 2). Arí, parejanpa allinta comportakusqanwanmi mana creyente kaqqa cheqaq religionman haykunman. Problemanta atipaspa ñawpaqman puriq matrimonioqa Diostan hatunchan, anchatataqmi kusichin qosata, esposata, hinallataq wawakunatapas.

10, 11. ¿Imakunan huk matrimoniopi qonqaylla sucedenman, imamantan seguro kasunman?

¹⁰ Jehová Diosta kusichinankupaqmi yaqa llapa soltero cristianokuna bautizasqa iñiqmasinkumanta parejata akllanku. Ichaqa, chaywanpas mayninpiqa qonqayllan sasachakuykuna kanman. Yaqapaschá mayqenninkutapas llaki onqoy hap’inman. Otaq hukninku manaña predicanmanchu. Ejemplopaq, Linda * sutiyoq cristianan rikurqan qosan cheqaq kaymanta karunchakapusqanta, qhepamantaq qarqosqa kapusqanta. ¿Imatan huk cristiano ruwanan matrimonionpi hukllachaq kaqkuna chinkapushaqtin?

¹¹ Kaytapaschá tapukuwaq: “¿Kallpachakunaychu imaña kaqtinpas matrimonioyta salvanaypaq?”, nispa. Chaytaqa manan pipas qanmanta decidinanchu. Sichus matrimonioykichispi karunchanakapushankichis chayqa, askha razonkunan kashan mana pisipanapaq. Jehová Diosqa anchatan valoran casado kawsayninkupi imaymana sasachakuykunata aguantaq cristianokunata (leey 1 Pedro 2:19, 20). Tukuy sonqowan kallpachakuq cristianotan yanapan Simin Qelqawan espiritunwan ima.

LISTON KASHANKU YANAPANANKUPAQ

12. ¿Imatan umallikuna yuyaykunqaku yanapayninta mañakuqtinchis?

¹² Sichus matrimonioykipi problemakuna kan chayqa, ama iskayaspa experienciayoq cristianokunaq yanapayninta maskhay. Umallikunan iñiq t’aqata michinku, paykunaqa sumaqtan yanapasunkichis Bibliaq nisqanman hina (Hech. 20:28; Sant. 5:14, 15). Hatun sasachakuypi tarikuspa yanapayninkuta  mañakuqtiykichisqa, manan chayraykuchu paykuna manaña respetasunkichis. Diospa munayninman hinapuni ruway munasqaykichista rikuspan umallikunaqa astawan munakusunkichis astawantaq qankunapi interesakunqaku.

13. ¿Ima consejotan tarinchis 1 Corintios 7:10-16 textopi?

¹³ Mana creyente parejayoq casado cristiano yanapayta mañakuqtinqa, umallikunan kay hina consejokunata qonku, Pablon qelqarqan: “Casarasqakunatan ichaqa mana ñoqachu kamachini, aswanpas Señormi kamachin: Esposaqa ama qosanmanta t’aqakuchunchu, t’aqakunmanchus chayqa, ama hukwanqa casarakuchunñachu, qosayoq kayta munaspaqa qosanwan kutinakapuchun, qosapas amataq esposanta wikch’upuchunchu [...]. Qan esposa ¿qosayki qespichinaykita yachawaqchu? Qanpas qosa, ¿esposayki qespichinaykita yachawaqchu?” (1 Cor. 7:10-16). ¡May sumaq bendicionmi mana creyente pareja cheqaq yupaychayman haykuqtinqa!

14, 15. ¿Imakuna kaqtinmi huk cristiano t’aqakunman? ¿Imaraykun chayta oracionpi allin yuyaywan qhawarina?

¹⁴ ¿Imaynapi tarikuspan huk cristiana ‘qosanmanta t’aqakunman’? Wakinqa qosa yuyaypi familiata mana manteniyta munaqtinmi t’aqakurqanku, sinchita maqaqtin otaq espiritual kawsayninta peligroman churaqtin.

¹⁵ T’aqakunapaq otaq mana t’aqakunapaqpas sapankan decidikuna. Ichaqa bautizasqa cristianoqa oracionpin allin yuyaywan decidinan. Ejemplopaq, sichus espiritual kawsayninta peligroman churasqanrayku t’aqakuyta yuyaykunman chayqa, qhawarinanmi cheqaqtachus mana creyente kaqlla chaypaq huchayoq kasqanta. Yaqapaschá cristiano kaqpas Biblia estudionta, huñunakuykunaman riyta, predicacionman lloqsiytapas mana allintachu hunt’arqan.

16. ¿Iman hark’awananchis divorciakuyta ama usqhaylla decidinapaq?

¹⁶ Dioswan allinpi kasqanchista valorasqanchis, matrimonio regalonmanta agradecikusqanchis iman hark’awananchis divorciakuyta ama usqhaylla decidinapaq. Dios serviqkunaqa munanchismi sutin ch’uyanchasqa kananta. Chayraykun mana hayk’aqpas promesa ruwasqanchista p’akisunmanchu hukwan casarakunanchisrayku (Jer. 17:9; Mal. 2:13-16).

17. ¿Ima sucedeqtinmi creyente cristianota Dios ‘thak-kaypi kawsananpaq waqyan’?

¹⁷ Mana creyentewan casarasqa cristianoqa kallpachakunanmi parejanwan allinpi kawsananpaq. Ichaqa manan huchachakunanchu sichus kallpachakuqtinpas mana creyente kaq t’aqakapuyta decidenman chayqa. “Diospi mana iñiq kaq qosapas otaq esposapas t’aqakuytapuni munan chayqa,  hina t’aqakapuchun. Chay hinapin wawqepas panapas libre kapunqa, Diosqa thak-kaypi kawsananchispaqmi waqyawarqanchis”, ninmi Biblia (1 Cor. 7:15). *

DIOSPI CONFIAY

18. Huk cristiano manaña matrimonion salvayta atinmanchu chaypas, ¿imaynapin kallpachakusqan allin kanman?

¹⁸ Matrimoniopi ima sasachakuytapas allichanaykipaqqa Diosmanta mañakuy kallpata, paypitaq confiay (leey Salmo 27:14). Lindaqa askha wataña kallpachakurqan matrimonionta salvananpaq chaypas, divorciopin tukurqan. ¿Yanqapaqchu kallpachakurqan? Paymi nin: “Manan, kallpachakusqayta rikuqkunaqa allintan qhawarirqanku cristiano kasqayta. Concienciayqa thakmi kashan. Astawanqa chay sasachakuy watakunan ususiyta yanaparqan cheqaq kaypi qaqata sayananpaq, chaymanta bautizakuspa Jehová Diosta hunt’aq sonqowan servinanpaq”, nispa.

19. ¿Ima kusikuytan chaskinkuman matrimonionkuta salvanankupaq kallpachakuqkuna?

¹⁹ Marilyn cristianapas Diospin confiarqan kallpachakurqantaq matrimonionta salvananpaq. Paymi nin: “Qosaymanta t’aqakapuytan munarqani, familiayta mana mantenisqanrayku espiritualpi kawsayniytapas peligropi churasqanrayku. Payqa umallin karqan manaraq mana allin negociokunapi purishaspa. Pisi-pisimantan huñunakuykunaman manaña rirqanchu, chaymantataq manaña rimanakapurqaykuchu. Tiyasqayku llaqtaman terroristakuna haykumuqtinmi mancharikurqani, chaymi hukkunamanta karunchakapurqani. Chayraqmi entienderqani matrimonioypi sasachakuy kananpaq ñoqapas huchayoq kasqayta. Chaymi hukmanta rimanakurqayku, familiapi estudiota ruwarqayku, huñunakuykunamanpas rirqayku. Umallikunaqa sumaq sonqon karqanku, anchatan yanapawarqanku. Chayraykun casado kawsayniyku hukmanta t’ikarirqan, tiempowantaq qosayqa iñiq t’aqapi llank’aykunata chaskirqan. Sasa tiempokunaña karqan chaypas, kusikuypin tukurqan”.

20, 21. ¿Matrimoniopi imata ruwananchispaqmi decidikunanchis?

²⁰ Casadoña otaq solteroña kanchis chaypas; rikuchisunpuni kallpachakusqanchista, Diospi tukuy tiempo confiasqanchistapas. Casarakuqkunaqa “manan iskayñachu kanku aswanpas huk cuerpollañan”; chayta yuyarispa sasachakuykuna kaqtinqa kallpachakusun allichanapaq (Mat. 19:6). Chaymantapas, parejanchis mana creyentechu chayqa, Diospaq hunt’aq kanapaq kallpachakuqtinchisqa yaqapaschá cheqaq religionman haykunpunqa.

²¹ Imaynapiña tarikunchis chaypas, kallpachakusun allin yuyaywan ruwanapaq, chhaynapin allin kawsasqanchista runakuna sumaqta qhawarinqaku. Sichus matrimonionchis fracasananpaq hina kashan chayqa, Diosmanta tukuy sonqowan mañakusun, allinta t’aqwirisun imarayku t’aqakuy munasqanchista, Bibliapi tarikuq consejokunapi yuyaymanasun, umallikunaq yanapaynintapas maskhasun. Astawanqa, decidikusun hanaq pacha taytanchista kusichinapaq, hinallataq matrimonio regalo qowasqanchista allinta qhawarinapaq.

[Uranpi willakuykuna]

[Tapuykuna]

[10 paginapi willakuy]

Mana usqhaylla t’aqakunankupaq kallpachakuq askha cristianokunan rikurqanku chay ruwasqanku allinpi tukusqanta

[12 paginapi willakuy]

Confiallaypuni Jehová Diospi, mañakuytaq kallpata

[9 paginapi foto]

Diosqa bendicenmi matrimonionku salvanankupaq kallpachakuq cristianokunata

[11 paginapi foto]

Iñiq t’aqapiqa sonqochayta yanapaytawanmi tarinchis